Преподобные Сергий и Герман Валаамские
(28 июня/11 июля; 11 / 24 сентября перенесение мощей)
Основатели Спасо-Преображенского Валаамского монастыря, преподобные Сергий и Герман, согласно церковному преданию, были греческими священноиноками, пришедшими в X веке во владения Великого Новгорода вместе с первыми православными миссионерами. Исторические сведения об основателях Валаамского монастыря скудны. Часто во времена вражеских нашествий (XII, XVII века) монастырь переживал опустошение, на долгие десятилетия прерывалось здесь иноческое служение. Во времена нашествий уничтожались церковные памятники, монастырские святыни, не раз были сожжены и разграблены богатейшие монастырские библиотека и хранилище рукописей.
Не дошло до нас и житие преподобных Сергия и Германа Валаамских. В XVI веке уже были утрачены многие исторические документы, об этом свидетельствует древний синодик Валаамского монастыря, после разорения обители в 1611 году хранившийся в Староладожском Васильевском монастыре. Этот синодик является единственным историческим документом, написанным на Валааме, в котором отражено подлинное знание о первоначальниках обители. В синодике в списке игуменов упоминаются преподобные Сергий и Герман.
Свидетельством иноческого подвига Преподобных стали церковное предание и древние летописные памятники. Смысл иноческого жития преподобных Сергия и Германа состоял в просвещении светом Христовой веры языческих карельских племен, в утверждении Православия на Севере Руси, в основании монашеской обители, которая стала оплотом Православия в ранние века христианского просвещения. Древние новгородские летописи сообщают об обретении мощей преподобных Сергия и Германа и перенесении их в Новгород во время нашествия шведов в 1163-64 гг.
Именно тогда состоялось местное прославление основателей Валаамского монастыря и было положено начало церковному почитанию преподобных Сергия и Германа в пределах Новгородской епархии. Свидетельством их церковного почитания является наличие их в соборе Новгородских святых, упоминания в службе «Всем русским святым», составленной в XVIII веке, а также прориси и иконописный подлинник XVIII века.
В начале XVIII века были известны иконы преподобных Сергия и Германа. Напоминание об утраченном житии Преподобных, встречается в многочисленных списках «Валаамской беседы», памятника церковной публицистики XVI-XVII веков. Зачало «Беседы», несомненно, является отрывком из сентябрьских Миней, где повествуется о перенесении мощей преподобных Сергия и Германа (Карельских чудотворцев) из Новгорода в монастырь Всемилостивого Спаса по утишении военной опасности, по-видимому, в 1182 г., что подтверждается новгородскими летописными источниками. Первоначальное место подвигов преподобных Сергия и Германа указывается на Святом острове. Так говорит предание известное при игумене Ефреме во второй половине XVIII века. Также данный факт подтверждает и шведский атлас, в котором на карте острова Валаама Святой остров именуется как Vanho Valamo — Старый Валаам, и на этом острове указан крест.
Чрезвычайно широкое распространение «Валаамской беседы», известной во множестве списков XVI, XVII, XVIII веков, свидетельствует о высоком духовном авторитете основателей Валаамского монастыря, так как именно их духовными устами изложена позиция нестяжателей в известной церковной полемике XVI века.
В 1611 году монастырь был разорен шведами, и на острове жили шведские колонисты. В 1685 году в царствование Великих Князей Иоанна Алексеевича и Петра Алексеевича, шведы захотели откопать мощи преподобных и надругаться над ними, но Господь молитвами преподобных вскоре послал на них великий недуг и расслабление членов, поэтому они устрашились и над мощами их устроили часовню.
В 1755 году игуменом Ефремом был выстроен новый деревянный соборный храм, в котором имелся придел преподобных Сергия и Германа. Путешественник, капитан Яков Яковлевич Мордвинов так описывает саму обитель: «Монастырь построен на горе каменной, церкви, колокольня и ограда деревянные. И всему оному монастырю взят план, и на плане означено: Соборная церковь Преображения Господня, в ней приделы: с южной стороны — святых апостолов Петра и Павла, с северной — святого апостола Иоанна Богослова, вверху с юга святого апостола Андрея Первозванного, с северу святых праведных Захарии и Елисаветы, внизу с южной стороны — преподобных отец Сергия и Германа, Валаамских чудотворцев, где и мощи преп. под спудом, а сверху сделаны раки, и на раки их положены живописные их образы».
К 28 июня 1789 года был освящен новый соборный храм преподобных Сергия и Германа Валаамских чудотворцев, казначеем Иннокентием с братией, где мощи их почивают под спудом. В 1817 году архимандритом Коневского монастыря Иларионом была составлена служба преподобным Сергию и Герману, Валаамским чудотворцам, и напечатана в Синодальной типографии с приложением поучительного слова на память их.
В 1819 году, 20 октября, Святейшим Синодом было предписано общероссийское почитание Валаамских угодников и определены дни церковного празднования их памяти 28 июня/11июля и 11/24 сентября.
Мощи преподобных Сергия и Германа и ныне почивают под спудом в Спасо-Преображенском Соборе Валаамского монастыря. Свидетельством благодатной молитвенной помощи Преподобных являются многочисленные чудеса, явленные по вере просящих и молящихся.
