Собор всех святых, в земле Российской просиявших

 

 

(Празднуется во 2-ю Неделю по Пятидесятнице)

 

 Каждый год Русская Православная Церковь совершает память "всеблаженных и богомудрых угодников Божиих" - Всех святых, просиявших своею жизнью и подвигами в земле Русской и непрестанно молящихся о ней.

  Празднование Собора всех святых, в земле Российской просиявших, появившееся в 50-е гг. XVI в. и забытое в синодальную эпоху, было в 1918 г. восстановлено, а с 1946 г. стало торжественно совершаться во 2-ю Неделю по Пятидесятнице.

  Центральным моментом праздника является, конечно же, прославление Церковью святых, просиявших своими добродетелями в нашем Отечестве, и молитвенное обращение к ним.

  Святые Церкви - наши помощники и предстатели перед Богом на протяжении всей нашей земной жизни, поэтому частое обращение к ним есть естественная потребность всякого христианина; тем более, обращаясь к русским святым, мы имеем еще большее дерзновение, так как верим, что "наши святые сродники" никогда не забывают своих потомков, совершающих "любовию их светлый праздник".

  Впрочем, "в русских святых мы чтим не только небесных покровителей святой и грешной России: в них мы ищем откровения нашего собственного духовного пути", и, внимательно всматриваясь в их подвиги и "взирая на кончину их жизни", стараемся, с помощью Божией, "подражать вере их" ( Евр. 13:7), дабы Господь и впредь не оставлял бы землю нашу Своей благодатью и являл бы в Русской Церкви святых Своих до скончания века.

 

 

 

АКАФИСТ

 

Кондак 1

 

Избраннии от Бога святии угодницы, в земли Российстей просиявшии и Церковь нашу, якоже звезды светлыя украсившии, верою сошедшеся днесь восхваляем пречестную память вашу. Вы же, яко имуще дерзновение к Спасу, от всяких бед нас свободите зовущих:

Радуйтеся, вси святии, в земли Российстей просиявшии.

 

 

Икос 1

 

Ангелов и человеков Творче и Царю, отверзи ныне грешная уста наша достойно воспети вся святыя Твоя, благодатию Твоею в земли Российстей просиявшии и Тебе, Бога нашего, благочестием своим прославившии, да с любовию зовем к ним таковая:

Радуйтеся, священномученицы седмочисленнии, кровьми вашими в Херсонесе Тавричестем Церковь Христову утвердившии, от неяже и мы освящение прияхом.
Радуйтеся, Феодоре с юным Иоанном, первомученицы Российстии, прежде просвещения страны нашея за Христа пострадавшии.
Радуйся, Ольго равноапостольная, тьму язычества светом Христовой веры озарившая.
Радуйся, равноапостольный Владимире, земли Российстей славный крестителю.
Радуйся, Михаиле, Церкве русские первосвятителю и православнаго благочестия и чина в земли нашей насадителю.
Радуйтеся, Антоние и Феодосие преподобнии, святыя лавры Киево-Печерския устроителие и жития иноческаго в земли нашей основателие.
Радуйтеся, вси святии, в земли Российстей просиявшии.

 

 

Кондак 2

 

Видев Господь скорби и утеснения малаго словеснаго стада Своего, в земли нашей древле от идольскаго злочестия озлобляема, крепкую помощь Свою дарова, да посрамивше прельщение вражие, в вере Христовой утвердится и непрестанно поет: Аллилуиа.

 

 

Икос 2

 

Разум разумных века сего отвергая и объюродевшую премудрость премудрых погубляя, приял еси, Господи, якоже плод красный от новаго вертограда Твоего, земли нашея, вся святыя, в ней просиявшии, ихже делание ныне восхваляюще, ублажаем их тако:

Радуйтеся, Борисе и Глебе, страстотерпцы святии, в жертву чисту Богови принесшиися.
Радуйтеся, Леонтие священномучениче, страны Ростовския просветителю, и Исаие, Игнатие, Феодоре, Иакове, града Ростова святителие.
Радуйся, Кукшо, земли вятичей благовестниче и священномучениче.
Радуйтеся, Никито и Иоанне, знамению Богоматере послужившии, к прочии святителие Новограда Великаго.
Радуйся, Кирилле, святителю Туровский, слова Божия изрядный проповедниче.
Радуйтеся, Ефреме преподобне, града Торжка просветителю, со Аркадием и Иулианиею девою.
Радуйтеся, вси святии, в земли Российстей просиявшии.

