Икона Божией Матери,

именуемая «Благодатное Небо»

(6/19 марта)

Эта икона находится в иконостасе Московского Архангельского собора Кремля. Ранее образ находился в Смоленске и перевезен в Москву дочерью литовского князя Витольда Софией, когда она стала супругой Московского князя Василия Димитриевича. На иконе Божия Матерь изображена в полный рост, на левой руке Ее – Богомладенец. Другое название этого образа – «Что Тя наречем».

АКАФИСТ

Кондак 1

     Избранней от всех родов Божией Матери и Царице, Благодатным Небом нами именуемой, телу нашему и душам спасение подающей, благодарственное приносим пение, Богородице, Ты же яко имущая милосердие неизреченное, от всяких нас бед и грехов свободи, да зовем Ти:
     Радуйся Владычице, Благодатное Небо, радость и спасение нам дарующая.

Икос 1

     Ангели и праведных души удивишася, егда предстала еси пред Сыном Твоим и Богом, и многим молением ходатайствовала о людех во гресех пребывающих. Мы же очима веры толикое Твое благоутробие зряще, со умилением взываем Ти сице:
     Радуйся, молитвы всех христиан приемлющая.
     Радуйся, и самых отчаянных грешников моления не отвергающая.
     Радуйся, к Сыну Твоему о них предстательствующая.
     Радуйся, нечаянную радость спасения им подающая.
     Радуйся, предстательством Твоим весь мир спасающая.
     Радуйся, вся наша печали утоляющая.
     Радуйся, житие наше добре устрояющая.
     Радуйся, избавление от грехов всем человеком принесшая.
     Радуйся Владычице, Благодатное Небо, радость и спасение нам дарующая.

Кондак 2

     Видящи Пречистая люди грешныя с верою и упованием пред честною Ея иконою долу повергающияся, и слезно молящияся о гресех своих, внят молению их, да вси, зряще Ея Матернее милосердие, на небеси и на земли вопиют Богу: Аллилуиа.

Икос 2

     Разум человеческий воистинну превосходит любовь Твоя к роду христианскому, о нем же молишися Сыну Твоему и Богу. Мы же, зряще Тя неотступную Предстательницу за нас грешных, со слезами вопием:
     Радуйся, Заступнице усердная рода христианскаго от Бога нам дарованная.
     Радуйся, Путеводительнице наша, к небесному отечеству нас возводящая.
     Радуйся, верных ограждение и прибежище.
     Радуйся, помоще всех призывающих имя Твое Святое.
     Радуйся, презренных и отверженных от рова погибели исхищающая.
     Радуйся, тех на путь правый обращающая.
     Радуйся, непрестанное уныние и мрак душевный отгоняющая.
     Радуйся, оставленных врачами на Своя всемощныя руце приемлющая.
     Радуйся Владычице, Благодатное Небо, радость и спасение нам дарующая.

Кондак 3

     Сила благодати, предстательством Твоим, Пречистая, преизобилует тамо, идеже умножися грех, да радуются на небеси Ангели о грешницех кающихся, поюще пред Престолом Божиим: Аллилуиа.

Икос 3

     Имущи к роду христианскому Матернее милосердие, всем с верою и упованием прибегающим к Тебе, подаеши руку помощи, Владычице, да вси единем сердцем и едиными усты славословие приносят Ти сицевое:
     Радуйся, яко Тобою к нам нисходит Божие благоволение.
     Радуйся, яко во всех бедах и обстояниих наших приносиши Сыну Твоему усердныя о нас молитвы.
     Радуйся, яко и наша молитвы приятными Богу соделоваеши.
     Радуйся, яко невидимых врагов от нас отгоняеши.
     Радуйся, яко сердца злых человек умягчаеши.
     Радуйся, яко от клеветы, досаждения и укорения нас изымаеши.
     Радуйся, яко Тобою вся благая желания наша исполняются.
     Радуйся, яко много может молитва Твоя пред Сыном Твоим и Богом.
     Радуйся Владычице, Благодатное Небо, радость и спасение нам дарующая.

