Икона Божией Матери,

именуемая «Избавительница»

 

 

(17 / 30 октября)

 

В начале XIX столетия на Афоне проводил иноческую жизнь замечательный подвижник Константий Феодул. У этого старца находился чудотворный образ Богородицы, написанный около полутораста лет тому назад. После смерти этого подвижника образ перешел в собственность к ученику Константия старцу Мартиниану, пришедшему на Афон из Греции в 1821 году. В начале 1841 года Мартиниан отправился с Афона в Элладу. Здесь он пришел в местечко Мавровони, находившееся в епархии Спарты.

Жители тех мест подверглись страшному бедствию: их поля, леса и вся вообще растительность опустошалась саранчою. Двигаясь вперед сплошною массою, она истребляла все, что ей попадалось на пути. Местное начальство выгоняло жителей силою на поля, заставляя их собирать губительное насекомое, сносить его в ямы и жечь, но все эти меры были бессильны в борьбе с ужасным врагом, и казалось, что чем больше саранча истреблялась, тем больше она увеличивалась. В ужасе поселяне обратились в лавру Алексия, человека Божия, находившуюся вблизи несчастного округа. Взяв часть святых мощей этого угодника Божия, они стали совершать молебны с крестными ходами на свои поля. Но саранча, как бы раздраженная этими действиями, стала бросаться на людей, преимущественно в глаза. И жители, и священники в ужасе разбежались по своим жилищам.

Об этом бедствии узнал и старец Мартиниан. После молебна он сказал, обращаясь к поселянам: - Неужели до того уже оскудела наша вера, что и этого у Господа не можем выпросить. Усилим же наши мольбы; соберите по крайней мере хоть старцев, прибегнем к державному и всесильному заступлению Владычицы неба и земли; вынесем Ее святую икону, помолимся совокупно, и верую Господу, что Он не презрит нашей смиренной и усиленной к Нему молитвы и, по предстательству Своей Матери, избавит страну от великого бедствия.

В надежде на милостивое заступление Богоматери собрались не только старцы, но и мужи, жены и даже дети. Явилось и 4 священника. И вот крестный ход в сопутствии старца, несшего святой образ, отправился на поле. Здесь Мартиниан поставил принесенную им икону прямо на землю, и пред нею все поселяне склонились с великою мольбой. Небесная Владычица не отринула молитвы вербных рабов Сына Своего и Бога нашего. Дивным знамением Своего могущества Она поразила саранчу. Внезапно налетело великое множество птиц; все они стремительно бросились на насекомых. Саранча поднялась с полей и полетела такой густой массой, что заслонила солнечный свет.

В этом же селении Мавровони лежал в тяжелой болезни один мальчик. Болезнь его усиливалась, и родители решили напутствовать своего сына причащением Св. Тайн. Но приглашенный священник почему-то замедлил и долго не являлся. Когда же он, взяв Св. Дары, направился к дому болящего, то пригласил с собою и старца Мартиниана. Лишь только они пришли в дом, как были поражены вестью, что мальчик уже умирает. Иерей обратился с просьбой к Мартиниану принести свою икону, чтобы вместе помолиться Царице Небесной об отроке. Старец, видя глубокую веру его и сокрушенных родителей, вынул находившийся всегда при нем святой образ и поставил его над одром мальчика. После молитвы старец трижды осенил образом умирающего, и мальчик неожиданно открыл глаза; его по просьбе Мартиниана причастили, и мальчик встал совершенно здоровым. Возвращенный к жизни мальчик впоследствии постригся в иночество и с именем Алексия долго подвизался на Афоне.

Весть об этом далеко разнеслась по окрестностям. Множество недужных и страждущих душевными и телесными немощами направилось к образу Богоматери, и все с верою притекавшие к Ее милостивому заступлению получали просимое. Непрестанно источавшиеся от образа чудотворения так увеличили число богомольцев, что хижина, в которой обитал старец, постоянно была ими переполнена. Бежавший от мирской суеты и стяжавший себе добродетель смирения старец задумал удалиться в такое место, где бы его никто не мог найти. С этой целью он направился вдоль морского берега и скоро нашел над морем отвесную скалу с пещерой, которая была вполне достаточна для его подвигов. Расположившись здесь, Мартиниан думал, что он уже совершенно уединился от людей. Но Пречистая Дева благоволила устроить иначе.

Однажды ночью подвижник молился в пещере. Во время молитвы он вдруг слышит голос, повелевавший ему не скрывать у себя чудотворного образа, а служить благу и нуждам ближних. Мартиниан попытался было сослаться на свое недостоинство, немощи и затруднения, но голос еще настойчивее велел подчиниться откровению, говоря, что совершается все это ради славы Матери Божией. Когда старец окончил свое моление, то он предался краткому отдыху. В это время вдруг необычайный свет озарил пещеру. Старец увидел сияющий столб, простиравшийся от неба до земли, и при этом снова услышал тот же глас, повелевавший ему оставить затвор и идти послужить ближним.

