Собор преподобных отцов Киево-Печерских

(Празднование собора всех преподобных отцев Киево-Печерских в неделю 2-ю Великого поста;

Собор преподобных отцев Киево-Печерских, в Ближних пещерах (преподобного Антония) почивающих 28 сентября / 11 октября;

Собор преподобных отцев Киево-Печерских, в Дальних пещерах (преподобного Феодосия) почивающих 28 августа / 10 сентября)

АКАФИСТ

(Акафист всем преподобным Киево-Печерским читается также
святому Евстратию-Печерскому)

 

Кондак 1

 

Богоизбранный полче и личе богокрасный, преподобнии отцы наши Печерстии, чудес многих источницы, иноческаго, постническаго общежития на Руси первоучители и наставницы, сие вам от душевнаго желания дерзаем принести похвальное пение. Вы же, яко имущи велие дерзновение к подвигоположнику Христу Богу нашему, молитеся Ему, молим вы, от всяких бед и зол нам избавитися, да с благодарением зовем вам: Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

  

Икос 1

 

Ангелоподобнаго возжелаете жития, отцы богомудрии, мирския многомятежныя молвы избегосте, в пещерах тесных и темных вселистеся, идеже труды велии и подвиги подъясте, да Христа приобрящете; темже и слышите от немощных нас и грешных сия песнопения:

Радуйся, Антоние, воздержания, смирения, послушания и безмолвия зерцало;
Радуйся, веры православныя крепкое забрало.
Радуйся, Феодосие, монашеская похвало;
Радуйся, обители твоея велелепная славо.
Радуйся Михаиле, первый архипастырю наш и учителю;
Радуйся, веры Христовой усердный насадителю и идолослужения искоренителю.
Радуйся, Прохоре, чудотворче всеблаженный, хлебы сущими от былий и солию от пепла, гладом тающия люди пропитавый.
Радуйся Иоанне, постом неизреченным просиявый.
Радуйтеся, Феодоре и Василие, во временней жизни взаимным любве Христове союзом себе связавшии;
Радуйтеся, от корыстолюбиваго князя Мстислава крепко пострадавшии.
Радуйтеся, яко и по блаженней кончине вашей во единей раце дружелюбно почиете;
Радуйтеся, яко во единем часе к престолу Божию предстасте.
Радуйтеся, вси преподобнии отцы наши Печерстии; всемирнии светильницы, великии и пpecлавнии чудотворцы.

  

Кондак 2

 

Видя Христос Господь, яко во имя Его снидостеся купножительствовати, посреде вас обретеся, пособствуя вам в различных подвизех, наипаче же во брани со духи злобы поднебесной, и обогащаше вас благодатию Духа Пресвятаго: одному подая дар пророчества, другому же дары исцелений, иному власть изгоняти духи нечистии, вы же благодать сию приемши, не вознесостеся духом своим, но в простоте души и сердца со смирением и благодарением Благодателю Богу песнь воспесте:
 Аллилуиа.

  

Икос 2

 

Разум неуклонен имуще и крепкою верою в Бога вооружившеся, пути спасительнаго держастеся, отцы прехвальнии, егоже и совершисте преславно с помощию Христа и Пречистой Его Матери; сию помощь и нам, хотящим богоугодному житию вашему подражати, испросите у престола Всевышняго, да благодарно воспоем вам:

Радуйся, Поликарпе, главо пресветлая, жития святых конечнее списавый и воедино собравый;
Радуйся, яко с ними у престола Троицы Пресвятыя представый.
Радуйся, Варлааме, уме благодатный, пещеру темную и тесную светлым и пространным палатам предпочтый;
Радуйся, златотканныя одежды на рубы иноческия пременивый.
Радуйся, Дамиане, целебниче безмездный, молитвами и святым елеем болящих уврачевавый;
Радуйся, купножития на небесех с преподобным Феодосием у Господа себе испросивый.
Радуйся, Никодиме, в печении хлебов священных тридесят лет потрудивыйся.
Радуйся, Лаврентие, в затворе теснейшем многолетно подвизавыйся.
Радуйся, Афанасие, дар слез и умиления от Господа получивый.
Радуйся, Еразме, за украшение храма Божия Матере палату красоты неизреченныя в Небесном Царстве от Христа стяжавый.
Радуйся, Луко, заповедей Божиих усердный делателю.
Радуйся, Нектарие, послушания неленостный исполнителю.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

  

Кондак 3

 

Силою и благодатию, данною ти свыше, в животе твоем, Агапите блаженне, болезни различныя врачевавый. Благодать сия и сила тебе и ныне присущая, паче же и умножися. Темже молим тя: исцели наша недуги, уврачуй страсти душевныя и телесныя, да здрави суще душою и телом, воспоем прославльшему тя Христу:
 Аллилуиа.

  

Икос 3

 

Имущи к вам веру, любовь и усердие, ходатаи будете жизни вечныя, отцы богоприятнии! Ваши бо молитвы многомогущии у престола Божия; сего ради и прибегаем к вам, яко великим помощникам нашим и заступникам, славяще вас сице:

Радуйся, Иоанне, яко послушание и по кончине своей проявил еси;
Радуйся, яко старшему брату свой смертный одр уступил еси.
Радуйся, Феофиле, яко братним послушанием от гнева исцелился еси;
Радуйся, яко вместо гнева умиление и слезы непрестанныя возымел еси.
Радуйся, Кукшо священномучениче, яко язычников множество ко Христовой вере привел еси;
Радуйся, яко за Христа со учеником твоим во главу усечен был еси.
Радуйся, Алексие, молитвы умныя добрый делателю.
Радуйся, Григорие, икон святых благоговейный писателю.
Радуйся, Савво, чудес великих творителю.
Радуйся, Сергие, послушания прехвальный рачителю.
Радуйся, Меркурие, житию безплотных поревнователю.
Радуйся, Пимене многоболезненный, крепкий на Бога упователю.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

 

Кондак 4

 

Бурный и широкий жития мирскаго путь возненавидевше, возлюбисте же вседушно узкую и прискорбную жития монашескаго стезю и сею усердна потекосте, отцы богомудрии; темже и Господь, видя ваше благое произволение, заповеда Ангелом своим споспешествовати вам и укрепляти вас. Сего ради, хотящему всем человеком спастися Христу, поем:
 Аллилуиа.

