Преподобный Александр Свирский

 

 

(30 августа / 12 сентября)

 

   Родился прп. Александр 15 июня 1448 года в селе Мандера на реке Ояти на земле Новгородской, против Островского Введенского монастыря. Назвали его Амосом. Родители его Стефан и Васса были небогатые благочестивые крестьяне, детям своим они дали христианское воспитание. Когда Амос пришел в возраст, родители захотели его женить, он же помышлял только о том, чтобы оставить мир ради спасения своей души. Рано узнал он о Валаамском монастыре и часто вспоминал о нем и, наконец, по воле Божией, встретил валаамских иноков. Долго длилась беседа их о святом монастыре, об уставе их, о трех родах жизни монашествующих. И вот, воодушевленный этой беседой, задумал он идти на "северный Афон". Перейдя реку Свирь, на берегу Рощинского озера, Преподобный услышал таинственный голос, возвестивший ему, что на сем месте он создаст обитель. И свет велий осенил его. Когда он пришел на Валаам, игумен принял его и постриг с именем Александр в 1474 году. Было ему тогда 26 лет. Ревностно новоначальный инок начал подвизаться в трудах, послушании, посте и молитве. Тут пришел на Валаам разыскивавший его отец; Преподобному удалось не только успокоить раздраженного отца, но и убедить его постричься в монахи вместе с матерью. И родители послушались сына. Стефан постригся с именем Сергий, а мать — с именем Варвара. Могилы их и доныне почитают в действующем Введено-Оятском монастыре.

   Александр же продолжал подвизаться на Валааме, изумляя суровостью своего жития самых строгих Валаамских иноков. Сначала он подвизался в общежитии, потом в безмолвии на острове, ныне именуемом Святым, и провел там 10 лет. На Святом острове доселе сохраняется узкая и сырая пещера, в которой с трудом может поместиться только один человек. Сохранилась и ископанная преподобным Александром для самого себя могила. Однажды, стоя на молитве, святой Александр услышал божественный голос: "Александр, изыди отсюда и иди на прежде показанное ти место, на нем же возможеши спастися". Великий свет указал ему место на юго-востоке, на берегу реки Свирь. Это было в 1485 году. Там он нашел "бор красен зело, место сие было леса и озеро исполнено и красно отовсюду и никтоже там от человек прежде живяше. Хижину свою Преподобный поставил на берегу Рощинского озера. На полверсты от него находится озеро Святое, отделенное от него Стремниной горой. Здесь он провел в полном уединении несколько лет, питаясь не хлебом, "а зелием зде растущим". Бог открыл свой светильник боярину Андрею Завалишину, а через него потом и многим людям. Обитель стала возрастать, а слава о даре прозорливости и врачевания недугов телесных и духовных, данном ее настоятелю, облетела вскоре все окрестные земли. Народ православный еще при жизни ублажил Александра Свирского как святого.

    На 23 году поселения Преподобного в пустыни большой свет явился в его храмине и он увидел трех мужей, вошедших к нему. Они были одеты в светлые одежды и освещены славою небесною "паче солнца". Из уст их святой услышал повеление: "Возлюбленный, якоже видиши в Триех Лицах Глаголющего с тобою, созижди церковь во имя Отца и Сына и Святого Духа, Единосущной Троицы... Аз же ти мир Мой оставляю и мир Мой подам ти".

    На месте явления Бога-Троицы впоследствии была построена часовня, и до наших дней на этом месте содрогается душа человеческая, помышляя о близости Божией к людям Своим. В Житии преподобного Александра поражает то, что при великом изобилии поданных ему божественных посещений, он всегда оставался смиренным иноком, желающим во всем послужить братии и приходящим в обитель простым поселянам.

   За несколько лет до кончины Преподобного Бог вложил ему в сердце благую мысль создать каменную церковь в честь Покрова Пресвятыя Богородицы с трапезою. И вот однажды ночью, когда уже закладка была совершена, по окончании обычного молитвенного правила Преподобный увидел необыкновенный свет, озаривший весь монастырь, а в основании Покровской церкви, на алтарном месте в царственной славе сидела на престоле Пречистая Богородица с Предвечным Младенцем, окруженная сонмом бесплотных сил небесных. Преподобный пал лицем на землю пред величеством Славы Ея, так как не мог созерцать сияния этого невыразимого света. Тогда Пречистая Владычица повелела ему встать и утешила обещанием быть неотступною от обители и помогать во всех нуждах живущим в ней как при жизни Преподобного, так и по смерти его.

   За год до кончины своей Преподобный, призвав к себе всю братию и объявив им, что скоро наступит время преставления его от временной сей прискорбной и многопечальной жизни в другую вечную, безболезненную и всегда радостную жизнь, назначил после себя четырех священноиноков: Исайю, Никодима, Леонтия и Иродиона для избрания кого-либо из них во игумена. Затем до самой кончины не переставал поучать свою братию богоугодному житию. Скончался же преподобный Александр 30 августа 1533 года 85-ти лет от рождения и, согласно предсмертному завещанию его, погребен был в отходной пустыни, близ церкви Преображения Господня, по правую сторону алтаря. В 1547 году он был причислен к лику святых.