Открыто было местопребывание подвижника и окрестным жителям. Одна бесноватая, именем Елена, все время кричала, что ей известно место, где скрывается старец; при этом она указывала, что только находящаяся у него икона может даровать ей исцеление. Бес, обитавший в этой женщине, был весьма пытлив и лют. Всех приходивших к Елене он обличал даже в сокровеннейших грехах. Один благоговейный иерей во что бы то ни стало решился прочитать над бесноватой заклинательные молитвы и пришел в дом Елены. Но больная набросилась на священника и начала грозно поносить служителя алтаря Божия. Не взирая на все возгласы бесноватой, священник продолжал читать молитвы, причем спросил у скрывавшегося в женщине беса, кто же может его изгнать. И нечистый дух против воли заговорил об уединившемся старце с иконой и, понуждаемый иерейским заклинанием и силой Божией, указал то место, где скрывался Мартиниан.

Наутро после видения старец услышал шум большой толпы народа, собравшегося перед скалою и умолявшего подвижника сойти к нему и помочь страждущим. Усматривая во всем этом волю Божию, старец повиновался и пошел в дома поселян. Прежде всего он направился к бесноватой Елене. Когда он приближался к ее жилищу, недужная впала в совершенное беспамятство и начала неистово вопить. Когда же старец, войдя в дом, поставил образ Богоматери и положил перед иконой несколько поклонов, бес немедленно же вышел из женщины с великим стенанием. Больная пришла в себя и с горячею мольбой возблагодарила Богородицу. Приложившись вслед за этим к Ее иконе, она почувствовала себя совсем здоровою. Много и других бесноватых исцелилось по молитве перед этим образом Богоматери.

Так как чудотворения источались от иконы непрерывно, то народ неотступно пребывал при Мартиниане. Старец тяготился этими собраниями и, наконец, решился вернуться в свою обитель. Народ, узнав о его отбытии, в великом множестве провожал подвижника на далекое расстояние. С великим плачем они расстались со старцем, так как вместе с ним уходил от них и образ Богоматери, излившей столько милостей на их местность.

После прибытия на Афон в монастырь великомученика Пантелеимона, Мартиниан вскоре преставился ко Господу. Святая же икона Богоматери перешла в драгоценное наследие обители. Здесь честный образ оставался до 1889 года. Настоятель Пантелеимоновской обители архимандрит Макарий завещал икону 'Избавительница' в благословение новоустроенной тогда Ново-Афонской обители Симона Кананитского, на Кавказе.

Впоследствии икона чудесным образом избавила от гибели Государя Императора Александра III с Августейшей семьей при крушении поезда на станции Борки, а также наследника престола Великого князя Николая Александровича в г. Отсу (Япония) от руки убийцы.

 

 

АКАФИСТ

 

Кондак 1

 

Возбрани врагом нашим озлобляти нас и от Господа нашего отлучити конечне, а нас научи пети Тебе весело:

Радуйся, Избавительнице, от горя, бед и гибели спасающая нас бедствующих.

 

Икос 1

 

Ангелов множество по Твоему, Мати наша, повелению ополчаются на избавление наше грозно. Ты же приими молитву сию:

Радуйся, Ангелов на спасение наше посылающая;

Радуйся, Царице горних чинов, небесную их помощь нам дарующая.

Радуйся, Ангелом хранити нас повелевающая;

Радуйся, воинством Ангельским врагов наших поражающая.

Радуйся, Избавительнице, от горя, бед и гибели спасающая нас бедствующих.

 

 

Кондак 2

 

Видят бедствующие толику и многую помощь Твою сердечно Тя призывающим, наставляются тем пети Сыну Твоему непрестанно: Аллилуиа.

 

Икос 2

 

Разумеют мнози, яко мирови дарова Тя Сын Твой Избавительницей бедствующих, темже поем Ти сице:

Радуйся, бедствующих Мати;

Радуйся, страждущих утешение.

Радуйся, болящих исцеление;

Радуйся, ненадежных надеждо.

Радуйся, Избавительнице, от горя, бед и гибели спасающая нас бедствующих.

 

 

Кондак 3

 

Сила Вышняго даровася Ти на помощь и спасение миру и нас, в бедах погибающих. И кто же Тобою не избавлен бысть, и кто же не поет Сыну Твоему: Аллилуиа.

 

Икос 3

 

Имуще непостижимую любовь к роду человечу, кии вздохи не прияла еси, кии слезы не отерла еси, и кого не принудила еси призывати Тя, вопиюще:

Радуйся, бедствующих скорое услышание;

Радуйся, печальных и скорбных утешение.

Радуйся, погибающих быстрое спасение;

Радуйся, плененных освобождение.

Радуйся, Избавительнице, от горя, бед и гибели спасающая нас бедствующих.

 

 

Кондак 4

 

Буря несчастий налете на ны, спаси нас погибающих, Избавительнице наша, бурю погибельную на земли укротившая и приемлющая нашу песнь: Аллилуиа.

 

Икос 4

 

Слышаша человечестии роди всю Твою к христианам дивную любовь и Твое мощное избавление от всяких находящих на них лютых, научишася пети Тебе:

Радуйся, человеческаго рода от бед избавление;

Радуйся, бурь житейских прекращение.

