Тихвинская икона Божией Матери
(26 июня / 9 июля)
Тихвинская икона Божьей Матери по своему типу относима к Одигитрии-Путеводительнице. Она является одним из наиболее чтимых списков Влахернской иконы Богоматери, или Влахернитиссы, упоминания о которой начинаются примерно с 439 года от Р.Х., когда она была перенесена из Иерусалима в Константинополь. Здесь для нее была выстроена Влахернская церковь. По преданию, икона Одигитрия, ставшая прототипом для Тихвинского образа, была одной из икон, написанных лично евангелистом Лукой, который, также по преданию, создал ряд прижизненных изображений Пречистой.
Там она находилась длительное время, пока в 1383 году, за 70 лет до того как османы захватили Константинополь, икона чудесным образом исчезла из храма, но возникла перед изумленными рыбаками над Ладожским озером. В рукописи «Сказания о Тихвинской иконе Богоматери», принадлежащей концу XV – началу XVI века, сказано, что икона появлялась по воздуху в семи местах как свидетельство ее чудотворной силы (что было важно во времена, когда процесс христианизации Руси еще продолжался и Русский Север не был охвачен им в достаточной мере) и окончательно остановилась над рекой Тихвинкой.
В предыдущие шесть раз икона не давалась в руки никому, перелетая с места на место, будто указывая путь следования за ней. Но тут, на берегу Тихвинки, все собравшиеся стали молиться перед ней, и она сошла им на руки. Тут же при священниках с молитвой положили деревянный венец – основу будущего строения, приготовили тес для дальнейшей стройки и, оставив его на ночь под стражей, ушли. Наутро, к великому ужасу и печали, пришедшие строители и заснувшие ночью сторожа не увидели ни иконы, ни венца. Горевали недолго – и икона, и венец, и тес оказались на другом берегу реки. Богоматерь Сама указала окончательное место для пребывания Ее Тихвинского образа.
Итак, в период княжения благоверного князя Дмитрия Донского, начиная с его победы в 1380 году над Мамаем на Куликовом поле, на Руси были чудесно обретены несколько икон Одигитрии и Владимирская икона Богоматери – Елеуса (Умиление). Это, безусловно, означало, что Русь всегда находилась под особым приглядом и заступничеством у Пресвятой Богородицы, и доказательство тому – обилие икон Ее, приходивших на Русь в самые тяжелые годы. Эти иконы сами указывали место, где они намерены остаться и где Царица Небесная желает видеть прославление ее имени устройством храмов и обителей, чтобы Она могла приходить на помощь всем, кто будет молитвенно притекать к ней за защитой и исцелениями от всех бед перед Ее образом.
За время нахождения Тихвинской иконы Божьей Матери в Тихвинском Богородице-Успенском монастыре с просьбами об укреплении Российской державы, с другими молитвенными пожеланиями в обитель на реке Тихвинке приезжали многие державные особы: Петр I, императрица Елизавета, посетившая обитель с великим князем Петром Федоровичем и его женой Екатериной, ставшей императрицей Екатериной II, Павел I и его августейшая супруга Мария Федоровна – весь дом Романовых весьма почитал этот образ.
Тихвинская икона Божьей Матери прославилась не только многочисленными исцелениями от нее. Во время наступления шведов на новгородские земли в 1615–1617 годах и захвата ими Новгорода они пытались разрушить Тихвинскую обитель. Но Сама Богородица стала на ее защиту. Монахов-насельников в монастыре было немного, но атаки хорошо обученных и многочисленных шведских войск каждый раз терпели поражение. В важнейшие моменты сражений шведы то видели сонм святого воинства, то им мерещились многочисленные русские войска, идущие со стороны Москвы, и они в ужасе отступали.
Когда шведы потерпели в 1617 году окончательное поражение, по просьбе послов царя был сделан список с Тихвинской иконы Божьей Матери. Заключение мирного договора в деревне Столбово под Тихвином между царем Михаилом Федоровичем и королем Густавом II Адольфом 10 февраля 1617 года происходило перед этим ликом Богородицы. Образ затем был перенесен как чтимая святыня в Успенский собор Московского Кремля, а позже, по ходатайству новгородцев, его перенесли в новгородский Софийский собор. Так с начала XVII века началось всероссийское почитание Тихвинской иконы Божьей Матери.
Однако за века происходило неоднократное поновление Тихвинской иконы Божьей Матери более поздними записями, и в 1910 году Комитет попечительства о русской иконописи принял решение раскрыть древний образ и дал о том поручение Г.О. Чирикову, брату М.О. Чирикова (оба – известные московские иконописцы и реставраторы, которым поручались самые сложные работы по реставрации древних икон). Однако к этой иконе Православная Церковь со времени правления царя Михаила Федоровича относилась как святому сокровищу, имея благоговейный страх перед прикосновением к письменному лику древних святынь, и то, что Пречистая не остановила реставраторов, было отнесено к одному из чудес Богородицы.