  

Икос 4

 

Слышаще людие, яко Господь прославил святым нетлением телеса ваша и дарова вам благодать целити недуги и болезни, темже притекают к вам движимые верою, с Востока, Запада, Севера и Юга, похваляюще вас приветствии таковыми:

Радуйся Несторе, первый Русский бытописателю;
Радуйся житий святых отцов Печерских сказателю и усердный им во всем подражателю.
Радуйся, Евстратие, доблий мучениче и постниче, сообразно самому Христу пострадавший;
Радуйся, все язвы Господа Иисуса на теле своем понесший.
Радуйся, Елладие, затворников похвало.
Радуйся, Иеремие, прозорливых славо.
Радуйся, Моисее, целомудрия светило.
Радуйся, Иоанне, девства победо.
Радуйся, Марко, его же честнии руце гробы святым ископаша;
Радуйся, его же гласа мертвии послушаша.
Радуйся, Николо княже, в послушание братии Печерстей всецело себе предавый.
Радуйся, Григорие, иже потоплением в реце кончину блаженную приявый, его же тело пречестное в келлии чудесно обретеся.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

  

Кондак 5

 

Видя Дионисий богомудрый телеса ваша во гробех святолепно почивающа, яже вниде покадити в день Пасхи Христовой, от избытка любве и благоговения к вам воззва: «Святии отцы и братия, ныне есть велик денъ: Христос воскресе!» И, о чудесе! Слышит абие от вас громогласное: «Воистину воскресе!» Дивяшеся чудеси сему преславному, поем воскресшему и пребывающему во век века Христу Богу:
 Аллилуиа.

  

Икос 5

 

Разумнии звезды небесе пещернаго вы есте, отцы прехвальнии, путь иноческаго жития освещающии и на круге Русския Церкве православныя пресветло блистающии. Слава бо всечестных подвигов ваших во вся мира концы протече, исповедание же святыя веры вашея всю Вселенную облиста: того ради и дерзаем приносити вам сия убогия наша пения:

Радуйся, Онисиме, яко теснотою затвора пещернаго в пространная селения райския прошел еси;
Радуйся, яко алчбою и жаждою насыщение бесконечное лицезрения Божия узрел еси.
Радуйся, Матфее, яко за чистоту души и тела дара пророческаго сподоблен еси;
Радуйся, яко кротостию и незлобием высоких добродетелей достигл еси.
Радуйся, Исаие, кладезю глубокий смирения;
Радуйся, источниче неиссякаемый чудотворений.
Радуйся, Авраамие, сыне святаго трудолюбия.
Радуйся, Нифонте святителю, поборниче Православия.
Радуйся, Сильвестре, бисере пречестный.
Радуйся, Пимене, сосуде Духа Святаго избранный.
Радуйся, Онуфрие, языком молчаливый, умом хваливый Бога.
Радуйся, Анатолие, терпеливый душею, разумом целомудренный.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

 

Кондак 6

 

Проповедницей нам является честная десница твоя, Спиридоне богоприятне, ею же православных чад твоих поучаеши, како персты слагати подобает во изображение креста святаго на челе, уста же расколоучителей заграждаеши, яве обличая их неправое учение о перстосложении; сим бо образом осенив себе крестным знамением отошел еси ко Христу, Ему же предстоя молися, да угасит безмерно горящую пещь страстей наших, да дарует нам истинное усердие славословити Его непрестанно во псалмех и пениих духовных в сей жизни и в будущей да сподобит нас пети Ему:
 Аллилуиа.

 

Икос 6

 

Возсия яко пресветлое светило богознаменитая обитель ваша, отцы преподобнии и всю землю Русскую благодатию Божиею просвети: юже кровными поты воздвигосте и на ню же благодать свыше молитвами вашими и святыми подвиги привлекосте, ревнуя бо поревновасте пророчеству, еже рече: «На горах сих возсияет благодать Божия и вера умножится». Темже к вам, яко виновником пророчества онаго зовем:

Радуйся, Арефо, яко Господь милость свою на тебе удиви;
Радуйся, яко Господь украденное богатство твое в милостыню тебе вмени.
Радуйся, Феофиле, ему же земля бысть ложем, власяница одеждею.
Радуйся, Сисое, ему же бдение бысть сном, слезы успокоением.
Радуйся, Алипие, ему же Ангели в трудех святаго иконописания помощники быша.
Радуйся, Симоне cвятитeлю, его же святии руцы жития святых написаша и нам на пользу душевную предаша.
Радуйся, Никоне, Антония первый благоговейный учениче;
Радуйся, Феодосия в делех монастырских усердный сотрудниче и в душеспасительных подвизех рачительный соучастниче.
Радуйся, Феофане, яко тело постом умертвил еси.
Радуйся, Онисифоре, яко душу бденными молитвами оживил еси.
Радуйся, Макарие, яко за жизнь святую истлением тела от Господа почелся еси.
Радуйся, Анастасие, диаконе благоговейный и страдальче предивный.
Радуйтеся, вси преподобнии отцы наши Печерстии, всемирнии светильницы, великии и пpecлавнии чудотворцы.

