Почаевская икона Божией Матери
 
 
 







Почаевская икона Божией Матери PDF Печать E-mail
Молитвы и о молитвах - Молитвы и акафисты перед иконами Божией Матери
16.06.2012 12:40

Почаевская икона Божией Матери

 

Почаевская икона Божией Матери

 

3p

 

(23 июля / 5 августа; 8 / 21 сентября)

 

    Почаевская икона Божией Матери принадлежит к числу наиболее чтимых святынь Русской Церкви. Она известна всему славянскому миру: ее чтут в России, в Боснии, Сербии, Болгарии и других местах. Наряду с православными на поклонение чудотворному образу Пресвятой Богородицы приходят и христиане других исповеданий. В Почаевской Лавре, древнем оплоте Православия, чудотворная икона пребывает около 400 лет. (Сведения о перенесении иконы в Почаевскую обитель помещены 8 сентября). Чудеса, проистекающие от святой иконы, многочисленны и засвидетельствованы в монастырских книгах записями верующих, с молитвою обращавшихся об избавлении от неизлечимых недугов, освобождении от плена и вразумлении грешников.

    Празднование в честь Почаевской иконы Божией Матери 23 июля было установлено в память избавления Успенской Почаевской Лавры от турецкой осады 20–23 июля 1675 года.
Летом 1675 года во время Збаражской войны с турками, в царствование польского короля Яна Собесского (1674–1696), полки, состоящие из татар, под предводительством хана Нурредина, через Вишневец подступили к Почаевской обители, обступив ее с трех сторон. Слабая монастырская ограда, как и несколько каменных зданий обители, не представляла никакой защиты для осаждаемых. Игумен Иосиф Добромирский убедил братию и мирян обратиться к небесным заступникам: Пресвятой Богородице и преподобному Иову Почаевскому (память 28 октября). Иноки и миряне усердно молились, припадая к чудотворному образу Божией Матери и к раке с мощами преподобного Иова. Утром 23 июля с восходом солнца татары держали последний совет о штурме обители, игумен же велел петь акафист Божией Матери. С первыми словами «Взбранной Воеводе» над храмом внезапно явилась Сама Пречистая Богородица, «омофор белоблистящийся распуская», с небесными ангелами, держащими обнаженные мечи. Преподобный Иов находился близ Божией Матери, кланяясь Ей и молясь о защите обители. Татары приняли небесное воинство за привидение, в смятении стали стрелять в Пресвятую Богородицу и преподобного Иова, но стрелы возвращались назад и ранили тех, кто их пускал. Ужас охватил неприятеля. В паническом бегстве, не разбирая своих, они убивали друг друга. Защитники монастыря устремились в погоню и захватили многих в плен. Некоторые пленные впоследствии приняли христианскую веру и остались в обители навсегда.

    В 1721 году Почаев был занят униатами. Однако и в это трудное для Лавры время монастырская летопись зафиксировала 539 чудотворений от прославленной православной святыни. Во время господства униатов, во второй половине ХVIII века, например, граф-униат Николай Потоцкий стал благотворителем Почаевской Лавры по следующему чудесному обстоятельству. Обвинив своего кучера в том, что взбесившиеся лошади перевернули коляску, граф достал пистолет, чтобы убить его. Кучер, обратясь к Почаевской горе, поднял руки вверх и воскликнул: «Матерь Божия, явленная в иконе Почаевской, спаси меня!» Потоцкий несколько раз пытался выстрелить из пистолета, никогда ему не изменявшего, но оружие делало осечку. Кучер остался жив. Потоцкий немедленно отправился к чудотворной иконе и решил себя и все свое имущество посвятить на устроение обители. На его средства построены Успенский собор и братский корпус.

    Возвращение Почаева в лоно Православия в 1832 году было ознаменовано чудесным исцелением слепой девочки Анны Акимчуковой, пришедшей на поклонение святыням с семидесятилетней бабушкой за 200 верст из Кременец-Подольска. В память этих событий архиепископ Волынский священноархимандрит Лавры Иннокентий (1832–1840) установил еженедельное, по субботам, чтение соборного акафиста перед чудотворной иконой. Во время управления Лаврой священноархимандритом Агафангелом, архиепископом Волынским (1866–1876) был устроен особый придел на хорах Свято-Троицкой церкви в память победы над татарами, освященный 23 июля 1875 года.

 

 

 

АКАФИСТ

 

Кондак 1

Взбранной Воеводе родов христианских и страны нашея известней Избавительнице хвалебныя песни принесем, вернии, на святей горе Ея собравшеся; Ты же, яко имущая милосердие неизреченное, О Владычице Богородице, моления нашего пред чудотворным Твоим образом возносимаго не отвержи, да в умилении сердец зовем Ти: Радуйся, Похвало Почаевская и всего мира Надеждо и Утешение.

 

Икос 1

Архангел Гавриил первее радуйся Тебе приношаше, Владычице, егда зачатие Сына Божия благовествоваше, по преславнем же Успении Твоем вся Небесныя силы туюжде хвалу на Небеси Тебе непрестанно приносят; како убо мы, грешнии, своя гласы с гласы Безплотных совокупити дерзнем? Обаче милосердие Твое ко всем кающимся поминающе, устне наша со страхом и любовию отверзаем, глаголюще сице:

Радуйся, милости бездно;

Радуйся, любве неистощимое море.

Радуйся, рода христианскаго Благая Предстательнице;

Радуйся, обители Почаевския стено нерушимая.

Радуйся, православныя люди на гору Почаевскую узами любве привлекающая;

Радуйся, всякую печаль от душ их отгоняющая.

Радуйся, Еяже чудотворный образ, яко звезда, от горы Почаевския нас путеводствует;

Радуйся, Ейже возносимыя молитвы страстныя прилоги вскоре отражают.

Радуйся, явлением Своим на горе сей люди утешившая;

Радуйся, след стопы Твоея на ней нам оставившая.

Радуйся, верных присное дерзновение;

Радуйся, сумнящихся доброе утверждение.

Радуйся, Похвало Почаевская и всего мира Надеждо и Утешение.

 

Кондак 2

Видевше пустынницы почаевстии и простец Иоанн босый Пресвятую Богородицу на скале во огненном столпе явльшуюся, след стопы Ея налобызаху и водою, зде камени истекшею, окропляяся, вопияху Богу: Аллилуиа.

 

Икос 2

Разум недоразумеваемый о явлении Твоем, Владычице, ищуще, в сицевом уповании утверждается, яко первее от агарян, послежде от еретиков оплот Православия на горе Почаевстей утвердити благоволила еси, сего ради в Твой святый храм приходяще, теплою верою сердца наша исполняем, глаголющи:

Радуйся, истинныя веры утверждение;

Радуйся, зловерия явное обличение.