Основатели монастыря преподобные Сергий и Герман, Валаамские чудотворцы, не оставили нам своего жития, которое несомненно существовало, сохранились лишь краткие упоминания в летописях и древних рукописях. Но преподобные Сергий и Герман никогда не оставляли своего братства. Они продолжают свидетельствовать на протяжении тысячи лет свое незримое присутствие, охраняя своим молитвенным предстательством Валаамскую обитель.
АКАФИСТ
Кондак 1
Возбранным нашего спасения поборником и теплым к Богу молитвенником похвальное Вам, преподобнии, приносим пение. Вы же, яко имущии дерзновение ко Господу, от всяких нас бед свободите, зовущих: Радуйтеся, Сергие и Германе, отцы преблаженнии.
Икос 1
Ангельски на земли поживше, со ангелы ныне на Небеси водворяетеся, отцы преподобнии, светом трисолнечным осияваеми и божественныя доброты лицезрения наслаждающеся. Темже и нас, чад ваших, память вашу любовию празднующих и с верою под отчий кров ваш прибегающих, у Престола Царя Славы Христа не забудите, вопиющих вам таковая:
Радуйтеся, в радость Господа своего вшедшии.
Радуйтеся, венцы нетленныя от Него приемшии.
Радуйтеся, Небеснаго Сиона прекраснаго граждане.
Радуйтеся, вечнаго Царствия Христова наследницы.
Радуйтеся, в жизни земней единаго Христа всем сердцем возлюбившии и Того единаго взыскавшии.
Радуйтеся, любве ради Его вся преобидевшии и мира красная презревшии.
Радуйтеся, непрестанным божественным рачением превыше видимых воспарившии.
Радуйтеся, деянием видение стяжавшии.
Радуйтеся, уми зрящии Бога.
Радуйтеся, неусыпныя молитвы источницы.
Радуйтеся, Валааму изрядная похвало.
Радуйтеся, миру светильницы.
Радуйтеся, Сергие и Германе, отцы преблаженнии.
Кондак 2
Видяще преподобнии земныя доброты непостоянное и славы жития сего суету, Отечество свое и сродники и други оставиша, и от полуденныя страны к чуждему и хладному северу устремишася. Христови бо тщахуся невозбранно послужити, поюще Ему: Аллилуиа.
Икос 2
Разума духовнаго и земли безстрастия обетованныя взыскующе, Авраамлю произволению подражасте, преподобнии, землю Отечества своего оставльше и в пустыни сей бывше пришельцы. Темже даже и доднесь святая обитель Валаамская, на пажити вашей вселящися, неустанно вопиет вам сердцем и усты:
Радуйтеся, семя святое, земли сея стояние.
Радуйтеся, людей, окрест живущих, Христови присвоение.
Радуйтеся, безплодную пустыню сию слез своих теченьми вспоившии.
Радуйтеся, хладную страну сию молитв теплотою согреявшии.
Радуйтеся, славии доброгласнии, райскую весну от полудня нам принесшии.
Радуйтеся, греческаго кедра отрасли избранныя, иночества сад в горе сей прорастшыя.
Радуйтеся, яко Христа стяжасте в сердцы своем.
Радуйтеся, яко Троицы явистеся чистое жилище.
Радуйтеся, привременными вечная купившии.
Радуйтеся, тленными нетленная наследовавшии.
Радуйтеся, богатства неиждиваемаго блазии рачители.
Радуйтеся, бисера добраго велицыи купцы.
Радуйтеся, Сергие и Германе, отцы преблаженнии.
Кондак 3
Силе от Вышняго предложению вашему приложшейся, не всуе труждастеся, преподобнии: Той бо бе вам стена крепка от лица вражия, камень терпения и мужества сподвижник. Духом же Его услаждаеми и от силы в силу восходяще, сподобистеся и части избранных Его, с нимиже зовете: Аллилуиа.
Икос 3
Имуще ум богоприятен и ангеловидное свое обещание непоколебимо на краесекомом камени веры во Христа, не разслабеша в подвизех своих преподобнии, ни возвратишася вспять к памяти прежняго жития мирскаго, но подъятый на ся крест даже до смерти понесоша и вся Христа ради сладце претерпеша. Сего ради и Бог я облагодати и ангельски зрети Его чистым сердцем сподоби, да и мы, житию их подражающе, усердно зовем к ним:
Радуйтеся, гласа Евангелскаго истиннии послушницы.
Радуйтеся, Закона Христова усерднии творцы.
Радуйтеся, Господу своему до смерти послужившии.
Радуйтеся, язвы Его выну на теле своем носившии.
Радуйтеся, яко Царствия ради Небеснаго ни в чесом же самих себе пощадили есте.
Радуйтеся, яко ангельским образом облекшеся, до конца брань свою совершили есте.
Радуйтеся, Христови оружницы вернии.
Радуйтеся, врага неустаннии запинатели.
Радуйтеся, пустыни сладкое прозябение.
Радуйтеся, воздержания неувядаемый цвете.
Радуйтеся, благодати сосуди избраннии.