 

 

Кондак 7

 

Хотя преблагий Господь страну нашу благодатию Своей обогатити и дати образ хотящим спастися, подвиже вас Духом Святым на вельми скорбное и богоугодное житие, им же удивисте не токмо человеков на земли, но и Ангелов на небеси: вы бо, о, отцы богоноснии, в пещерах заключившеся, аки во гробех, всеусердно в теплоте сердца и души, Единому Богу поработасте, богокрасно поюще песнь:
 Аллилуиа.

 

Икос 7

 

Новыя жизни иноческия отцами и учителям и явистеся, яже на Руси ниже именовася когда, сию вы насадисте и добре укоренисте. Темже безчисленныя множества монашествующих последующе душеспасительным стезям вашим благодарно вам воспевают:

Радуйся, Авраамие, яко Христа Господа всею душою и сердцем возлюбил еси;
Радуйся, яко Его ради и труды велии затвора пещернаго подъял еси.
Радуйтеся и вы, дванадесять братий прекраснии, яко церковь Божия Матере небеси подобную украсили есте;
Радуйтеся, яко за труды ваша динарий от Сына Ея Христа Бога, Царство Небесное восприяли есте.
Радуйся, Исаакие, яко премногими страдании диавольскую прелесть низложил еси.
Радуйся, Илие, яко воздержания подвиги и безстрастия благодатию обогатился еси.
Радуйся младенче мучениче Иоанне, яко кровь твою святую неповинно за Христа пролиял еси;
Радуйся, Никоне, яко на кресте простершему волею длани Христу терпением и незлобием вельми угодил еси.
Радуйся святителю Ефреме, яко пчела сот пресладок, тако ты Устав студийский в обитель Печерскую принесл еси.
Радуйся, Тите блаженне, яко гневнаго беса смирением попрал еси;
Радуйся, яко тьму лукавых демонов далече от нас прогоняеши.
Радуйся, яко свет, еже не гневатися на ближняго, собою нам проливаеши.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

 

Кондак 8

 

Странное и преславное чудо благодати небесныя проявися воочию всех верных: пещера разбойников в храм Божий соделася: идеже бо грех преизобилова, тамо благодать приумножися, идеже терн беззакония укоренися, тамо кедры рая Христова возрасташа, идеже блато смрадное греха бяше, тамо источницы безсмертия воскипеша, идеже смерть обладаше, тамо Господь воцарися. Дивящеся изменению десницы Вышняго, зовем: Аллилуиа.

  

Икос 8

 

Все ваше, преблаженные отцы, тщание, желание и попечение бяше, да всезлобному рода христианскаго врагу гордую главу попрати и сотрети, Господа же Иисуса Христа в душах и телесах ваших да возвеличите и прославите; сего ради приветствуем и вас сице:

Радуйся, священномучениче Лукиане, яко уготовася тебе небесное жилище;
Радуйся, яко страдальцу, даровася тебе нескончаемое райское покоище.
Радуйся, Лаврентие, яко суеты мирския избегл еси;
Радуйся, яко к общежитию с миром ангельским востекл eси.
Радуйся, Пафнутие, яко, помня час смертный, непрестанно слезил еси;
Радуйся, яко при кончине от Ангелов утешения сподобился еси.
Радуйся, Мартирие, яко за великую чистоту и постнические подвиги дара целити болезни сподоблен был еси.
Радуйся, иерарше Иларионе, яко стадо словесных овец Христовых на пажитех Православия добре упасл еси.
Радуйся, княже Феодоре, яко в честь и во славу Церкви православной много потрудился еси.
Радуйся, Дионисие, яко «воистину воскресе Гоcподь» от преподобных отцев в день Пасхи услышал еси.
Радуйся, Афанасие, яко красная мира сего презрев, блату вменил еси.
Радуйся, святителю Феофиле, пастырю добрый, яко за пасомых тобою и живот положити готов был еси.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

  

Кондак 9

 

Всем есте вся, отцы преподобнии, небесная бо врачества предлагаете нам и к безмездным лечбам своим вся ны созываете, не хитростьми человеческими, ни обязаньми, но действием Святаго Духа душевныя и телесныя исцеления преестественне подаете, еже приемлюще обильно, род всяк и возраст Благодателю и Промыслителю зовет благодарно:
 Аллилуиа.

  

Икос 9

 

Витии многовещаннии риторскими своими языки не возмогут достойно воспевати вашея святыни, тем паче аз убогий словом и разумом, киими песньми восхвалю вас, о отцы, Ангелом равночестнии, обаче побужден усердием и любовию яже к вам, дерзаю венчати вас сими недостойными моими похвалами:

Радуйся, Зиноне, постом и многими иными подвиги иноческаго жития светло просиявый;
Радуйся, смирением, кротостию и послушанием землю кротких наследивый.
Радуйся, Григорие, яко зелием, им же питался, здравие болящим преподавый.
Радуйся, Ипатие, святым отцем в болезнех со всеусердием послуживый и за сия благодать Духа исцеляти недуги восприявый.
Радуйтеся, отцы преподобнии, их же пречестнии главы во здравие душ и телес наших миро источают;
Радуйтеся, их же пресвятии души в неизреченней славе Божию престолу предстоят.
Радуйся, Моисее, яко молитвами, постом и веригами страсти умертвил еси.
Радуйся, Иосифе, яко вратами смиреннаго и усерднаго послушания в вечный покой вшел еси.
Радуйся, Павле, яко николиже в праздности времене препроводил еси, темже со труждающимися и обремененными водворился еси.
Радуйся, Сисое, яко чрезмерными подвигами постничества не токмо человеков, но и Ангелов удивил еси.
Радуйтеся, Леонтие и Геронтие, яко из младенчества Христа возлюбили есте;
Радуйтеся, яко во отрочестве в подвизех наставником соравнялися есте.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

 

Кондак 10

 

Спасти хотя многих, всех обращения и спасения милостивно ищай премилосердный Христос Бог наш, других вас отцев Египта, Фиваиды и Палестины, — Руси прояви, да вами многих вразумит и покажет вашим житием путь ко спасению, в чем вы потруждшеся, добре преуспеете, в неведении сущих Евангельстей истине неленостно поучая, к правоверию приведосте и к хранению Божиих заповедей и богоугодному и чистому житию словом и делом непрестанно возбуждасте, Богу Помощнику песнь поюще:

Аллилуиа.