   Все, имевшие различные недуги, приходя к честному гробу его и с верою припадая к нему, получали обильно исцеления: слепые прозревали, расслабленные укреплялись в членах, страдавшие другими болезнями получали совершенное выздоровление, из бесноватых прогонялись демоны, бездетным подавалось чадородие.

  Дивный во Святых Своих Всеблагий Бог наш, прославляющий Угодника Своего во временной жизни сей, творя рукою его знамения и чудеса, благоволил и по смерти нетленное, честное и святое тело его, как великое светило, положить в Церкви Своей, чтобы оно осиявало там своими преславными чудесами".

 

Составил монах Афанасий. 1905 г. Июля 12 дня.

Александро-Свирский монастырь Олонецкой губернии.

 

 

АКАФИСТ

 

Кондак 1

 

Избранный угодниче Христов и чудотворче, преподобный отче Александре, возсиявый мирови, яко звезда богосветлая, жития твоего добротою и множеством чудотворений, восхваляем тя любовию в песнех духовных: ты же, яко имеяй дерзновение ко Господу, молитвами твоими от всяких нас бед свободи, да зовем ти:

Радуйся, преподобне Александре, Свирский чудотворче.
 

 

Икос 1

 

Ангельский нрав имел еси, отче преподобне, и яко безплотный, непорочно житие совершил еси на земли, дивный образ совершенства духовного нам оставив, да подражаем добродетелем твоим, и зовем ти сице:

Радуйся, благочестивых родителей плод богодарованный.
Радуйся, неплодие рождших тя разрешивый.
Радуйся, сетование их на радость преложивый.
Радуйся, от пелен Богом избранный.
Радуйся, от утробы матерния на службу Ему предуставленный.
Радуйся, от юности Его единаго всем сердцем возлюбивый.
Радуйся, вся красная мира сего ни во что же вменивый.
Радуйся, постом и бдением молитвенным плоть твою удручивый.
Радуйся, непорочный сосуде Божия благодати.
Радуйся, жилище Духа Святаго, украшенное чистотою.
Радуйся, мужу желаний духовных.
Радуйся, главо, освященная десницею Всевышняго.
Радуйся, преподобне Александре, Свирский чудотворче.

 

 

Кондак 2

 

Видя Господь душу твою, яко ниву благовозделанную к плодоносию духовному, от юности к исканию единаго на потребу направи твой помысл, преподобне, темже любве ради Христовы, родителей твоих и дом отеческий оставил еси, всякаго пристрастия суетнаго свободився, притекл еси в пустынную обитель Валаамскую на подвиги иноческия, зовый спасающему тя Богу: Аллилуия.

 

 

Икос 2

 

Разумом богопросвещенным постигл еси суету мира сего и непостоянство, в немже радость сменяется скорбию, благополучие наветуется нечаянными бедами. Темже вечных нетленных благ возжелел еси, отче преподобне, и сия взыскати потщился еси отречением мирских благ и вольною нищетою, подвигая нас звати тебе:

Радуйся, пустыннаго безмолвия любителю.
Радуйся, смирения и нестяжания рачителю.
Радуйся, истиннаго самоотвержения совершенный образе.
Радуйся, иноческаго равноангельскаго жития всеизрядное явление.
Радуйся, правило веры и благочестия.
Радуйся, зерцало терпеливаго послушания.
Радуйся, безмолвие иноческое возлюбивый.
Радуйся, слезы духовныя стяжавый.
Радуйся, плачем временным блаженство вечное снискавый.
Радуйся, молитвами непрестанными прилоги вражия сокрушивый.
Радуйся, бдением и труды плоть твою духови покоривый.
Радуйся, постом и воздержанием страсти укротивый.
Радуйся, преподобне Александре, Свирский чудотворче.

 

 

Кондак 3

 

Силою Всевышняго осененный и укрепляемый, в иночестем пострижении власов главы твоея, все плотское мудрование отложил еси, преподобне, и яко воин благоискусный, схиму иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимого – диавола, –смирением глубоким побеждая его вознесенную гордыню, и выну вопия ко Господу: Аллилуия.

 

 

Икос 3

 

Имея слез источник изобильный, угодниче Божий, и умиления велию благодать, хлеб твой слезами орошал еси, и питие плачем растворял, от преизбытка желания божественнаго и любве ко Господу. Темже и мы ублажаем тя звании сими:

Радуйся, крепости и мужества тезоименитый подвижниче.
Радуйся, ангелоподобный человече.
Радуйся, Царя Небеснаго воине добропобедный.
Радуйся, валаамския обители плоде добрый.
Радуйся, пустынножителю благоприятный.
Радуйся, молитвенниче неусыпающий.
Радуйся, постниче изрядный.
Радуйся, безмолвниче дивный.
Радуйся, подвигом древних богоносных отцев последователю.
Радуйся, их терпению и трудом подражателю.
Радуйся, благовременно могилу себе ископавый.
Радуйся, о смертнем часе непрестанно помышлявый.
Радуйся, преподобне Александре, Свирский чудотворче.