Радуйтеся, веры подвижницы.
Радуйтеся, Сергие и Германе, отцы преблаженнии.
Кондак 4
Бурю противных ветров аще и воздвиже на преподобныя диавол, обаче потопити их не возможе, ниже града душевнаго их разорити. Тии бо щитом веры ограждшеся и мечь молитвы вращающе, вся стрелы лукаваго нетрудно угашаху, Христу поюще: Аллилуиа.
Икос 4
Слышана бысть, преподобнии, духовных подвигов ваших молва и молитвы непрестанное горение и жития вольное озлобление: не может бо град укрытися, вверху горы стояй. Сего ради, яко елени на источники водныя, вси алчущии покаяния и жаждущии правды, о Господе ревнующе, к вам притекоша, и се обитель святая создася и пустыня Валаамская аки град благоцветущь показася. Темже о множестве спасаемых веселящеся, воспеваем вам сице:
Радуйтеся, обители вашея первоначальницы.
Радуйтеся, великаго иноков сонма отцы.
Радуйтеся, покаяния от жизни своея проповедницы.
Радуйтеся, люботруднаго жития законоположницы.
Радуйтеся, яко на пажити спасительныя многи овцы изведосте.
Радуйтеся, яко Христа о множестве кающихся возрадовасте.
Радуйтеся, дух правый спасения в людех обновившии.
Радуйтеся, ревность о Бозе в сердцах унылых возжегшии.
Радуйтеся, душ христианских возстание.
Радуйтеся, спящих зле пробуждение.
Радуйтеся, к Небесному Царствию кормчии.
Радуйтеся, пестуни во Христа.
Радуйтеся, Сергие и Германе, отцы преблаженнии.
Кондак 5
Боготечныя яко звезды, на севере неба возшли есте, преподобнии, и светом веры и подвиг ваших страну Карельскую просветили есте, учаще приходящыя к вам люди суеверия и бесовския обычаи отложити и единаго точию Бога боятися и Ему единому служити, поюще Ему: Аллилуиа.
Икос 5
Видевше окрест себе чада своя, носящая ветви благодеяния, возвеселишася преподобнии и, яко венец жития, блаженную кончину улучивше, радующеся к небеси преидоша, обаче союза любве не расторгоша, ниже чада своя оставиша сира: не оскудеша бо и по смерти за ня Христу выну молящеся и во искушениих и бедах я назирающе и спасающе. Сего ради слышаху от них таковая:
Радуйтеся, в нуждах наших помощницы.
Радуйтеся, в скорбех утешители.
Радуйтеся, язв греховных целители.
Радуйтеся, бесовских наваждений отгнатели.
Радуйтеся, вы бо колена, унынием разслабленная, скоро укрепляете.
Радуйтеся, вы бо угасающыя светильники наша елеем молитв ваших исполняете.
Радуйтеся, страстьми порабощенных скории свободители.
Радуйтеся, подвижников ко спасению нелестнии вожди.
Радуйтеся, целомудрия нашего блюстители.
Радуйтеся, нестяжания известное правило.
Радуйтеся, крепкое наше ограждение.
Радуйтеся, непостыдное наше упование.
Радуйтеся, Сергие и Германе, отцы преблаженнии.
Кондак 6
Проповедницы Славы Божия и по смерти явистеся, преподобнии, от раки честных мощей ваших неоскудныя струи исцелений источающе и всем требующым различная дарования подающе, яже видевше чада ваша благодарно воспеша прославльшему вас Богу: Аллилуиа.
Икос 6
Возсиявше паки и паки слава ваша, преподобнии, и обитель ваша возрасташе и множашеся, аще и многаши нечестивии воеваху ю, храмы ея разоряюще и иноки избивающе и изгоняюще: от жива бо суща, аще и посечена, корене паки и паки леторасль восхождаше и многи добродетелей подвижники под сень свою собираше, да злостраждуще за Христа, в терпении стяжавают душы своя, вам же, яко первоначальником своим, воспевают сице:
Радуйтеся, светила веры, присно возсиявающая.
Радуйтеся, источницы молитвы, николиже оскудевшии.
Радуйтеся, хлебе сладкий ищущым покаяния.
Радуйтеся, питие безсмертное подвижником пощения.
Радуйтеся, вы бо бысте благодатное всем смиренным прибежище.
Радуйтеся, вы бо показастеся недвижное послушным утверждение.
Радуйтеся, изгнанным правды ради готовии спутницы.
Радуйтеся, обидимых за Христа сопричастницы.
Радуйтеся, нищих духом сожители.
Радуйтеся, кротких сердцем собеседницы.
Радуйтеся, злострадания живии образи.
Радуйтеся, терпения независтнии датели.
Радуйтеся, Сергие и Германе, отцы преблаженнии.
Кондак 7
Хотяще нечестивии свеи в конец веру православную истребити, обитель Валаамскую до основания истощиша, обаче светильника вашего угасити не возмогоша: инуде бо преставленный, паче возсия на свещнице высоце, да и тамо веселит чада церковная и пети Богу подвизает: Аллилуиа.