  

Икос 10

 

Стеною твердою и ограждением крепким будете нам, всехвальнии отцы, с теплою верою, усердием и любовию к вам прибегающим, ограждающе нас противу чувственных и мысленных врагов наших, да не убоимся их, но да побеждаим тии молитвами вашими ко Христу Богу, зовуще с благодарением к вам сице:

Радуйся, Несторе, нижняя презревый, вышняя же возлюбивый;
Радуйся, яко пред кончиною самого Господа Иисуса Христа со Ангелы видети сподобивыйся.
Радуйся, Феодоре, яко хранение устом своим положил еси.
Радуйся, Памво исповедниче, боги языческия проклявый, имя же Господа небесе и земли исповедавый.
Радуйся, Софроние, затвором крепким и железом тело стеснивый, душею же и умом со псалмопением к небеси непрестанно паривый.
Радуйся, Панкратие, яко болящим благодатию Духа Святаго исцеления источаеши.
Радуйся, Антоние, яко духи лукавыя от приходящих к тебе с верою проганяеши.
Радуйся, Мардарие, нищеты и нестяжания любителю.
Радуйся, Аммоне, древним отцем святым в подвизех всеусердный подражателю.
Радуйся, Пиоре, страсти телесныя огнем воздержания попаливый.
Радуйся, Мартирие, добродетельным нравом душу просветивый.
Радуйся Руфе, во образ житием своим постникам и подвижникам бывый.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

 

Кондак 11

 

Пение всякое хвалебное побеждается множеством преславных ваших подвигов и трудов чрезмерных, превосходящих житие человеческое, но ангельскому подобное: и похвалам от Ангел паче, а не от человек вам приносимым быти достояше, обаче усердное наше видяще произволение, с верою и любовию приносимое нами приимите пение и испросите нам оставление грехов, и да в добром исправлении и покаянии скончаем временное сие житие наше, в вечном же да сподобимся молитвами вашими пети Богу: Аллилуиа.

 

 

Икос 11

 

Свет вам незаходимый возсия возненавидевшим страстей тьму, угодницы Божии преславнии: веселие же нескончаемое восприя вас, добрый подвиг со тщанием скончавшим. Темже предстояще престолу Христову, поминайте нас поющих вам сия:

Радуйся, Евфросиние, горняго Иерусалима дши пречестная;
Радуйся, дольняго Иерусалима, нашею града Киева, мати пресветлая.
Радуйся, Иулиане, дево, лилие прекрасная, произростшая в земном Христовом саде;
Радуйся, процветшая в небесном Его вертограде.
Радуйся, Макарие священномучениче, яко до смерти верен пастырь был еси;
Радуйся, яко прежде, неже прияти ти престол на земли чувственный, на престолы мысленные предпослался еси.
Радуйся, Кассиане, затворниче дивный.
Радуйся, Арсение, яко за богоугодные временные, вечно от Христа упокоен еси.
Радуйся, Евфимие, яко пощения ради твоего великаго и немолчнаго славословия Богу, райских сладостей насыщаешися и со Ангелы поеши.
Радуйся, Вениамине, яко раздав имения твоя, на лоне Авраама почиваеши.
Радуйся, Тите, яко земнаго царя воинство оставль, да Небесному Царю храбрейший воин будеши.
Радуйся, Ахило, яко от юности распялся еси житию и страстем, да распеншагося волею на кресте Христа приобрящеши.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

 

Кондак 12

 

Благодатию Всемилостиваго и Всещедраго Бога житием равноангельным пожисте, отцы духоноснии, чудеса многи содеясте, храм Пречистей Госпоже Деве Богородице пречуден создасте и яко невесту прекрасну златом, сребром и камением многоценным украсисте, в онь же людие от всея Вселенныя приходяще, восхваляют о вас Христа Бога, поюще Ему: Аллилуиа.

 

Икос 12

 

Поюще ваше безмолвное житие, похваляем подвиги ваша — пост, молитвы, слезы, коленопреклонения, всенощныя бдения, плоти умервщления, духа сокрушение, долулегания, смирение, кротость, молчание, терпение, нищету, нeстяжание и вся та чтим, яже любви ради Христовы подъясте, тако воспевающе:

Радуйтеся, Паисие и Меркурие, яко в неразлучней жизни и единодушней любви братской пожисте на земли;
Радуйтеся, яко единою жизнию и радостию вкупе наслаждаетеся со Христом и на небеси.
Радуйся, Макарие, яко Самуил в юном возрасте в служение Господу предназначен был еси.
Радуйся, Пимене, яко пшеница гумна Христова, в житницы небесныя предопределен еси.
Радуйся, Силуане, яко на крилех поста и молитвы к Богу возлетел еси.
Радуйся, Агафоне, яко на плещех добродетелей высоких в горныя подъят еси.
Радуйся, Захарие, яко бесом страшен был еси, Ангелом же собеседник явился еси, с ними же и ко престолу Троицы Пресвятыя воспарил еси.
Радуйся, Игнатие, княже пресветлый пещернаго града;
Радуйся, пастырю преподобный богоизбраннаго стада.
Радуйся, мучениче младенче, яко за Христа от Ирода бесчеловечнаго чашу смерти испивый;
Радуйся, землю Востока кровию освятивый и нашу страну пришествием твоим благословивый.
Радуйся, Лонгине, яко путем узким право шествовал еси, им же и рая Божия доспел еси.
Радуйтеся, вси преподобнии отцы наши Печерстии, всемирнии светильницы, великии и преславнии чудотворцы.