 

 

Кондак 4

Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердем камени веры во Христа, и хранима трезвением и молитвами непрестанными, имиже выну противоборствовал еси врагу спасения человеческаго, и непреткновенно восходил еси по стезям добродетелей к совершенству духовному в меру возраста Христова, воспевая Богу: Аллилуия.

 

 

Икос 4

 

Слышав похваляема себе от человек, убоялся еси превозношения суетнаго, отче богомудре, и яко истинный смирения образ, умыслил еси убежати в пустыню неизведанную, на реку Свирь, на место свыше тебе указанное в видении чудном, да тамо невозбранно единому Богу поработаеши, идеже мы сретаем тя благохвалении сими:

Радуйся, смирившагося до рабия зрака Христа Господа благий последователю.
Радуйся, святых Его заповедий усердный исполнителю.
Радуйся, девственниче душею и телом.
Радуйся, трудолюбче нелицемерный.
Радуйся, презревый славу человеческую суетную.
Радуйся, сокрушивый сети тщеславия и гордыни.
Радуйся, поправый высокоумия душевредную прелесть.
Радуйся, усвоивый себе святое смирение Христово.
Радуйся, исполнивый вся обеты иночества.
Радуйся, украсивыйся дарами благодати Божия.
Радуйся, по благодати приемый власть на духи нечистыя.
Радуйся, ни во что же вменивый тех устрашения и привидения.
Радуйся, преподобне Александре, Свирский чудотворче.

 

 

Кондак 5

 

Светозарный луч озари в нощней темноте место пустынное, на немже вселитися пришел еси, преподобне, знаменуя собою светлость души твоея, и пламенеющее любовию ко Господу сердце твое, идеже благоприятно бысть Творцу твое произволение работати Ему в преподобии и святости, и пети Ему тамо хвалебную песнь: Аллилуия.

 

 

Икос 5

 

Видевше ангельстии чинове равноангельское житие твое, отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша человеколюбца Бога, укрепляющаго немощное естество человеческое. Мы же ублажаем тя и зовем:

Радуйся, светильниче пустынный, просветивый страну корельскую сиянием твоих добродетелей.
Радуйся, монашествующих дивное украшение.
Радуйся, крине благоуханный пустыннаго прозябения.
Радуйся, древо благоплодное небеснаго насаждения.
Радуйся, возлюбивый благолепие дому Божия.
Радуйся, в самем себе храм Триипостасному Божеству уготовивый.
Радуйся, преподобием и правдою одеянный.
Радуйся, союзом добродетелей удобренный.
Радуйся, помазание приемый от Святаго Духа.
Радуйся, освященный сосуде благодати Божия.
Радуйся, рабе Христов, благий и верный.
Радуйся, слуго Господень истинный.
Радуйся, преподобне Александре, Свирский чудотворче.

 

 

Кондак 6

 

Проповедник подвигов твоих в пустыни Свирстей явился ловец зверей дивиих, иже гнав еленя в дубраве непроходимей, смотрением Божиим обрете храмину твою, преподобне отче; видев же тя во плоти Ангела, знамение благодатнаго озарения на лице своем носяща, страха и радости исполнися и припад к честным твоим стопам, во умилении сердца возопи Зиждителю Богу: Аллилуия.

 

 

Икос 6

 

Возсиял еси в пустыни Свирстей богосветлое светило, и на спасения стезю наставил еси многи души человеческия: яви бо тя Христос наставника и учителя иноком пустыннолюбивым, иже стекахуся к тебе, яко овцы к пастырю, могущу упасти их на пажити живоносней. Темже, яко сотворившаго и научившаго, чествуем тя сими похвальными словесы:

Радуйся, источниче богодухновенных учений.
Радуйся, хранилище изобильного умиления.
Радуйся, одушевленныя скрижали закона Господня.
Радуйся, немолчный проповедниче Евангелия Христова.
Радуйся, заповеди Господни исполнивый, и оным научивый учеников твоих.
Радуйся, ленивых подвигнувый к исправлению твоими христоподражательными нравы.
Радуйся, немощных укрепивый данною ти от Господа благодатию.
Радуйся, скорбящих утешивый сладостию твоих словес.
Радуйся, грешных к покаянию направивый.
Радуйся, юныя уцеломудривый.
Радуйся, сострадания исполненный.
Радуйся, в милости богатый.
Радуйся, преподобне Александре, Свирский чудотворче.

 

 

Кондак 7

 

Хотя Человеколюбец Господь прославити место подвигов твоих, отче, посла Ангела Своего благовестити тебе, яко будет на месте том обитель иноком во спасение, в нейже храм во имя Святыя Троицы. Ты же явлением безплотнаго просвещен, с радостным трепетом внимал еси благовестию небесному, зовый в смирении духа Владыце Ангелов и человеков: Аллилуия.