В 1924 году Тихвинская обитель была закрыта. Чудотворная икона до 1941 года находилась в Тихвинском краеведческом музее, а после проделала длительный путь: во время оккупации немецко-фашистскими войсками она была передана в Псков, в Духовную миссию. Два года она находилась там, ее особо выдавали для воскресной службы в Троицком кафедральном соборе. Потом икону перевезли в Ригу, и еще спустя время она оказалась в американской оккупационной зоне в Германии, откуда попала в Чикаго. Здесь Тихвинская икона Богоматери хранилась в Свято-Троицком соборе, где настоятелем был архиепископ Рижский Иоанн (Гарклавс), который и вывез сюда икону в 1949 году. После его ухода из жизни настоятелем собора стал его сын, протоиерей Сергий, который всю жизнь хранил эту величайшую православную святыню, так далеко перекочевавшую из русских земель. Но сохранение исконно русского почитаемого образа на чужбине не было капризом или присвоением иконы, тем более что, будь на то воля Богородицы, она давно уже вернулась бы в Россию. По завещанию архиепископа Иоанна Тихвинская икона Божьей Матери должна была явиться в России тогда, когда вновь будет возобновлен Тихвинский Богородице-Успенский монастырь, который возник на месте, Ею Самой выбранном.
В 1995 году то, что уцелело от обители – Успенский храм, другие строения, было передано Русской Православной Церкви. Тихвинский Богородицкий монастырь постепенно возродился, приобрел прежнюю силу, и в 2004 году после переговоров Святейшего Патриарха Московского и Всея Руси Алексия II с представителями РПЦ в Америке икона Богоматери Тихвинская 25 июня/8 июля с великими почестями обрела свое прежнее место, и обитель стала снова одним из важнейших центров русского богомолья.
АКАФИСТ
Кондак 1
Взбранной Воеводе, Владычице нашей Богородице благодарственная пения восписуем о явлении чудныя Ея иконы, к Ней же притекающии присно избавляются от враг видимых и невидимых. Ты же, Госпоже Неба и земли, яко милосердная Мати, приими ныне малое сие моление наше и неотступну никогда же сотвори милость Твою от нас и заступление, охраняющи от всех бед и напастей нас, зовущих Ти: Радуйся, Владычице, милостивая о нас пред Богом Заступнице.
Икос 1
Ангелов лицы ликовствующе служат Тебе, Владычице, и почитающе Тя, на руку Твоею носившую Творца видимыя и невидимыя твари, икону Твою с места на место преносят. Мы же, земнороднии, дивящеся чудному явлению иконы Твоея, Ангелы носимыя, вопием Ти сице:
Радуйся, всех Небесных Сил высшая;
Радуйся, вся ангельския чины превосходящая.
Радуйся, Честнейшая Херувим;
Радуйся, Славнейшая без сравнения Серафим.
Радуйся, радование Ангелов;
Радуйся, похваление ликов небесных.
Радуйся, от Ангелов воспеваемая.
Радуйся, от Серафимов прославляемая.
Радуйся, от Архангел поклоняемая;
Радуйся, от воинств небесных почитаемая.
Радуйся, в иконе Твоей от Ангел чтимая;
Радуйся, в видимем образе Твоем от невидимых сил носимая.
Радуйся, Владычице, милостивая о нас пред Богом Заступнице.
Кондак 2
Видяще рыбарие над пучиною вод носимую невидимою силою и светом подобно солнцу сияющую Твою, Богомати, икону с Предвечным Младенцем, рыбарей призвавшим на уловление мира в сети спасения, возопиша: Аллилуиа.
Икос 2
Разум недоразуменный дивнаго явления иконы Твоя разумети людие ищуще уведеша, яко чтимая в Цареграде пречестная икона в наследие российскому роду даровася. Темже мы, благодаряще за милость Твою к роду нашему, вопием Ти:
Радуйся, Мати истинныя жизни;
Радуйся, послушанием Твоим преслушание Евы исцелившая.
Радуйся, затворенный Эдем отверзшая;
Радуйся, миру явившая Сокрушителя главы змиевой.
Радуйся, ковчеже Умирителя мира носивший;
Радуйся, мир спасшая от потопления греховнаго.
Радуйся, лествице еюже сниде Бог;
Радуйся, земных возводящая на небо.
Радуйся, море фараона мысленнаго потопившее;
Радуйся, купино, неопалившаяся всельшимся в Тя огнем Божества.
Радуйся, скрижале Богописанная;
Радуйся, каменю, воду жизни источивший жаждущим.
Радуйся, Владычице, милостивая о нас пред Богом Заступнице.
Кондак 3
Сила Вышняго осеняше страну Тихвинскую егда икона Пречистыя Богоматере, многочастне являющися и временным пребыванием освящающи землю, к воздвизанию храмов святых возбуждаше, да славится имя Владычицы во славу Триипостаснаго Бога, Емуже вопием: Аллилуиа.
Икос 3
Имуще благоутробное изволение, да людие страны Тихвинския вожделеют пребывания Твоего с ними да памятуют выну покров Твой, икону Твою являла еси многочастне, дондеже указала еси богоизбранное место вселения ея. Темже чудящеся вопием Ти:
Радуйся, скиние, в нейже вселися Божество телесне;
Радуйся, святая святых, в неюже единою вниде вечный Архиерей.