Икос 7
Новый Исраиль явишася духовная чада ваша, яже, многоцелебную раку мощей ваших на рамена восприимше, от губительства избегоша: ревноваху бо святыни не быти поруганней от поганых. Темже и в Новград притекоша, идеже всельшеся и мощем вас, отцев своих, приседяще, не престаша заповеди ваша хранити и воспевати вам сице:
Радуйтеся, сокровище наше некрадомое.
Радуйтеся, светильницы наши неугасимии.
Радуйтеся, вожди, николиже нас оставляющии.
Радуйтеся, наставницы, выну с нами сущии.
Радуйтеся, столпи света, путь к небеси нам указующии.
Радуйтеся, облацы благодати, от лести нас покрывающии.
Радуйтеся, Амалика всегубителя победнии борители.
Радуйтеся, фараона мысленнаго правиии обличители.
Радуйтеся, сланое море суеты добре прешедшии.
Радуйтеся, в пустыню страстей мужественно всельшиися.
Радуйтеся, небесныя манны причастницы.
Радуйтеся, нас грешных пред Богом споручницы.
Радуйтеся, Сергие и Германе, отцы преблаженнии.
Кондак 8
Странноприемый раку мощей ваших божественне возвеселися Великий Новград, собор святых своих две звезде приложивый, дивным светом чудес сияющыя и благодать исцелений неоскудно всем подающыя. Сего ради возопи: Аллилуиа.
Икос 8
Всецелою мыслию у Господа водворяющеся и зрением нетленныя славы Его наслаждаеми, не небрегли есте, преподобнии, о разорении святыя обители вашея, ниже потерпесте, да угаснет светильник, возжженный на Валааме: но неемииною печалию поболесте и молитвою помолистеся, да поруган будет диавол, зле совещавый на страну сию. Темже молитвою вашею воста от пепла обитель святая сия и ликующи честныя мощи ваша от Новаграда грядущыя сретает, вам же вопиет сицевая:
Радуйтеся, радости небесныя вестницы.
Радуйтеся, милости Божия посли.
Радуйтеся, славо наша, паки воставшая.
Радуйтеся, венче наш, нам паки возданный.
Радуйтеся, яко пришествием вашым вера правая паки зде утвердися.
Радуйтеся, яко светильник вечныя жизни паки во обители вашей возсия.
Радуйтеся, злаго на страну сию совета диаволя разрушение.
Радуйтеся, народа окрестнаго от рова ереси избавление.
Радуйтеся, Церкве Православныя новое торжество.
Радуйтеся, врат адовых вящшее посрамление.
Радуйтеся, ангелов горних высокая песнь.
Радуйтеся, земных человек ликование.
Радуйтеся, Сергие и Германе, отцы преблаженнии.
Кондак 9
Вся строяй о спасении человечестем, вдал еси, Христе, стража Дому Твоего во стране сей святую обитель нашу. Не попусти убо ю унынием воздремати, ни куплями житейскими отяготитися, ниже путь добрейший Креста Твоего оставити, но купно с преподобными Твоими да выну поет Ти: Аллилуиа.
Икос 9
Ветиям многовещанным века сего юродство есть еже мир возненавидети и плоть свою умертвити: недоумеют бо духовная духовными востязовати, ниже жизни сокровенныя во Христе постигнути, яже утаи Бог от премудрых и разумных и откры младенцем. Темже, преподобнии, яко Царствия Небеснаго наследницы и благодатныя радости общницы, молитвою вашею выну наставите нас, да тщетныя прелести жития сего избывше, невозвратным помыслом поприще наше течем, поюще вам таковая:
Радуйтеся, духовнаго любомудрия податели.
Радуйтеся, безстрастия сосуди.
Радуйтеся, чистоты сердечныя сокровища.
Радуйтеся, смирения зерцало.
Радуйтеся, вы бо мудрых мира сего явистеся посрамление.
Радуйтеся, вы бо юродивых о Христе бысте похвала.
Радуйтеся, яко вами врага низлагаем хотения.
Радуйтеся, яко вами суеты отреваем прилоги.
Радуйтеся, во бранех духовных нам пособницы.
Радуйтеся, во искушениих всемощнии заступницы.
Радуйтеся, обуреваемых пристанище.
Радуйтеся, немощных исцеление.
Радуйтеся, Сергие и Германе, отцы преблаженнии.
Кондак 10
Спасительный путь поста возлюбившии и ярем Христов на ся волею вземшии, приидите вси к сему тихому от бури греховныя пристанищу, в покаянии припадем к неослабным молитвенником нашым и отцем, яко молитвою их присно воздвизаеми, обрящем славу и воспоем: Аллилуиа.
Икос 10
Стена есте обители вашей и всем с верою к вам притекающым, преподобнии: вашим бо бодренным заступлением соблазны мира отгоняются и страстей взыграния угашаются. Темже молим вас: не отрините нас в немощех наших, во искушениих и скорбех. Внегда оскудевати духовней крепости нашей, не оставите нас, но будите нам присное защищение, покров же и отрада, да вопоем вам благодаряще:
Радуйтеся, пустынных тихое утешение.
Радуйтеся, уединенных тайное радование.
Радуйтеся, в молитве пребывающих незримии сомолитвенницы.