 

 

Кондак 3

 

Сила Божия, в немощех человеческих совершающаяся, укрепляше вас, святии угодницы Божии, в земли нашей Господу многообразне послужившии, Емуже купно с вами поем: Аллилуиа.

 

 

Икос 3

 

Имуще облежащ нас облак толик свидетелей, все множество святых в земли нашей просиявших, торжествуем радостно и духовно веселимся, приносяще им хвалебное пение сие:

Радуйся, Симоне, Владимирския и Суздальския земли святителю и храмов Божиих усердный создателю.
Радуйтеся, Феодоре и Иоанне, с преподобным Дионисием, Евфимием и Евфросиниею, Суздаля звезды пресветлыя.
Радуйтеся, Муромския страны просвятителю Константине со чады твоими Михаилом и Феодором.
Радуйтеся, Петре и Февроние, Муромстии чудотворцы, со Иулианиею праведною и милостивою.
Радуйся, Василие святителю, в Муроме поношение ложное приемый и в Рязань преестественно приплывый.
Радуйтеся, Никито Столпниче и Данииле, мертвых погребателю, Переяславлю Залесскому украшение.
Радуйтеся, вси святии, в земли Российстей просиявшии.

 

 

Кондак 4

 

Буря нечестия идолобожнаго, аще и восставаше в земли нашей на Церковь Христову православную, обаче потопити ю не возможе: доселе бо стоит в чине своем, победно поюще Богу: Аллилуиа.

 

 

Икос 4

 

Слышаша святии сладчайший глас Христов, ко спасению призывающий, и Того иго благое чрез все житие свое понесше, ныне покой безболезненный и вечный в райских обителех обретоша. Сего ради слышат от нас таковая:

Радуйтеся, Несторе, достопамятных деяний списателю, Иоанне многострадальный, Алипие, святых икон живописателю и весь лик прочих преподобных Печерских, от Господа прославленных.
Радуйся, Иове, лавры Почаевския украшение, со всеми угодники и чудотворцы Волынскими.
Радуйся, Евфросиние, граду Полоцку радование и девам сияние. Радуйтеся, преподобне Авраамие и мучениче Меркурие, Смоленстии чудотворцы.
Радуйтеся, Антоние, Иоанне и Евстафие, Литовстии мученицы, огню служити отвергшиися и страданьми своими многия люди ко Христу приведшии.
Радуйся, Исидоре пресвитере, со всем собором мученик в Юрьеве граде Ливонстем, от латин за веру православную пострадавший.
Радуйтеся, вси святии, в земли Российстей просиявшии.

 

 

Кондак 5

 

Боготечныя звезды землю нашу благодатию озаряющия, восхваляем вас, угодницы Божии, овии во святительстве, друзии во иночестве, инии во юродстве Христа ради подвизавшиися, вси же преподобием и правдою Богу послужившии, Емуже согласно поем: Аллилуиа.

 

 

Икос 5

 

Видевше просиявших в земли Российстей святых Божиих неослабное терпение в сем веце и неизреченную славу на небесех, сами себе и друг друга к подражанию тем поощряти потщимся, зовуще им:

Радуйся, Сергий Радонежский чудотворче, иноков начальниче и за всю землю нашу теплый молитвенниче.
Радуйтеся, Сергие и Германе Валаамстии, Александре Свирский и Арсение Коневский, монахов наставницы и иноверных просветителие.
Радуйся, Антоние, от ветхаго Рима, отечествия Твоего, в Новоград Великий на камени приплывый и зде образ иноческаго жития явивый.
Радуйся, Варлааме, Хутынский чудотворче, Новограду похвало и всея страны нашея светильниче.
Радуйтеся, Зосимо, Савватие и Германе, звезды иночества пресветлыя, со всеми преподобными Соловецкими.
Радуйся, и вся Фиваида русская, — пустыни и дебри Олонецкия, Белоезерския и Вологодския, — святое и славное преподобных отцев множество возрастившая.
Радуйтеся, вси святии, в земли Российстей просиявшии.