Радуйся, уныния Прогонительнице;

Радуйся, радости по скорби нам Подательнице.

Радуйся, Избавительнице, от горя, бед и гибели спасающая нас бедствующих.

 

 

Кондак 5

 

Боготечней звезде подобящаяся, мрак и темноту в греховных сердцах разгоняющей, да во свете Твоея любве узрят Господа и воспоют Ему: Аллилуиа.

 

Икос 5

 

Видеша людие российстии Твое нечаянное от многоразличных бед избавление, радостно поют Тебе сице:

Радуйся, в бедах наша Помощнице;

Радуйся, скорбей наших отъятие.

Радуйся, печалей наших отгнание;

Радуйся, в скорбех наших утешение.

Радуйся, Избавительнице, от горя, бед и гибели спасающая нас бедствующих.

 

 

Кондак 6

 

Проповедуют помощь Твою и любовь, Мати, исцеленнии, утешеннии, обрадованнии и спасеннии Тобою от бед, и поют Твоему Высокодержавному Сыну: Аллилуиа.

 

Икос 6

 

Возсиял есть нам свет спасения во мгле погибели, окружающий нас, и наставил есть пети Тебе:

Радуйся, мглу грехов разгоняющая;

Радуйся, тьму греховную потребляющая.

Радуйся, мрак души моея просвещающая;

Радуйся, светом радости души ободряющая.

Радуйся, Избавительнице, от горя, бед и гибели спасающая нас бедствующих.

 

 

Кондак 7

 

Хотящим нам конечному отчаянию предатися, отовсюду бедам належащим, помыслихом же о Тебе, Избавительнице, и ободрихомся и утешихомся, поюще Сыну Твоему: Аллилуиа.

 

Икос 7

 

Новую и нежданную показа нам милость Свою, под державную руку Твою нас восприявши, и отсюда вопием Ти:

Радуйся, Царице державная;

Радуйся, и нас под Твою державу восприявшая.

Радуйся, защиту Твою нам даровавшая;

Радуйся, врагов наших поразившая.

Радуйся, Избавительнице, от горя, бед и гибели спасающая нас бедствующих.

 

 

Кондак 8

 

Странное чудо на погибель обреченных и в нуждах томящихся безчисленных, внезапу спасение и избавление получают от Тебе, Вселюбящей, поюще Богу: Аллилуиа.

 

 

Икос 8

 

Вси сущии во мраце скорбей, вси обуреваемии несчастий бурею, приидите к доброму пристанищу и нашему поможению, покрову Девы Избавительницы, вопиюще Ей:

Радуйся, радостей источниче;

Радуйся, печалей прогнание.

Радуйся, бед уменьшение;

Радуйся, всяческаго покоя Подательнице.

Радуйся, Избавительнице, от горя, бед и гибели спасающая нас бедствующих.

 

 

Кондак 9

 

Все существо человеческое хвалит Тя, вси воспевают Тя, многоразличное избавление несущую, вместо печалей радость подающую поющим: Аллилуиа.

 

Икос 9

 

Ветия многоумнии обезумеша, видяще Твое быстрое и чудесное от бед страждущих избавление, и умолкоша нам, поющим Ти:

Радуйся, чудесами мир удивившая;

Радуйся, чудесами нас укрепившая.

Радуйся, безбожие чудесами истребившая;

Радуйся, врагов силою Божиею посрамившая.

Радуйся, Избавительнице, от горя, бед и гибели спасающая нас бедствующих.

 

 

Кондак 10

 

Спасти хотя всяку душу человечу, всею любовию печешися о ней, дондеже не научиши ю пети Сыну Твоему: Аллилуиа.

 

Икос 10

 

Стеною, мир христианский хранящей и всяку душу от врагов ограждающей, явися икона Твоя, Избавительнице, в мире православнем и чудесами прославися. Тебе людем Божиим воспевающим:

Радуйся, Наставнице наша, Святую гору Афонскую в жребий Себе избравшая;

Радуйся, Избавительнице наша, Твоим благословением Новый Афон благословившая.

Радуйся, веселие наше, знамение союза неразрывнаго уделов Своих земных иконою Твоею явившая;

Радуйся, вечная радосте наша, чудесным попечением к юной Ново-Афонской обители благоволившая.

Радуйся, Избавительнице, от горя, бед и гибели спасающая нас бедствующих.

 

 

Кондак 11

 

Пение непрестанное приносят Ти Тобою избавленнии и Тобою паки радость обретшие, и Божественному Сыну Твоему поют радостно: Аллилуиа.

 

Икос 11

 

Светосияющим светилом лучезарным во мраце греха явися нам, Твоя икона, Избавительнице, наставляющая нас пети Тебе:

Радуйся, от глада нас избавляющая;

Радуйся, вредоносящее естество от растительного мира отгоняющая.

Радуйся, посевы и леса, и вся растущая от погибели спасающая;

Радуйся, земледельцев скорбящих утешение и труда их благословение.

