Святой праведный Алексий Бустурманский

 

 

(21 апреля / 4 мая)

 

   Праведный Алексий родился в семье священника, (Алексий Гнеушев; 13.05.1762 - 21.04.1848, с. Бортсурманы Курмышского у. Симбирской губ., совр. Нижегородская обл.) в 1784 г. по окончании Нижегородской духовной семинарии рукоположен во диакона в с. Бортсурманы в храме в честь Успения Пресвятой Богородицы и в 1797 г.- во священника к той же церкви. Однажды ночью его позвали к умирающему в соседнюю деревню, Алексий рассердился, выгнал посланного и лег спать. Но через некоторое время, мучимый совестью, решил поехать. Войдя в дом, Алексий увидел, что крестьянин уже умер, рядом с почившим стоял ангел со Святой чашей в руках. Это видение так поразило Алексия, что он упал на колени и всю ночь молился, домой он вернулся другим человеком. Каждый день он совершал литургию, насколько было возможно, исполнял монашеское келейное правило и устав. Правило было такое: полуночное - полунощница, 12 избранных псалмов, житие святого и поучение из Пролога; утреннее - молитвы утренние, часы, акафист прп. Сергию, или вмц. Варваре, или свт. Митрофану; полуденное - 4 кафизмы; вечернее - канон Спасителю с акафистом, канон Ангелу Хранителю, молитвы на сон грядущим; Алексий ежедневно совершал 1500 поклонов с Иисусовой молитвой. Во время, свободное от служб и келейных молитв, Алексий принимал приходивших к нему людей, тайно помогал неимущим и попавшим в беду.

     За свою праведную и подвижническую жизнь Алексий получил от Бога дары исцеления и прозорливости и сподобился многих Божественных откровений. Во время Отечественной войны 1812 г. он молился за литургией, чтобы Господь даровал России победу, и вдруг увидел ангела, который возвестил ему, что силы небесные уже двинулись на помощь и враг будет сокрушен. Неоднократно Алексий, был удостоен видений Спасителя, Божией Матери, святых; свои видения и откровения Алексий записывал.

     За 9 лет до кончины Алексий, вышел за штат, но литургию служил, как и прежде, почти каждый день, и богослужений не сокращал и во всем следовал уставу. Последние годы он жил в малой келье, под одной крышей с его домом. Удалив от себя все мирские заботы, он предался аскетическим и молитвенным подвигам: носил власяницу, спал на жестком войлоке, пищу вкушал раз в день, мяса не употреблял, строго соблюдал посты. Слава о нем как о великом молитвеннике и чудотворце распространилась далеко за пределами его округи. Когда к прп. Серафиму Саровскому приходили люди из местности, где жил Алексий, преподобный отправлял их обратно, уверяя, что у них есть свой усердный молитвенник. «Сей человек своими молитвами подобен свече, возжженной пред престолом Божиим. Вот труженик, который, не имея обетов монашеских, стоит выше многих монахов. Он как звезда горит на христианском горизонте»,- говорил прп. Серафим об Алексии.

    Число чудесных исцелений, совершенных Алексием, очень велико. Однажды он силой своей молитвы воскресил умершего мальчика, исцелил 6-летнюю Татьяну Растригину из г. Курмыш, которая от рождения не могла ходить. Бесноватый купец, выздоровевший по молитве Алексия, устроил в бортсурманской церкви чугунный пол. Перед своей кончиной Алексий всех утешал и говорил, что не забудет тех, кто будет его поминать. Алексий погребен напротив алтаря храма в честь Успения Пресвятой Богородицы в с. Бортсурманы. Жители села и окрестных деревень чтили его могилу, по воскресеньям и праздникам здесь служили панихиды по Алексию, после которых многие просившие исцеления избавлялись от своих недугов. Был распространен также обычай брать землю с могилы святого и принимать ее с водой в случае тяжелой болезни. В окт. 1913 г. в Бортсурманы приехала комиссия из Нижегородской духовной консистории для расследования устных и печатных сообщений о чудесах, связанных с Алексием. Чудеса подтвердились, но революции и последующие события не позволили тогда канонизировать подвижника. В советское время власти многократно пытались разорить могилу, но почитание праведника народом, очевидность чудес помешали им это сделать. Алексий Бортсурманский прославлен Архиерейским Собором РПЦ 2000 г.