 

 

Икос 7

 

Новое знамение благоволения Божия даровася тебе, преподобне, егда безмолвствующу ти в избранней пустыни, в нощи свет велий облиста тя, и Три Мужа в одеждах светлых предсташа пред тобою, мир тебе дарующе и повелевающе, да устроиши тамо обитель иноческую, и в ней храм во имя Святыя Троицы. Дивящеся убо сему пречудному в триех ангельских лицех Троическому явлению, зовем ти:

Радуйся, таинниче Пресвятыя и Единосущныя Троицы.
Радуйся, самовидче неизреченнаго Божия явления.
Радуйся, собеседниче светоносных Ангельских Сил.
Радуйся, созерцателю лучезарнаго Божественнаго видения.
Радуйся, причастниче огнезрачнаго трисолнечнаго сияния.
Радуйся, поклонниче Триипостаснаго Божества.
Радуйся, в смертнем телеси безсмертия зарею просвещенный.
Радуйся, на земли небеснаго посещения удостоенный.
Радуйся, смирением высокая стяжавый.
Радуйся, нищетою богатую милость Господню улучивый.
Радуйся, сеявый слезами радость присносущную,
Радуйся, приемый исполнение обетований непреложных.
Радуйся, преподобне Александре, Свирский чудотворче.

 

 

Кондак 8

 

Страннолепно явися ти на воздусе Ангел Господень в мантии и куколи иночестем, указуяй место, на немже храм во имя Живоначальныя Троицы имел еси создати в пустыни Свирстей, преподобне отче, егоже Божиим поспешением совершив и освятив, со ученики твоими немолчныя хвалы возсылал еси в нем Господеви, зовый: Аллилуия.

 

 

Икос 8

 

Всего себе предав воле Господней, учениками твоими умоленный, священства благодать восприяти не уклонился еси, отче, аще и тужаше дух твой, ужасаяся высоты сея, но послушание, явил еси духовным чадом твоим, подвизая их согласно звати тебе:

Радуйся, Безкровныя Жертвы достойный совершителю.
Радуйся, олтаря Господня благоговейный служителю.
Радуйся, преподобныя руце твои со многим дерзновением ко Господу воздеявый.
Радуйся, молитвы теплейшия от сердца чиста к престолу Вседержителя возносивый.
Радуйся, образ благочестия бывый твоим учеником.
Радуйся, мастию священства умащенная главо.
Радуйся, вождю благоискусный воинов духовных.
Радуйся, отче благомудрый общежития иноческаго.
Радуйся, свеще, в молитве к Богу возжженная.
Радуйся, звездо ко спасению путь верный показующая.
Радуйся, маслино, елей милости Божия источившая.
Радуйся, чаше, жаждущих учения спасительнаго напоившая.
Радуйся, преподобне Александре, Свирский чудотворче.

 

 

Кондак 9

 

Вси иноцы обители твоея в радостный трепет приидоша, егда устремление потока воднаго, на святую обитель твою движущееся, молитвою твоею укротил еси, и призыванием всесильнаго имене Иисус Христова бурному потоку тещи безвредно устроил еси на благую потребу иночествующих, еже видевше духовная чада твоя всеумиленно возгласиша купно с тобою Богу: Аллилуия.

 

 

Икос 9

 

Витийство человеческое не довлеет изрещи обилие радости духовныя, еюже преисполнился еси, отче богоносне, егда во время молитвы твоея нощныя, явися ти Пресвятая Богородица с ликом чинов Ангельских и обетовании непреложными душу твою возвесели, яко Присная Заступница обители твоея будет, снабдевающи и покрывающи ю по вся дни. Темже и мы сия радостныя тебе приносим глаголы:

Радуйся, благоволением Богоматере осененный.
Радуйся, посещением Царицы небесе и земли утешенный.
Радуйся, слышавый милостивыя от уст Ея глаголы.
Радуйся, приемый обетование крепкаго Ея обители заступления.
Радуйся, любимиче Ея преискренний.
Радуйся, избранниче Сына Ея и Бога.
Радуйся, даром чудотворения облагодатствованный.
Радуйся, будущая, яко настоящая провидевый.
Радуйся, рыбарем ловитву чудесно умноживый.
Радуйся, неплодным родителем чадородие даровавый.
Радуйся, болящия здравы возставивый.
Радуйся, тайная согрешения человеческая обличивый.
Радуйся, преподобне Александре, Свирский чудотворче.

 

 

Кондак 10

 

Спасти хотя души ученик твоих, отечески назидал еси их, богомудре, оваго словом, оваго примером жития твоего, с кротостию обличая, с любовию увещая их преуспевати в благочестии и чистоте: наипаче же пред кончиною твоею, вся ко спасению душевному благопотребная заповедал еси им, и научил еси их в молитвах бодрствовати и немолчно пети Богу: Аллилуия.