Радуйся, Избавительнице, от горя, бед и гибели спасающая нас бедствующих.

 

 

Кондак 12

 

Благодать, от иконы Твоея, Избавительнице, текущая, исцелений струи обильно подающая и сердца веселием оживляющая, побеждает всех волею пети Тебе, Мати, и Сыну Твоему и Богу: Аллилуиа.

 

Икос 12

 

Воспеваем исцеления, воспеваем наипаче воскрешение Анастасия отрока и воспевающе поем:

Радуйся, мертвых воскрешающая;

Радуйся, умершая сердца оживляющая;

Радуйся, от смерти и вечнаго огня изымающая.

Радуйся, посмертное наше упование и защито.

Радуйся, Избавительнице, от горя бед и гибели спасающая нас бедствующих.

 

 

Кондак13

 

О Всепетая и Вселюбимая наша Мати, умилосердися ныне и помилуй, в лютых и безысходных сущих нас скорбех избавляющи, научи нас сердечно воспевати Богу прощающему нас: Аллилуиа.

 

(Этот кондак читается трижды, затем икос 1 и кондак 1)

 

 

 

МОЛИТВА

 

О Ма̀ти Божия, по̀моще и защѝто наша! Егда̀ призовем Тя, бу̀ди изба̀вительница наша, яко на Тя уповаем и вседушно Ти взываем: умилосердися и помозѝ, пожалей и избави, приклони ухо Твое и наша скорбныя и слезныя молитвы примии, и я̀коже хо̀щеши, успокой и обрадуй нас, лю̀бящих Твоего Сына и Бога нашего. Аминь.

 

 

ТРОПАРЬ

 

Икос 1

 

Тропарь, глас 4

 

Яко пресветлая звезда, просия Божественными чудесы святый образ Твой, Избавительнице, лучами благодати и милосердия Твоего озарив в нощи скорбей сущих. Подаждь убо и нам, Всеблагая Дево, избавление от бед, исцеление недугов душевных и телесных, спасение и велию милость.

 

 

 

КАНОН ПЕРВЫЙ

 

 

Канон Пресвятей Богородице ради иконы Ея «Избавительница», глас 4.

Песнь 1

 

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.

 

Христе, Свете истинный, подаждь ми просвещение восписати похвальная Пресвятей Матери Твоей, и воспою Тоя великое к рабом Твоим благоутробие.

 

Горе, выну славимая, благоволила еси, Госпоже, и низу среди бедных прославити имя Свое благодатию чудес от святыя иконы Твоея, Избавительнице.

 

Егда обитателие веси, отчаявшеся от истреблявшаго труды их пружия, притекоша со слезами ко образу Твоему, Дево, абие улучиша избавление и, радующеся, прославиша милость Твою.

 

Десница Твоя, Владычице, прославися в крепости, и множеством милости Твоея явилася еси Покровительница и Избавительница во спасение бедствовавших.

 

Упование христианом, Помощнице сущим в скорбех, моли Сына Твоего избавитися всикях бед празднующим святому образу Твоему, Избавительнице.

 

Радуйся, богатство неистощимое нищих и сирых Заступнице, радуйся, спасающая верою имя Твое, Дево, призывающих, радуйся, уныния отгнание и радости Подательнице.

Песнь 3

 

Ирмос: Твоя песнословцы, Богородице, живый и независтный Источниче, лик себе совокупльшия, духовно утверди, в Божественней Твоей славе венцев славы сподоби.

 

Господь мертвит, егоже хощет, и живит Тобою, Мати Живота, исполняя молитвы молящихся Тебе, низведенных во ад возводит и от гноища страстей воздвизает Твоим всемощным предстательством.

 

Замедлившу иерею напутствовати умирающа отрока, егда о умершем помолишася к Тебе, Всеблагая, и осениша иконою Твоею, Избавительнице, внезапу отроча оживе и воста здраво Твоею и Сына Твоего животворною силою.

 

Живоносный Тя и всецелебный источник, Богоневесто, познахом, раби Твои: образом бо Твоим, Избавительнице, жизнь и здравие подаеши душевное и телесное и от бед избавляеши просящих Твоего заступления.

 

Начало Христовых чудес Ты еси, Пречудная Дево, темже чудеса образа Твоего славяще днесь, Избавительнице, молимся Тебе: посети рабы Твоя благодатию Твоею, недугов, зол и вечныя смерти изымающи ны.

 

Грехами умерщвляемую душу мою оживотвори, Владычице, яко по Бозе вся могущая, и обдержащих мя страстей избави, да, пленения страстнаго свобожден, благодарственно Тя величаю.

 

Направи, Чистая, к тишине безстрастия во глубину зол влекома раба Твоего и не попусти ми погибнути, просящему Твоея, Избавительнице, милости, Тобою бо вернии, покрываеми, спасаются.

Седален, глас 3:

 

Пресвятеи руце Твои, имиже носила еси Носящаго вся, простри к Нему, Приснодево Избавительнице, и молитвами Твоими избави ны гнева Его, грех ради движимаго, отводящи лютая наведения и тех ради бывающую людем тугу и уныние, и спаси в мире души наша.