Радуйся, кивоте позлащенный Духом, Законодателя носивший;
Радуйся, светильниче, огнем Божественным возженный.
Радуйся, стамно, носившая манну жизни Христа;
Радуйся, трапезо, хлеб животный вместившая.
Радуйся, кадильнице, угль Божества имущая, мир весь облагоухавшая;
Радуйся, жезле цвет, прозябший Христа.
Радуйся, столпе, к вечному наследию руководяй;
Радуйся, облаче, от враг видимых и невидимых покрываяй.
Радуйся, земле обетования;
Радуйся, руно, на негоже Христос, яко дождь сниде с небесе.
Радуйся, Владычице, милостивая о нас пред Богом Заступнице.
Кондак 4
Бурю смущения и скорби утолити тщащеся, благовернии людие взываше ко Господу: яви нам Божественный дар, егоже человеколюбие стране Российстей послал еси, не скрый сокровища, имже душевную нищету нашу обогатити надеяхомся, претвори печаль нашу в радость, отри слезы и рыдания. И улучивше желаемое, возопиша: Аллилуиа.
Икос 4
Слышав пастырь паствы своея радостное обретение и Матерь Пастыреначальника упасшуюся в странах Тихвинских, устрояет храм в честь новоявленныя иконы Ея, и пресвитеры учреждает, да выну прославляя Богоматерь вопиют Ей:
Радуйся, Дщи, приклонившая ухо ко гласу Отца Небеснаго;
Радуйся, яко праматернее сетование разрушися рождеством Твоим.
Радуйся, Невесто, Еяже доброты вожделе Царь Небесный;
Радуйся, Царице, одесную Царя представшая.
Радуйся, рясны златыми украшенная и всю славу внутрь имущая;
Радуйся, вводящая многих в чертог Царства Небеснаго.
Радуйся, яблоко, егоже благовоние обоняет весь мир;
Радуйся, крине чистоты, блистанием светящийся.
Радуйся, миро благовонное, всему миру излиянное;
Радуйся, царскую порфиру, плоть Творца всех, из девственных кровей Твоих исткавшая.
Радуйся, живый запечатленный источниче, источивший воду жизни;
Радуйся, мысленный винограде, гроздь Божественный возрастивший.
Радуйся, Владычице, милостивая о нас пред Богом Заступнице.
Кондак 5
Боготечная звезда явися икона Твоя, Богомати, вся страну Тихвинскую обтекающи, и сущих во тьме невежествия светом боговедения озаряющи, скорбящих радостию осиявающи, заблуждающих же на путь делания заповедей Сына Твоего и Бога наставляющи. Ему же благодарственне вопием: Аллилуиа.
Икос 5
Видев Георгий на кладе древа седящу Жену, жезл червленный в руках имущу и светом неизреченным сияющу, Ейже предстоя беседоваше дивный Святитель, позна чрез благоухание благодати Тя, Богородицу, чувственный зрак приимшую и Святителя Николая предстояща Тебе, и возопи со трепетом:
Радуйся, доме, егоже созда Себе для вселения Премудрость Божия;
Радуйся, Дево, Еммануила родившая.
Радуйся, жезле Иессеов, от негоже прозябе цвет Христос Бог;
Радуйся, Неневестная Невесто, осенением Духа заченшая Сына.
Радуйся, свитче, в немже перстом Отчим написася Слово;
Радуйся, книго девства запечатленная, Иосифу на хранение врученная.
Радуйся, клеще таинственная угль Божества во чреве приемшая;
Радуйся, престоле превознесенный, на немже плотию возседе Христос.
Радуйся, облаче легкий, на немже прииде Господь славы;
Радуйся, врата затворенная, имиже един Христос пройде.
Радуйся, горо несекомая, от неяже краеугольный камень отсечеся, Христос;
Радуйся, огнеросная пеще, неопально приимшая огнь Божества.
Радуйся, Владычице, милостивая о нас пред Богом Заступнице.
Кондак 6
Проповедник быв видимаго Твоего пребывания в стране Тихвинстей и дивнаго промышления о ней, благочестивый Георгий явление Твое и волю Твою людем возвести, ейже неповинующися чудесы вразумляются славити Тя, Владычице, и пети Богу: Аллилуиа.
Икос 6
Возсияти свету Богопознания явлением иконы Твоей изволившая, и свет иноческия жизни возжещи благоволила еси, Богомати, на месте явления Твоея иконы, да иноков лицы вопиют Ти непрестанно:
Радуйся, неплоднаго корене благоплодное прозябение;
Радуйся, от младенчества Богу посвященная.
Радуйся, во святем храме воспитавшаяся;
Радуйся, Богу уневестившаяся.
Радуйся, всеми добродетельми преукрашенная;
Радуйся, светоносная палато, Владыце уготованная.
Радуйся, благодатию Божию предочищенная;
Радуйся, от начала веков во главизну нашего спасения предызбранная.