Радуйся, древле в Неопалимей Купине Синайстей известившаяся;

Радуйся, христианом в столпе огненном зде явившаяся.

Радуйся, яко в пещи горящей, росою спасении, Авраамстии отроцы Тя предвозвестиша;

Радуйся, яко водою от следа стопы Твоея исцелении благодать Твою проповедаша.

Радуйся, землю нашу, древле от агарян разоренную, явлением Твоим тогда утешившая;

Радуйся, и ныне многими знаменьми молящияся зде ободряющая.

Радуйся, кающихся скорое услышание;

Радуйся, подвизающимся помощь и прибежище.

Радуйся, и неведущих вразумление;

Радуйся, и малодушных укрепление.

Радуйся, Похвало Почаевская и всего мира Надеждо и Утешение.

 

Кондак 3

Силу сугубыя благодати явила еси, Владычице, на горе Почаевстей, егда место явления Твоего по триех стех летех чудотворною иконою Своею обогатила еси, юже рукою святителя Неофита Еллина, из Москвы грядущаго, первее боярине Анне даровала еси, потом же от нея во обитель Почаевскую прияла еси, радующимся людем и поющим Богу: Аллилуиа.

 

Икос 3

Имущи в дому своем икону Твою, Владычице, бояриня Анна, и исцеление от нея слепорожденному брату своему Филиппу бывшее уведевши, абие духом ревности о славе Твоей возгоре и обитель из камене во имя Пречестнаго Успения Твоего пустынником почаевским устрояет, в ней же чудотворному образу Твоему поклоняющися взывает сице:

Радуйся, сокровище богатное в Твоей святей иконе нам преподавшая;

Радуйся, святителя рукою дарованным образом Твоим землю нашу освятившая.

Радуйся, души наша от земнаго богатства отвращающая;

Радуйся, Славу Божию пети нас научающая.

Радуйся, яко чудеса Твоя зряще, к Небеси сердцы своими восхищаемся;

Радуйся, яко во обители Твоей, аки в преддверии рая обретаемся.

Радуйся, православныя люди иконою Твоею утешившая;

Радуйся, от всех стран молящияся люди во обитель Почаевскую призывающая.

Радуйся, еюже вера умножается;

Радуйся, еюже уныние отгонится.

Радуйся, иноков почаевских присное Радование;

Радуйся, мирских людей непостыдное Упование.

Радуйся, Похвало Почаевская и всего мира Надеждо и Утешение.

 

 

Кондак 4

Буря еретическаго неистовства на святую обитель Твою устремившися, Владычице, святую икону Твою рукою злых иконоборцев пленивши и на злохуление тех подвигши, вскоре гневом Божиим удержана бысть, егда невидимая сила безстудне пиршествующия хульники, аки Артаксеркса и Ирода, сляче и в недуг вверже, над святынею Твоею ругавшихся и не уведевших пети: Аллилуиа.

 

Икос 4

Слышаша иноцы почаевстии и вси православнии людие, яко святая икона Твоя по седминадесятих летех еретическаго пленения во святую обитель от посрамленных хулителей возвращается, абие на сретение ея изыдоша и плач свой на радость преложше, вопияху Тебе:

Радуйся, христианом прибежище;

Радуйся, еретиков обличение.

Радуйся, обитель Почаевскую иконы Твоея до конца не лишившая;

Радуйся, злохуление иконоборцев посрамившая.

Радуйся, яко в бедах не унывати и нас научаеши;

Радуйся, яко Правосудию Божию веровати нам повелеваеши.

Радуйся, Еюже Православие во стране нашей утвердися;

Радуйся, Еюже и вся вселенная воплощенную истину прияти сподобися.

Радуйся, долготерпение Божие подражающая;

Радуйся, в терпении люди Твоя утверждающая.

Радуйся, яко смиреннии Тобою утешение приемлют;

Радуйся, яко горделивии Тобою смиряются.

Радуйся, Похвало Почаевская и всего мира Надеждо и Утешение.

 

Кондак 5

Боготечная звезда ищущим спасения явилася еси, Владычице, к Солнцу Правды сих приводящая, якоже бо в земнем житии Твоем о людех Предстательница к Сыну Твоему в Кане Галилейстей показалася еси, тако и по преславном Твоем на Небеса отшествии, моления о верных от конец земли приносимая к Сыну Твоему возносиши и зде, на горе Почаевстей, исцеления многоразличная от Него людем подаеши, вопиющим Богу: Аллилуиа.

 

 

Икос 5

 

Видеша людие, на гору Почаевскую, якоже в древняя, тако и в последняя лета притекающии, множества исцелений, Тобою подаваемая, в желании спасения души своя утверждаху и о гресех своих покаяние теплое приношаху, вопиюще Тебе:

Радуйся, слепых прозрение и хромых исцеление;

Радуйся, бесных от демонов избавление.

Радуйся, плененнаго инока во обитель Твою на воздусе чудесне возвратившая;

Радуйся, младенца Симеона предумерша по молитве старицы воскресившая.

Радуйся, яко в сих знамениих сила древних чудес Твоих людем паки явися;

Радуйся, яко исцеления от святыя иконы Твоея и в последняя дни не оскудеша.

Радуйся, во всем мире источник исцелений от святых икон Твоих подающая;

Радуйся, паче сих духовными дарованьми молящияся обогащающая.

Радуйся, Еюже православнии роди хвалятся;

Радуйся, к Еяже помощи и маловернии притекают.

Радуйся, земнородных упование;

Радуйся, Небесных чинов радование.

Радуйся, Похвало Почаевская и всего мира Надеждо и Утешение.

 

Кондак 6

Проповедницы славы Пречистыя Девы явишася агаряне на обитель Почаевскую нашедшии и видения Пречистыя Богородицы с преподобным Иовом первее не уразумевшии; егда бо стрелы, от них пущаемыя, паки на ня устремишася, абие силу Владычицы проразумевше и покаяние о безумии своем принесше, верою возопиша: Аллилуиа.

 

 

Икос 6

 

Возсия видение Твое, Владычице, на горе Почаевстей, егда братия обители, зело от агарян осаждаема, с велиим воплем моление пред святою Твоею иконою и пред ракою преподобнаго Иова возношаше, егда же братия агаряны, видением сим смятенныя и бежащия, виде, абие с веселием воспе Тебе сице:

Радуйся, Избавительнице наша и спасение;

Радуйся, рода христианскаго присное вспоможение.