 

 

Икос 10

 

Стена заступления быша молитвы твоя, чудотворче святый, всем с верою к тебе притекающим во всякой скорби, ибо чистоты ради твоея сердечныя сила духовная от Бога тебе даровася болящих исцеляти, бедствующим помогати, будущая прорицати, яко славити ближним и дальным величия Божия, в тебе явленная, и звати тебе сице:

Радуйся, врачу немздоприемный недугов человеческих.
Радуйся, не токмо телесных, но и душевных болезней изрядный целителю.
Радуйся, слепым прозрение даровавый.
Радуйся, сляченных и увечных здравы сотворивый.
Радуйся, бесных от диавольскаго удручения свободивый.
Радуйся, изступленным ум здравый возвративый.
Радуйся, покрытых струпами уврачевавый.
Радуйся, печальных утешивый.
Радуйся, бедствующим на помощь ускоривый.
Радуйся, плененным и в темнице седящим ослабу и свободу явлением твоим даровавый.
Радуйся, преподобне Александре, Свирский чудотворче.

 

 

Кондак 11

 

Пение всеумиленное принесл еси Пресвятей Троице во время кончины твоея, преподобне, и в молитве, сущей на устех твоих. предал еси святую душу твою в руце Живаго Бога, Егоже от юности возлюбил еси, и Емуже до старости маститыя работал еси нелицемерно; темже со упованием благим радостно прешел еси к обителем небесным, со Ангельскими лики пети Триипостасному Богу: Аллилуия.

 

 

Икос 11

 

Мирную кончину твою видевше твои ученицы, великий угодниче Божий, скорбь разлучения с тобою утешением благодатным раствориша, во уповании всесильнаго предстательства твоего горе, у престола Божия, идеже слышиши с любовию тебе зовущих:

Радуйся, венец безсмертныя жизни приемый от руки Вседержителя.
Радуйся, ликовствуяй в чертозе Небеснаго Домовладыки.
Радуйся, откровенным лицем созерцаяй славу Трисияннаго Божества.
Радуйся, со старцы белоризными покланяяйся Творцу.
Радуйся, наследниче всесветлаго Царствия Христова.
Радуйся, гражданине Иерусалима Горняго.
Радуйся, небеснаго Сиона жителю.
Радуйся, нерукотворенных скиний райских обитателю.
Радуйся, по трудех временныя жизни, покой вечный улучивый.
Радуйся, блаженство, от века праведным уготованное, праведно восприявый.
Радуйся, лучами невечерняго света свыше осиянный.
Радуйся, долу величием чудес блистаяй.
Радуйся, преподобне Александре, Свирский чудотворче.

 

 

Кондак 12

 

Благодати причастна явися священная рака, содержащая многоцелебныя мощи твоя, чудотворче святый, ихже по летех мнозех яви Господь в недрех земных нетленными, исцеления неоскудно источающия, и всяк недуг врачующия силою Бога, дивнаго во святых Своих, дивно прославльшаго тя на небеси и на земли, Емуже воспеваем: Аллилуия.

 

 

Икос 12

 

Поюще радостную песнь хвалы и благодарения Человеколюбцу Богу, прославльшему тя в стране Российстей, чудотворца дивнаго и милостиваго, молим тя, преподобне отче наш: буди ходатай к Нему и молитвенник присный о нас зовущих ти:

Радуйся, заступниче рода христианскаго.
Радуйся, сокровищнице даров многоразличных.
Радуйся, покрове, Богом зданный.
Радуйся, от Бога благодать исцелений восприявый.
Радуйся, цвете нетления, облагоухавый святую Церковь.
Радуйся, заре безсмертия, от гроба преславно возсиявшая.
Радуйся, щедрот и милования струе неизсякаемая.
Радуйся, благоутробия источниче неоскудеваемый.
Радуйся, любве и сострадания явление многочудесное.
Радуйся, телес наших богодарованное врачевание.
Радуйся, о душах наших благоприятное предстательство.
Радуйся, преподобне Александре, Свирский чудотворче.

 

 

Кондак 13

 

О великий и преславный чудотворче, преподобне отче наш Александре! Милостивно приими сие малое моление наше, и молитвами твоими сохрани нас от недугов душевных и телесных в жизни сей, и от грядущих мучений вечных избави, и сподоби нас вкупе с тобою во Царствии Небеснем выну пети Богу: Аллилуия.

 

(Этот кондак читается трижды, затем икос 1 и кондак 1)

 

 

МОЛИТВА

 

О священная главо, Ангеле земный и человече небесный, преподобне и богоносне отче наш Александре, изрядный угодниче Пресвятыя и Единосущныя Троицы, являяй многия милости живущим во святей обители твоей и всем, с верою и любовию притекающим к тебе! Испроси нам вся благопотребная к житию сему временному, и нужная к вечному спасению нашему; пособствуй предстательством твоим, угодниче Божий, пред Господем на враги видимыя и невидимыя, верных рабов Его, в скорби и печали день и нощь вопиющих к Нему, многоболезненный вопль да услышит и да изведет от погибели живот наш; да в мире глубоце пребудет святая Православная Церковь Христова, и в благостроении зиждется Отечество наше, во всяком благочестии нерушимо. Буди всем нам, чудотворче святый, помощник скорый во всякой скорби и обстоянии, наипаче же в час кончины нашея явися нам заступник благосердый, да не предани будем на мытарствех воздушных власти злобнаго миродержца, но да сподобимся непреткновеннаго восхода в Царствие Небесное. Ей, отче, молитвенниче наш присный! Не посрами упования нашего, не презри смиренная моления наша и предстательствуй за нас пред Престолом Живоначальныя Троицы, да сподобимся вкупе с тобою и со всеми святыми мы, недостойнии, в селениих райских славити величие, благодать и милость единаго в Троице Бога, Отца и Сына и Святаго Духа, во веки веков. Аминь.