 

  

АКАФИСТ

 

 

Кондак 1

 

Избранный от Царя сил Господа Иисуса Христа, крепкий победитель врагов невидимых показался еси, предивне Алексие. Во смирении многия труды и подвиги подъял еси, и сего ради велие дерзновение пред Богом стяжав, недугов душевных и телесных целитель явился еси; и ныне Престолу Святыя Троицы в веселии предстоя, от всяких нас бед свободи, зовущих: Радуйся, праведне Алексие, предивный чудотворче.

 

 

Икос 1

 

Ангельскими добродетельми украшенный, небожителем еще на земли уподобился еси, и яко звезда пресветлая в земли Российстей просиял еси. Темже смиренное житие твое воспоминающе и величию подвига твоего дивящеся, глаголем ти сицевая:

Радуйся, преславный избранниче Божий;
Радуйся, подвижниче преизрядный.
Радуйся, всею душею Господа возлюбивый;
Радуйся, любовию ко Христу пещь страстей угасивый.
Радуйся, покаянием плотския соблазны отринувый;
Радуйся, непрестанно в сердце Бога славивый.
Радуйся, образе кротости и смирения;
Радуйся, усердный ревнителю поста и воздержания.
Радуйся, мира духовнаго умиленный тайнозрителю;
Радуйся, жития добродетельнаго учителю.
Радуйся, посылаяй нам от Господа пречудное поможение;
Радуйся, в печалех сущим даруяй скорое утешение.
Радуйся, праведне Алексие, предивный чудотворче.

 

 

Кондак 2

 

Видев Господь, яко велию злобу лукавый воздвиже на тя, мирскими соблазны тебе уловити желая, возбрани тому совершитися, и видением Ангела с чашею от пути гибельнаго отврати тебе, и отселе, отче святе, в непрестанной молитве подвизался еси, добрыми делы людем страждущим послужититщася. Прославляюще молитвенныя подвиги и добродетели твоя, спасающему грешных Богу воспоим, вернии: Аллилуйя.

 

 

Икос 2

 

Разум имея благодатию просвещенный, вся тленная блага ни во чтоже вменил еси, и ревностию по Бозе разжизаем, явил еси себе делателя заповедей Божиих неленостна, отче наш Алексие. Взирающе на славная твоя деяния, восхвалим тя тако:

Радуйся, честный сосуде Духа  Святого;
Радуйся, нрава кроткого богомудрый обладателю.
Радуйся, постниче изряднейший Господа ради;
Радуйся, молитвенниче теплейший за род наш.
Радуйся, наставниче в мори житейском обуреваемым;
Радуйся, во всяких обстояниих болезнующим предстателю.
Радуйся, скорый заступниче в бедах сущим;
Радуйся, щедрый подателю милостыни неимущим.
Радуйся, немощствующих благодатная крепосте;
Радуйся, скорбных неиждиваемая радосте.
Радуйся, недугов наших целителю:
Радуйся, истиннаго благочестия подвижниче.
Радуйся, праведне Алексие, предивный чудотворче.

 

 

Кондак 3

 

Сила Вышняго осени тя, велия искушения от демонов претерпевшаго, и даровася ти еже печаль всякую от душ страждущих отгоняти. И тако путь живота твоего в служении людем совершая, обителей райских жителем уподобился еси, идеже ныне любовию Богу взываеши: Аллилуйя.

 

 

Икос 3

 

Имеяй сердце горящее любовию ко Господу, едино помышлял еси, како спастися и со Христом в Царствии Небеснем пребыти, постом и добрыми делы, а наипаче молитвою Тому послужити потшался еси, отче Алексие; духом убо тя ведый преподобный Серафим, великаго молитвенника тя провозгласи. Темже славим тя тако:

Радуйся, свеще, в молитве к Богу пламенеющая;
Радуйся, звездо, сияющая верным.
Радуйся, благовонное молитвы кадило;
Радуйся, яко тобою Господь прославляется.
Радуйся, в миру монашескому жительству прилежавый;
Радуйся, гласу Божественному со трепетом внимавый.
Радуйся, послушниче Христов совершенный;
Радуйся, совершителю службы Божия усердный.
Радуйся, образ и подобие Божие в ближнем возлюбивый;
Радуйся, веру делами любве утвердивый.
Радуйся, чистоты душевныя и телесныя сокровище;
Радуйся, милосердия пучино.
Радуйся, праведне Алексие, предивный чудотворче.