  

Кондак 13

 

О Всеблаженнии и всяких похвалений превышнии, преподобнии отцы наши Печерстии, приимите сие малое вам приношение, якоже и Господь прият две лепты вдовицы: и не возгнушайтеся молением нашим, яко и Христос не возгнушался лобзания блудницы, и сподобите нас ходатайством вашим ко Господу в добром исправлении и покаянии скончати житие сие и с молитвою во устех, в сердце и душе отьити от сея временныя жизни к вечней, и предстати престолу Всевышняго, идеже вы предстоите и со Архангелы и Ангелы и со всеми святыми, песнь поюще: Аллилуиа.

 

(Этот кондак читается трижды, затем икос 1 и кондак 1)

 

 

 

Молитвы всем преподобным Киево-Печерским

 

 

МОЛИТВА ПЕРВАЯ

 

Преподобнии и богоноснии отцы наши Антоние и Феодосие, и вси преподобнии Печерстии, светила земная пресветлая, от темных мест пещерных в земли Русской славно просиявшии, и сию многими светозарными ангелонравнаго вашего жития звездами онебесившии, всю же Вселенную высоких добродетелей светлостьми и чудес божественных блистаньми удивившии, и ныне смертным западом плотски на время во гроб зашедше, душами со Христом Солнцем Правды, суще праведницы просвещаетеся, яко солнце во Царствии Небеснем: идеже молитвенная ваша к Богу Свету лучи о Отечестве своем простирающе, не забудите и нас, всегдашния своя молитвенники, в нощи страстей и скорбей пребывающия, свыше благодатными призирати осиянии; яко да во свете добродетельнаго вашего жития право ходяще, сподобимся зрети свет неприкосновенныя славы Божия, хваляще Его купно с вами в нескончаемыя веки. Аминь.

 

 

МОЛИТВА ВТОРАЯ

 

О угодницы Христовы, преподобнии отцы наши Антоние и Феодосие и вси святии Киево-Печерстии, светильницы пресветлые, святостию иноческаго жития первые просиявшие на земле Российстей, покровители града Киева и всего отечества нашего! К вам, молитвенникам теплым и предстателям непостыдным, усердно притекаем, в нуждах и скорбях наших утешения и помощи просяще. Помозите нам, рабам Божиим (имена), заступницы наши! Утвердите нас в вере святей, сохраните Церковь Божию от пагубных ересей и расколов, научите нас всегда творити заповеди Божия и вся предания церковная, от отец нам заповеданная, будите нам благосердые отцы и теплые молитвенницы, яко да прославим имя Живоначальныя Троицы, Отца и Сына и Святаго Духа во веки. Аминь.

 

 

ТРОПАРЬ

(Тропарь Собору преподобных отцев Киево-Печерских, в Дальних пещерах
(преподобного Феодосия) почивающих)

 

Тропарь, глас 4

 

Мысленное солнце и светлую луну первоначальных Печерских, со всем собором преподобных днесь почтим: тии бо церковную твердь озаряюще, просвещают во тьме страстей бедствующих, и подают от Христа Бога молитвами своими помощь во всех скорбех и душам нашим просят избавления.

  

Кондак, глас 8

 

Избраннии от родов угодницы Божии, святии преподобнии Печерстии, на сих горах добродетельми просиявшии, и вас земля не потаила есть, но небо отверзеся вам и райское селение. Темже мы похвальныя песни Богу прославльшему вас в памяти вашей приносим: вы же, яко имущии дерзновение, ваш собор почитающих от всех бед молитвами вашими заступайте, яко заступницы наши и к Богу ходатаи.

 

 

ТРОПАРЬ

 

(Тропарь преподобным отцам Киево-Печерским,
в Ближних (Антониевых) пещерах почивающих)

 

Тропарь, глас 4

 

Столп огнезрачный и светоносное солнце, возсиявшее на горе Печерстей, великаго Антония со всем собором Богоносных отец приводим Тебе, Христе, в молитву, ихже ради молим подаждь обители нашей благодать и душам нашим велию милость.

 

 

Ин тропарь, глас 2

 

Егда снидосте во гробы и самех себе заключисте, тогда страсти умертвивше плотския, спогребостеся Христу, Богоноснии, и диавольския в подземных разрушисте ограды. Сего ради ангели венцы с Небес вам подают.

 

 

Кондак, глас 8

 

Отцы всечестнии, личе богокрасный, чудес многих источницы, миро источающии, сокровища краснобогатная Господня, в земли сокровенная, не престайте, молим вы, о нас молитися ко Господу да зовем вам: радуйтеся, всему миру светильницы.

 

 

Ин кондак, глас 2

 

Лик постнический собрася умне, мысленныма зряще очима, приидите, людие, хвалами почтите, покланяющеся мощем их, любовныя принесите дары, тии бо суть к Богу ходатае и молитвенницы о душах наших.

 

 

Величание

 

Величаем вас, преподобнии отцы наши Печерскии, и чтим святую память вашу, вы бо молите о нас Христа Бога нашего.

 

 

 

КАНОН

 

Канон, Глас 6

 

Песнь 1

 

Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще, поим Тебе, Единому Владыце.