Кондак 4

     Бурю внутрь имея греховных помышлений, пред честною иконою Твоею, Царице Небесная, склоняем колена душ и телес наших и со умилением дерзновенно молим Тя: спаси нас, о Мати милосердия, да не погибнем до конца во гресех наших. Ты бо еси всем грешником Едина Надежда и прибежище; преклонися убо на милость, Благая Мати, и умоли о нас Сына Твоего и Творца нашего, да непрестанно зовем Ему: Аллилуиа.

Икос 4

     Слышавше небожители, яко молитвами Твоими пред Сыном Твоим прощение грехов и спасение на земли сущим грешником даруется, прославляют Тя, благосердную Царицу небесе и земли. И мы, грешнии, уведевше таковое Твое заступление о нас, недоумеем, како благохвалити Тя возможем по достоянию, и из глубины сердца нашего умиленно воспеваем Ти сице:
     Радуйся, Споручнице спасения грешных.
     Радуйся, падших востание.
     Радуйся, Предстательнице к Богу, мир от бед спасающая.
     Радуйся, яко гласа молитв Твоих беси трепещут.
     Радуйся, яко Ангели сему радуются.
     Радуйся, яко и нас земнородных сила молитв Твоих веселия исполняет.
     Радуйся, яко теми от тины грехов нас изымаеши.
     Радуйся, яко пламень страстей наших угашаеши.
     Радуйся Владычице, Благодатное Небо, радость и спасение нам дарующая.

Кондак 5

     Боготечную звезду — чудотворную икону Матере Твоея показал еси нам, Господи, ибо, взирающе на образ Ея телесныма очима, умом и сердцем к Первообразней возвышаемся и Ею к Тебе востекаем, поюще: Аллилуиа.

Икос 5

     Видевше Ангели Хранители христиан, яко Божия Матерь споспешествует им в наставлении тех, заступлении и спасении, потщашася сице возопити Честнейшей Херувим и Славнейшей без сравнения Серафим:
     Радуйся, с Сыном Твоим и Богом вечно царствующая.
     Радуйся, Ему всегда о роде христианстем моления приносящая.
     Радуйся, в христианстей вере и благочестии Наставнице.
     Радуйся, ересей и тлетворных расколов Искоренительнице.
     Радуйся, от растлевающих душу и тело соблазнов сохраняющая.
     Радуйся, от опасных обстояний и внезапныя смерти избавляющая.
     Радуйся, уповающим на Тя непостыдный конец жития дарующая.
     Радуйся, Матерним Твоим предстательством от вечнаго мучения избавляющая.
     Радуйся Владычице, Благодатное Небо, радость и спасение нам дарующая.

Кондак 6

     Дивная дела милосердия Твоего людем явленная, предаде письмены святый Димитрий Ростовский в научение и утешение всем верным, да и тии, во гресех, бедах, скорбех и озлоблениих суще, на всяк день пред честным Твоим образом «Благодатное Небо» именуемым, колена преклонят и, избывше бед, печалей и напастей, вопиют Богу: Аллилуиа.

Икос 6

     Возсия нам, яко пресветлая заря, чудотворная икона Твоя, Богомати, прогоняя тьму бед и скорбей от всех с любовию вопиющих Ти сице:
     Радуйся, Целительнице наша в болезнех телесных.
     Радуйся, Благая Утешительнице, печали в радость претворяющая.
     Радуйся, ненадеющихся несумненною надеждою возвеселяющая.
     Радуйся, алчущих Питательнице.
     Радуйся, нагих одеяние.
     Радуйся, вдов Утешительнице.
     Радуйся, безматерних сирот незримая Воспитательнице.
     Радуйся, неправедно гонимых и обидимых Заступнице.
     Радуйся Владычице, Благодатное Небо, радость и спасение нам дарующая.

Кондак 7

     Хотя Законодавец Правосудный Господь Сам быти закона Исполнитель и явити милосердия Своего бездну, преклонися на усердное моление Твое Преблагословенная Мати Дево, о людех во гресех пребывающих и милостей Божиих чающих, глаголя: «Закон повелевает, да сын чтит матерь. Аз Сын Твой, Ты же Мати Моя: Аз Тя должен чтити, послушая Твоего моления; проси убо еже хощеши, о нихже молишися — прощаются им греси Тебе ради». Мы же, видя таковую силу молитвы Ходатаицы нашей о прощении согрешений наших, прославим милосердие и неизреченное благоутробие Ея, зовуще: Аллилуиа.