 

 

Кондак 6

 

Проповедницы веры Христовы и благочестия христианскаго бысте святии на земли, темже ныне на небесех с веселием предстояще Христу немолчно поете Ему: Аллилуиа.

 

 

Икос 6

 

Возсияли есте нам святии, преукрашеннии изобилием многоразлич-ных даров, имиже венча вас подвигоположник Христос. Прибегающе бо к вам не всуе труждаемся: Божию благодать и милость улучаем молитвами вашими. Сего ради вопием вам: Радуйтеся, честнии страдальцы Черниговстии Михаиле и Феодоре, велению мучителеву не повинующиися и Единому Богу точию кланятися изволившии.

Радуйтеся, Александре Невский и Андрее Боголюбивый, Георгие и Глебе, Владимирстии чудотворцы, веры ревнителие и защитницы.
Радуйся, мучениче Авраамие Болгарский, в Казани за Христа пострадавый и град Владимир украсивый.
Радуйся, Данииле, града Москвы покровителю, родительскаго благословения наследниче.
Радуйтеся, Арсение, святителю Тверский, княже Михаиле и Анно Кашинская, молитвенницы наши.
Радуйтеся, вси святии, в земли Российстей просиявшии.

 

 

Кондак 7

 

Хотяще спасение вечное улучити, святии скорбным и тесным путем Христу последоваша и Ему единому угождати потщишася, и ныне, лицем к лицу Того во славе зряще, воспевают Ему: Аллилуиа.

 

 

Икос 7

 

Новыя светила, православную Церковь украшающии, зрим вся святыя земли нашея, прославлением бо своим утверждают веру нашу и нам у Бога спасение ходатайствут, да вопием им:

Радуйся, Петре, великий святителю, первопрестольниче Московский.
Радуйся, Алексие, врачу предивный, града Москвы и всея земли нашея похвало.
Радуйся, Ионо, паствы твоея наставниче и предстателю.
Радуйся, Филиппе, царя неистоваго обличивый и люте убиенный.
Радуйся, священномучениче Ермогене, прославлению Казанския иконы Богоматере послуживый и за веру православную душу свою положивый.
Радуйтеся, Василие, Иоанне и Максиме, Московстии чудотворцы, блаженнии юроди Христа ради, подвижницы неложнии и молитвенницы теплии.
Радуйтеся, вси святии, в земли Российстей просиявшии.

 

 

Кондак 8

 

Странно есть неверным видети, како сила Божия в немощи совершается, мы же, истинную Христову веру твердо содержаще, славе святых наших возрадуемся и Господу, прославляющему их, непрестанно и усердно воспоим: Аллилуиа.

 

 

Икос 8

 

Вся отложше попечения житейская и самех себе отвергшеся, неуклонно Христу последовасте, присноблаженнии; не может язык изобразити и воспети достойно веру вашу и любовь, труды и болезни, терпение и злострадания, имиже в радость Господа своего вошли есте. Сего ради восхваляем вас сице:

Радуйтеся, Никоне Радонежский, преподобнаго Сергия преемниче, и Михее смиренный, и Савво Звенигородский, и Стефане Махрищский, и прочии ученицы Сергиевы, многих обителей иноческих устроителие.
Радуйтеся, Макарие Калязинский и Макарие Унженский, Желтоводский, Богу угодившии.
Радуйтеся, Ниле Столбенский, в молитвех и трудех неусыпно подвизавшийся, и Ниле Сорский, скудость скитскую возлюбивый.
Радуйся, Иосифе, отче Волоцкий, монастырскаго чина ревнителю.
Радуйтеся, Пафнутие Боровский, падших исправителю, с Тихоном Калужским чудотворцем внутри дуба обитавшим.
Радуйтеся, вси святии, в земли Российстей просиявшии.

 

 

Кондак9

 

Всяк подвиг и всяку добродетель исправисте, святии, образ христианскаго благочестия людем в себе показавше, яко да видяще ваша добрая дела, прославят Отца нашего, иже на Небесех, поюще Ему: Аллилуиа.