 

В памяти преподобных Твоих даждь, Христе мой, помощь свыше, и научи мя умудряя Святым Твоим Параклитом, да принесу песненное хваление Тебе, Единому Владыце.

 

Собор Богоносных отец о Бозе собрася, людие, приидите в поклонение, несуще с собою одушевленныя жертвы, се бо призывают ны, да принесем славу Царю всех, Единому Владыце.

 

Ихже изведе восток и Российская земля и израсти Печерская гора, аки Богосажденная древеса, сих плоды объемлюще, людие, сотецытеся почтити, и песнь принесем Владыце.

 

Рай мысленный еси, Печерская святая горо, умножившая умная древеса, блаженныя отцы, ихже исчести по единому не могуще: о всех вкупе хвалу и песнь приносим Тебе, Единому Владьще.

 

Благоплодовитое древо и масличная ветвь, от Афона принесенная на сию гору, великий Антоний, егоже плодами увеселяюще души наша, приносим песнь Тебе, Христу, всех Владыце.

 

Стефан исполнь веры и благочестия, совершитель Богом основанныя Церкве, и Никон иконами украсивый, яко великая светила просияша, ихже чтуще, приносим песнь Единому Тебе, Христу, всех Владыце.

 

Слава: Славу Тебе приносяще, Троице Пресвятая, привожду молитвенника Варлаама чуднаго, презревшаго славу рода болярска: егоже ради славу мою в мире сем в персть всели, да тамо обрящу славу о Тебе, всех Владыце.

И ныне: В первое благородие Приведшая род человеческий святым Рождеством Твоим, обезчещенна мя бесовскими лаянии, приведи ко славе умней, и выну пою Ти: радуйся, Славо православным, Чистая Мати Дево.

 

Песнь 3

 

Ирмос: Несть свят, яко Господь, и несть праведен, яко Бог наш, Егоже поет вся тварь: несть праведен, паче Тебе, Господи.

 

Аще и несть красно пение во устну моею, обаче приношу ти, Ефреме Богоносе, ты бо оставив работати земному князю, послужил еси Царю Небесному, и приял мзду от руки Господни.

 

Исаию чту велегласнаго в даре чудесном и сего пою яко обдержавшаго Ростову архиерейство, моля да Вышняго Пастыря пастве прилучиши мя, заблуждшее овча, и приведеши ко ограде Его молитвами своими, преподобне.

Пресвитером красоту и целебником, Дамиана блаженнаго похваляю. Любовию бо ко всем горя, елеем и молитвою целяще, того врачевством и мене исцели, Владыко Господи.

 

Иеремия, хвалами чтится почтенный от свыше прозорливства даром, и бысть тайн человеческаго сердца видец в забвении мне сущу грехов неисчетных воспомяни, блаженне, и будеши наставник покаянию моему.

 

Матфей, видевый бесовския входы яве, и исправляяй дающаго вину прилогом страстным, яко ведый мысленныма очима мое неисправление, накажи, да величаю тя выну, преподобне.

 

Светильник Суждалю, Симон пастырь, пет буди с ним и Никита затворник, яко любителе великия Лавры и ревнителе иноческому исправлению, падша мя направите вашим, отцы, наказанием.

 

Слава: Славу Твою, Троице Святая, в жизни сей преподобнии в души своей сохраниша, тем сподобишася от Тебе присносущныя славы, Еяже и мы да не лишимся, собор их днесь Тебе во молитву представляем.

И ныне: Слово неизглаголанное веселие сущи преподобных, радости мя оных причастника сотвори и славы святых не лиши, яко вся Тебе возможна и твориши, елика хощеши, Марие Богоневесто.

 

 

Седален, глас 8-й

 

Звезды мысленныя озаряющия Российскую землю, Богоносных отец собор почитати дерзаю, но страстьми омраченную имый душу, умом недоумею, разжените тьму непостоянныя мысли и честно воспою песнь вам, отцы преблаженнии.

 

Слава, и ныне:

 

Звезды Незаходимыя Мати и заре таинственнаго дне, радуйся, Тобою бо узрехом свет и солнце истинныя правды, Еяже лучами озаренны, выну Тя поем, Отроковице Богоблаженная.

 

 

Песнь 4

 

Ирмос: Из горы приосененныя, Слове, пророк, единыя Богородицы, хотяща воплотитися, Боговидно усмотри, и со страхом славословяше силу Твою.

 

Из горы по предуведению Божию светила явишася на земли Богоноснии отцы, и просветиша Российскую землю светлостию жития своего: еже мы чтуще удивляемся и славословим, Христе, силу Твою.

 

Удивляемся, яко во плоти суще, вышше естества подвиг приемше, Ангелом уподобистеся, души бо своя вперисте в любовь Божию, и ничтоже во мире паче тоя предпочтосте, от неяже в немощной плоти прияша, Христе, силу Твою.

 

Стефан крепкий в посте и Анастасий, дерзновение имевый к Богу, во прошении бо своем все приимаше: их трудолюбие чтущи, славословлю, Христе мой, силу Твою.

 

Исаакий, прельщенный тьмою во свете, и светом исправления тьму прельстивый, яко и ныне сынове тьмы имени его боятся, от таковаго искушения избави нас, Христе, молится преподобный Твой, да славословим присно силу Твою.

 

Илию Муромскаго непреборимаго воина почитати подвиг дерзаю, в руце имущаго от оружия язву, в сердце же любовь к Тебе, Христе мой, глубочайшую ему сотвори рану, и сею паче венчается, славословя силу Твою.

 

Никонову во искушении славим крепость, яко претерпе много от неверных. Но множае терпением стяжа смирение и спасение, егоже молитвами и мы да спасемся, всемогущую, Христе, славословим силу Твою.