Радуйтеся, во благоговении сущих благодатни сподвижницы.
Радуйтеся, наставницы наши, имиже к совершенству призываемся.
Радуйтеся, отцы наши, имиже постничества желаннаго конца доспети уповаем.
Радуйтеся, крепосте наша, еюже стену греха нашего прейдем.
Радуйтеся, утверждение наше, имже тяготу злобы нашея отлагаем.
Радуйтеся, грехми обремененных любвеобильнии восприемницы.
Радуйтеся, кающихся тепле блазии ходатаи.
Радуйтеся, юноши к целомудрию возводящии.
Радуйтеся, старцем терпение подающии.
Радуйтеся, Сергие и Германе, отцы преблаженнии.
Кондак 11
Пению немолчному безплотных подражающе и на жестокое житие отцев наших взирающе, не обленимся, о братие: возлюбим в молитвах всенощное бдение, не устрашимся тленныя плоти утеснения, да преподобным нашым сопричастницы будем и со ангелы воспоем: Аллилуиа.
Икос 11
Светозарныя светильники, светом истиннаго благочестия северную страну сию просвещающыя, зрим вы, преподобнии: в земнем бо житии вашем многи от лести бесовския ко Христу приведосте, и по смерти токи благодатных дарований изливающе и обитель свою во благоговении и трудолюбии содержаще, православную веру зде утверждаете, и вся окрестныя люди духовным хлебом питаете, и от Люторова пагубнаго нечестия и тмы неведения избавляете. Сего ради приимите от нас сицевая:
Радуйтеся, истины нелестнии свидетелие.
Радуйтеся, мрачных суеверий отгнатели.
Радуйтеся, Силы Божия дивное явление.
Радуйтеся, благодати Христовы чудное знамение.
Радуйтеся, вами бо Царствие Божие в сердца многих прииде.
Радуйтеся, вами бо Денница истиннаго света во омраченных грехом возсия.
Радуйтеся, врачеве святии, сумнящихся душы благодатно исцеляющии.
Радуйтеся, пастырие добрии, овцы своя от челюстей звериных изимающии.
Радуйтеся, православным Христово благоухание.
Радуйтеся, еретичествующым смертная воня.
Радуйтеся, Карелии славнии апостоли.
Радуйтеся, Российския земли украшение.
Радуйтеся, Сергие и Германе, отцы преблаженнии.
Кондак 12
Благодатию Твоею божественною раздрав грех наших рукописание, благодать Твоего сыноположения обнови в нас, Слове Божий, и даждь нам прочее в покаянии благоугодити Тебе, да с преподобными Твоими воспоем Тебе: Аллилуиа.
Икос 12
Поюще пресланую память вашу, елико по силе нашей, восхваляем вас, преподобнии: вы бо, жертву чисту себе Христови принесше, всем вся бысте и всем просящым туне вся потребная подаете, да вси, благодарению поучившеся, в покаяние и исправление приидем, вас же воспоем сице:
Радуйтеся, смиренных мольбам вниматели.
Радуйтеся, убогих воздыхания послушатели.
Радуйтеся, вдов и сирот наказатели и кормители.
Радуйтеся, обидимых отрадо и утешение.
Радуйтеся, в нуждах и обстояниих сущих скорое и известное избавление.
Радуйтеся, всех к раце мощей ваших с верою притекающих независтное исцеление и спасение.
Радуйтеся, предстатели наши, умиленныя слезы наша приемлющии.
Радуйтеся, молитвенницы наши, во благих прошения верных исполняющии.
Радуйтеся, монашествующих всегда готовое прибежище.
Радуйтеся, мирских человек упование.
Радуйтеся, государства нашего крепосте.
Радуйтеся, Церкве Православныя удобрение.
Радуйтеся, Сергие и Германе, отцы преблаженнии.
Кондак 13
О всепетии и преславнии чудотворцы наши и молитвенницы, Сергие и Германе преподобнии! Нынешнее смиренное приношение от недостойных чад ваших приемше, от всяких напастей, скорбей и болезней, наветов вражиих и обстояний избавите нас, и в страшный час смертный будите нам крепцыи предстатели, яко да вечныя смерти избавльшеся, воспоем прославльшему вас Богу: Аллилуиа.
(Этот кондак читается трижды, затем икос 1-й и кондак 1-й)
МОЛИТВА ПЕРВАЯ
О велицыи отцы наши Христови угодницы, и теплии предстатели ко Спасу о душах наших, Сергие и Германе: вы бо в недузех целители явистеся, по морю плавающым кормчии, и утопающым благонадежное избавление, и от всякаго смертоноснаго нашествия хранители, паче же от духов нечистых свобождение и всяких наветов противу нас содержимых очищение и помощь. О преблаженнии отцы и чудотворцы преславнии, Сергие и Германе, молитеся к Владыце Христу о нас грешных: яко да вашими молитвами сподобимся в день Судный деснаго предстояния, и наслаждения во Царствии Божии во веки веков. Аминь.