Икос 7

     Новое дивное и славное знамение всем верным явися, яко не токмо Матери Твоей, но и пречистому лику Ея, на дске изображенному, силу чудотворения даровал еси, Господи: сему таинству дивящеся, во умилении сердца вопием к Ней таковая:
     Радуйся, премудрости и благости Божия откровение.
     Радуйся, веры утверждение.
     Радуйся, благодати явление.
     Радуйся, душеполезных знаний дарование.
     Радуйся, душевредных учений низложение.
     Радуйся, беззаконных навыков нетрудное преодоление.
     Радуйся, слово премудрости просящим дарующая.
     Радуйся, несмысленных разумными соделовающая.
     Радуйся Владычице, Благодатное Небо, радость и спасение нам дарующая.

Кондак 8

     Видяще славная дела и многоразличную премудрость Божию в мире и житии нашем являемыя, предстательством Твоим пред Богом, о Небо Благодатное, Пречистая Владычице, устранимся земныя суеты и излишних житейских попечений и ум и сердце наше на небеса возведем, поюще Богу: Аллилуиа.

Икос 8

     Вся в вышних пребывающи, и нижних никакоже отступила еси, Премилосердная Царице небесе и земли; аще бо по Успении Твоем и взошла еси на небеса с Пречистою Твоею Плотию, обаче и грешныя земли не оставила еси, являющися Причастница Промышления Сына Твоего о роде христианстем. Сего ради Тя по долгу ублажаем:
     Радуйся, сиянием пречистыя души Твоея всю землю просветившая.
     Радуйся, чистотою телесе Твоего вся небеса возвеселившая.
     Радуйся, о всем мире усердная Предстательнице.
     Радуйся, всех нас при Кресте Сына Твоего усыновившая.
     Радуйся, всегда матернюю любовь к нам являющая.
     Радуйся, всех даров духовных и телесных независтная Подательнице.
     Радуйся, двери Царствия Христова верным отверзающая.
     Радуйся, и на земли чистаго веселия сердца наша исполняющая.
     Радуйся Владычице, Благодатное Небо, радость и спасение нам дарующая.

Кондак 9

     Всякое естество Ангельское удивися делу Твоего милосердия, Господи, яко даровал еси толико твердую и теплую Заступницу и Помощницу роду христианскому, нам невидимо спребывающу, слышащу же Тебе поющих: Аллилуиа.

Икос 9

     Витийство человеческое не возможет по достоянию благохвалити Тя, Пресвятая Богородице, и воспети неисчетная чудеса Твоя, от иконы Твоея являемая, имиже православныя люди от бед, напастей и всякаго зла сохраняеши. Мы же добре ведуще о многих чудотворениях от честнаго лика Твоего бывших и потребная нам ко временней и вечней жизни приемлюще, с веселием Богородице взываем:
     Радуйся, яко от священнаго лика Твоего чудеса деются.
     Радуйся, яко утаися премудрость и благодать сия от мудрых и разумных века сего.
     Радуйся, яко открыся та младенцем в вере.
     Радуйся, яко прославляющих Тя прославляеши.
     Радуйся, яко отвергающих Тя пред всеми посрамляеши.
     Радуйся, яко от всякаго зла прибегающих к Тебе избавляеши.
     Радуйся, яко вся болезни человеческия душевныя и телесныя милостивно врачуеши.
     Радуйся, яко праведный гнев Божий на нас Твоим молением скоро утоляеши.
     Радуйся Владычице, Благодатное Небо, радость и спасение нам дарующая.

Кондак 10

     Спасти хотя души своя от вечныя смерти, мы, недостойная чада Твоя, преклоньше колена своя пред Пречистым Твоим образом, молим Тя, Небесная Царице и Милосердная Мати: сотвори нас причастными вечнаго блаженства в Небесном Царствии Сына Твоего, да поем Ему со всеми святыми: Аллилуиа.

