«Воспитание» икона Божией Матери

5 / 18 марта

Эта икона - список с древней византийской иконы, который получил название "Воспитание" в России, так как молящиеся перед нею получали помощь от Божией Матери в воспитании детей. Икона, прославившаяся по всей России своими чудотворениями, находилась в Казанском соборе. Богоматерь изображается с младенцем Иисусом, сидящим на левой руке Ее.

АКАФИСТ

Кондак 1

Взбранной Воеводе и Благой Воспитательнице рода христианского, яко избавльшеся от злых, благодарственная восписуем Ти раби Твои, Богородице, имущая державу непобедимую, от всяких бед чадо мое свободи да со слезами зову Ти:

Воспитай, Владычице, чадо мое (имя) достойна Небесного царствия и наследником вечных благ его сотвори.

Икос 1

Ангела с небесе послати чаду моему исходатайствуй, Пресвятая, у Сына Своего и Бога, якоже и Тебе послан бысть хранитель прекрепкий - Гавриил Архангел и сподоби мя взывати Тебе сице: Воспитай чадо мое земным ангелом.

Воспитай чадо мое небесным человеком.

Воспитай чадо мое Тебе угодным. Воспитай чадо мое сокрушенным духом и сердцем.

Воспитай чадо мое Твоим рабом.

Воспитай чадо мое зовуща Тебе:

«Радуйся, Благодатная, Господь с Тобою!»

Воспитай, Владычице, чадо мое достойна Небесного Царствия и наследником вечных благ его сотвори.

Кондак 2

Видяще мое матернее моление о чаде моем, у Тебе единой помощи просящей: возьми его под Свой честный и милосердный покров, да воззову Богу: Аллилуиа.

Икос 2

Разум чаду моему посли, како добре Ти послужити и наполнити сердце его премудростью Небесной, подаяя одну ея возлюбите, земное же паче презрети, и не возбрани устом моим вопити таковая:

Воспитай чадо мое мудрым, яко есть змии и простым, яко голубицы.

Воспитай чадо мое имеющим разум на доброе и не ищущим на грех.

Воспитай чадо мое премудрым противу козней диавольских.

Воспитай чадо мое возрастающим в познании премудрости Царствия Вечного.

Воспитай чадо мое устрояющего мудре житие свое по образу святых.

Воспитай чадо мое, питающе его млеком Премудрости Божией и сокровенной, да взыскует Ю во всем животе своем.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 3

Сила Вышняго да осенит чадо мое Твоего ради неусыпного предстательства пред Сыном Твоим, и по сем познавше Твое матернее милосердие ко всем, к Тебе с верою притекающим, воззову Богу: Аллилуиа.

Икос 3

Имущи от Бога чадо мое, не хочу узрети его в муке вечно пребывающа, но паче записанного в Книге Жизни и наследующаго живот вечный. Сего ради, Пречистая Дево, приклони ухо к молению моему, взывающе Тебе:

Воспитай чадо мое избегнути вечных мук.

Воспитай чадо мое наследовати живот вечный.

Воспитай чадо мое проводити путь жития в покаянии.

Воспитай чадо мое претрудне стяжающаго благодать Духа Святаго.

Воспитай чадо мое употребляющим усилие восхитити Царство Небесное.

Воспитай чадо мое, еже быти записанным ему в Книге Жизни.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 4

Бурю внутрь имея помышлений сумнительных, восхощеши ли пояти чадо мое в живот вечный, рыдаю, но воспомянув Твоя милости пребогатыя, во уповании и умилении сердца пою Сыну Твоему: Аллилуиа.

Икос 4

Слышаше глас Твой, глаголющий Сыну Твоему: «Данных Мне Тобою в удел сохраняй во веки», простираю руце мои и сердце к Твоему милосердию да возмеши чадо мое в рабы Своя и исполниши прошения таковая:

Воспитай чадо мое в уделе Твоем преславнем.

Воспитай чадо мое со всеми Твоими святыми.