Радуйся, нечестивыя враги от Твоея святыни отгнавшая;

Радуйся, в покаяние их приводящая.

Радуйся, Еяже и невидимии спасения нашего врази трепещут;

Радуйся, Ейже Святии Ангели и преставльшиися праведницы на Небеси поклоняются.

Радуйся, преподобнаго Иова в молитву с Собою приемшая;

Радуйся, агаряны ко Святому Крещению видением Своим приведшая.

Радуйся, яко Тобою вернии страх смертный в конец отложиша;

Радуйся, яко Тебе ради нецыи от агарян богобоязненнии иноцы зде явишася.

Радуйся, истины присное изъявление;

Радуйся, заблуждающимся доброе вразумление.

Радуйся, Похвало Почаевская и всего мира Надеждо и Утешение.

 

Кондак 7

Хотящи желание Вечнаго Живота возгрети в сердцах христианских, Пресвятая Богородица болящия чудесы Своими исцеляет, бесы изгоняет, плененныя свобождает, мертвыя воскрешает, да мы вси, силу Божию уразумевше, земная возненавидим и о душах своих попечение приложим, непрестанно вопиюще Богу: Аллилуиа.

 

 

Икос 7

Новыя и тягчайшия беды претерпе обитель Почаевская, егда вкупе со всею страною от Православия лестию отторженная во обладание еретиков вдадеся, обаче прошедшим стом и десятим летом паки православным христианом вдана бысть, в нюже православнии иноцы, пришедше и святыя мощи преподобнаго Иова из-под спуда изъемше, к чудотворному образу Владычицы припадаху, глаголюще:

Радуйся, Православия защитнице;

Радуйся, еретиков обличительнице.

Радуйся, обитель Твою до конца не оставившая;

Радуйся, страху Божию нас научающая.

Радуйся, яко предстательством Твоим страна Волынская паки ко Православию возвратися;

Радуйся, яко от лет древних мнозии еретицы Твоим вразумлением исправишася.

Радуйся, во святую Лавру Твою верных на молитву паки призывающая;

Радуйся, и неверныя зде поклонятися православней святыне научающая.

Радуйся, Юже праведницы и праведнии непрестанно воспевают;

Радуйся, в Нейже и падшии в покаянии притекают.

Радуйся, отступников к вере возвращение;

Радуйся, прельщаемых к свету истины возведение.

Радуйся, Похвало Почаевская и всего мира Надеждо и Утешение.

 

Кондак 8

Странное чудо зрим о Тебе, Богомати, елико бо телеснии недузи святыя Твоея иконы целованием и воды почаевския кроплением исцеляются, тако и душевныя страсти видением святыни Твоея отъемлются, вера утверждается и умиления сердца наша исполняются, поющих Богу: Аллилуиа.

 

Икос 8

Весь аз недостойный грехами исполнился, мирскому рассеянию вдався и о души своей вознерадев, обаче на святую икону Твою, Владычице, взирая, и просвещение от нея безчисленным людем, зде приходящим, видя, паки на путь спасения устремляюся и в радости сердца воспеваю Ти сице:

Радуйся, чистоты сокровище;

Радуйся, милостей бездно.

Радуйся, к Сыну Твоему о верных моления выну приносящая;

Радуйся, моления грешных не отвергающая.

Радуйся, яко Тобою мнози отчаяния греховнаго избегоша;

Радуйся, яко призывающии имя Твое от падения страннаго возсташа.

Радуйся, Еюже иконоборная ересь во вселенней посрамися;

Радуйся, Еюже истинная вера Волынской стране возвратися.

Радуйся, к подвигу целомудрия души возводящая;

Радуйся, обидящим прощати научающая.

Радуйся сердец наших умиление;

Радуйся, душ наших упование.

Радуйся, Похвало Почаевская и всего мира Надеждо и Утешение.

 

Кондак 9

Всякия отступства и еретическая блуждания покаявшемуся народу земли Волынския отпустила еси, Владычице, и паки источник исце-лений от чудотворныя Твоея иконы от следа стопы Твоея на горе Почаевстей в православной Лавре Твоей людем открыла еси, токмо аще покаяние о гресех своих принесут Богу и о Твоей помощи не сумнящеся, возопиют ему: Аллилуиа.

 

Икос 9

Ветия славы Твоея явишася, Владычице, слепии и хромии исцеление от Твоея иконы, православным людем возвращенныя, приявшии, яко и еретической жене некоей болящей, Тя в помощь призвати и по исцелении истинную веру исповедати и облобызати, нам же вопити Тебе сице:

Радуйся, Царя Небеснаго умоление:

Радуйся, земных присное предстательство.

Радуйся, от лютерских заблуждений жену некую недуга исцелением отвратившая;

Радуйся, вся люди во истине Православия уверившая.

Радуйся, яко Тебе ради православнии людие столькраты прельщения агарянская победиша;

Радуйся, яко Тебе ради и совращеннии от латын паки православную веру облобызаша.

Радуйся, к Нейже вси живущии молитвенно очи воздвизают;

Радуйся, Юже и молящиися о упокоении умерших в помощь призывают.

Радуйся, и от житейских нужд притекающия к Тебе изъемлющая;

Радуйся, паче сих всякия нужды претерпевающим крепость дарствующая.

Радуйся, христолюбивому воинству во бранех вспоможение;

Радуйся, на демоны воинствующим благое наставление.

Радуйся, Похвало Почаевская и всего мира Надеждо и Утешение.

 

Кондак 10

Спасти хотяше, Пречистая Богородица, препростую некую старицу во ослеплении латынстем бывшую и внуку малую имущую, Православием убо просвещенную, но телесными очесы слепотствующу, темже сима обема благое желание влагает, еже на горе Почаевстей чудотворному Ея образу поклонитися, идеже абие слепую отроковицу чудесне исцеляет и старицу православную веру исповедати научает, вопиющую Богу: Аллилуиа.

 

Икос 10

Стена нерушимая истинныя веры явилася еси, Владычице, зане якоже нечестивии еретицы от прославления Тебе, яко Истинныя Богородицы, со упорством отвергошася, тако и православнии в вере Твоей тверди пребыша, и от молитв непрестанно Тебе приносимых николиже отвратитися восхощут, и сих ради еретических глагол во утеса своя приимати не дерзнут, но сердцем благодарным восхваляти Тя не престанут, глаголюще:

Радуйся, Христианом отрадо и утешение;

Радуйся, ангельским чином славо и поклонение.

Радуйся, от льстивых глагол еретических нас отвращающая;

Радуйся, памятованием милостей Твоих умы наша к Богу возносящая.