 

 

МОЛИТВА 

(Молитва прп. Александру Свирскому, читаемая в обители у мощей)

 

Преподобне и Богоносне Отче наш Александре! Смиренно припадающе к раце честных твоих мощей, молим тя прилежно, воздвигни руце твои о нас грешных ко Владычице нашей Богородице и Приснодеве Марии, яко да помянет древния милости Своя, имиже обещалася неотступна быти от обители твоея; и подаст нам силу и крепость на врагов душевных, отводящих нас от пути спасительнаго, да явльшеся оных победители, в день Страшнаго суда услышим от тебе похвальный оный глас: Се аз и дети яже дал ми еси Боже! и победный венец от победителя врагов Христа, Сына Божия восприимем, и наследие вечных благ купно с тобою получим; воспевающе Пресвятую Троицу, Отца и Сына и Святаго Духа, и твое милостивое предстательство и заступление, ныне и присно и во веки веков. Аминь.

 

 

ТРОПАРЬ
 

Тропарь, глас 4

От юности, богомудре, желанием духовным в пустыню вселився, единаго Христа возжелал еси усердно стопам вслед ходити; темже и ангельстии чини зряще тя, удивишася, како с плотию к невидимым кознем подвизався, премудре, победил еси полки страстей воздержанием, и явился еси равноангелен на земли; Александре преподобне, моли Христа Бога, да спасет души наша.

 

Кондак, глас 8

Яко многосветлая звезда, днесь в странах Российских возсиял еси, отче, вселився в пустыню. Христовым стопам последовати усердно возжелел еси, и Того святое иго на рамо твое взем честный крест, умертвил еси труды подвиг твоих телесная взыграния. Темже вопием ти: спаси стадо твое, еже собрал еси, мудре, да зовем ти: Радуйся, преподобне Александре, отче наш.

 

 

КАНОН

 (Преподобному Александру Свирскому)

 

Тропарь, глас 4-й

 

От юности, богомудре, желанием духовным в пустыню вселився, Единаго Христа возжелал еси усердно стопам вслед ходити. Темже и ангельстии чини зряще тя, удивишася, како с плотию к невидимым кознем подвизався, премудре, победил еси полки страстей воздержанием, и явился еси равноангелен на земли, Александре преподобне, моли Христа Бога, да спасет души наша.

 

 

Канон, глас 4-й

 

Песнь 1

 

Ирмос: Моря чермную пучину, невлажными стопами, древний пешешествовав Израиль, крестообразныма Моисеовыма рукама, Амаликову силу в пустыни победил есть.

 

Припев: Преподобне отче наш Александре, моли Бога о нас.

 

Божественнаго и Пресвятаго Духа блистаяся благодатию, светоносное, Александре, и честное совершающих твое успение, светлою молитвою твоею, страстей мглу очисти.

 

Преподобне отче наш Александре, моли Бога о нас.

 

От юности, преподобне, ярем Господень восприем, и в браздах твоего сердца пшеницу сеял еси духовну, клас пожал еси утверждающ души, богоблаженне.

Слава: Светоносная память твоя нам днесь возсия, яко солнечная луча, Александре, исправлений твоих, страстей наших отъемлющи облак: юже сотворяюще верою тя и любовию ублажаем.

И ныне: Зачала еси, Пречистая, неизреченным Словом содержащаго земныя концы, и сего родила еси: Егоже моли прилежно помиловати нас.

 

 

Песнь 3

 

Ирмос: Веселится о Тебе Церковь Твоя, Христе, зовущи: Ты моя крепость, Господи, и прибежище, и утверждение.

 

Преподобне отче наш Александре, моли Бога о нас.

 

Жезлом воздержания страстное море, отче, разделив, прешел еси неистоплен, и предел достигл еси истиннаго безстрастия, и Богу предстоя беседовал еси ума чистотою.

 

Преподобне отче наш Александре, моли Бога о нас.

 

Кто твоя подвиги, Александре, по достоянию изрещи возможет? Ты бо пути жестокия в пустыни шествуя, сурово былие ял еси, вкушение же отлагал еси пищи, болезньми воздержания.

Слава: Яко маслина плодовита в дому Господни прозябл еси, маслом трудов твоих, Александре, умащая наша лица: поющия тя, преподобне и богоблаженне, вся ны посети молися Человеколюбцу.

И ныне: Из Тебе, Чистая, Цвет неувядаемый, благоухая все человечество, Божественным миром естества Своего, Иже Отцу Собезначальный, из Тебе быв под летом, Дево Всенепорочная.

 

Господи, помилуй (трижды).