 

 

Икос 9

 

Витий художество превзошедше, святии, благодатную силу веры Христовой житием и подвиги своими всему миру явиша, благодатию Божиею неустанно невидимаго врага попирающе. Сего ради зовем:

Радуйся, Стефане святителю, Пермския страны апостоле славный.
Радуйтеся, того преемницы: Герасиме и Питириме священномученицы и Ионо, Усть-Вымския чудотворцы.
Радуйся, Трифоне преподобне, страну Вятскую от зловерия идольскаго ко Христу приведший.
Радуйся, Трифоне, Печенгский чудотворче, обители твоея похвало, во тьму языческую стран полунощных свет веры Христовой принесший.
Радуйтеся, Гурие, Варсонофие и Германе, града Казани и всех окрестных стран светила пресветлая.
Радуйтеся, Сибири апостоле, Иннокентие Иркутский, первый епископе, с Софронием премудрым и Иоанном Тобольским, добротами вашими вся Сибирския страны озарившии.
Радуйтеся, вси святии, в земли Российстей просиявшии.

 

 

Кондак 10

 

Спасти хотя люди земли нашея, даровал еси нам, Господи, вся святыя в ней просиявшия, яко образы жития спасительнаго и яко ходатаи за нас и помощники, да благодаряще Тебе вопием: Аллилуиа.

 

 

Икос 10

 

Стена есть и заступление всем, с верою к вам прибегающим, святии. Вам бо дадеся благодать всем, требующим полезная даровати: недужным исцеление, скорбящим утешение, в напастех сущим избавление, да воспоим вам таковая:

Радуйтеся, Всеволоде Кроткий и Довмонте, граду Пскову стены необоримыя.
Радуйтеся, Никандре пустынножителю и Евфросине преподобне, во стране Псковстей подвизавшиися.
Радуйся, Прокопие блаженне, град твой Устюг от каменометныя тучи избавивый.
Радуйся, Симеоне праведный, Верхотурский молитвенниче и всему Уралу утверждение.
Радуйтеся, блаженнии юроди Христа ради: Николае и Феодоре Новоградстии и Исидоре Ростовский, неправды обличителие и премудрости века сего посрамителие.
Радуйся и ты, Российский Златоусте, Ростовский святителю Димитрие, жития святых собравый и в назидание всем словом твоим написавый.
Радуйтеся, вси святии, в земли Российстей просиявшии.

 

 

Кондак 11

 

Пение сие хвалебное и благодарственное приимите от нас, угодницы Божии: к вам бо прибегающее упование наше на предстательство и помощь вашу возлагаем, Богу же вопием: Аллилуиа.

 

 

Икос 11

 

Светозарнии лучи подвиг ваших многообразных всяку душу христианскую осветиша, ко умилению и ревности о спасении побуждают, вам же пети подвизают таковая:

Радуйся, Митрофане, Воронежская похвало, святителю препростый и душ водителю ко Христу премудрый.
Радуйся, Тихоне, Задонский чудотворче, медоточивая уста, Христова Евангелия вещателю сладчайший.
Радуйся, Феодосие, святителю Черниговский, светильниче преизрядный.
Радуйся, Иоасафе, молитвенниче Белоградский и благочестия ревнителю великий.
Радуйся, Питириме, страны Тамбовския предстоятелю и ходатаю пред Богом неленостный.
Радуйся и ты, Серафиме преподобне, радосте наша, подвижниче Саровский пречудный.
Радуйтеся, вси святии, в земли Российстей просиявшии.

 

 

Кондак 12

 

Благодать Господа нашего Иисуса Христа, и любовь Бога и Отца, и причастие Святаго Духа испросите нам, святии угодницы наши, да силою и действием Пресвятыя Троицы ограждаеми, избегнем пагубы, ересей и раскола, православно поюще: Аллилуиа.