Радуйся, святыя апостолы ко Успению Твоему на облацех воздушных призвавшая;

Радуйся, и грешныя люди в той день на гору Почаевскую в тысящах и тмах на всяко лето собирающая.

Радуйся, Еяже ради христиане трудность пути, аки сладкое упокоение, подъемлют;

Радуйся, Еяже ради и ленивии подражати им тщатся.

Радуйся, иноком сладость мирскую забыти благодатию Твоею пособствующая;

Радуйся, вспять озирающияся сновиденьми грозными устрашающая.

Радуйся, Церкве Христовы лучшая диадимо;

Радуйся, страны нашея щите неодолимый.

Радуйся, Похвало Почаевская и всего мира Надеждо и Утешение.

 

Кондак 11

Пение благодарное о Твоих, Владычице, благодеяниях во всем мире от христиан возносимое, аки фимиам к Небеси непрестанно восходящий помышляюще и наша убогая хваления не отвратити Тебе просим, еще же и благодать покаяния даровати Тебе молим, со упованием поюще Богу: Аллилуиа.

 

Икос 11

Свет живота временнаго и Вечныя Жизни упование явилася еси, Владычице, человеку некоему в Бессарабии умрети имущему, но внезапу, по вкушении воды от святыни Почаевския, здраву бывшему, еже сродницы его видевше, со страхом и умилением Тебе воззваша:

Радуйся, болящих исцеление;

Радуйся, скорбящих слышание.

Радуйся, Тобою бо смерть пришедшая отгнася;

Радуйся, Тобою бо вера несумненная нам даровася.

Радуйся, яко предвещание Гавриила пред очию нашею сбывается;

Радуйся, яко от всех родов, по глаголу Твоему, ныне и присно ублажаешися.

Радуйся, гору Почаевскую, яко место пребывания Твоего освятившая;

Радуйся, аки вторый Назарет тую явившая.

Радуйся, яже никогоже упования отвратившая;

Радуйся, всех молитвы тепле приемлющая.

Радуйся, здравие нам подавающая;

Радуйся, ко спасению нас возводящая.

Радуйся, Похвало Почаевская и всего мира Надеждо и Утешение.

 

Кондак 12

Благодать исцелений и умиления молитвеннаго от Твоея, Владычице, иконы источаемая, да не вотще душам нашим будет, аще бо грех ради во окамененное бесчувствие впадохом; обаче, яко имущая власть мертвыя воскрешати, и наше пробуди душевное омертвение, и помыслом лучшим сердца наша озари, да греховную прелесть возненавидевше, воспоем Богу: Аллилуиа.

 

Икос 12

Поюще Твоя чудеса во обители Почаевстей явленная, молим Тя, Владычице, лица Твоего от страны нашея не отврати, но и всем приходящим на святую гору Твою и милости от Тебе ищущим во благое прошение исполни, да вси воспоют Ти сице:

Радуйся, всеправеднаго Бога умилостивление;

Радуйся, христиан ко Христу дерзновение.

Радуйся, торжество веры в Лавре Твоей являющая;

Радуйся, сердца человеков любовию распаляющая.

Радуйся, яко древним чудесем подобное зде видети людие сподобишася;

Радуйся, яко гора сия, аки вторый Синай, в странах христианских прославися.

Радуйся, Бога на земли явльшагося во чреве Твоем понесшая;

Радуйся, человеки молитвою Твоею к Богу возносящая.

Радуйся, икону Твою, яко проповедницу спасения во обители Твоей оставившая;

Радуйся, след стопы Твоея, целебною водою исполняемый, чудесы прославившая.

Радуйся, с Небесных высот на рабы Твоя призирающая;

Радуйся, на благия деяния верныя наставляющая.

Радуйся, Похвало Почаевская и всего мира Надеждо и Утешение.

 

Кондак 13

О всепетая Мати Христа Бога, вся роды христианским любовию Себе всыновившая достойныя похвалы воспети Тебе недоумеем мы, грешнии, обаче любовию Твоею побеждаемии и к Твоему чудотворному образу очи своя возносяше, молим Тя: в борении и нуждах наших не остави чад Твоих, заступлению Твоему тепле верующих и Сыну Твоему вопиющих: Аллилуиа.

(Этот кондак читается трижды, затем икос 1 и кондак 1)

 

МОЛИТВА ПЕРВАЯ

 

   О Всемилостивая Госпожѐ, Царѝце и Владычице, от всех родо̀в избра̀нная, и всеми ро̀ды небѐсными и земными ублажа̀емая! Воззрѝ мѝлостиво на предстоя̀щий пред святою иконою Твоею и усердно к Тебе молящийся народ сей, и сотвори предстательством и заступлением Твоим у Сына Твоего и Бога нашего, да никто̀же изыдет отсюду упова̀ния своего тощь и посра̀млен в надежде своей, но да приѝмет кѝйждо от Тебе вся по благо̀му изволению сердца своего и по ну̀жде и потребе своей, во спасение души и во здра̀вие телу. Прѝзри благосердием, воспѐтая Богордице, и на обѝтель, Твоим именем нарицающуюся, ю̀же от лет древних возлюбила есѝ, избравши ю в достояние Себе, и неоску̀дно источающи токи исцелений от чудотворныя иконы Твоея̀ и от приснотеку̀щаго источника, в слѐде стопы Твоея̀ нам открытаго, и сохрани ю от всякаго прило̀га и навѐта вражия, я̀коже дрѐвле сохранила есѝ Твоим явлением цѐлу и невреждѐнну от лютаго нашествия ага̀рянскаго, да вы̀ну воспевается и славится в ней пресвятое имя Отца и Сына и Святаго Духа и Твое преславное успение, во вѐки веко̀в. Аминь.