 

 

Кондак 4

 

Бурю нападений демонских претерпел еси, егда враг рода человеческаго, завистник искони, умысли погубити тя, отче, и многое множество духов нечистых снидошася, да тя устрашат. Ты же, Святым Духом укрепляем, именем Господа нашего Иисуса Христа сим противлялся еси, и заступи тя Сама Пресвятая Богородица со Ангелы, воспевающими: Аллилуйя.

 

 

Икос 4

 

Слышавше святое житие твое, отче праведне, дивляхуся людие добродетелем твоим, и притекаху в весь твою, да тя яве узрят. Отонудуже исходяще, благодариша Господа, яко воздвигает рабов Своих на утешение верным. Мы же с ними воззовем ти:

Радуйся, к дому Отца Небеснаго всем сердцем устремивыйся;
Радуйся, на высоту безстрастия еще на земли возшедый.
Радуйся, веселия Божественнаго в юдоли скорбной сподобивыйся;
Радуйся, видения лика Христова и Пречистыя Богоматере удостоенный.
Радуйся, сокровища духовная возлюбивый;
Радуйся, плоть духу покоривый.
Радуйся, нестяжателю предивный;
Радуйся, человече Божий и доблий воине Христов.
Радуйся, Света Невечерняго причастниче;
Радуйся, святых подражателю и наследниче.
Радуйся, яко велия искушения мужески претерпел еси;
Радуйся, яко благодатныя дары преизобильно стяжал еси.
Радуйся, праведне Алексие, предивный чудотворче.

 

 

Кондак 5

 

Боготечней звезде подобяся, светозарный путь спасения показующей, во тьме греховней блуждающим путь правый житием твоим показал еси, отче Алексие, да спасеннии тобою вопиют Богу: Аллилуйя.

 

 

Икос 5

 

Видевше людие преславная чудеса, яже благодатию Божиею сотворил еси, вси в скорбех твоего предстательства прошаху, ты же молитвою и кротким вразумлением тех укреплял еси, сего ради воспеваем ти сицевая:

Радуйся, святыя Церкве похвало и радование;
Радуйся, добродетельми Христа выну прославляяй.
Радуйся, дарами благодатными преисполненный;
Радуйся, избранниче Христов, чудесами прославленный.
Радуйся, Пресвятыя Богородицы благоговейный почитателю;
Радуйся, чистоты ума и сердца хранителю.
Радуйся, покаяния преславный проповедниче;
Радуйся, благодатную силу смирения познавый.
Радуйся, Богу и ближним нелицемерно служивый;
Радуйся, пред святым престолом за вся люди слезно воздыхавый.
Радуйся, отче праведный, любовию твоею немощи наша покрываяй;
Радуйся, бедствующим защитниче.
Радуйся, праведне Алексие, предивный чудотворче.

 

Кондак 6

 

Проповедник чудес Божиих явился еси, совершенную любовь, яко дар Святаго Духа прием, немощи немощных подъял еси. Людие же вернии, недугов многообразных исцеление приявше, благодарственно взывают Богу: Аллилуйя.

 

 

Икос 6

 

Возсия чрез тебе милосердие Божие к людем русским, егда двадесять языков на Отечество наше ополчишася, грады и веси наша пожгоша, святыя церкви оскверниша, и многи убиша. Ты же, отче, яко и вси праведницы земли Русския, молился еси ко Господу о спасении Отечества нашего, и возвести Ангел тебе преславную победу воинства православнаго, небесными вои споспешествуема. Темже ублажаем тя сице:

Радуйся, святый угодниче Божий, земли Русския красото и славо;
Радуйся, христолюбиваго воинства присный ходатаю.
Радуйся, державы Российския крепкое забрало;
Радуйся, добрым воином ея несокрушимый щите.
Радуйся, духовными оружии изрядно вооруженный;
Радуйся, покровом Богоматере осененный.
Радуйся, воине, со духи злобы ратоборствовавый;
Радуйся, именем Христовым тех победивый.
Радуйся, яко моление твое милость Божию привлекает;
Радуйся, яко заступление твое от велия напасти избавляет.
Радуйся, щедрот Божиих сокровище;
Радуйся, благоутробия Его изобилие.
Радуйся, праведне Алексие, предивный чудотворче.