 

 

Икос 12

 

Поюще великий и пресветлый полк ваш, вси святии в земли нашей просиявшии, благодарне величаем прославльшаго вас Господа, Егоже милость и прощение нам грешным испросите, да усердно вопием вам:

Радуйтеся, святии в земли нашей потрудившиися во благовестии Христовом и Церковь православную в Сибири, Китае, Японии, Америке и Индии насадившии.
Радуйтеся, вси благовестнический подвиг своею кровию запечатлевшии и за исповедание Христа душу положившии.
Радуйтеся, святии царственнии мученицы и преподобнии старцы Оптинстии, и вси прочии земли нашея святии, зде нами не поименованнии, Богу же знаемии, Церкви явленнии и не явленнии, но присно молящиися о нас.
Радуйтеся, Нино равноапостольная со множеством мученик и преподобных Иверских.
Радуйтеся, апостоли Христови Варфоломее и Симоне Кананите, до предел наших дошедшии.
Радуйся, Клименте Римский, священномучениче, подвиг твой в стране нашей скончавый.
Радуйся, Афанасие Царьградский, к нам пришедый и во граде Лубнах мощи своя во благословение нам оставивый.
Радуйся и ты, Церкве Российския первоначальниче, Андрее, апостоле Первозванный, на обильный плод первосеяния твоего ныне взирающий.
Радуйтеся, вси святии, в земли Российстей просиявшии.

 

 

Кондак 13

 

О угодницы Божии, святии, в земли Российстей просиявшии! Всечестную память вашу ныне празднующе, к вашему молитвенному предстательству и заступлению прибегаем, да вашими молитвами избавимся в сем веце от падений греховных, от навета злых человек и от напрасныя смерти, и в будущем сподобимся спасение улучити и вечных благ наслаждение, купно с вами ангельски поюще Богу: Аллилуиа.

 

(Этот Кондак читается трижды, затем Икос 1 и Кондак 1).

 

 

МОЛИТВА ПЕРВАЯ

 

О преславнии и всехвальнии угодницы Божии, святии вси в земли Российстей просиявшии! Многая ваша имена и дарования! Священную и всепраздственную память вашу ныне совершающе, величаем возвеличившаго вас Христа Бога нашего: Ему же верою и любовию чрез все житие добре послужисте и многообразными труды и подвиги своими угодисте и славне Его прослависте; святостию жития вашего Церковь Христова укрепляется и украшается, вера православная утверждается, вся земля наша Российская освящается, и мы, яко духовная чада ваша, светло торжествуем: яко воистинну от Восток солнца до Запад, по всей земли нашей хвально имя Господа. Обаче ведуще безмерная беззакония наша, сами себе осуждаем и к вам, яко теплым ходатаем нашым, с любовию прибегаем и смиренно молимся: да вашими благоприятными молитвами, обаче же Своим человеколюбием Христос Бог страждущую страну Российскую от злых безбожник и власти их свободит, и возставит престол православных царей. Верных рабов Своих, в скорби и печали день и нощь вопиющих к Нему, многоболезный вопль услышит, и изведет от погибели живот наш; да дарует всем нам тихое и безмолвное житие в веце сем пожити во всяком благочестии и чистоте, избавляя нас от искушений и соблазнов лукаваго врага, от бед и напастей, и от всякаго зла; на страшнем же суде Своем да сподобит нас деснаго стояния, и наследники Царства Небеснаго да сотворит, яко благословися и прославися пречестное и великолепое имя Отца и Сына и Святаго Духа, ныне и присно, и во веки веков. Аминь.

 

 

МОЛИТВА ВТОРАЯ

 

О, преславнии и всехвальнии угодницы Божии, вси святии ведомыя и неведомыя в земле Российстей просиявшии! К вам, яко к теплым ходатаям и предстателям нашим с любовию прибегаем и смиренно молимся: умолите Господа Бога, да вашими благоприятными молитвами, Своим же человеколюбием да дарует нам (имена) тихое и благочестное житие в веце сем пожити, да избавит нас от искушений и соблазнов лукаваго диавола и от бед и напастей, и от всякаго зла; на Страшнем же суде Своем да сподобит нас деснаго стояния и наследники Царствия Своего Небеснаго да сотворит, яко благословися пречестное и великолепое имя Отца и Сына и Святаго Духа, ныне и присно и во веки веков. Аминь.

 

 

ТРОПАРЬ

 

Тропарь, глас 8:

 

Якоже плод красный Твоего спасительнаго сеяния, земля Российская приносит Ти, Господи, вся святыя, в той пресиявшия. Тех молитвами в мире глубоце Церковь и страну нашу Богородицею соблюди, Многомилостиве.