 

 

МОЛИТВА ВТОРАЯ

 

   Царѝце наша Преблага̀я, Владычице Преблагословенная, Надѐждо наша Богородице! К Тебе умилѐнно ныне притекаем, и сокрушѐнною душею и смиренным сердцем молим Тя, Всепетая, пред Пречѝстым Твоим о̀разом: помяни щедро̀ты Твоя древния, я̀же от Тебе зде бывшия, и я̀коже иногда явѝлася есѝ на скале Почаевстей, в столпѐ огненнем, от камене цельбоно̀сную воду источающи, сѝце и ныне предстани нам, Ма̀ти многомощная, и теплотою Богоматерния любвѐ Твоея̀ согрей сердца наша окамененная, слезы любвѐ и покаяния нераскаяннаго от очей наших исторгающи. Ты бо едѝна есѝ заступница наша благодарова̀нная, Тя у̀бо молим: избави от всех бед, от вся̀кия напа̀сти, болезни и ско̀рби рабы Твоя, предстательством великаго о нас ходатая и молитвенника Твоего, всеблаженнаго отца нашего Иова, угодника Твоего Почаевскаго, его̀же молитве я̀ве внимала есѝ на возду̀се иногда, егда̀ всеславным и страшным явлением Твоим избавила есѝ обѝтель Твою от нашествия и обложения ага̀рянскаго. Прѝзри благосердием, Всепетая, презрѐнием милостиваго Твоего заступления и на всю страну нашу, и на вся люди Твоя излей богатыя Твоя милости: разсѐянныя собери, неверныя же и иноверныя во страна̀х наших на путь истинный настави, отпадшия от благочестивыя отеческия веры па̀ки возрати и сопричтѝ их святей Твоей Православней и Кафоличестей Церкви; в семействах наших мир утверди, старость поддержи, юныя настави, младенцы воспитай, сирыя и вдовицы заступи, плененныя свободѝ, болящия уврачуй, на судѝщи и в темницах, и в заточениих, и в горьких работах су̀щих помяни, ограждающи вся ны вы̀ну, посещающи и утешающи то̀ками чудес и зна̀мений многоразличных, я̀же прѝсно изливаеши всем от святы̀я иконы Твоея̀ цельбоно̀сныя. Да̀руй, Всеблагая̀, землѝ плодородие, возду̀ха благорастворѐние и вся, я̀же на пользу нашу да̀ры благовременныя и благопотрѐбныя, молитвами изра̀нных угодников Твоих, благода̀тный Твой лик на святѐй иконе Твоей окружающих: Илии богоглаго̀ливаго, свята̀го архидиакона Стефа̀на первострада̀льнаго, преподо̀бнаго Авраамия всеблаженнаго, и Мѝны, мученика многоименѝтаго, и с ними ку̀пно святых и праведных жен: Параскевы, прехвальныя, Ирины преблаженныя и святы̀я Екатерины, великомученицы многострадальныя, и всех святых. Егда̀ же приспеет наше от жития̀ сего̀ отшѐствие и к вечности преселение, сѝце предстани нам, Преблагословенная, я̀коже иногда благопоспешѝла есѝ обѝтели Твоей во спасение во время брани Збара̀жской, и Твоим теплым хода̀тайством да̀руй нам христианскую кончину живота̀ нашего безболезненну, непосты̀дну, мирну и святых Таин прича̀стну; да я̀коже в сей жизни, сѝце и в будущем вѐце сподобимся вси, молитвами Твоими, безконечныя небѐсныя жизни во Царствии возлюбленнаго Сына Твоего, Господа Бога и Спаса нашего, Иисуса Христа, Ему̀же подобает всякая слава, честь и поклонение во вѐки веко̀в. Аминь.

 

 

МОЛИТВА ТРЕТЬЯ

 

чтомая пред цельбоносной стопой Божией Матери

в Почаевской лавре.

 

   О Пресвятая Дево, Владычице Богородице! Благодарю Тя от всего сердца моего, я̀ко сподобила ѐси мя, грешнаго и недостойнаго раба Твоего, предстати зде и покланя̀тися на святѐй горе Твоей. О, клѝких благ удосто̀ихся та̀ко многогрешный аз милосердием Твоим! Вѝжду, Пречистая, и ужасаюся, и истаива̀ет дух мой, зря воочию многоцелебный сей источник благода̀ти Твоея̀, его̀же издрѐвле во следѐ святы̀я стопы Твоея̀ неизречѐнно явѝла есѝ, всеблагоговейно покланя̀яся на месте, идѐже стоя̀сте девѝчестеи но̀зе Твои, молю Тя, благословенная надѐждо и спасение душ и телѐс наших: омы̀й мя цельбоно̀сною водою Твоею от вся̀кия сквѐрны пло̀ти и духа, утоли благода̀тными струя̀ми Твоими вся страсти моя сердечныя, уврачуй каплями от приснотекущаго источника Твоего вся неду̀ги моя телесныя, да, Тобою наставляемый, врачуемый и избавляемый, воспеваю Тебе всеусердно: Радуйся, исто̀чниче радости непрестаѐмыя; радуйся, то̀че добро̀ты неизречѐнныя. Радуйся, вожделений нечистых потопление; радуйся, скверн всяких измовѐние. Радуйся, струѐ световѝднейшая во здра̀вии верным от горы приосенѐнныя чаши благода̀ть исцелений подавающая; радуйся, росо̀ небесная, свыше то̀ки премудрости жаждущим истиннаго познания низпосылающая. Радуйся, похвало̀ Почаевская, спаси ны, молящияся Тебе, надеждо наша и утешение. Аминь.

 

 

МОЛИТВА ЧЕТВЕРТАЯ

 

    К Тебе, о Богомати, молитвенно притекаем мы, грешнии, чудеса Твоя, во святей Лавре Почаевстей явленная, поминающе и о своих сокрушающеся прегрешениих. Вемы, Владычице, вемы, яко не подобаше нам, грешным, чесого просити, токмо о еже праведному Судии беззакония наша оставити нам. Вся бо нами в житии претерпенная, скорби же, и нужды, и болезни, яко плоды падений наших прозябоша нам, Богу сия на исправление наше попущающу. Темже вся сия истиною и судом Своим наведе Господь на грешныя рабы Своя, иже в печалех своих к заступлению Твоему, Пречистая, притекоша и во умилении сердец к Тебе взывают сице: грехов и беззаконий наших, Благая, не помяни, но паче всечестнеи руце Твои воздвигши, к Сыну Твоему и Богу предстани, да люте содеянная нами отпустит нам, да за премногая неисполненная обещания наша лица Своего от рабов Своих не отвратит, да благодати Своея, спасению нашему пособствующия, от душ наших не отымет. Ей, Владычице, буди спасению нашему ходатаица и, малодушия нашего не возгнушавшися, призри на стенания наша, яже в бедах и скорбех наших пред чудотворным Твоим образом возносим. Просвети умиленными помыслы умы наша, веру нашу укрепи, надежду утверди, любве сладчайший дар сподоби нас прияти. Сими убо, Пречистая, дарованьми, а не болезньми и скорбьми живот наш ко спасению да возводится, но, от уныния и отчаяния души наша ограждающи, избави нас, маломощных, от находящих на ны бед, и нужд, и клеветы человеческия, и болезней нестерпимых. Даруй мир и благоустроение жительству христианскому предстательством Твоим, Владычице, утверди Православную веру в стране нашей и во всем мире. Церковь Апостольскую и Соборную умалению не предаждь, уставы святых отец на веки непоколебимы сохрани и всех к Тебе притекающих от рова погибельнаго спаси. Еще же и ересию прельщенных братий наших или веру спасительную в греховных страстех погубивших паки к истинней вере и покаянию приведи, да вкупе с нами, Твоему чудотворному образу покланяющеся, Твое предстательство исповедят. Сподоби убо нас, пресвятая Госпоже Богородице, еще и в животе сем победу истины Твоим заступлением узрети, сподоби нас благодатную радость прежде кончины нашея восприяти, якоже древле насельники Почаевския Твоим явлением победители и просветители агарян показала еси, да вси мы благодарным сердцем вкупе со Ангелы, и пророки, и апостолы, и со всеми святыми, Твое милосердие прославляюще, воздадим славу, честь и поклонение в Троице певаемому Богу Отцу и Сыну и Святому Духу, во веки веков. Аминь.