МОЛИТВА ВТОРАЯ
О преподобнии, богоноснии, всеблаженнии отцы наши, Сергие и Германе, зрителие Славы Божия в Небесном Царствии, не презрите нас грешных в нуждах и скорбех наших, но ускорите в помощь к вам прибегающым: приимите воздыхание и слезы, и вонмите смиренному молению нашему. Предстояще убо Небесному Царю, о всеблаженнии! Молите благость Его, еже ущедрити место селения вашего и всякому граду и стране ниспосылати обилие благ земных. Страждущую страну Российскую от лютых безбожник и власти их Господь да свободит, и да возставит престол православных правителей; верных рабов Его, в скорби и печали день и нощь вопиющих к Нему, многоболезный вопль да услышит и да изведет от погибели живот наш. Молите Его, еже нас всех в вере и добродетелех утвердити, избавляя присно от вожделений греховных, и от нападения видимых и невидимых врагов: обидимыя защитити, болящыя уврачевати, от томительства злых духов свободити, на мори плавающих спасати, путешествующым спутешествовати, и всякому верному в нуждах способствовати; яко Того вси есмы творение и Того есть Царство, и Сила и Слава во веки веков. Аминь.
МОЛИТВА ТРЕТЬЯ
О преподобнии и богоноснии отцы наши Сергие и Германе! С верою и любовию припадающе к святей иконе вашей, умиленно молим вас: не забудите нас, недостойных и грешных (имена), но предстательством вашим оградите нас от злых козней вражиих, утолите возстание страстей, укрепите немощь нашу в духовных бранех и подвизех, предлежащих нам, отжените всякое уныние и печаль греховную от сердец нашых, и небесное утешение низпослите нам во трудех и скорбех наших. В страшный же час смертный предстаните всем нам, яко же блазии ходатаи и темных зраков демонских прогонителие: да в мире и покаянии скончавше земное поприще наше, достигнем и вечных благ наслаждения, и купно с вами да воспоем и прославим всесвятое имя Отца, и Сына и Святаго Духа, ныне и присно и во веки веков. Аминь.
ТРОПАРЬ
Тропарь, глас 4
Евангелиа Христова истиннии послушницы явистеся, преподобнии, мир и вся яже в нем, яко не сущая, преобидевше любве ради Христовы и в морский остров вселистеся, и трудолюбно в нем противу козней невидимых врагов подвизастеся, постом, бдением же и всенощным стоянием плоти своя духу мудру повинули есте: сего ради от Вседержительныя Десницы достойныя венцы прияли есте. И ныне Пресвятей Троице предстояще молитеся, всеблаженнии отцы, Сергие и Германе, спастися душам нашим.
Ин. тропарь, глас 1
От мирския молвы бегающе, безмолвия и благочестия рачители, в тихое пристанище Валаама от востока приидосте и в нем евангельски Христу добродетельми последовавше, на верх совершенства востекли есте: и ныне в торжестве премирном богозрением наслаждающеся, всеблаженнии отцы Сергие и Германе, Человеколюбца Бога молите, еже спасти всех нас, благочестно вас почитающих.
Кондак, глас 4
От мирскаго жития изшедше, отвержением мира Христу последовасте, и достигосте великаго Нева езера, и в нем на острове Валааме всельшеся, равноангельное житие пожили есте, отонудуже, веселящеся, прешли есте к Небесным чертогом. И ныне со ангелы Владычню Престолу предстояще, поминайте нас, чад своих, яже собрали есте, богомудрии, да радостно от души вопием: радуйся, Сергие и Германе, отцы преблаженнии.
Величание:
Ублажаем вас, преподобнии отцы Сергие и Германе, и чтим святую память вашу, наставницы монахов и собеседницы ангелов.
КАНОН
(Святым преподобным Сергию и Герману, Валаамским чудотворцам)
Песнь 1
Ирмос: Тристаты крепкия, Рождейся от Девы, безстрастия во глубине души тричастное потопи, молюся, да Тебе, яко в тимпане, во умерщвлении телесе победное воспою пение.
Припев: Преподобнии отцы наши Сергие и Германе, молите Бога о нас.
Солнце Правды – Христе, возсияй ми днесь светом разума Твоего, да светильники наша, Сергия и Германа, сердцем и устнами воспою во славу Твою, Владыко.
Преподобнии отцы наши Сергие и Германе, молите Бога о нас.
Рекоша в себе святии: бежим пространнаго пути, зане в пагубу ведет, бежим греховных страстей, до ада бо низводят, тесный же путь возлюбим, да наследим жизнь вечную.
Слава: Якоже дождем, слезами землю сердца вашего напаяюще, и, яко солнцем, теплотою молитвы согревающе, добродетелей плоды, Сергие и Германе, винограда Делателю принесосте.
И ныне: Добродетели святых пою и славлю, сам же злая творити, увы мне, не престаю. Но, Владыко Христе, молитвами Матере Твоея и мене, окаяннаго, от сна лености к добродетелей деланию возбуди.
Песнь 3
Ирмос: Не мудростию, и силою, и богатством хвалимся, но Тобою, Отчею Ипостасною Мудростию, Христе, несть бо свят, паче Тебе, Человеколюбче.
Преподобнии отцы наши Сергие и Германе, молите Бога о нас.