Радуйся, Невесто Архитектона небеснаго, земному тектону на хранение врученная;
Радуйся, малый Назарет Своим пребыванием возвеличившая.
Радуйся, горних сил похвало;
Радуйся, всех земнородных слава.
Радуйся, Владычице, милостивая о нас пред Богом Заступнице.
Кондак 7
Хотящим преподобным Мартирию и Кириллу во уединении подвизатися и труды и подвиги иноческими Богу угождати, путь в место вожделеваемаго подвига в столпе огненнем и гласе указала еси. Они же познавше Тя, яко Одигитрию благую, спутьшествующую им, возопиша Богу: Аллилуиа.
Икос 7
Новый источник чудес в стране северней явися икона Твоя Тихвинская, Пресвятая Владычице, независтно точащий изцеления всем притекающим с верою: слепии бо презирают, немии благоглаголиви бывают, глусии слышат, разслаблении возстают, бесноватии от уз демонских свобождаются. Темже славяще Тя, возопием:
Радуйся, яко на Тебе почи благоволение Отчее;
Радуйся, Духом Святым осененная.
Радуйся, яко в Тебе воплотися Сын Божий, Спас миру;
Радуйся, совета неизреченнаго Таиннице.
Радуйся, от Ангела благовестие приимшая;
Радуйся, ангельским, еже радуйся, весь мир обрадовавшая.
Радуйся, яко Господь с Тобою;
Радуйся, яко Тобою вси земнороднии Богу приближишася.
Радуйся, Благословенная в женах;
Радуйся, всем женам благословение даровавшая.
Радуйся, Мати до рождества и по рождестве пребывшы Девою;
Радуйся, начаток чести и славы девства.
Радуйся, Владычице, милостивая о нас пред Богом Заступнице.
Кондак 8
Странно чудо явления образа Твоего, Владычице, и несказанно, удивляет премирная и ужасает земная, вкупе же и просвещает благодатию рождшагося от Тебе Христа Бога нашего. Странно и заступление обители от врагов, хвалившихся разорити достояние Твое. Сего ради вопием Богу: Аллилуиа.
Икос 8
Вся еси в вышних, Владычице, но и нижних не оставляеши, защищающи, аки стеною и забралом, честною иконою Твоею обитель Твою. Рекла бо еси, егда бысть нашествие вражие, да возмут людие икону Мою и обыдут по стенам окрест, и узрят милость Божию. Темже избавлении Тобою от враг возопиша Тебе:
Радуйся, Мати Творца и Господа Своего;
Радуйся, Еяже ради младенец Иоанн взыграся во чреве Елисаветы.
Радуйся, от всех родов ублажаемая;
Радуйся, смирением возвышенная.
Радуйся, небесным радование и земным мир рождением Твоим даровавшая;
Радуйся, от Ангелов славословие, от пастырей величание, от волхвов поклонение о рождении Твоем приимшая.
Радуйся, млеком питавшая горняя и дольняя благодатию Своею Питающаго;
Радуйся, пеленами повившая Одевающагося светом, яко ризою.
Радуйся, носившая на руку Твоею Носящаго весь мир дланию;
Радуйся, во храм принесшая священие храма.
Радуйся, Симеоном благословенная;
Радуйся, Анною пророчицею возвеличенная.
Радуйся, Владычице, милостивая о нас пред Богом Заступнице.
Кондак 9
Всякаго естества ангельскаго чистейши сущи, Владычице, обитель, ради пришествия Твоея иконы созданную, от нечистоты греховныя близ погибели бывшую, но покаянием очистившуюся, яко общая Молебница о роде христианском избавила еси от врагов, по подобию нечистых животных подкопати ю трудившихся. Темже вопием Богу: Аллилуиа.
Икос 9
Вития многовещанныя недоумеют воспети по достоянию множество чудес Твоих, Владычице, и тайны Твоего строения спасения человеков: ово бо благостию, ово же посещением наказаний руководиши людий на путь спасения. Зане необориму обитель сохранивши от врагов видимых, огненным очищением благоволила еси очистити от уязвлений врага невидимаго, вразумляя, яко чистота, воздержание и молитвы сердечныя угоднее Тебе паче хвалы единых точию уст. Темже вопием Ти:
Радуйся, Египет освятившая пришествием Твоим;
Радуйся, Галилейскую страну прославившая пребыванием Твоим.
Радуйся, по всему Иерусалиму искавшая Отроча Твое, Егоже возлюби душа Твоя;
Радуйся, в дому Отца Его обретшая Его.
Радуйся, вся глаголы о Сыне Твоем слагавшая в сердце Своем;
Радуйся, в Сыне Твоем прежде всех познавшая Бога.
Радуйся, Сыну Твоему послужившая в земнем житии Его;
Радуйся, страданием Его спострадавшая.
Радуйся, при Кресте Сына Твоего усыновление Иоанна Апостола и всех верующих приимшая;
Радуйся, матерински возлюбившая искупленных кровию Его.
Радуйся, первее всех уразумевшая тайну воскресения Сына Твоего;
Радуйся, премногий радости насладившаяся в вознесении Сына Твоего на небеса.