Воспитай чадо мое рабом, творящим вся Твоя повеления.

Воспитай чадо мое шествующа узким путем заповедей Сына Твоего во Иерусалим Горний.

Воспитай чадо мое ищущим помощи у Тебе единой.

Воспитай чадо мое для поятия в живот вечный.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 5

Звезда утренняя, сиречь Сын Твой, Пресвятая Дево, да воссияет светом невечерним в сердце чада моего, во еже воззвати ему Богу: Аллилуиа.

Икос 5

Видяще мое прилежное моление, возносимое во славу Твою, аки фимиам благовонный, не отврати лица Твоего от моего чада, аще он и отвратится те услыши глаголы уст моих вопиющих Тебе:

Воспитай чадо мое нищим духом, яко тех есть Царство Небесное.

Воспитай чадо мое плачущим, яко тии утешатся.

Воспитай чадо мое кротким, яко тии наследят землю.

Воспитай чадо мое алчущим и жаждущим правды, яко тии насытятся.

Воспитай чадо мое милостивым, яко тии помилованы будут.

Воспитай чадо мое чистым сердцем, яко тии Бога узрят.

Воспитай чадо мое миротворцем, яко тии сынове Божии нарекутся.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 6

Проповедует мир весь христианский Твое всегдашнее заступление сирот, вдовиц и матерей, о чадех молящихся и вопиющих Богу: Аллилуиа.

Икос 6

Возсияй лучами благодати к душе чада моего да просвещенный от Тебе свыше узрит путь, ведущий в живот вечный, и последует по нем, окормляемый под Твоим всемощным покровом, в Царство Сына Твоего, идеже жизнь бесконечная и сего ради услыши мене, зовущую Тебе сице:

Воспитай чадо мое светом мира, да светит свет ею пред людьми и да видяще его добрые дела прославят Отца Небесного.

Воспитай чадо мое просвещенным от Сына Твоего да во свете Его узрит свет и направит стопы своя к Нему.

Воспитай чадо мое выну обращающа очи сердца своего к Создателю всяческих.

Воспитай чадо мое, путеводствуя звездою утреннею, иже есть Сын Твой во обители праведников.

Воспитай чадо мое кротким, молчаливым и трепещущим Словес Божиих.

Воспитай чадо мое любящаго Тебе и Сына Твоего не токмо умом, но и сердцем.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 7

Хотящу чаду моему вечнаго спасения со слезами предста пред честною Твоею иконою, Владычице, да не презреши моления моего, зовущей Сыну Твоему: Аллилуиа.

Икос 7

Дивными и неизследимыми судьбами Сына Твоего привлецы чадо мое Твоею милостивою рукою под Свой благодатный покров да со усердием зову Ти:

Воспитай чадо мое ищущаго прежде Царствия Божия и правды его.

Воспитай чадо мое входити тесными вратами ведущими в живот вечный.

Воспитай чадо мое на всяком месте творящаго волю Сына Твоего и Бога.

Воспитай чадо мое не глаголящим, ниже мыслящим хулу на Духа Святаго.

Воспитай чадо мое в малем числе избранных Твоих.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 8

Странствующе в юдоли сей земной, многоскорбней и много-мятежней, чадо мое, идеже обрете отраду и утешение, аще не в Тебе, Пречистая? Спутеводствуй же ему и настави его на путь истинный, да зовет Богу: Аллилуиа.

Икос 8

Всем еси Мати милующая, Ты, Богородице, и хощу, да пребудеши Ею чаду моему. Се вручаю его в руце Твоя и во смирении прошу Тя:

Воспитай чадо мое бодрствующим и молящимся да не внидет во искушение.

Воспитай чадо мое милосердным, якоже Отец Небесный милосерд есть.

Воспитай чадо мое во умилении младенческом, яко детей есть Царство Божие.

Воспитай чадо мое меньшим всех, да будет пред Богом велик.

Воспитай чадо мое соблюдающим слово Божие причастником блаженства райского его содевая.