 

 

Седален, глас 8-й

 

От юности вся оставль житейская, красная же и лепотная, и в пустыню вселився, усердно последовал еси звавшему тебе, преподобне: в трудех же и постех, отче, тело твое изнурил еси. Отонудуже тя пастыря Своим овцам добре устрояет Всебогатый Господь, Александре блаженне. Моли Христа Бога, прегрешений оставление даровати, чтущим любовию святую память твою.

Слава, и ныне: Яко Деву и Едину в женах, Тя без семени рождшую Бога плотию, вси ублажаем роди человечестии: огнь бо вселися в Тя Божества и яко младенца млеком питаеши Зиждителя и Господа. Тем ангельский и человеческий род, достойно славим Пресвятое Рождество Твое, и согласно вопием Ти: моли Христа Бога, согрешений оставление даровати покланяющимся верою пресвятому Рождеству Твоему.

 

 

Песнь 4

 

Ирмос: Вознесена Тя видевши Церковь на Кресте, Солнце Праведное, ста в чине своем, достойно взывающи: слава силе Твоей, Господи.

 

Преподобне отче наш Александре, моли Бога о нас.

 

Ветрилом, отче, креста, душевный твой корабль окормив, благоутишно же и легко житейскаго лютаго потопления избегл еси, и к тишине Божественных извлекл еси пристанищ радуяся.

 

Преподобне отче наш Александре, моли Бога о нас.

 

Обретая, отче, сам себе, всеблаженне, всю нощь стоял еси яко безплотен, недреманно око имел еси, и чисто якоже зерцало духовною зарею, и Божественнаго явления, чистым помыслом приемля.

Слава: Яко Божественный зрится рай, премудре, храм, имея в себе твоих мощей раку, цветы принося чудесныя, имиже сердца наслаждаются верою, Александре, присно хвалящих тя.

И ныне: Святая Богородице, освяти нас, Яже Пресвятаго Бога рождши плотию, уподобитися восхотевша человеком, и небеснаго жития вся покажи, Пречистая, причастники молитвами Твоими.

 

 

Песнь 5

 

Ирмос: Ты, Господи, мой Свет, в мир пришел еси, Свет Святый, обращаяй из мрачна неведения верою воспевающия Тя.

 

Преподобне отче наш Александре, моли Бога о нас.

 

Просвещаемь зарею, отче, невечернею, и Божественным блистанием, бесовский мрак, и страстную мглу отгнал еси, и явился еси столп светозарен, и лествица воистинну, к Богу верныя возводящи.

 

Преподобне отче наш Александре, моли Бога о нас.

 

Бодр ум всегда имея, отче Богомудре Александре, страсти успил еси душетленныя, к Божественному светозарению хотя достигнути к незаходимаго света светлости, идеже есть веселящихся жилище.

Слава: Яко очистившу помышления, преподобне, благодать тебе дадеся яко пророку: яко настоящая глаголеши будущая, зрети же дальняя яко ближняя, Александре, Божие обителище.

И ныне: Рождши, Пренепорочная, Бога Еммануила, и Человека яве за милосердие бывша, Егоже моли яко Человеколюбца, Чистая, ущедрити люди согрешшия.

 

 

Песнь 6

 

Ирмос: Пожру Ти со гласом хваления, Господи, Церковь вопиет Ти, от бесовския крове очищшися ради милости от ребр Твоих истекшею Кровию.

 

Преподобне отче наш Александре, моли Бога о нас.

 

Неболезненную жизнь в болезнех восприял еси, и болезней лютых уставляеши озлобления, верою просящим прияти исцеление, Александре всечестне. Темже разреши болезни наша душевныя и телесныя.

 

Преподобне отче наш Александре, моли Бога о нас.

 

К раце твоей священней приступающе, благоухания Божественнаго разума исполняемся, преблаженне Александре, смрада избавляющеся страстей, любовию тя чтущии, отче преподобне.

Слава: Исправляеши, отче, хромых, и очи просвещаеши слепых, ходити же твориши разслабленных о Христе, и отгониши духи лукавыя, Александре преподобне.

И ныне: На Тя яко дождь на руно сшед, Богородице, Спас, изсуши яко потоки безбожия: души же наша напаяя всегда, присно чтущия Тя.

 

Господи, помилуй (трижды). Слава, и ныне:

 

 

Кондак, глас 8-й

 

Яко многосветлая звезда, днесь в странах Российских возсиял еси, отче, вселився в пустыню, Христовым стопам последовати усердно возжелел еси, и Того святое иго на рамо твое взем честный крест, умертвил еси труды подвиг твоих телесныя взыграния. Темже вопием ти: спаси стадо твое, еже собрал еси, мудре, да зовем ти: радуйся, преподобне Александре, отче наш.