 

 

Кондак 7

 

Хотяй Всеведец Господь милость грешным явити, смиренней молитве твоей вняти благоволи, и отрока умерша пред всеми людьми воскреси. Мы же, дивящеся таковому твоему дерзновению, прославльшему тя Господу поем: Аллилуйя.

 

 

Икос 7

 

Новаго и дивнаго чудотворца в земли Россиистей яви тя Господь, отче Алексие, верна Господу нашему Иисусу Христу себе показавша и велия искушения претерпевша, сего ради великия дары от Господа прияти сподобился еси, и вся сия на служение ближним предал еси. Восхваляюще преславная чудеса твоя, воспеваем тебе:

Радуйся, болящих здравие и хромых хождение;
Радуйся, разслабленных возставление.
Радуйся, из многих бесных духов нечистых изгнавый;
Радуйся, яко николиже вера постыжена будет, показавши.
Радуйся, людем малым сим, по заповеди Божией, себе отвергнувся, служивый;
Радуйся, все упование твое на Господа возложивый.
Радуйся, терпение и надежду на Бога не оставляти паству твою научавый;
Радуйся, верность Тому в искушениях явити призывавый.
Радуйся, предзревый будущая яко настоящая;
Радуйся, ведевый дальняя яко ближняя.
Радуйся, яко сокрытая яве обличал еси;
Радуйся, яко имя Христово, имже чудотворил еси, возвеличил еси.
Радуйся, праведне Алексие, предивный чудотворче.

 

 

Кондак 8

 

Странное Ангелом и человеком явися, отче праведне, житие твое: быв человек, тело носяй, дух твой, яко безтелесен, в горняя устремил еси, пренебрег вся тленная, в Бога богатея: щедроты милосердия твоего на вся с верою притекающия к тебе излиял еси. Славяще Господа, даровавшаго ти благодать сию, воспоем людие: Аллилуйя.

 

 

Икос 8

 

Всего себе на служение Богу управил еси, отче, волю Божию выну творя и умом на небесех пребывая; сего ради духовнаго мира созерцатель сподобился еси быти, сия же видения тайно письменем предал еси, токмо малое нечто блаженной игумении Марии поведав. Дивящеся же сему и устрашающеся, с верою воззовем:

Радуйся, пречудный лик Христов созерцавый;
Радуйся, гласу Божественному пресладкому внимавый.
Радуйся, яко стража Церкве восхоте тя Господь нарещи;
Радуйся, яко овцы Своя словесныя тебе поручи.
Радуйся, Пресвятою Богородицею со одра болезни возставленный;
Радуйся, заступления Ея удостоенный.
Радуйся, благодатный мир в сердце своем стяжавый;
Радуйся, всем страждущим независтно милость твою изливавый.
Радуйся, очима телесныма ангельское блистание видевый;
Радуйся, небеснаго пения безплотных наслаждавыйся.
Радуйся, Царствия Божия на земли предтече;
Радуйся, земный Ангеле и небесный человече.
Радуйся, праведне Алексие, предивный чудотворче.

 

 

Кондак 9

 

Всякое естество ангельское радовашеся, егда един от Ангел возвести тебе в алтаре о начале твоего ангельскаго служения. Ты же, отче, житием твоим безплотным подобяся, воспел еси Богу: Аллилуйя.

 

 

Икос 9

 

Ветии многовещаннии умолкают, зряще обилие чудес твоих, Алексие праведне, мы же, неискусен язык имуще, обаче желанием прославити тя побеждаеми, с любовию взываем ти сицевая:

Радуйся, Духа Святаго жилище украшенное;
Радуйся, от бед и скорбей прибежище благоотишное.
Радуйся, отче великий и смиренномудрый;
Радуйся, души людския ко Христу приводяй.
Радуйся, словеса Божия на сердце твоем начертавый;
Радуйся, единыя правды Божия взыскавый.
Радуйся, оправдания Божия паче всех тленных благ возлюбивый;
Радуйся, в послушании Богови присно пребывый.
Радуйся, сокровенных подвигов ради Христа делателю;
Радуйся, тайныя милостыни раздаятелю.
Радуйся, яко еси бесов добропобедный прогонитель;
Радуйся, яко еси добродетелей в чадех твоих насадитель.
Радуйся, праведне Алексие, предивный чудотворче.