 

 

 

 

ТРОПАРЬ

 

Глас 5

    Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети, и к Сыну Твоему молитву вознеси о спасении душ наших.

Кондак, глас 1-й:


Источник исцелений и веры Православныя утверждение Почаевская Твоя икона, Богородице, явися: тем же и нас, к ней притекающих, от бед и искушений свободи, Лавру Твою невредиму сохрани, Православие во окрест стоящих странах утверди, и грехи разреши молитвенник Твоих: елика бо хощещи, можеши.

Величание

Величаем Тя, Пресвятая Дево, и почитаем честную икону Твою, юже от лет древних на горе Почаевстей прославила еси.

 

КАНОН

Пресвятей Богородице в честь иконы Ея Почаевская

 

Тропарь, глас 5-й

Пред святою Твоею иконою, Владычице, молящиися исцелений сподобляются, веры истинныя познание приемлют и агарянская нашествия отражают. Темже и нам, к Тебе припадающим, грехов оставление испроси, помыслы благочестия сердца наша просвети и к Сыну Твоему молитву вознеси о спасении душ наших (дважды).

 

 

     Канон, глас 8-й,

    егоже краегранесие: Богородице Почаевская, спаси и сохрани Православную Русь.


Песнь 1

Ирмос: Поим Господеви, проведшему люди Своя сквозе Чермное море, яко Един славно прославися.

 

Припев: Пресвятая Госпоже Богородице, услыши молитву раб Своих, молящихся Тебе (поклон).

 

Божию Матерь воспоим, вернии, моления к Ней приносяще и чудотворному Ея образу покланяющеся верою и любовию.

 

Пресвятая Госпоже Богородице, услыши молитву раб Своих, молящихся Тебе.

 

О Владычице, убогая хвалы нашея не отвержи и греховныя нищеты не возгнушайся, но припадающия люди приими, яко благая, Благаго же Родительница.

 

Пресвятая Госпоже Богородице, услыши молитву раб Своих, молящихся Тебе.

 

Гора Почаевская, прежде темная и безвестная, явлением Твоим, Владычице, Синаю уподобися: тамо бо огнь, купину не паляй, Тебе прообразоваше, зде же Сама, во огни зримая, христианом явилася еси.

Пресвятая Госпоже Богородице, услыши молитву раб Своих, молящихся Тебе.

 

Очи ваши блажени, о пастырие овчии, Владычицу на горе Почаевстей узревшии и тем части вифлеемских пастырей сподобльшиися. Темже убо блажени суть христиане, сего не видевшии, но верою месту тому покланяющиися.

Слава: Роди российстии и от всякаго языка вернии, сошедшеся к месту явления Владычицы, чудотворному Ея образу поклонимся и о своих согрешениих восплачем, о милосердии же Господни возрадуемся.

И ныне: Огненный столп, Владычице, Тебе иноком и пастырем являше, нам же огнь ревности вложи в душу, еже веру истинную хранити, от всякаго же глагола еретическаго отвращатися и греховную отревати прелесть от сердец наших.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 3

Ирмос: Ты еси утверждение притекающих к Тебе, Господи, Ты еси Свет омраченных, и поет Тя дух мой.

 

Пресвятая Госпоже Богородице, услыши молитву раб Своих, молящихся Тебе.

 

Дар священный, странноприимства мзду, прият христолюбивая Анна икону Твою, Владычице, рукою святителя, от неяже исцеление брату своему слепу рождену видевши, сию во обитель Почаевскую на общую пользу дарствует.

 

Пресвятая Госпоже Богородице, услыши молитву раб Своих, молящихся Тебе.

 

Икону Почаевскую Пречистыя Богородицы лобызаим, вернии, и, покаяние о гресех наших принесше, здравия, и от нужд избавления, и во всех благих начинаниих помощи от Владычицы воспросим.

 

Пресвятая Госпоже Богородице, услыши молитву раб Своих, молящихся Тебе.

 

Цвет прекрасный на древе благосеннолиственнем явися чудотворная икона Богородицы на святей горе Почаевстей: просите, вернии, и дастся вам, по глаголу Христову, милосердия дар, житию вашему потребный.

 

Пресвятая Госпоже Богородице, услыши молитву раб Своих, молящихся Тебе.

 

Еже временному житию потребно бывает, о братие, вмале полезно есть, и сия дарствует нам Господь, по молитве Матере Своея. Обаче терпящия паче сих блажит и вечною радостию на небеси награждает, юже нам даровати, Владычице, помолися.

Слава: Почаевская церковь, чудотворный след стопы Твоея, Богородице, покрывающая и икону Твою хранящая, аки небесный вход верным является, в нейже молящимся помози, о Владычице, земная попечения отложити, и единаго, еже на потребу, желати, и в молитве тепле просити.

И ныне: Оле безумия иконоборцев, иже икону Твою, Владычице, от Почаевския обители плениша и, поруганию предающе, кару Божию абие на ся наведоша, беснованием же обличене бывшей жене, ужасом многим содержахуся.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Господи, помилуй (трижды). Слава, и ныне.

 

Седален, глас 6-й

Река, обильно текущая, покою не навыче, ниже престати от течения воднаго возможет, тако и моления Твоя, Владычице, о людех присно возносимая, не престают, но праведныя от падений хранят, падшия же на покаяние возставляют. Нам же, Твоему образу покланяющимся, сугубую умиления благодать даруют и вопити Тебе со Архангелом и Елисаветою воздвизают: благословена Ты еси в женах, и Твоего чрева Плод благословен есть.

 

Песнь 4

Ирмос: Услышах, Господи, смотрения Твоего таинство, разумех дела Твоя и прославих Твое Божество.

 

Пресвятая Госпоже Богородице, услыши молитву раб Своих, молящихся Тебе.