Воспитай чадо мое благонадежным для Царства Небеснаго.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 9

Всякого добра душу и сердце его исполни, подающе от щедрот Твоих всем по коегождо потребе да зову Богу: Аллилуиа.

Икос 9

Витий суемудренных общения, глаголющих лжу на Твое всемощное заступление, избави его и призри на мя, верно вопиющую:

Воспитай чадо мое в целомудрии и послушании.

Воспитай чадо мое бегающим утех мира и прелестей века сего.

Воспитай чадо мое уклоняющимся от зла и творящим благо.

Воспитай чадо мое творящим добрый плод.

Воспитай чадо мое любящим и молящимся о вразех своих.

Воспитай чадо мое совершенным, яко совершен Отец наш Небесный.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 10

Спасти хотя мир. Сын Твой прииде с Небесе призвати не праведники, но грешники на покаяние. Сего ради взмолись Сыну Твоему и скажи о чаде моем да спасенный Тобою воззовет Богу: Аллилуиа.

Икос 10

Стеною несокрушимою стани, Небесная Царице, чаду моему, да под Твоим блаженным покровом возможет содеяти множество благих дел да и с сим зову Ти сице:

Воспитай чадо мое ведущим творити волю Сына Твоего и Бога.

Воспитай чадо мое ненавидящаго грех и всякое беззаконие.

Воспитай чадо мое любящим добро и всякую добродетель.

Воспитай чадо мое в чистоте непорочней.

Воспитай чадо мое восходящим по лествице живота своего на кийждо день.

Воспитай чадо мое в горести своей обращающа очи свои к Твоему милосердию.

Воспитай, Владычице, чадо мое достойна Небесного Царствия и наследником вечных благ его сотвори.

Кондак 11

Пети Твое необоримое заступление выну сподоби чадо мое и Твоею благодатию отверзи устне его вопити Богу: Аллилуиа.

Икос 11

Светоприемную свещею, пламенеющей и истаивающей на от любви к Тебе и Сыну Твоему и ближнему день и нощь, живот его соделай и не презри мене, зовущую Ти:

Воспитай чадо мое любити Тебе от всего сердца и помышления.

Воспитай чадо мое всегда взирающим на крест и страдания Сына Твоего.

Воспитай чадо мое отверзающим устне своя токмо на похваление и прославление благости Твоей.

Воспитай чадо мое ждущим пришествия Сына Твоего со слезами.

Воспитай чадо мое в молитве трезвенной и непрестанней.

Воспитай чадо мое в благоговении всегда Тебе предстоящем.

Воспитай, Владычице, чадо мое достойна Небесного Царствия и наследником вечных благ сотвори.

Кондак 12

Благодатию неизреченной Духа Святаго напитай сердце чада моего, еже возлюбити токмо Сына Твоего и Бога, и Тебе, Преблагую, да быв подвигнут Тобою, зовет Царю всяческих: Аллилуиа.

Икос 12

Поюще Твое милосердие, им же милуеши и питаеши чадо мое, не престай просити о нем у Сына Твоего, яко верую, вся Тебе доступна суть, и исполни во благо мольбы моя таковая:

Воспитай чадо мое исполнена Духа Святаго.

Воспитай чадо мое обрестияя на Суде Сына Твоего одесную.

Воспитай чадо мое живуща свято.

Воспитай чадо мое благодатию Духа Божия твердо на пути вернем пребывающа.

Воспитай чадо мое в слезах и стенании о гресех житие свое проводящим.

Воспитай чадо мое ненасытно алчуща и жаждуща осенения Духа Святаго.

Воспитай, Владычице, чадо мое достойна Небесного Царствия и наследником вечных благ сотвори.

Кондак 13

О, Всепетая Мати Иисуса Сладчайшаго! Приими сие малое акафистное моление в воню благоухания духовного о чаде моем, и возьми ею под Твой милосердный покров. Еще же даруй ему мыслити, ведати, слышати, глаголати и творити токмо тое, еже приближает к Тебе и Сыну Твоему и споспешествует вечному спасению. И посли ему в жизни сей привременней все полезное ко спасению души его да зовет Богу: Аллилуиа, Аллилуиа, Аллилуиа.