 

 

Кондак 10

 

Спасти хотя душу и Царствие Небесное наследовати, отче Алексие, велиим подвигом от Господа прощение грехов прияти сподобился еси, темже улучив жизнь вечную, со Ангелы славиши Бога: Аллилуйя.

 

 

Икос 10

 

Стена несокрушимая бысть молитва твоя людем православным, егда же призва тя Господь в обители небесныя, велиею скорбию о сиротстве своем сокрушающеся, плакашася вся чада твоя духовная горце; обаче и радостию о вечном твоем блаженстве плач растворяюще, взываху тебе:

Радуйся, отче снятый, с нами на земли поживый;
Радуйся, сродниче наш, Богу угодивый.
Радуйся, молитися о нас пред Престолом Божиим присно обещавый;
Радуйся, в животе богоугоднем утверждатися выну нас наставлявый.
Радуйся, яко земля, приявшая мощи твоя, освятися;
Радуйся, яко тою мнози недужнии исцелишася.
Радуйся, по успении твоем с любящими тя духом пребываяй;
Радуйся, просящих с верою николиже тщи отвращаяй.
Радуйся, истинный пастырю стада Христова;
Радуйся, правило жизни благочестивыя.
Радуйся, заступниче наш богодарованный;
Радуйся, наставниче наш богопросвещенный.
Радуйся, праведне Алексие, предивный чудотворче.

 

 

Кондак 11

 

Пение всеумиленное приими от нас, отче праведне, пред Престолом Всесвятыя Троицы непрестанно моляся за ны; мы же со Ангелы и всеми святыми радующеся о славе твоей, поем Богу: Аллилуйя.

 

 

Икос 11

 

Светозарному светильнику уподобился еси, отче, сияние святости источая, благодати Духа Святаго исполнен быв. Мы же, мысленныма очима на тя взирающе и лучами, от тебе исходящими, согреваеми, любовию к тебе уязвляемся и взываем ти таковая:

Радуйся, древним великим отцем в подвизех подражавый:
Радуйся, тех ревности по Бозе преисполненный.
Радуйся, невещественным огнем осияваемый;
Радуйся, на воздусе моливыйся.
Радуйся, яко тобою благословися земля окрестная;
Радуйся, яко тобою прославися Новград Нижний.
Радуйся, страны нашея Российския дивная доброто;
Радуйся, Вселенския Церкве цвете благоуханный.
Радуйся, крине небесный, на земли процветший;
Радуйся, во плоти ангельскою чистотою блиставый.
Радуйся, силу правыя веры, человеки обновляющую, всем явивый;
Радуйся, славу Христа Человеколюбца показавый.
Радуйся, праведне Алексие, предивный чудотворче.

 

 

Кондак 12

 

Благодать от святых мощей твоих обильно изливая, вся недужныя с верою к тебе притекающия здравы сотворяеши, отче Алексие. Славяще Господа, даровавшаго нам о тебе таковыя милости, хвалебную песнь воспоем Ему: Аллилуйя.

 

 

Икос 12

 

Поюще равноангельное житие твое и преславная чудотворения, Алексие праведне, дивящеся добродетелем твоим, ублажаем тя яко дивнаго о нас молитвенника пред Богом, темже со умилением вопием ти:

Радуйся, источниче исцелений благодатных;
Радуйся, сострадальниче сирых и страждущих.
Радуйся, милостивый скорбящим помощниче;
Радуйся, наставниче ищущим спасения.
Радуйся, Небеснаго Отечества гражданине;
Радуйся, Горняго Иерусалима жителю.
Радуйся, добродетели ризу светлую стяжавый;
Радуйся, радости вечныя удостоенный.
Радуйся, яко в обителех райских наслаждаешися;
Радуйся, яко Господу в веселии предстоиши.
Радуйся, о всех помощи твоея просящих молит венниче;
Радуйся, за вся верныя ко Христу и Богородице ходатаю.
Радуйся, праведне Алексие, предивный чудотворче.

 

 

Кондак 13

 

О, прехвальный угодниче Христов и великий чудотворче, праведне отче Алексие, приим малое сие приношение наше, умоли Господа Иисуса Христа даровати нам в покаянии усердие, к деланию заповедей Божиих твердое произволение, в правой вере утверждение, во всех делех наших благое поспешение и по скончании живота нашего души спасение, да с тобою вкупе воспоем Богу: Аллилуйя. Аллилуйя. Аллилуйя.