 

Часу и дни пришедшу возвращения иконы Твоея во обитель Почаевскую от иконоборцев, сию пленивших, возрадовася преподобный Иов со братиею, тую лобызающе; ныне же на всяк день и час приходящий во обитель Твою христиане туюже радость и веру пред нею свидетельствуют.

 

Пресвятая Госпоже Богородице, услыши молитву раб Своих, молящихся Тебе.

 

Аз, грешный, леностию порабощен, о Владычице, благаго Бога присно грехи своими прогневляю, ниже очи свои возвести к Нему дерзаю, но ко Твоему припадаю чудотворному образу, пред нимже кающийся прощение от Тебе прияша, и вопию: Господа, Сына Твоего, умилостиви и мне предстательством Твоим.

 

Пресвятая Госпоже Богородице, услыши молитву раб Своих, молящихся Тебе.

 

Еда обрящется толико окамененный сердцем и безумен муж, иже не умилится, в церкви Почаевстей предстояй и святыням Твоим, Владычице, покланяяйся, чудеса же, от них бывшая, помышляяй и верою молящияся видяй народы?

 

Пресвятая Госпоже Богородице, услыши молитву раб Своих, молящихся Тебе.

 

Видени быша мнози исцеленнии пред иконою Твоею, Владычице, слепии и хромии, слышани быша глусии и немии возглаголавшии, тамо беснии, воды от стопы Твоея пиюще, от бесов свобождахуся. Темже и мою приими молитву, еже от бесовских страстей свободитися и свет спасения Христова выну созерцати.

Слава: Сый во узилищи земли турския пленен, инок Твоею силою, Владычице, на воздусе в гору Почаевскую принесеся, убо и мене, во узах страстей суща, ныне, в день славы Твоея, от тех свободи и лику верою и любовию поющих Тя сопричти.

И ныне: Ко Твоему чудотворному образу притек, Владычице, и водою от следа стопы Твоея омывся, сляченный недугом юноша абие исцеле, слепая же отроковица, зде принесенная, прозре, и предумерый младенец воскресе, убо и мене, припадающа, от смертоноснаго уныния воздвигни и душевныя мои отверзи очи.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 5

Ирмос: Утренююще, вопием Ти: Господи, спаси ны, Ты бо еси Бог наш, разве Тебе иного не вемы.

 

Пресвятая Госпоже Богородице, услыши молитву раб Своих, молящихся Тебе.

 

Аще и всех грешнейший есмь от тем людей, ко Твоей, Владычице, иконе припадающих, аще и вси верою своею мя превзыдоша, обаче и мене, окаяннаго, не отрини от Твоего заступления, милостей бездну людем во обители Твоей явившая.

 

Пресвятая Госпоже Богородице, услыши молитву раб Своих, молящихся Тебе.

 

Якоже ко всем призывающим Тя милостива являешися, издалеча иконе Твоей мысленно покланяющияся слышиши, и тако отрочища некоего, по молитве прабабы его, воскресила еси, и ныне, о Владычице, ко всем, от конца земли Тебе молящимся, благоуветлива буди.

 

Пресвятая Госпоже Богородице, услыши молитву раб Своих, молящихся Тебе.

 

Се, Владычице, людей многая множества, на святую гору Твою притекающе, милости Твоея получити ищут, вернии вкупе с маловерными, праведнии и грешнии, с нимиже и Церкви Святей чуждии приметаются, всех убо помилуй, всем свет истинныя веры яви во спасение.

 

Пресвятая Госпоже Богородице, услыши молитву раб Своих, молящихся Тебе.

 

Почто аз, грешный, Пречистей Богоматери покланяяся и исправите житие свое обещавая, паки на прежняя прегрешения обращаюся? Увы мне, еда злейший есмь неверных агарян, иже на горе Почаевстей покаяние принесше, добрии христиане содеяшася?

Слава: Аще и люти быша агаряне турстии, святую обитель Твою, Владычице, осаждающе, аще и стрелы в Тя, на небеси явльшуюся, пущати дерзнуша, но сим на главы их возвращающимся, сердцем сокрушенным покаяшася и силу Твою исповедаша.

И ныне: Со Иовом преподобным на небесех Тебе зряще, Владычице, агаряном смятенным и бежащим, иноцы Почаевстии песнь воспеша Ти достойную, со угодником Тебе благодаряще тепле.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 6

Ирмос: Ризу мне подаждь светлу, одеяйся светом, яко ризою, Многомилостиве Христе Боже наш.

 

Пресвятая Госпоже Богородице, услыши молитву раб Своих, молящихся Тебе.

 

Иже от агарян Тя, Владычице, на небесех узреша, друг друга вопрошаху: что есть видение сие ужасное? И ови, смятени бывше, друг друга убиваху, ови же, веру в сердце свое приемше, Крещения требоваху, по сих же иноцы быша чрез все житие, силу Твою воспевающе.

 

Пресвятая Госпоже Богородице, услыши молитву раб Своих, молящихся Тебе.

 

Иноки и мирския люди, Твоему заступлению верующия, Владычице, обогати духовными дарованьми, маловерныя же просвети и озари, якоже тогда неведевшия Христа агаряны в познание Его привела еси.

 

Пресвятая Госпоже Богородице, услыши молитву раб Своих, молящихся Тебе.

 

Сохраниша память Твоего заступления, Владычице, агаряне, в землю турскую возвращшеся, и чадом своим о явлении Твоем память предаша. Кольми паче нам, христианом, чудеса Твоя, на горе Почаевстей бывшая, памятовати подобает?

 

Пресвятая Госпоже Богородице, услыши молитву раб Своих, молящихся Тебе.

 

Образу Твоему мысленно припадая, во глубокий кладязь впадый муж от несумненныя смерти спасеся и, невредим из глубины подъят быв, Твое проповедаше милосердие.

Слава: Хотел бых и аз, Владычице, вере спасенных Тобою людей подражати, хотел бых и аз Твое заступление в житии моем улучити, но за множество прегрешений моих оскудевает моя вера. Сию убо укрепи во мне, Владычице, вопиющем: верую, помози моему неверию.

И ныне: Ров прельщений латинских чрез сто и девять лет поглоти обитель Почаевскую, но Твоим, Богородице, заступлением паки тая к высоте Православия изъемлется и Лавра именуется. Сию убо в Православней вере непоколебиму соблюди даже до часа втораго пришествия Сына Твоего и Бога.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Господи, помилуй (трижды). Слава, и ныне.

 

Кондак, глас 1-й

Источник исцелений и веры Православныя утверждение Почаевская Твоя икона, Богородице, явися, темже и нас, к ней притекающих, от бед и искушений свободи, Лавру Твою невредиму сохрани, Православие во окрест стоящих странах утверди и грехи разреши молитвенник Твоих, елика бо хощеши, можеши.