Икос 10

     Стена необоримая и пристанище небурное Ты еси, Богородице Дево всем к Тебе притекающим: темже и нас огради и покрый от всех враг видимых и невидимых, да с верою и умилением покланяющеся пречестней и цельбоносней иконе Твоей, вопием Ти:
     Радуйся, столпе и ограждение девства.
     Радуйся, чистоты и целомудрия незримая Охранительнице.
     Радуйся, сохраняющая и спасающая всех призывающих Тя.
     Радуйся, к Сыну Твоему и Богу молитвы верных приносящая.
     Радуйся, и Сама непрестанно у Престола Его молящаяся о нас.
     Радуйся, благодать Твою иконам даровавшая.
     Радуйся, всю вселенную лучами тех озаряющая.
     Радуйся, рода христианскаго Похвало и непостыдное Упование.
     Радуйся Владычице, Благодатное Небо, радость и спасение нам дарующая.

Кондак 11

     Пение всеумиленно приносяще Ти, недостойнии, просим Тебе, Дево Богородице: не презри гласа рабов Твоих, к Тебе бо в напастех и скорбех прибегаем и пред Тобою в бедах наших слезы проливаем, поюще: Аллилуиа.

Икос 11

     Светозарная свеща, сущим во тьме греха и юдоли плача явися предивная икона Твоя, Пречистая Владычице: всем бо притекающим к ней струи исцелений изливаеши и чудес зарями сердца верных веселиши, подвизающи взывати Тебе сице:
     Радуйся, Божественный Свет неизреченно родившая.
     Радуйся, тьму смертную Рождеством Твоим просветившая.
     Радуйся, страны нашея неусыпная Покровительнице.
     Радуйся, верных пастырей Церкви ободряющая и вразумляющая.
     Радуйся, людей православных верная Хранительнице.
     Радуйся, богобоязненных иноков и инокинь присное утешение.
     Радуйся, кающихся пред Богом грешников непостыдная Заступнице.
     Радуйся, радости небесныя всем нам Подательнице.
     Радуйся Владычице, Благодатное Небо, радость и спасение нам дарующая.

Кондак 12

     Благодать Божественную испроси нам у Сына Твоего и Бога, простри нам руку помощи, отжени от нас всякаго врага и супостата, умири нашу жизнь, да не погибнем люте, без покаяния, но приими нас в вечныя кровы, Богородице, да радующеся поем Богу, Тобою нас спасающему: Аллилуиа.

Икос 12

     Поюще дивная Твоя чудеса, умильно припадаем пред пречистым образом Твоим и, благоговейно лобызающе его, немолчными песньми воспеваем Тя, предивная Царице небесе и земли, и просим Тя, Владычице, услыши наше моление в час сей и благодать Твою нам ниспосли с любовию вопиющим Тебе:
     Радуйся, милостей Сына Твоего и Бога нас сподобляющая.
     Радуйся, десную часть на Суде Сына Твоего молитвами Твоими нам уготовляющая.
     Радуйся, грешников кающихся к покаянию ободряющая.
     Радуйся, скорбным вдовицам и сирым помогающая.
     Радуйся, алчущих и жаждущих правды к Богу приводящая.
     Радуйся, изнемогающих от уныния и печали скорая Утешительнице.
     Радуйся, Церкве Православныя Нерушимая Стено и Небо Благодатное.
     Радуйся, страны нашея Покрове и защищение.
     Радуйся, Благодатное Небо, радость и спасение нам дарующая.

Кондак 13

     О, Всепетая Мати, Невместимаго Бога во чреве вместившая и Радость всему миру родившая! Нынешнее приими пение, вся наша печали на радость преложи, и от всякия избави напасти всех, и будущия изми муки о Тебе вопиющих: Аллилуия, Аллилуиа, Аллилуиа.