Радуйся, Владычице, милостивая о нас пред Богом Заступнице.
Кондак 10
Спасти хотящи многия люди от обдержащих их скорбей и болезней и веру их утвердити во всесильное заступление Твое, Владычице, во многих градех, обителех, весех православныя страны силу чудотворения даровала еси изображением честныя иконы Твоея, да видяще являемую Тобою милость, вопиют со умилением Богу: Аллилуиа.
Икос 10
Стена и щит была еси, Владычице, православному воинству, под знамением Твоея иконы противу двадесяти язык воинствовавшему, сохраняя его от стрел вражиих. Темже буди стена и покров от всех врагов видимых и невидимых и нам, ко пречестней иконе Твоей с верою и любовию припадающим и вопиющим Тебе:
Радуйся, утешение верным по вознесении Сына Твоего;
Радуйся, Учительнице и Споспешнице Апостолом.
Радуйся, извещением Твоего к Богу отшествия обрадованны;
Радуйся, лик ученический облаком к погребению Ти совокупльшая.
Радуйся, от земли дланьми Сына Твоего восприемлемы;
Радуйся, от всех ангельских чиноначалий провождаемая.
Радуйся, земное небо к горнему селению возвышенное;
Радуйся, престоле Господень, от земли вознесенный в Царствие Небесное.
Радуйся, воздух освятившая восхождением Твоим;
Радуйся, чрез Фому уверившая Твое на небо с плотию преселение.
Радуйся, ученическому лику обещание хранити его исполньшая;
Радуйся, присещением Твоим от Сына Твоего и Бога мир тому подавшая.
Радуйся, Владычице, милостивая о нас пред Богом Заступнице.
Кондак 11
Пение всякое побеждается, спростретися тщащеся ко множеству чудес, приснобываемых от святыя Твоея и чудотворныя иконы. Якоже бо скорая Помощница недуги исцеляеши, от бед избавляеши, от мучения демонов свобождаеши, на всяком месте с верою Тя призывающих и вопиющих Богу: Аллилуиа.
Икос 11
Светоприемную свещу зрим святую икону Твою, Богомати, во странах Тихвинских благодатию Твоею возженную, всю страну просвещающую и многих ко свету своему привлекающую на спасение душ. Темже вопием Ти:
Радуйся, сохраняти и спасати всех призывающих Тя обещавшая;
Радуйся, прославляющих Тя прославляющая.
Радуйся, к Сыну Твоему и Богу молитвы верных приносящая;
Радуйся, и Сама непрестанно у престола Сына Твоего и Бога молящаяся о всех.
Радуйся, благодать Твою иконам Твоим честным даровавшая;
Радуйся, всю вселенную лучами Твоея благодати озарившая.
Радуйся, Честнейшая Херувим и Славнейшая Серафим;
Радуйся, всея твари высшая.
Радуйся, Царице Неба и земли;
Радуйся, яко много может молитва Твоя пред Сыном Твоим.
Радуйся, всего рода христианскаго скорое заступление;
Радуйся, всех верных твердое упование.
Радуйся, Владычице, милостивая о нас пред Богом Заступнице.
Кондак 12
Благодати Твоея новое знамение дати восхотев, Петрову граду источник чудес отверзла еси, Богомати, в иконе Твоей, да верующии вразумляются, труждающиися и скорбящии обретуют готовое прибежище и заступление, прославляющи Бога даровавшаго таковая, вопиют Ему: Аллилуиа.
Икос 12
Поюще чудеса Твоя и милости роду нашему явленныя, умильно припадаем к пречистому образу Твоему, Владычице, и лобызающе, со страхом и любовию молим Тя: настави нас на путь спасения, да достойни будем выну Твоего милостиваго заступления, буди присно Заступница и Ходатаица о нас, вопиющих Ти:
Радуйся, верных утверждение и защищение;
Радуйся, неверных вразумление и просвещение.
Радуйся, отчаянных Надеждо;
Радуйся, грешных спасение.
Радуйся, печальных утешение;
Радуйся, больных изцеление.
Радуйся, вдов и сирот покрове;
Радуйся, обидимых прибежище.
Радуйся, царей укрепление;
Радуйся, святителей удобрение.
Радуйся, девствующих похвало;
Радуйся, всех благочестивых веселие.
Радуйся, Владычице, милостивая о нас пред Богом Заступнице.
Кондак 13
О Всепетая Мати, рождшая всех святых Святейшее Слово, нам покров и защищение в жизни сей от врагов видимых и невидимых, от бед и скорбей, сохрани от искушений и грехопадений, и в будущей жизни, на суде Сына Твоего и Бога нашего, буди Заступница и Ходатаица, избавляющи нас от вечнаго осуждения, да спасеннии Тобою, с лики ангельскими вопием Богу: Аллилуиа.