Песнь 4

 

Ирмос: Седяй в славе на Престоле Божества на облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.

 

Разумеша вернии дела благости Твоея, Владычице, и вниде радостный трепет в сердца их, внегда бо смутитися душам их от бед и недугов, милость Свою, Благословенная, помянувши, иконою Твоею изшла еси на избавление людей Твоих.

 

Уведевшии о преславном чудеси могущества Твоего, Богородице, во оживлении отрока, устремишася от различных мест к образу Твоему, Избавительнице, и, приемлюще исцеления, с веселием Тя величаху.

 

Милосерда сущи, Чистая, яко Всеблагое Слово на спасение наше воплотившая, помощи и избавления Твоего не лиши нас, с верою притекающих к чудотворней иконе Твоей, Избавительнице.

 

Ты похвала верных, Мати Всепетая, Ты кивот святыни, освящение подающая, Ты целеб источник неисчерпаемый и от бед Избавительница молящихся Тебе пред святым образом Твоим.

 

Недугами угнетаемых и искушений борителя, избавляй нас от сих, Богородительнице, и в час исхода не предаждь душ наших на одоление супостатом, да воспеваем величия Твоя.

 

Непобедимая Воеводо вождей и воинств христианских, христолюбивое воинство, щитом веры и Креста вооруженных, победоносны являй, избавляющи от всех наветов вражиих.

Песнь 5

 

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

 

В скорби мале наказание Сына Твоего бысть обитателем веси, и, поболевше, призваша Тя, Матерь щедрот, и Тобою возсташа от отчаяния и возвеселишася, роса бо благодати, яже от иконы Твоея, исцеление им бысть.

 

Благодать точащую икону Твою, Избавительнице, верному Твоему рабу, с собою всегда носившу, возбранила еси, Госпоже, скрывати ю от верных, да избавляются от бед и недугов прибегающии к Тебе.

 

Тобою, Всемилостивая Владычице, свобождение от лютых ниспослася, притекшим с верою ко святому образу Твоему, надежда же, покров и нерушимо веселие даровася скорбящим, Богорадованная.

 

Ужасошася бедствовавшии о богатстве даров Твоих, Дево, в чудесех от образа Твоего, к немуже припадающе, радостно взываху: воистину Ты еси Избавительница от всех бед.

 

Радосте Ангелов и человеков, свободна мя печалей житейских сотвори и будущия тесноты избави и вечнаго огня матерним дерзновением Твоим, Всеблагая, от бед Избавительнице.

 

Богоизбранная Приснодево, в руне орошенном предвиденная древле, окропи росою благодати изсохшую землю сердца моего и плодоносну соделай душу мою благим деянием и зрением.

Песнь 6

 

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

 

Кий ум постигнет, Госпоже, державу крепости Сына Твоего, изведша люди Своя из земли, еяже вереи заклепи вечнии, и Тебе, Матерь Свою, соделавша врагом страшну, из чрева адова избавляющую призывающия Тя.

 

Кий язык изъяснит всепобеждающую силу Твою, Владычице! Едино бо точию подобие лица Твоего, яко огнь, опаляет злобныя духи, люди же Твоя врачует и радует, егоже благоговейно лобызаем, раби Твои.

 

Кое слово изобразит величие чудес Твоих, Всемилостивая от бед Избавительнице! Точию бо принесеся святая икона Твоя к люте мучимей бесом, абие исчезе мучитель, и исцеленная велегласно прослави силу Твою.

 

От обилия благодати, присущий образу Твоему, Богоневесто, колико беснуемых и иных недужных Тобою исцелеша, колико скорбящих на веселие приложися, с верою притекших ко иконе Твоей.

 

О, великаго милосердия Твоего, Богородительнице, благоволившая чудотворным образом Твоим пребывати у нас! Что воздадим Ти за благодать, юже явила еси нам, даровавши храму сему толико священное богатство?

 

О Всепетая Мати, державный покрове мира! Храни от всех бед чтущия Тя, спобори им на враги христианская необоримою силою Твоею.

Кондак, глас 8:

 

Ко иконе Твоей, Пресвятая Госпоже, бедствовавшии с верою притекше, заступлением Твоим избавишася от злых, но яко Матерь Христа Бога, и нас свободи от лютых обстояний, временных и вечных, да зовем Ти: радуйся, Избавительнице наша от всех бед.

Икос:

 

Сошедшиися во храме сем, прославим преславный храм Божества, Пресвятую Деву, пред образом Ея со благоговением вопиюще: радуйся, Божественныя славы селение; радуйся, Владычице Небесе и земли. Радуйся, неистощимый источниче чудес; радуйся, всемощное врачевание недужных. Радуйся, Прогонительнице демонов; радуйся, мертвецев оживление. Радуйся, обителей Горы Твоея покрове; радуйся, иноков теплое предстательство. Радуйся, верных Заступнице; радуйся, спасение рода христианскаго. Радуйся, Еюже возсиявает радость; радуйся, Еюже печаль престает. Радуйся, Избавительнице наша от всех бед.