 

Икос

Востаните от гроб ваших, иноцы почаевстии, и рцыте нам: коликих чудес Пресвятыя Богородицы бысте зрители и свидетели, како мертвии пред Тоя иконою воскресаху, како демони от мучимых людей отбегаху, како недужнии тамо исцеляхуся, како невернии вероваху, како хулители тамо каяхуся? Сия бо дивная бываху человеком и Ангелом. Мы же, вся сия бывшая и доднесь бываемая воспоминающе, со страхом и умилением ко святей иконе Пречистыя Богоматере молитвенно припадаем и глаголем сице: о милостей бездно и благодеяний сокровище, грехи разреши молитвенник Твоих: елика бо хощеши, можеши.

 

Песнь 7

Ирмос: От Иудеи дошедше отроцы, в Вавилоне иногда, верою Троическою пламень пещный попраша, поюще: отцев Боже, благословен еси.

 

Пресвятая Госпоже Богородице, услыши молитву раб Своих, молящихся Тебе.

 

Акафистово пение возношаху пред иконою Твоею, Пречистая, православнии людие, егда обитель Почаевская Церкви возвращена бысть, тем убо оставление грехов испроси, нам же, молящим Ти ся, на враги пособствуй.

 

Пресвятая Госпоже Богородице, услыши молитву раб Своих, молящихся Тебе.

 

Народа православнаго души упокоити молися, Владычице, вкупе же и всех, о возвращении Лавры Твоея из еретическаго плена потрудившихся, нам же, к Тебе прибегающим, подаждь единомыслие и мир.

 

Пресвятая Госпоже Богородице, услыши молитву раб Своих, молящихся Тебе.

 

И ныне народу нашему милостива буди, Владычице, и мир подаждь, покаряющи противоборствующия враги и супостаты.

 

Пресвятая Госпоже Богородице, услыши молитву раб Своих, молящихся Тебе.

 

Пред Твоею иконою, Богородице, православным христианом возвращенною, паки исцеления приимати вернии навыкоша: не у истекшу бо единому лету от того дне, уже четырми чудесы Церковь Христову прославила еси во утешение людем.

Слава: Рая небеснаго сподоби ны, Владычице, святую Лавру Твою аки земный рай почитающия и Твоя милости теплою верою воспевающия.

И ныне: Авраам Господень день издалеча виде, и радовася, и чаянием того дне живяше; узревши же издалеча Твою Почаевскую церковь некая хромая жена и упованием Твоея помощи исполнившися, абие исцеле и, аки елень, воспрянувши, ко обители Твоей поспешаше.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 8

Ирмос: Царя Небеснаго, Егоже поют вои Ангельстии, хвалите и превозносите во вся веки.

 

Пресвятая Госпоже Богородице, услыши молитву раб Своих, молящихся Тебе.

 

Во град Киев от предел Уральских пришедшей жене бесней явися Богородица со преподобным Иовом и на гору Почаевскую тую призываше, идеже здравие ей подавши, славити научи Свое заступление.

 

Пресвятая Госпоже Богородице, услыши молитву раб Своих, молящихся Тебе.

 

Омыв очеса своя в купели Силоамстей, приемлет слепорожденный зрение Христовым велением; омывшися же от воды стопныя в церкви Почаевстей, исцеле слепая отроковица. Убо и наше страстное ослепление исцели, Владычице, водою от следа стопы Твоея с верою кропящихся.

 

Пресвятая Госпоже Богородице, услыши молитву раб Своих, молящихся Тебе.

 

Сию отроковицу исцелену узреши, прабаба ея абие прельщения унитскаго отрицается и Православную исповедует веру, в нейже утверди и ны, рабы Твоя, о Владычице.

 

Пресвятая Госпоже Богородице, услыши молитву раб Своих, молящихся Тебе.

 

Людие Божии, на гору Твою, Владычице, притекающии, обеты подвиг благочестивых тамо приносят, яже делы исполнити помози им, Богородице.

Слава: Ангели на небеси Твою славу непрестанно воспевают, Богородице, на земли же человецы ко Твоему заступлению притекати не престают, ихже воздыхания не отрини, яко благая, паче же на месте явления Твоего тех моления услыши.

И ныне: Велия Твоего заступления сила, о Владычице, егоже ради Сын Твой и Бог наш грешным прощение дарует, подвизающимся же крепость и унывающим утешение.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Песнь 9

Ирмос: Воистинну Богородицу, Тя исповедуем, спасеннии Тобою, Дево Чистая, с безплотными лики Тя величающе.

 

Пресвятая Госпоже Богородице, услыши молитву раб Своих, молящихся Тебе.

 

Не точию един по единому подвизаются христиане на гору Почаевскую, но и от сугубо священнаго града Киева совокупльшеся вернии, помощь от сея чудотворныя иконы в годину бывшаго губительства исповедаша и, подобие ея написавше, во святую Лавру сие принесоша.

 

Пресвятая Госпоже Богородице, услыши молитву раб Своих, молящихся Тебе.

 

Убо и во грядущая лета спасай нас, Владычице, от губительства и междоусобныя брани, от глада же и огненнаго запаления, зане оскудевшей крепости Душ наших, уныния исполняемся в бедах, неразумливи суще.

 

Пресвятая Госпоже Богородице, услыши молитву раб Своих, молящихся Тебе.

 

Южский предел земли российския Почаевскую икону Владычицы и святую Лавру Ея, яко диадиму царствия, хранит и сими хвалится; обаче же и Северский, во граде Тобольстем, чудотворное подобие тояжде Почаевския иконы молитвою иноков себе испроси.

 

Пресвятая Госпоже Богородице, услыши молитву раб Своих, молящихся Тебе.

 

Русскую землю, о Владычице, яко безпредельное горы Твоея подножие, от бед и искушений свободи и во благочестии тую сохрани до скончания века.

Слава: Уже нестыдно поднявшимся хульным гласом посреде христианскаго жительства, не остави, Богородице, раб Твоих в тех прельщения впасти, но веру несумненну возгревай в сердцах наших выну.

И ныне: Се время заступления Пресвятыя Богородицы прииде, умножившимся соблазном, се время наших к Ней воздыханий. О братие! Рцем убо от всего сердца нашего: Владычице! Помози людем Твоим.

 

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).

 

Фотография иконы: http://days.pravoslavie.ru/Images/ii2947&2468.htm

 

 






Рейтинг@Mail.ru Рейтинг@Mail.ru Rambler's Top100 Яндекс.Метрика