(Этот кондак читается трижды, затем икос 1 и кондак 1)
МОЛИТВА ПЕРВАЯ
О Пресвятая Дево, Мати Господа вышних сил, Небесе и земли Царице, града и страны нашея Всемощная Заступнице. Приими хвалебно-благодарственное пение сие от нас недостойных раб Твоих и вознеси молитвы наша ко престолу Бога Сына Твоего, да милостив будет неправдам нашим и пробавит благость Свою чтущим всечестное имя Твое и с верою и любовию поклоняющимся чудотворному образу Твоему. Несмы бо достойни от Него помиловани быти, аще не Ты умилостививши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорой Заступнице нашей; услыши нас молящихся Тебе, осени нас вседержавным покровом Твоим и испроси у Бога Сына Твоего пастырем нашим ревность и бдение о душах, градоправителем мудрость и силу, судиям правду и нелицеприятие, наставником разум и смиреномудрие, супругам любовь и согласие, чадам послушание, обидимым терпение, обидящим страх Божий, скорбящим благодушие, радующимся воздержание: всем же нам дух разума и благочестия, дух милосердия и кротости, дух чистоты и правды. Ей, Госпоже Пресвятая, умилосердися на немощныя люди Твоя: разсеянныя собери, заблуждшыя на путь правый настави, старость поддержи, юныя уцеломудри, младенцы воспитай, и призри на всех нас призрением милостиваго Твоего заступления, воздвигни нас из глубины греховныя и просвети сердечныя очи наша к зрению спасения, милостива нам буди зде и тамо, в стране земнаго пришельствия и на страшнем суде Сына Твоего: преставльшыяся же в вере и покаянии от жития сего отцы и братию нашу в вечней жизни со Ангелы и со всеми святыми жити сотвори. Ты бо еси, Госпоже, слава Небесных и упование земных. Ты по Бозе наша Надеждо и Заступница всех притекающих к Тебе с верою. К Тебе убо молимся, и Тебе, яко Всемогущей Помощнице, сами себе и друг друга и весь живот наш предаем, ныне и присно, и во веки веков. Аминь.
МОЛИТВА ВТОРАЯ
Благодарим Тя, о Преблагая и Пречистая, Преблагословенная Дево, Владычице, Мати Христа Бога нашего, о всех благодеяниих Твоих, яже показала еси роду человеческому, наипаче же нам, христоименитым людем российскаго народа, о нихже ниже самый ангельский язык к похвалению доволен будет. Благодарим Тя, яко и ныне удивила еси неизреченную Свою милость на нас, недостойных рабех Твоих, преестественным самопришествием пречистыя Твоея иконы, еюже всю просветила еси Российскую страну; темже и мы, грешнии, со страхом и радостию покланяющеся, вопием Ти: о Пресвятая Дево, Царице и Богородице, спаси и помилуй вся люди, и подаждь им победы на вся враги их, и сохрани вся грады и страны христианския, и сей святый храм от всякаго навета вражия избави, и всем вся на пользу даруй, ныне пришедшим с верою и молящимся рабом Твоим, и покланяющимся пресвятому образу Твоему: яко благословенна еси с Рождшимся от Тебе Сыном и Богом, ныне и присно и во веки веков. Аминь.
ТРОПАРЬ
Тропарь, глас 4
Днесь яко солнце пресветлое возсия нам на воздусе всечестная икона Твоя, Владычице, лучами милости мир просвещающи, юже великая Россия, яко некий дар Божественный свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих, и спасет верою покланяющихся Его Божественному и Твоему пречистому образу, Дево Неискусобрачная.
Кондак, глас 8
Притецем, людие, к Деве Богородице Царице, благодаряще Христа Бога, и к Тоя чудотворней иконе умильно взирающе припадем, и возопием Ей: о Владычице Марие! Присетивши страну сию Твоего честнаго образа явлением чудесно, спасай в мире и благовременстве вся христианы, наследники показующи небесныя жизни. Тебе бо верно зовем: радуйся, Дево, мира спасение.
КАНОН
Тихвинской иконе Божией Матери
Тропарь, глас 4-й
Днесь, яко солнце пресветлое, возсия нам на воздусе всечестныя икона Твоя, Владычице, лучами милости мир просвещающи, яже великая Россия, яко некий дар Божественный свыше благоговейне восприемши, прославляет Тя, Богомати, всех Владычицу, и от Тебе рождшагося Христа Бога нашего величает радостно. Емуже молися, о Госпоже Царице Богородице, да сохранит вся грады и страны христианския невредимы от всех навет вражиих и спасет верою покланяющихся Его Божественному и Твоему пречистому образу, Дево Неискусобрачная.
КАНОН, ГЛАС 4-й
Песнь 1
Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.
Припев: Пресвятая Богородице, спаси нас.
Даждь ми, Светодавче Христе, в нарочитый день преславнаго явления иконы, Рождшия Тя, светло торжествовати и весело во страсе и радости воспевати присно Тоя чудеса.
Пресвятая Богородице, спаси нас.
Слово Божие Светодательное и Премудрость Отчую плотию, Дево, рождшая, просвети глубокую тьму моего неразумия и слово ми подаждь воспети Твоя чудеса.