 

 

Икос

 

Како восхвалю твоя подвиги и борения, преподобне Александре? Яко невеществен разум стяжав смирением, житие твое препроводил еси зельным воздержанием трудов твоих. Аще убо и человек был еси естеством, но Вышняго Иерусалима явился еси гражданин: с плотию бо на земли пожил еси, но ангельское пребывание прошед, был еси столп страстьми непотрясом. Тем вся Российская земля тобою обогащшися хвалит тя, и верою величает, взывающи тебе таковая:

Радуйся, отечеству твоему похвала, великому же Новуграду и всей стране Российстей пресветлый светильниче:
Радуйся, иже благочестива отца преславная отрасль, и благоговейны матере ветвь многоплодна:
Радуйся, целомудрия непреклонный столпе, и монахов пресветлая слава:
Радуйся, пастырю Христовы ограды словесных овец, ихже к Божию приводя разуму:
Радуйся, ты бо многочадну пустыню возделал еси высотою смирения твоего:
Радуйся, монашествующих всех образ добродетели, и единообразных лавры спасение:
Радуйся, красное добродетелей хранилище, и всем в печали унывающим утешение:
Радуйся, яко вся мира сего мудрования презрев, страсти плотския умертвил еси:
Радуйся, яко Ангелом собеседник быти сподобился еси, и вся бесовския полки посрамил еси:
Радуйся, ты во всех странах прославлен был еси, о Христе бо многа чудеса сотворил еси:
Радуйся, яко воистинну обрел еси Божию благодать, и со Ангелы присно зрети сподобился еси лицем к лицу Святую Троицу:
Радуйся, яко второе солнце сияя чудесы, всем даруеши благодать исцелений:
Радуйся, преподобне Александре отче наш.

 

 

Песнь 7

 

Ирмос: В пещи авраамстии отроцы персидстей, любовию благочестия паче, нежели пламенем опаляеми, взываху: благословен еси в храме славы Твоея, Господи.

 

Преподобне отче наш Александре, моли Бога о нас.

 

Освящся от младенства доброгласною трубою молитвы твоея, и неплодныя утробы многоплодны сотворил еси. Слепым подаеши прозрение, и хромым благотечение, Александре преблаженне.

 

Преподобне отче наш Александре, моли Бога о нас.

 

Слезными излиянии погасил еси страстей разжжения, Александре блаженне, чудес источил еси струи присно животны, имиже омываются душ же и телес недузи, преславне.

Слава: Терпение стяжав многое, премудре, воздержание, веру и любовь истинну, явился еси отец сирым, вдовицам заступник, милостив и смирен Александре, монахом слава и похвала.

И ныне: Како доиши млеком Сына, Чистая, без Отца, питающаго всякое дыхание, Мати Пречистая? Како на руку носиши вся содержащаго? Паче ума чудо Твое. Тем поем величия Твоя.

 

 

Песнь 8

 

Ирмос: Руце распростер, Даниил львов зияния в рове затче; огненную же силу угасиша, добродетелию препоясавшеся, благочестия рачители, отроцы, взывающе: благословите, вся дела Господня, Господа.

 

Преподобне отче наш Александре, моли Бога о нас.

 

Умом безстрастия очищен, беседовал еси Господеви Вседержителю: от Негоже неизглаголанно, преподобне, научаемь, пророчески предглаголал еси просвещая души, яко велик, всеблаженне, пророк. Тем тя согласно, Александре премудре, вернии похваляем, поюще: благословите, вся дела Господня, Господа.

 

Преподобне отче наш Александре, моли Бога о нас.

 

Подавая тебе, яже противу любве Зиждитель, от юности соблюдая тя десницею, и малым былием самовозрастшим от земли, питает тя боголепно, яко от младенства всяко похотение поправша, и поюща: благословите, вся дела Господня, Господа.

Слава: Яко струя Божественна исцелений, происходящи от раки твоея, вся исцеляет, и омывает скверны страстей, и гноение лютых очищает, и верных напаляет всех сердца, Александре премудре, любовию поющих: благословите, вся дела Господня, Господа.

И ныне: Воплощся безплотный из Тебе боголепно, Егоже моли, Пречистая, страсти плоти моея умертвити, и оживити мою умерщвленную душу грехми.

 

 

Песнь 9

 

Ирмос: Камень нерукосечный от несекомыя горы Тебе, Дево, краеугольный отсечеся, Христос, совокупивый разстоящаяся естества. Тем, веселящеся, Тя, Богородице, величаем.

 

Преподобне отче наш Александре, моли Бога о нас.

 

Твоя священныя и святыя мощи во гробе лежаще, многоразличныя недуги исцеляют, и попаляют полки бесовския всегда, мудре Александре: Божиею благодатию точиши всем исцеления, верно тя присно блажащим.

 

Преподобне отче наш Александре, моли Бога о нас.

 

Струи нам всегда честная твоя рака явися исцелений, отче, страстей излияние всяческих изсушающи, и вся напаяющи души ко благоплодию Божественному, премудре Александре, Христов угодниче.

Слава: Память твоя днесь яко солнце возсия, Александре преблаженне, яже благочестивых сердца озаряющи, болезней твоих, и чудес сиянием, яко воистинну просвещающи, отче, в нюже вся ны помяни, верно чтущия тя.

И ныне: Глас приносим ти Гавриилов радующеся: радуйся, глаголюще, место священия: радуйся, преподобных славо, и всех верных спасение, еюже ради обожихомся, Богородице Приснодево.