Песнь 7

 

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.

 

Сотвори с нами по множеству милости Твоея, Богородице, и изми нас по чудесем Твоим, и да постыдятся от всякия силы, и крепость да сокрушится являющих злая рабом Твоим, о Тебе поющим: отцев Боже, благословен еси.

 

Тебе, Дево, халдейская пещь прообраз имущи, отроки росою прохлаждаше посреде пламене. Темже и нас, образ Твой имущих, во огни искушений прохлади и неопалимы соблюди благодатию Сына Твоего, да поем Ему: отцев Боже, благословен еси.

 

Седмерицею разжигаемыя стрелы седми смертоносных страстей, яже испускает возстающий на ны седмиглавый змий диавол, угаси и сокруши, Владычице, да, якоже отроцы неврежденнии, поем: отцев Боже, благословен еси.

 

Седмисвещный светильник разумеем Тя, Богоблагодатная Марие, седмию дарами Духа светящий верным, облагодати убо и ущедри поющих о Тебе, Подателю благих: отцев Боже, благословен еси.

 

Тя, Госпоже, имуще милосердия неиждиваемое сокровище и святую икону Твою, Избавительнице, в покров обители и во избавление от бед, Сыну Твоему о Тебе поем: отцев Боже, благословен еси.

 

Яко Царя царствующих Матерь, молим Тя, Владычице: отечеству нашему и христолюбивому воинству буди несокрушимая крепость, подающи им благая, поющим: отцев Боже, благословен еси.

Песнь 8

 

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.

 

Якоже трие отроцы, хранимии во огни, пояху и благословляху Бога, тако и вернии, Тобою, Благословенная, избавльшеся от огня, бед и недугов, вся дела,— взываху,— Господа пойте и превозносите Его во веки.

 

Якоже от зловредных пругов избавила еси прежде к образу Твоему притекших, Богородице, тако и ныне не престай от тех и всякаго вреда избавляти обитель сию, Гору, Россию и повсюду православныя, да славим Тя во веки.

 

Якоже умерша, осененна иконою Твоею, Дево, оживила еси, оживотворяй и нас, отводящи от смертоноснаго пути и наставляющи на стезю вечнаго живота, да, спасаеми Тобою, превозносим Тя во веки.

 

Якоже повелела еси рабу Твоему не скрывати от верных благодати, точащияся от святаго образа Твоего, Всеблагая Избавительнице, источай сию и нам, рабом Твоим, да прославляем Тя во веки.

 

Якоже многих исцелила еси, Госпоже, от мучительства демонскаго и иных недугов, и нас свобождай болезней душевных и телесных и от всех сетей вражиих, да воспеваем Тя во веки.

 

Якоже Ангел воодушеви Гедеона на побеждение мадиамлян, воодушевляй, Всецарице, и славящия Тя, всякое шатание врагов низлагающи, да благословляем Тя во веки.

Песнь 9

 

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

 

Иночествующии сея обители, к Матери Господа Вышняго притецем днесь, молящеся пред чудотворною иконою Ея, еюже посети скорбящия и сотвори избавление людем Своим.

 

Щедраго рождшая и Милостиваго Владыку и Избавителя всех, покажи, Всеблагая, щедроты Твоя на нас, празднующих честному образу Твоему, и сотвори избавление от бед людем Своим.

 

В Тебе, Богородице, воздвиже Сын Твой рог спасения нам, укрепи убо рабы Твоя служити Ему преподобием и правдою пред Ним вся дни живота нашего и твори избавление от бед людем Своим.

 

Призри, Дево Избавительнице, на молитвенныя воздыхания наша, не остави ны безпомощны во искушениих и буди Молитвенница ко Господу, да подаст грехом нашим прощение и избавление от бед людем Своим.

 

Госпоже Всемилостивая, не престай Гору Твою и обитель сию, Россию и вся православныя посещати благодатию и творити избавление от бед людем Своим.

 

Ходатаицу о нас, Слове Божий, предлагаем Матерь Твою, от Неяже воплотился еси на спасение наше, молитвами Ея прости и помилуй нас, Незлобиве, согрешающих Тебе, и сотвори избавление от бед людем Твоим.

Светилен:

 

Мати Света умнаго, просвети песнословящия Тя пред лучезарною иконою Твоею, мрак страстей наших прожени и осияния праведных причастники ны сотвори Твоим предстательством, Преблагословенная.

 

 

 

КАНОН ВТОРОЙ

 

Канон поемый в Святую Пятитесятницу

 

Канон Пресвятей Богородице ради иконы Ея «Избавительница», поемый во святую Пятидесятницу, глас 1.

Песнь 1

 

Ирмос: Воскресения день, просветимся, людие, Пасха, Господня Пасха: от смерти бо к Жизни и от земли к Небеси Христос Бог нас преведе, победную поющия.

 

Воскресения день, славим ныне Господа Христа. Приидите, и Пресвятую Матерь Его прославим, пред святою иконою Ея благодарственная поюще.

 

Очистим чувствия и узрим воскресшаго Христа и Всеблагую Деву, Избавительницу от бед, блистающуюся и озаряющую верныя благодатию.