Преслушав заповедь, праотец сладости райския лишен бысть, послушанием же святии вечную жизнь наследовавше, Богозрением наслаждаются.
Преподобнии отцы наши Сергие и Германе, молите Бога о нас.
Тайное делание ваше, безмолвия любителие, видя Отец Небесный, яко сыны Своя ущедри, благодатию обогати и на Небесех прослави.
Слава: Чистоты рачители, земныя Ангелы, избранныя сосуды Святаго Духа, чистое зерцало целомудрия, Сергия и Германа чистотою сердца почтим.
И ныне: Раб сый чрева, како возмогу плоть духу покорити и чистоту ангельскую стяжати? Но, о девственных похвало, Пречистая! Ты из плена сего избави мене, несмысленнаго.
Господи, помилуй (трижды).
Седален
Глас 3-й
От шума житейских волн удаляющеся, во остров Нева понта с восточных стран приидосте, идеже ни глубина страстей, ни буря духов противных твердостию ума вашего, Сергие и Германе, не возможе поколебати, но подвигом добрым, в безмолвии подвизающеся, благоугодни Христу явистеся, Егоже ныне предстояще Престолу, мольбу сотворите, да призирает выну милосердым оком Своим на место селения вашего, спасая в мире души наша.
Слава, и ныне: Не от Ангел, ни от человек, но от Твоего Сына, Владычице, Творец Ангелов и человеков, кроткаго и смиреннаго сердцем Иисуса, смирению удобь навыкнути могу и не прилежу: увы мне! горд сый, презорлив и непокорив присно от нерадения моего являюся. Тя убо, о Дево Пренепорочная, молю смиренно с теплыми слезами, еже дух кротости и смирения сердцу моему даровати, да вкусит покой сладчайший душа моя.
Песнь 4
Ирмос: Седяй в славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.
Преподобнии отцы наши Сергие и Германе, молите Бога о нас.
Яко лозы винограда Христова суще, Сергие и Германе, гроздами добродетелей процветшии, вином Божественнаго веселия исполните сердца наша.
Преподобнии отцы наши Сергие и Германе, молите Бога о нас.
Молим вас, яко в радости сущия праведных, всеблаженнии, всяку печаль и горесть от душ наших отгнати, яко да, радующеся, славим вас.
Слава: Темная страстей буря воста на мя и свет благодати сокрывается от очес моих. Но, о свидетельницы мысленнии! моему омрачению ускорите в помощь.
И ныне: Лицы Ангелов и преподобных и мы, грешнии, молим Тя, Благоутробне Господи, предстательством Матере Твоея ущедри и спаси всех нас.
Песнь 5
Ирмос: Нечестивии не узрят славы Твоея, Христе, но мы Тя, Единородне, Отеческия Славы Сияние Божества, от нощи утренююще, воспеваем Тя, Человеколюбче.
Преподобнии отцы наши Сергие и Германе, молите Бога о нас.
Крайним безмолвием, молитвою же, и постом, и бдением души своя очистивше, пустыннолюбцы Трисияннаго Света приятелище соделашася.
Преподобнии отцы наши Сергие и Германе, молите Бога о нас.
Не якоже трости, ветром колеблемыя, но яко твердии столпи, Сергий и Герман, на краеугольном камени, Христе, верою утвердившеся, добродетельми просияша.
Слава: Иоаннову житию в пустыни Иорданове и Илиину безмолвию на горе ревнующе, преподобнии, страстей ига деянием свобождшеся, Богозрением просветишася.
И ныне: Ты покров мой от напастей вражиих, Владычице, Ты свет сердцу моему, печальми житейскими омраченному, присно буди, Богородице, и спаси мя.
Песнь 6
Ирмос: Приидох во глубины морския, и потопила мя есть буря многих грехов, но, яко Бог, из глубины возведи живот мой, Многомилостиве.
Преподобнии отцы наши Сергие и Германе, молите Бога о нас.
Яко жертву непорочну и всесожжение тучно, принесоша себе святии Богу, и, паче всякаго всеплодия жертвы и приношения, благоугодни Ему явишася.
Преподобнии отцы наши Сергие и Германе, молите Бога о нас.
Умныма очима зряще пред собою Господа, Богоблаженнии, непорочно шествовали есте по стезям заповедей Его, утверждени имуще нозе благодатию Святаго Духа.
Слава: Не име покоя боголюбивый дух ваш, Сергие и Германе, дондеже не обретосте себе место безмолвия. В том бо верою и любовию с Богом соединившеся, вечный покой наследовасте.
И ныне: Не китом, якоже Иона, но грехом пожрен сый, вопию: Владыко Христе! Молитвами Пречистыя Твоея Матере и преподобных отец от истления мя избави, яко Благоутробен.
Господи, помилуй (трижды). Слава, и ныне:
Кондак
Глас 4-й
От мирскаго жития изшедше, отвержением мира Христу последовасте, и достигосте великаго Нева езера, и, в нем на острове Валааме всельшеся, равноангельное житие пожили есте, отонудуже, веселящеся, прешли есте к Небесным чертогом. И ныне со Ангелы Владычню Престолу предстояще, поминайте нас, чад своих, яже собрали есте, Богомудрии, да радостно от души вопием: радуйтеся, Сергие и Германе, отцы преблаженнии.