(Этот кондак читается трижды, затем икос 1 и кондак 1)

МОЛИТВА

О, Пресвятая Владычице Дево Богородице, Премилосѐрдная Мати всех человек, спаси и сохрани под кровом Твоим чад наших (имена), всех отроко̀в, отроковѝц, младенцев, и во чреве матери носѝмых. Покрой их рѝзою Твоѐю, соблюдѝ их во стра̀се Божием и послуша̀нии родителем, умолѝ Господа нашего и Сына Твоего, да дарует им вся полезная к душевному спасению. Вруча̀ем их Твоему Матерѝнскому смотрѐнию, яко Ты еси Божественный покров рабом Твоим. Аминь.

ТРОПАРЬ

Икос 1

Ангела с небесе послати чаду моему исходатайствуй, Пресвятая, у Сына Своего и Бога, якоже и Тебе послан бысть хранитель прекрепкий - Гавриил Архангел и сподоби мя взывати Тебе сице:

Воспитай чадо мое земным ангелом.

Воспитай чадо мое небесным человеком.

Воспитай чадо мое Тебе угодным.

Воспитай чадо мое сокрушенным духом и сердцем.

Воспитай чадо мое Твоим рабом.

Воспитай чадо мое зовуща Тебе: «Радуйся, Благодатная, Господь с Тобою!»

Воспитай, Владычице, чадо мое достойна Небесного Царствия и наследником вечных благ его сотвори.

Кондак 1

Взбранной Воеводе и Благой Воспитательнице рода христианского, яко избавльшеся от злых, благодарственная восписуем Ти раби Твои, Богородице, имущая державу непобедимую, от всяких бед чадо мое свободи да со слезами зову Ти: Воспитай, Владычице, чадо мое (имя) достойна Небесного царствия и наследником вечных благ его сотвори.

 КАНОН

(Перед иконою Богородицы "Воспитание")

Тропарь, глас 4

Воспитавшейся во храме во святая святых,/ одеянней верою и премудростию и безмерным девством,/ Архистратиг Гавриил принесе с небесе целование/ и еже радуйся, радуйся Благословенная,/ радуйся, Препрославленная, Господь с Тобою.

Канон, глас 3

Песнь 1

Море древле / пройде немокренными стопами Израиль, бегая плена фараонска, / сподоби, Владычице, молитвами Твоими, / чада наша неврежденны проити // море сего жития.

Припев: Пресвятая Богородице, спаси нас.

Рабство греха отвергнути чада наша дерзновение имуще, путеводствуемые выну пламенем молитвы Богородицы, да достигнут земли обетованныя Царствия Твоего.

Слава: Огустеша море, шествию победному удивися, молися, Богородице, чадам нашим, Господу присно сшествовати, греховные помыслы молитвою побеждающе.

И ныне: Преестественно пройде Израиль море, отверзающее дверь спасения, Дева по Рождестве Спаса пребысть непорочна, отверзая дверь Небесную, Тоя молитвами чада наша в целомудрии сохрани.

Песнь 3

Мудрость и богатство / не довлеют спасению, / молитвами Твоими, Богородице, / чада наша настави, / Бога ве́дение стяжати // и Царствие Небесное тем улучити.

Пресвятая Богородице, спаси нас.

Бесплодствует всяк / возносяйся сердцем, / молитвою Твоею, Богородице, / благоплодны сотвори чада наша, // смирением мудрость и силу стяжавающия.

Слава: Аще и страстьми умерщвляеми, / праведного суда страшася, / но верою в милосердие Божие укрепляеми, / да обрящут чада наша // животворящую силу покаяния.