Слава: Днесь верных собори просвещаются, еретическая же ополчения посрамляются, видяще икону твою, Владычице, яко солнце, по воздуху шествующу, нечестия мглу потребляющу и верныя просвещающу.
И ныне: Едина еси Ты величие наше и похвала с Богом, Богоневестная, Тобою бо от бед спасаемся, и к Тебе прибегаем, и прилежно молимся: избави, Владычице, рабы Твоя вечнаго мучения, воспевающия Твоя чудеса.
Песнь 3
Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.
Пресвятая Богородице, спаси нас.
Христе Иисусе, Превечный Царю и Многомилостиве, пречестнаго Твоего образа и рождшия Тя Приснодевы просвети нас явлением и подаждь нам согрешений оставление и от бед избавление.
Пресвятая Богородице, спаси нас.
Егда Ангелами невидимо носиму пречестную Твою икону, Владычице, и светозарно стоящу на воздусе людие видеша, тогда, просветившеся светом Твоея милости, радости неизглаголанныя исполняшася.
Слава: О Боголюбивии святителие и священицы, монаси и простии и народи вси, светло ликовствуйте днесь, яко возсия на высоте Заря светоносная, держащи Истиннаго Света, изображена плотию, с Нимже сниде к нам, подающи всему миру просвещение.
И ныне: Твоею, Дево, всечестною иконою древле Творец всех чудодействова, спасе Царский град от иноплеменных нахождения; сице и Российстей стране буди, Госпоже Царице, покров и заступление, спасающи ю от всех навет вражиих.
Господи, помилуй (трижды). Слава, и ныне:
Седален, глас 4-й
Яко древняго воистинну кивота честнейший Твой пречистый образ, Владычице! Паче бо илектра блистаяся, повсюду неоскудно лучи милости Твоея всем, являя, простирает и чтущия преславное пришествие его благодатию Божиею милостивно соблюдает. О немже, Владычице, мы, радующеся, усердно празднуем и матернее Твое к нам милосердие прославляем
Песнь 4
Ирмос: Седяй в Славе на Престоле Божества во облаце легце, прииде Иисус Пребожественный Нетленною дланию и спасе зовущия: Слава, Христе, силе Твоей.
Пресвятая Богородице, спаси нас.
Земля убо вся днесь да возвеселится, вкупе же и воздух, и море да кропит радование, яко всечестнаго образа Богоматере чудесным шествием Российская страна преславно озарися.
Пресвятая Богородице, спаси нас.
Раболепно служат и Ангельстии чинове Тебе, всех Царице, и благоговейно почитают всечестную Твою икону, воспевающе Тя, Пресвятую Деву, мы же, смиреннии, како Тебе, Всечистую, достойно пети возможем?
Слава: Архангельскую песнь, еже радуйся, Тебе зовем, Богоневесто, Господь с Тобою, радуйся, радосте Ангелов и всех человеков, славящих Тя, воистинну веселие, спаси души поющих Тя, Богородице Чистая.
И ныне: О Богородительнице, радости Подательнице, верою славящия Тя и от души поющия радости неизреченныя исполни и Света Невечерняго сподоби, Дево Благодатная, Владычице.
Песнь 5
Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Пресвятая Богородице, спаси нас.
В пустыни явленно Тебе, Богомати, со святителем благоговейный узрети муж сподобися и благоволения Твоего глаголы от Тебе, Царице, восприят, на большее утверждение и в пользу миру спасения.
Пресвятая Богородице, спаси нас.
Окаянен убо аз, Всечистая, и недостоин таковыя ныне благодати еже Тя видети, но поне в будущем сподоби мя узрети Тя, и Сына Твоего усрести, грядуща во славе, и глас Божественный услышати, зовущ во Царство Небесное.
Слава: Прибегаем к Твоей, Дево, благости, и очи сердец наших воспущаем к Тебе, Чистая, и, с плачем колена преклоняюще, молим Тя: не презри нашего воздыхания и буди нам покров и Помощница в День судный.
И ныне: Едина еси всех Предстательница христиан, Богомати Пречистая, услыши наше моление, воззри на ны, Всепетая, спаси град и обитель Твою и озари стадо Твое зарею благодати Твоего заступления.
Песнь 6
Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.
Пресвятая Богородице, спаси нас.
О, предивнаго Твоего чудесе, Владычице! Яко за преслушание Твоего повеления ужасно человек с главы церковныя восхищен быв, на земли невредим обретеся, милостию Твоею, Всемилостивая.
Пресвятая Богородице, спаси нас.
Никтоже тако преслуша Божественная повеления, якоже аз, окаянный. Тем, Ти припадая, молюся, Владычице: прежде даже до конца не погибну, настави мя на истинный путь и спаси мя, Чистая.
Слава: Ты, о Богомати, рождшая Претерпевшаго нас ради на Древе Крестнем распятие, умоли присно нам, страдание Его святое помнящим, волю Его Божественную творити и вечных благ наследниками быти.
И ныне: Владычице, Дево Чистая, избави нас лютых всех, умоляющи Пригвоздившаго на Кресте грехи наша, и сподоби нас достойно одесную Его стати, егда приидет во славе Своей.