 

(Этот кондак читается трижды, затем икос 1 и кондак 1)

 

 

 

МОЛИТВА ПЕРВАЯ

 

Святый праведный отче наш Алексие, сохрани и соблюди нас молитвами твоими от искушений диавольских и падений греховных, испроси нам свыше помощь во время уныния и безпомощия нашего, да не преткнемся о камень соблазна, но неуклонно шествуем путем заповедей Христовых, дондеже достигнем оных блаженных обителей райских, идеже ты ныне водворяешися и веселишися. И яко предумершую душу отрока молитвою твоею воскресил еси, тако и душам нашим испроси у Господа к усердию воззвание, да избежавше молитвами твоими мытарств воздушных и власти лютаго миродержца, унаследуем Царство Небесное и прославим великолепое Имя Отца, и Сына, и Святаго Духа во веки веков. Аминь.

 

 

МОЛИТВА ВТОРАЯ

К тебе, о праведный отче Алексие, мы, грешнии и недостоинии, притекаем и со умилением взываем ти: призри ныне милостивно с высоты святыя своея на Отечество наше и нас, тя прославляющих. Приявший в житии своем тяготы людей и сердцем милующим понесый скорби их, приими в молитвенное твое предстательство и нас, грехи многими обремененных и суетою мира сего утружденных.
В тебе, о дивный старче, прославися Господь, явив тя таинником милости Божией. Тя призываем неотступно: буди врач душам и телесем нашим, унывающим — утешитель, малодушным дерзновение низпосли, помраченных злобою всепрощению научи, воздержанию способствуй. Воспламени, благий делателю винограда Христова, хладные сердца наша ревностию служения твоего, научи молитве непрестанной и деятельной любве с утеснением себе ради блага ближних наших. Укрепи молитвами твоими чада Церкви нашея, да поживем в любве и мире, а вне ограды церковныя пребывающии да уразумеют Христову Истину и вкупе с нами прославят Животворящую и Нераздельную Троицу и твое милостивное предстательство во веки веков. Аминь.

 

МОЛИТВА ТРЕТЬЯ

О всечестный и преблаженный отче наш Алексие, дивный старче Московский и всея Церкви Россииския похвало и радование! Велию любовь ко Господу имея, заветы евангельския непреложно исполняя, душу твою за паству полагал еси, милующим сердцем болезнуя о всех, просящих твоея помощи. Приими малое сие моление наше, и яко в земном житии твоем отирал еси всяку слезу, облегчал еси всяку скорбь, так и ныне милосердый молитвенниче и ходатаю наш, возьми тяготы, болезни и скорби наша, исполни страждущая сердца радостию, умоли человеколюбца Бога о прощении безчисленных прегрешений наших, да очистив душу покаянием, к деланию доброму приступим. Ей, старче благий, буди и нам пастырем добрым, наставляя на стезю спасения, да молитвами твоими безпорочно пройдем путь жития нашего и обрящем Отечество Небесное, идеже ты со ангелы и всеми святыми предстоиши Престолу Святыя Троицы, славяще Безначального Отца со Единородным Его Сыном и Пресвятым, и Благим, и Животворящим Его Духом во веки веков. Аминь.

 

 

 

ТРОПАРЬ

Тропарь, глас 1

 

Помози в бедах, утеши в скорбех, пастырю добрый, отче Алексие, подвигом старчества миру просиявший, во мраце беззаконий отечеству нашему лучу Света Христова. Болезнуя сердцем о всех притекающих к тебе, ныне и о нас усердно Бога моли, любовию чтущих тя.

 

Кондак, глас 5

Велии труды любве и милосердия в мире подъял еси, праведный старче Алексие, от святаго пастыря Кронштадтскаго благословение на помощь людем страждущим прияв, еды и скорби людския яко вериги незримыя на рамо свое возложи. Мы же ведуще тя яко молитвенника дерзновенна ко Господу, со умилением зовем ти: моли Христа Бога о чтущих святую память твою.

 

Фото иконы: http://visb.3dn.ru/photo/koncerty/pravednyj_aleksij_bortsurmanskij_chudotvorec/4-0-344