И ныне: Яже Младенца Сильнаго Бога / родила еси, Богородице, / ад Посрамившего / снисхождением Своим, / моли чадам нашим, силу в Едином Боге искати, // мира соблазны отвергающе.

Песнь 4

Небеса покры слава Господня, / покрый, Владычице, чада наша, // врагов напастей избавляющи.

Пресвятая Богородице, спаси нас.

Аще и тесен путь, ведущий в Царствие Небесное, / обаче сподоби чада наша, терпением пройти сей, // верою спасение улучающе.

Слава: Сподоби, Владычице, чада наша чады Божии быти, познание пути Господня // присно пред собою полагающе.

И ныне: От Горы, древле проповеданныя, / пройде Господь, спасение даруя роду человеческому, / егоже улучити чадам нашим, / помози, Богородице // молитвами Твоими.

Песнь 5

Озари, Владычице, души чад наших / светом правды Божией, / настави их Единаго Бога искати // и именем Его вся напасти препобеждати.

Пресвятая Богородице, спаси нас.

Егда скорби найдут на ны, умудри чада наша, в скорбех путь ко спасению прозревати.

Слава: Христос снисхождением Своим мертвыя оживи, / прореченное исполняя, / сподоби, Владычице, чад наших душам // умерщвления избежати.

И ныне: Побеждая естества чин, прииде Бог от Неискусомужныя Девы, спасение даруя роду человеческому.

Песнь 6

Молитвою Твоею укрепляеми, / да отвергутся чада наша / хранящих суетная, // чрева безсловеснаго всячески бегая.

Пресвятая Богородице, спаси нас.

Помози, Владычице, молитвами Твоими, чадам нашим в скорби вопити ко Господу, от Того спасение взыскующе, обетная глаголы присно воздавая.

Слава: Аще и бездна последняя чад наших обыдет, /Пресвятая, Ты не остави их // в сей погибнути.

И ныне: Пресвятая Владычице, рождшая Спаса паче слова и разума, не остави чад наших, напастьми суетными обуреваемых.

Песнь 7

Молися, Владычице, / сердца чад наших в Бозе утвердити // и присно Ему по Нем горети.

Пресвятая Богородице, спаси нас.

Аще и блага не разумевши своего, еже есть заповедей хранение, даруй, Владычице, чадам нашим сердце сокрушенное, да обрящут милость Господню в покаянии.

Слава: Правы путие Твои Господи, сподоби молитвами Богородицы, чадам нашим присно теми в Царствие Твое следовати.

И ныне: Огнь, купину неопаляющий, / Рождество Твое провозвести, / спаси, Господи, чад наших огня страстей, / присно помощь им, молитвами Богородицы, подавая.

Песнь 8

Даруй, Владычице, / чадам нашим / веру и разум / вся дела Господня благословити / и твердо веровати, / яко тии спасению их // споспешествуют.

Пресвятая Богородице, спаси нас.

Смерть погибе, благою рукой Господнею побеждаема, / моли чадам нашим душу живу сохранити / милостию Своею /от всякого губящего их греха // покрывающе.

Слава: Господь снисхождением Своим, волю Отчую исполняя, извлече и спасе от ада души наша, присно Духом Святым к Небу наставляюще.

И ныне: Благословится имя Твое, Богородице, яко Небо и Храм Божества показалася еси, осени чад наших Твоим Матерним покровом.

Песнь 9

Просвети, Владычице, / сердца чад наших / уве́сти, яко смирение токмо к Небесам возносит, // гордыню их отметати научающе.

Пресвятая Богородице, спаси нас.

Алчущими правды Божией соделай чада наши, Богородице, да па́мятуя выну помощь Твою, ублажат Тя во вся дни живота своего.

Слава: Храм Божества показалася еси, Богородице, сподоби чада наши храмы Духа Святаго быти, всякую скверну от души присно отгоняюще.

И ныне: Неизреченному воплощению Твоему, Господи, ангелы удивишася, неизреченной милости Богоматере человецы радуются, тоя не лиши чад наших, молитвами Твоими.