Господи, помилуй (трижды). Слава, и ныне:
Кондак, глас 8-й
Притецем, людие, к Деве Богородице Царице, благодаряще Христа Бога, и к Тоя чудотворней иконе, умильно взирающи, припадем и возопием Ей: о Владычице Марие, присетивше страну сию Твоего честнаго образа явлением чудесно, спасай в мире и благовременстве отечество наше и вся христианы, наследники показующи Небесныя жизни, Тебе бо верно зовем: радуйся, Дево, мира спасение.
Икос
Пречудное явление Богоматере видяще, на высоту добродетелей взыдем и ум на Небо возведем. Сего бо ради небошественне прииде, да привлечет к высоте вопиющия Ей сице: радуйся, благословенная Дево, от всех родов Богом избранная; радуйся, Небесная Царице, Господа Бога Мати и Творца всяческих. Радуйся, всерадостное Ангелом пение; радуйся, всежелательное всего мира зрение. Радуйся, неподвижимое веры благочестия основание; радуйся, всесветлое благодати познание. Радуйся, Божие к земным благоволение; радуйся, земных к Богу возведение. Радуйся, озлобленным душам утешение; радуйся, всем верным скорое поможение. Радуйся, дарованная от Бога Предстательнице роду христианскому, егоже и соблюдай прилежно от всяких бед и зол, да зовем Ти: радуйся, Дево, верным спасение.
Песнь 7
Ирмос: Не послужиша твари Богомудрии паче Создавшаго, но, огненное прещение мужески поправше, радовахуся поюще: препетый отцев Господь и Бог, благословен еси.
Пресвятая Богородице, спаси нас.
Единочадый Твой Сын и Бог всех, Богомати, пречистый Твой образ невредим сохрани во пламени, о, чудесе! Благодатию паче солнца обретеся сияющ, и верныя просвещающ верою поющия: Боже, благословен еси.
Пресвятая Богородице, спаси нас.
Небеснии Чинове веселятся с земнородными, Богородице, в светлом торжестве Твоем, еже совершающия ны и со страхом предстоящия пред пречистым Твоим образом просвети светом сияния Твоего, Пречистая, и вся спаси.
Слава: Единаго от Троицы Бога Слова, Царя Небеснаго, плотию, Царице, родила еси, Того моли, Владычице, воинству нашему подати одоление на противныя и всем верным помощь, грехов оставление и душам спасение.
И ныне: Рабы Твоя, Чистая, поющия Тя и верою несумненною молящияся Тебе, светодательною Твоею и Божественною осени благодатию, яко Благодетеля всех рождшая, и покрый и сохрани от всех навет вражиих.
Песнь 8
Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Пресвятая Богородице, спаси нас.
О, преславных чудес Твоих, Чистая! Яко здатели святыя церкве Твоея, под камением тридневно бывшии, обретошася живи и безвредни, покровом соблюдени, Тебе, всех Царице, возсылающе гласы похвальныя.
Пресвятая Богородице, спаси нас.
Жизнь вместо смерти даровала еси, Богородице, мертвенному существу. Темже и нас, умерщвленных грехи многими, Богоневесто, неврежденны от враг соблюди и к жизни лучшей возведи, спасающи души наша.
Слава: Днесь исполняшася радости и веселия вси вернии о иконе Твоей, Богородице, яко в челюстех смерти бывшим явилася еси Жизни Виновница и источник приснотекущий, целебныя дары всем точащий и спасение подающий.
И ныне: Изрядно воспета пречистаго Твоего образа и рождшагося из Тебе Младенца, истинна же Бога, чудныя иконы преславное пришествие совокупльшихся людей отвсюду, Всепетая, моление приими и прошения исполни.
Песнь 9
Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.
Пресвятая Богородице, спаси нас.
Явлению, Владычице, всечестныя Твоея иконы кто не удивится или кто не почудится? По воздуху бо сию, яко некий дар светоносный, низпослала еси земли Российстей, радостно поющей Тя и верно величающей.
Пресвятая Богородице, спаси нас.
Радость миру, Дево, неизглаголанную даровавши явлением пречистыя Твоея иконы, избави, Владычице, от всякия печали верою покланяющияся ей и со страхом целующия ю: о Пресвятая! вся спаси и помилуй и Царствия Небеснаго сподоби.
Слава: Рождшая, Владычице, Человеколюбца Бога, за человеколюбие посетила еси нас Божественною Твоею иконою, к нейже всегда притекающе и благолепие ея зряще, Тебе умильно вопием: спасай присно, Богородице, достояние Твое.
И ныне: Устнами смиренными принесох Ти препростое сие, Всепетая, пение: понеже груб есмь, многогрешный, и недостоин по достоянию воспети Тя, но от усердия на Твоя щедроты надеяся, яко Спасителя всего мира родила еси, не возгнушайся, Царице, приими сие и спаси мя.
Фотография иконы: http://days.pravoslavie.ru/images/all.htm
История иконы: http://iconkuznetsov.ru/index.php?sid=341&did=7