Сей кондак читается трижды, затем икос 1-й и кондак 1-й

МОЛИТВА ПЕРВАЯ

Что Тя наречем, о Благодатная Богомати Богоотроковѝце, Пренепорочная Марѝе? Кѝими песнопении возвеличим Тя, возвеличенную небом и землею, Ангелы и человѐки? Явися бо на Тебе неслы̀шанное от века на землѝ и несвѐдомое Ангелы на небеси таинство, па̀че ума и слова, вочеловѐчения Бога Слова, рожденнаго исконѝ от безначальнаго Отца без матери и воплощеннаго в Твоей утро̀бе и с нетлѐнною печатию дѐвства Твоего родившагося. О чудо всех древних и новых чудес! Непреложное слово Сама̀го Бога о победоноснем Семени жены и исполнися и совершися в безмужней Деве. О неизмеримая глубина премудрости и величия Божия! Кѝими имены̀ наречем Тя, о Невѐсто неневестная? Зарею ли наречем Тя восходящаго на небе солнца? Но Ты – само небо, из Тебе бо возсия̀ Солнце правды – Христос Бог наш, Спаситель грешных. Именуем ли Тя вратами, вводящими в потерянный прародителями рай, обиловавший всеми бла̀гами? Но Ты Сама есѝ благода̀тный рай, произрастѝвшая Цвет нетления, отгоняющий смрад греха и зловоние прародительского тления. Наречем ли Тя непорочною Девою, не познавшею брака? Но Ты и до старости пребыла неискусобра̀чною и дѐвственною, до рождения, и в рождении, и по рождении Сына Твоего̀. Именуем ли Тя чистою и святою Ма̀терию, превозшедшею Своею чистотою вся ма̀тери и прома̀тери? Но Ты не то̀кмо родила Того младенца Христа, но и носила Его при Своих пѐрсех, и питала Твоим матерода̀вственным млеко̀м, Того, Иже питает всякое создание, Ему̀же со страхом и трепетом предстоят небѐсныя силы и Его̀же хвалит всякое дыхание и тварь. О, воѝстинну Ты есѝ дивная в жена̀х, чудная в девах, неподражаемая в ма̀терех! К Тебе припа̀даем и пред Твоими святыми стопа̀ми повергаем и слагаем все наша мысли, желания, намерения и чувства. Освяти их Твоим Богома̀терним призрѐнием и вознеси их, я̀ко жертву нашего смиреннаго сердца, я̀ко малоценную лепту нашея духовныя нищеты, к престолу Сына Твоего, спасителя нашего, да ѝмиже весь судьбами управит наш путь ко спасению и наследию Царствия Его, не иму̀щаго конца во вѐки веко̀в. Аминь.

МОЛИТВА ВТОРАЯ

     О, Пресвятая и Преблагословенная Мати Сладчайшего Господа нашего Иисуса Христа! Припадаем и молимся пред святою иконою Твоею и смиренно молим Тя, всесильная рода нашего Заступнице: помози нам немощным и грешным и сподоби нас Твоего Матернего заступления и благопопечения. Спаси и сохрани, Владычице, под кровом милости Твоея Церковь святую, град сей, страну нашу и всех нас, припадающих к Тебе с верою и любовию и умиленно просящих со слезами Твоего заступления. О, Милостивая Мати, умилосердися на ны, обуреваемыя грехми многими, простри ко Христу Господу Богоприятныя руце Твоя и предстательствуй за нас пред благостию Его, просящи прегрешений наших прощения, благочестнаго мирнаго жития, благия христианския кончины и добраго ответа на Страшнем Суде Его, да спасаеми всесильными Твоими к Нему молитвами, блаженство райское унаследуем, и со всеми святыми воспоем Пречестное и Великолепое имя достопокланяемыя Троицы, Отца и Сына и Святаго Духа, и Твое велие к нам милосердие во веки веков. Аминь.

ТРОПАРЬ

Тропарь, глас 6:

     Что Тя наречем, о Благодатная? Небо? - яко возсияла еси Солнце Правды; рай? - яко прозябла еси Цвет нетления; Деву? - яко пребыла еси нетленна; Чистую Матерь? — яко имела еси на святых Твоих объятиях Сына, всех Бога. Того моли спастися душам нашим.

Кондак, глас 6:

     Не имамы иныя помощи, не имамы иныя надежды, разве Тебе, Владычице, Ты нам помози, на Тебе надеемся и Тобою хвалимся, Твои бо есмы раби, да не постыдимся.

Величание

     Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.