Слава: Во Едином существе Триипостасное прославляем Божество, Отца и Сына, и Духа Пресвятаго, Единаго Бога и, покланяющеся в памяти преподобных отец наших, славословим силу Твою.

И ныне: В Тебе упование имый, не устрашаюся бесовских нападений, и о Тебе дерзновение стяжав, сопротивляюся страхованиям сатанинским, ведущи, яко Ты еси, Владычице, гром враги устрашающий.

 

Песнь 5

 

Ирмос: Страстей мя мглы, яко от глубокия нощи, избавляяй, утреневати сподоби дух мой, молюся, во свете дне повелений Твоих, Христе.

 

Страстий мглу всю и похоть вредну отложще, терпением востекоша на предлежащий подвиг преподобнии Твои, Господи. Темже озаришася от Тебе благодатию, ходяще во свете повелений Твоих, Спасе.

 

Тита священника, поправшаго смирением гневнаго беса, и Лаврентия затворника, дерзновение имущаго на лукавыя духи, славим память: сии бо сохраниша заповеди Твоя, и славятся во свете Твоем, Спасе.

 

Сисоя просиявшаго в посте, восхвалити привожду на среду, но по достоянию не возмогу, яко невежа сый, на се простираюся. Упование же на Тя, Параклите Пресвятый, имам и Ты от Твоих даров подаси ми, Святе.

 

Феофил в чудесех изящный поется, той бо еще в жизни сей многия чудодействием удивляше, ныне же большее прием дарование, иным пособствовати, яко сохрани повеления Твоя, Спасе.

 

Василия и Феодора со мученики почитаем, яко бесом оклеветанны, от князя мучение неповинне прияста, ов стрелою кончину, ов же огнем и дымом: но единокупно с Тобою прославляются, Спасе.

 

Прохор хвалим есть в чудодействии своем и трудех, яко птица бо питашеся зелием несеянным, прочиим же от лободы хлеб светел, и от пепела соль претвориши подаваше, сего ради его ублажаем.

 

Слава: Духом водим, сын Вышняго наречеся, Иоанн просвещся постом, словом бо питашеся Божиим паче, нежели брашном, тем легко, аки пернат, протекл жизнь сию, от Тебе прием силу Твою, Спасе.

И ныне: Вся слава Дщери Цареви внутрь, одеянна и преукрашенна предстоит Тройческому Престолу. Отонюдуже сияет паче солнца, лучами благости Твоея, призри на ны, и поем, Мати Дево, выну силу Твою.

  

Песнь 6

 

Ирмос: Содержима мя приими, Человеколюбче, грехи многими, и припадающа щедротам Твоим, яко пророка, Господи, и спаси мя.

 

Одержим есмь любовию восхвалити ваш Собор, отцы Богоноснии, вы бо хвалими есте от Бога и человек, яко в жизни сей славу мира сего презресте, да исполните повеления Христова.

 

Кий язык изречет славу вашу, о преподобнии, юже многими трудами стяжаете, благодатию же навершисте. И сия знамения являют чудес благотворения исцелений, имже и нас немощных не презрите, да возможем исполнити повеления Христова.

 

Агапите многочудесне, исцеления даяй неоскудно, и Елладие преподобне, с другим Авраамием, яко много имущи дерзновение ко всех Владыце, не презрите рабы ваша, но молитеся, от всякия скорби избавитися, чтущим вас, преблаженнии.

 

Иоанне многолюбне, и по смерти брату подвижением тела любовь показавый, и Феофиле, славолюбия осквернение омывый слезами, яко зде и тамо неразлучни суще, не отлучите молитвы нашея, хвалящих вас.

 

Дамиане, исцеляяй страсти молитвою и елеем со Саввою чудотворцем, не презрите ны, изнемогших душевными страстьми, но от целебнаго вашего дара умастите нам душевныя струпы, яко хвалящих вас.

 

Нектарий послушливый со Сергием ти единонравным, яко предавший души своя под иго послушания Христова, преклоните молитвою своею наше непокорство под ярем послушливаго Иисуса, во еже поведенное нам исполнити.

 

Слава: Слава смоленскому граду, Меркурий пастырь, пастырей начальника своего пасый овца добре, духом же горя выну неразлучну быти от лика преподобных Печерских. Темже по смерти чудотворне приплы в кладе, и в пещере святей почивает телом, душа же радуется его со преподобными на ложи.

И ныне: К преподобных селению от дел восхода не имый, к Тебе прибегаю, Владычице Богородице, Ты бо еси Дверь Небесная, и пророком виденная лествица. По благодати даждь ми восхождение в сердце и отверзи двери милости Твоея.

 

 

Кондак, глас 2-й

 

Лик постнический собрася умне, мысленныма зряще очима, приидите, людие, хвалами почтите, покланяющеся мощем их, любовныя принесите дары, тии бо суть к Богу ходатае и молитвенницы о душах наших.

  

Икос

 

Восхвалити по единому кто возможет святыя Твоя, Блаже, изочту их и паче песка умножатся. Но Сам, Владыко Христе, исчитаяй множество звезд, и всем имена нарицаяй, яви им мольбы наша и тех ради яви щедроты Твоя на людех Твоих. Вемы бо, яко много имут дерзновение ко величеству Твоему, и ходатайствуют к Тебе, яко присно молитвенницы о душах наших.

  

Песнь 7

 

Ирмос: Отроки оросивый в пещи и Деву сохранивый рождшую Тя по Рождестве, благословен еси, Боже отец наших.

 

Отроческую песнь принести сопособствуй ми, личе Богокрасный отец Печерских, да вашим наставлением уныние прогнав, безстрастно воспою со христолюбивыми люди: благословен Бог отец наших.