 

Очистим чувствия и узрим мысленными очесы промышление о нас Владычицы: честным бо образом Своим избави от бед христоименитыя люди.

 

Небеса убо достойно да веселятся, земля же да радуется воскресшему Христу, да торжествует же сия обитель, обогатившаяся Избавительницы иконою.

 

Небо и земля достойно да веселятся во Христовом востании, да празднуют же Богоматери монаси и бельцы, чудотворный Ея образ почитающе.

 

Умерщвления предел сломила еси, вечную Жизнь рождшая — Христа, из гроба возсиявшаго днесь, Дево Всенепорочная, и мир просветившаго.

Песнь 3

 

Ирмос: Приидите, пиво пием новое, не от камене неплодна чудодеемое, но нетления источник, из гроба одождивша Христа, в Немже утверждаемся.

 

Приидите, пиво пием новое от источника целительнаго недугом душевным и телесным, егоже источи Богоблагодатная с верою притекшим ко иконе Ея.

 

Приидите, весны умныя в видимой весне насладимся, неувядаемый бо Цвет — Христа — израстившая Дева благоуханием благодати живит и утешает скорбящия.

 

Ныне вся исполнишася света воскресением Христовым, да празднуем и мы светло Избавительнице, лучи испущающей радости о Бозе Спасе в нощи искушений.

 

Ныне обитель сия озаряется светом от Матере Света в нарочитом дни празднества чудотворному Тоя образу и благодатию Сына Ея утверждается.

 

Вчера погребено бе селение верных в смертоносном отчаянии, днесь же оживотворися скорым от бед избавлением Богоневестныя Марии, надежды безнадежных.

 

На нетленную жизнь прихожду днесь, благостию Рождшагося из Тебе, Чистая, и всем концем свет облиставшаго.

Песнь 4

 

Ирмос: На Божественней стражи Богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос, яко всесилен.

 

На Божественней стражи ставше во Христе, братие, и воспоминание творяще чудес Избавительницы, со благоговением рцем: днесь спасение Богородицею бысть скорбящим, яко вся могущею.

 

Яко непорочную Агницу, пречистаго Агнца рождшую, венчаем Тя, Благословенная, песненными цветы: покрый от зол рабы Твоя, воскресшаго Сына Твоего о всех умилостивляющи.

 

Богоотец убо Давид пред сенным ковчегом скакаше, играя, раби же Твои, Госпоже, пред иконою Твоею ликующе, веселимся божественне о Твоем милосердом заступлении к Тебе прибегающих.

 

Яко в краснейший храм, вселися в Тя, Чистая, Иисус, всех Царь, снитием же во ад жилище мрачное упраздни и воскресением совоскреси человеки, оживляя Тобою умершия, яко всесилен.

 

Святых Святаго паче ума Мати явилася еси, Владычице, освящение и избавление от бед подающи верным, славящим Его воскресение и Тебе, Всеблагую Избавительницу, призывающим.

 

Создавый Адама, Твоего праотца, Чистая, зиждется от Тебе, и смертное жилище разори Своею смертию днесь, и озари вся Божественными блистаньми воскресения.

Песнь 5

 

Ирмос: Утренюем утренюю глубоку, и вместо мира песнь принесем Владыце, и Христа узрим, Правды Солнце, всем жизнь возсияюща.

 

Утренююще во святем храме Твоем, Чистая, Сына Твоего воспеваем, из гроба возсиявшаго, и Тя, Избавительнице, величаем, от Солнца Правды, умершему отроку жизнь возсияющу.

 

Утренюем утренюю глубоку и с пением деяния принесем богоугодная, Деве вопиюще: храни, Всецарице, Гору, и Россию, и вся православныя необоримы от враг видимых и невидимых.

 

Безмерное Твое благоутробие, Владычице, узами вражиими содержимии зряще, ко иконе Твоей избавленный идяху веселыми ногами, Твою и Сына Твоего хваляще Божественную силу.

 

Приступим, свещеноснии, исходящу Христу из гроба, яко жениху, и спразднуим Богородице любопразднственными чинми, в честь святыя иконы Ея, прославленныя чудесы многими.

 

Облиста Тя и возвесели, Богорадованная, Спас всех, из гроба возсиявый, Правды Солнце, Егоже моли озарити и утешити сердца любовию песнословящих Тя, Избавительнице, пред Твоею иконою.

 

Просвещается Божественными лучами и живоносными воскресения Сына Твоего, Богомати Пречистая, и радости исполняется благочестивых собрание.

Песнь 6

 

Ирмос: Снизшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от Гроба.

 

Снидохом во тьму греховную и праведное на ся негодование Божие привлекохом,— вопияху вернии, но, о Госпоже Всемилостивая, Ты избавила еси нас от рова отчаяния.

 

Сохранив целы труды рук наших и невредимы от всепоядающаго пружия, предстательством Твоим, Избавительнице, отверзла еси нам милосердия двери.