Икос
Како, неразумен сый, воспою постники всехвальныя? Слово бо премудрости и слово разума несть дано ми, безсловесием одержиму сущу. Ты Сам, смысла Подателю, Иисусе, Премудрость вечная и Слово Божие Ипостасное, молитвами преподобных ум мой просвети и даруй слово, да гласом ангельским воспою их, глаголя:
Радуйтеся, звезды мысленныя, от востока нам возсиявшия;
Радуйтеся, безмолвия любители всеизряднии.
Pадуйтеся, Христовых заповедей делатели непорочнии;
Радуйтеся, златии сосуди, Духом Святым исполненнии.
Радуйтеся, столпи одушевленнии, здание постничества утверждающии;
Радуйтеся, крини, чистотою сердечною, аки снегом, убеленнии.
Радуйтеся, маслины, от Христа нам елей милосердия плодоносящия;
Радуйтеся, верным поборницы, молитвенным копием сопротивныя поражающии.
Радуйтеся, целителие телесных немощей и страстей душевных;
Радуйтеся, ускоряющии в помощь обуреваемым и вам молящимся.
Радуйтеся, Валааму светила велия и пресветлая.
Радуйтеся, Сергие и Германе, отцы всеблаженнии.
Песнь 7
Ирмос: Юноши три в Вавилоне, веление мучителево на буйство преложше, посреде пламене вопияху: благословен еси, Господи, Боже отец наших.
Преподобнии отцы наши Сергие и Германе, молите Бога о нас.
Огню сущу в вас, Сергие и Германе, Божественныя любве, пламень похоти и огнь ярости претворися в росу. Тем, радующеся, в безмолвии воспеваете: благословен еси, Господи, Боже отец наших.
Преподобнии отцы наши Сергие и Германе, молите Бога о нас.
Плоти своей, якоже златому идолу отроцы, преподобнии не послужиша, но, апостольски распинающе ю со страстьми и похотьми, покориша духу и, храмы честни сотворшеся Святому Духу, взываху: благословен еси, Господи, Боже отец наших.
Слава: Яко чистоты хранители, чистейшему Божеству вместилище соделашася, любомудрии, и, во плоти суще, тайнодействием Утешителя к премирных зрению восхищахуся, поюще: благословен еси, Господи, Боже отец наших.
И ныне: Яко Матерь Безначальнаго Бога Слова сущую, Тя, Владычице, прошу умиленно от безсловесных страстей избавити мя, яко отроки от пещи халдейския, да с ними, радуяся, воспою: благословен еси, Господи, Боже отец наших.
Песнь 8
Ирмос: Избавителю всех, Всесильне, посреди пламене благочествовавшия, снизшед, оросил еси и научил еси пети: вся дела, благословите, пойте Господа.
Преподобнии отцы наши Сергие и Германе, молите Бога о нас.
Бодренным ума трезвением и теплым ко Христу молением, диавола, яко льва рыкающаго и ищущаго кого поглотити, преподобнии посрамиша, страстныя того прилоги отсекше. Тем со отроки пояху: вся дела, благословите, пойте Господа.
Преподобнии отцы наши Сергие и Германе, молите Бога о нас.
Вся оружия Божия Сергий и Герман восприимше на горах Валаама, якоже Моисей и Аарон, воздеянием ума и рук на высоту, сопротивных силу, верным споборствующе, ослабиша, поюще песнь: вся дела, благословите, пойте Господа.
Слава: Безначальная, Вседержительная, Единосущная Святая Троице, молитвами преподобных Твоих от трех мысленных врагов борений души наша избави, помилуй и спаси всех, благочестно Тя исповедающих.
И ныне: Богоугодно пожившим последовати мене сотвори добрыми делы, Всенепорочная, потребляющи от души моея прилоги лукавых демонов и возводящи присно ум мой к зрению заповедей Сына Твоего и Творца моего.
Песнь 9
Ирмос: Ева убо недугом преслушания клятву вселила есть; Ты же, Дево Богородице, прозябением чревоношения мирови благословение процвела еси. Тем Тя вси величаем.
Преподобнии отцы наши Сергие и Германе, молите Бога о нас.
На твердом веры камени благодатию утверждени суще, в безмолвии подвизающеся, течение постничества добре скончавше и мздовоздаяние от Христа приимше, Тому ныне молитеся, всеблаженнии, в вере и добродетели верных Своих утвердити.
Преподобнии отцы наши Сергие и Германе, молите Бога о нас.
Яко победители мысленных врагов, Сергие и Германе, предстояще ныне Престолу Небесных Сил Царя, молите благость Его православным на сопостаты победу и одоление даровати.
Слава: В Небесных суще обителех, преподобнии, Владыку всех молите страну нашу и вся грады и страны христианския в мире сохраните и вся ны спасти, благочестно вас почитающия.
И ныне: Камень краеугольный, Христос, верным есть основание, неверным же – камень претыкания и соблазна. На сем Камени, Владычице, утверди мое помышление и спаси мя, яко к Нему имущая матернее дерзновение.