 

Пимене многоболезненне, со благодарением протекий во болезни жизнь сию, но инем подаваяй молитвою во болезнех устрабу, ты ныне в неболезненном сый покою, от болезни мя премени, да пою: благословен Бог отец наших.

Злато чисто и сребро седмерицею дарований искушенно, Евстафий праведный, имже аще и праведно делатель бывый, но отсюду в делание добродетелей умных прииде, и сими украсив душу свою представи чисту, аки злато и поет: благословен Бог отец наших.

Времени и лета многочудесныя Церкве, жития и добродетели отец первоначальных писанием нам изъявивый, и делом их ревнитель, быв Нестор славный, егоже славим, поюще: благословен Бог отец наших.

Евстратий мучеником доброта, вторый Илия колесничник. Но ов аки на небо взятся, сей же в самыя огненною колесницею вниде Небесныя двери, гласу призывающу его от велелепныя Славы, идеже гласом радования поют: благословен Бог отец наших.

 

В чудесех благодаровитых славится блаженный Елладий, с нимже причитается и Лука економ, яко добрая делателя заповедей Владычних, ныне прияша возмездие потоком сладости и радостно поют: благословен Бог отец наших.

 

Слава: Дух Пресвятый со Отцем и Сыном спослушествует духови вашему, отцы Богоноснии, яко есте чада Божия, и сонаследницы Христовы, и Емуже работаете, с Ним и прославляетеся, поюще: благословен Бог отец наших.

И ныне: Дух Святый найде на Тя, и сила Вышняго осенши, показа Тя Матерь Чистую и по Рождестве. Еюже избавльшеся от чуждаго работы, блажат Тя вси роди, яко ублажи Тя благословенный Бог отец наших.

 

Песнь 8

 

Ирмос: На горе святей прославльшася, и в купине огнем Приснодевы Моисеови тайну явльшаго, Господа пойте и превозносите во вся веки.

Проявльшаго на горе святой Печерской, вас, светила великая, отцы Богоноснии, отнюдуже благодатныя лучи простросте, и всю Российскую землю чудесами просветисте. Тем поем Господеви и превозносим во веки.

 

Не многобурное море, но пещера святая являет ваша мощи, аки бисерие драгое, угодницы Божии, и обогащаете чудес излиянии всех к вам со верою приходящих, яко отсюду превозносят Господа хвалами во веки.

 

Матфей, грядущих провидец, и Иоанн во многом страдании светлейший паче инех, с Моисеом чистоты зерцалом, аки камение честное в пещере сокровенно, но являются чудесами всем иже превозносят хвалами Господа во веки.

 

Ефрем евнух умная голубица, ветвь масличную студийскаго устава принесый во обитель святую, и Арефа украшен старческими нравы, с прозорливым Иеремием славятся паче, неже славится адамант твердый, ихже слава во веки.

 

Марко гробокопатель, трудолюбием показася зерцало, мертвым воскреситель, кающимся наставник. Егоже слова, аки гласа львова, со страхом послушаху, но ныне страшен есть на беси, яко живет со Господем во веки.

 

Григорий не от Кесарии, но от Печерския Лавры чудотворец, показася, молитвою три дни и три нощи неподвижных татей удержавый водою жизнь скончав, и ныне радуется со Сергием Преподобным на воде покойней, Господа поющи хвалят во веки.

 

Слава: Слава буди Еразму, украсившему иконами Церковь Печерскую, и Онисиму пользы имениту, имже причисляется Матфей дивный пророческое дарование имевый. И в сих триех Тройческое Имя славится во веки.

И ныне: Славити Тя всегда кто не хощет, Чистая Дево, чужд есть спасения своего: слава бо Твоя всем простреся во спасение, славящим Тя, Марие Богоневесто.

 

 

Песнь 9

 

Ирмос: Проявленное на горе законоположнику во огни и купине, Рождество Приснодевы в наше верных, спасение, песньми немолчными величаем.

 

В горе святей, в темной пещере, кущи своя водрузисте, отцы преблаженнии, Божий рай сотвористе, и огустисте добродетельми и чудесы, аки благоплодовитыми древесами, от нихже приходящии верно приемлют исцеления плоды, и хвалами вас величают.

Спиридон, незлобия крин, и Никодим победотезоименитый, оба просфорницы святии, хлебы чисты в дар творяще Богу, и себе во благовонную жертву сотвориша. Причисляется к сим и Анатолий, ихже вси величают.

 

Ангеломудрый Алипий с Григорием византийским, искуснейшии иконописцы, не искусная дела наша вапами благих деяний исправите, да светлообразно представите Христу, славою вас величаем.

 

Пимен, постник благовонный цвет, и Ефрем священник, сия суть добрая маслица, ихже дарованием благодати умастившеся, отходят вернии и славословлении выну всех Творца величают.

 

Онуфрий молчания любитель, и Исаия, горлица пустыннолюбная, со Сильвестром преблаженным, триплетенная ветвь на бесы, их же птенцы страстныя прилоги до конца удавивше, имут дарование и иным во искушениях пособствовати, тем вси их величают.

Равноапостольный Владимир, с Богомудрыми Романом и Давидом, с нимиже и Никола Святоша, четверица князей Российских поется, и на тех, яко на колеснице умной Бог почил есть, тем вси их величают.

 

Слава: Слава мученицам светоносная Варвара, и Евфросиния от Полоцка, сияние девам, и Иулиания, издающая немощным в цельбу елей благодати. Сих ради триех дев спаси всех, Троице Святая, иже Тя с поклонением величающих.

И ныне: Радуйся, Славо святых Пречистая Дево, радуйся, Кораблю во многобурней жизни сей хотящим спастися, радуйся, Каменю, напоивший жаждущих благ вечных. Сие радуйся вси Тебе приносят, и песньми величают.