 

Спасе наш, живое же и нежертвенное от всех заколение, бедствующим даровал еси Матерь Твою Избавительницу от бед молитвами убо Ея избави нас от всякия нужды и печали.

 

Явилася еси, Богоневесто, вышши Ангел, Бога воплощши, распеншагося за ны, и погребена, и мертвым нетление из гроба источивша, чтущих же Тя тли греховныя избавляюща.

 

Видевши Сына Твоего, из мертвых возставша, райския сладости исполнилася еси, Приснодево, Того убо моли, Благословенная, да отверзет молящимся Тебе райския двери.

 

Возведеся древле держимое смертию и тлением Воплотившимся от Твоего пречистаго чрева к нетленней и присносущней жизни, Богородице Дево.

Песнь 7

 

Ирмос: Отроки от пещи избавивый, быв Человек, страждет, яко смертен, и страстию смертное в нетления облачит благолепие, един Благословен отцев Бог и Препрославлен.

 

Отроки от пещи избавивый, презрев, яко Милосерд, прегрешения наша, соблюди ны невредны от пещи искушений Пресвятыя Матере Твоея мольбами, отцев Боже Препрославленный.

 

Жены с миры Богомудрыя вслед течаху Христа, обитателие же веси, вместо мира слезы Деве приносяще, поклонишася, радующияся, Ея иконе и избавление от бед зде благовестиша.

 

Жены с миры вслед Христа течаху, да течем и мы усердно, добрый подвиг иночества совершающе и радующеся живому Богу, да сподобимся молитвами Богоматере пасху тайную вкушати.

 

Смерти празднуем умерщвление воскресением Христа и избавление от бед милосердием Владычицы, темже, пред иконою Ея ликующе, поем Виновнаго, единаго Благословеннаго отцев Бога и Препрославленнаго.

 

Яко воистину священный и радостный сей праздник Богородицы, провозвестник сущий чудес от честнаго Тоя образа, от негоже благодать исцелений явственно всем возсия.

 

Умертвив Сын Твой смерть, Всенепорочная, днесь, всем смертным пребывающий живот во веки веков дарова, един Благословенный отцев Бог и Препрославленный.

Песнь 8

 

Ирмос: Сей нареченный и Святый День — един суббот царь и господь, праздников праздник и торжество есть торжеств, в оньже благословим Христа во веки.

 

Сей нареченный и Святый День, в оньже славим Всепетую Владычицу, яко избави от бед притекших к Ея образу, и благословим Сию во веки.

 

Приидите, обители сея иночествующии, с любовию благодарение Деве принесем, Хранительнице Горы и Избавительнице нашей, поюще Ю яко Богоматерь во веки.

 

Возведи окрест очи Твоя, Чистая, и виждь рабы Твоя, пред иконою Твоею молящияся Тебе, и прошения исполни о Тебе благословящия Христа во веки.

 

Всесильный Господь родися из Тебе, Марие, и Крестом Своим умерщвление аду содела, избавляя смертоносных бед к образу Твоему притекающих и поющих Его яко Бога во веки.

 

Отче Вседержителю, и Слове, и Душе, ходатаицу о нас Пресвятую Деву Тебе предлагаем: молитвами Тоя помилуй и спаси нас, в Тя крестившихся, да Тя благословим во вся веки.

 

Прииде Тобою в мир Господь, Дево Богородице, и, чрево адово расторг, смертным нам воскресение дарова, темже благословим Его во веки.

Песнь 9

 

Ирмос: Светися, светися, Новый Иерусалиме, слава бо Господня на тебе возсия, ликуй ныне, и веселися, Сионе. Ты же, Чистая, красуйся, Богородице, о востании Рождества Твоего.

 

Светися, Русская обителе, веселися и красуйся, святая бо в тебе Избавительницы икона чудесы прославися многими, от бед свобождением и недугов исцелением.

 

Благоутробие Твое к верным и дары Твои суть паче постижения, Всеблагая Госпоже, сподобляй убо сих рабы Твоя, благодарственная Тебе поющия и радующияся о востании Рождества Твоего.

 

О, Божественнаго, о, любезнаго Твоего, Богомати, гласа! яко повелела еси не скрывати чудотворную икону Свою, да притекающии к ней многих лютых избавляются милостию Твоею.

 

О, паче словесе Твоих чудес, Избавительнице! Ты бо осененна иконою Твоею отрока воскресила еси, Мати сущи Живота, воскресением Своим всех оживотворившаго.

 

О Пресвятая Владычице, о Всемилостивая Избавительнице от бед, не престай милосердовати о бедствующих и сподобляти благодатнаго присещения обитель, образ Твой почитающую.

 

Согласно, Дево, Тебе блажим, вернии: радуйся, двере Господня; радуйся, граде одушевленный; радуйся, Еяже ради нам ныне возсия свет из Тебе Рожденнаго из мертвых воскресения.

Светилен:

 

Светильниче светлый, Пресветлаго Света мира, от гроба возсиявшаго, просвети, Благословенная, души наша светом благодати, да сподобимся зрети воплотившееся из Тебе Солнце Правды и Тебе, Просветительницу нашу, присно величати.