 

Величание:

 

Ублажаем вас, чудотворцы наши славнии, землю Русскую добродетельми вашими озарившии и образ спасения нам светоявленно показавшии.

 

 

КАНОН

 

(Всем Святым в земли Российстей просиявшим)

 

 

Тропарь, глас 8-й

 

Якоже плод красный Твоего спасительнаго сеяния, земля Российская приносит Ти, Господи, вся святыя, в той просиявшия. Тех молитвами в мире глубоце Церковь и страну нашу Богородицею соблюди, Многомилостиве.

 

 

Ин тропарь, глас 4-й

 

Иерусалима Вышняго гражданы, от земли нашея возсиявшия и Богу во всяцем чину и всяким подвигом угодившия, приидите, воспоим, вернии: о всеблаженнии земли Российския заступницы, молитеся ко Господу, да помилует сию от гнева Своего, исцеляя сокрушение ея, и верныя люди Своя утешит.

 

 

Канон, глас 8-й

 

Песнь 1

 

Ирмос: В Чермнем фараона с колесницами погрузил еси и люди Моисеом спасл еси, поющия Тебе, Господи, песнь победную, яко Избавителю нашему Богу.

 

Припев: Вси святии, в земли Российстей просиявшии, молите Бога о нас.

 

Вси в песнех духовных воспоим согласно во благочестии просиявшия Божественныя отцы наша, яже изнесе Русския земли всяко место и страна и яже Церковь Русская воспита.

 

Вси святии, в земли Российстей просиявшии, молите Бога о нас.

 

Радуйтеся, святителие седмочисленнии: Василие, Ефреме, Евгение, Елпидие, Агафодоре, Еферие и Капитоне, в Херсоне епископствовавшии и землю нашу кровьми своими освятившии.

 

Вси святии, в земли Российстей просиявшии, молите Бога о нас.

 

Приидите, мучениколюбцы вернии, песньми почтим первомученики русския, Феодора и юнаго Иоанна, идолом не послужившия и крови своя за Христа давшия.

 

Вси святии, в земли Российстей просиявшии, молите Бога о нас.

 

Величие наше и похвала ты еси, Ольго Богомудрая, тобою бо свободихомся от бесовскаго прельщения, не престай и ныне молити за люди, яже Богу привела еси.

 

Вси святии, в земли Российстей просиявшии, молите Бога о нас.

 

Радуйся и веселися, рабе Христов, княже великий и мудрый Владимире, просветителю наш, тобою бо избавихомся от душепагубнаго идолослужения, темже, радуйся, вопием тебе.

 

Вси святии, в земли Российстей просиявшии, молите Бога о нас.

 

Сияет, яко звезда на небеси, Божий иерарх Михаил, землю Русскую просветивый светом познания Божественныя веры и Владыце приведый люди новы, банею Крещения обновленны.

Слава: О блаженнии страстотерпцы Христовы, князие Борисе, Глебе, и Игоре, и Михаиле с болярином Феодором! Не забудите отечества вашего, глад и озлобление отгоните, от грехопадений междоусобий избавите ны.

И ныне: С Чинми Ангел, Владычице, со пророки, и апостолы, и со всеми святыми за ны, грешныя, Богу помолися, Твоего Покрова праздник в Российстей земли прославльшия.

 

 

Песнь 3

 

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

 

Вси святии, в земли Российстей просиявшии, молите Бога о нас.

 

Проповедует преславно и паче трубы вопиет великая Лавра Печерская, тобою начало приимшая, отче преподобне, Антоние славне, всех российских монахов первоначальниче.

 

Вси святии, в земли Российстей просиявшии, молите Бога о нас.

 

Воспоим светло монашескаго общаго жития в Русстей земли устроителя, блаженнаго Феодосия, с ним и Нестора, достопамятных деяний списателя, и Алипия, живописания в России начальника.

 

Вси святии, в земли Российстей просиявшии, молите Бога о нас.

 

Рай мысленный еси, Печерская святая горо, умножившая духовная древеса, блаженныя отцы, ихже исчести по единому не могуще, о всех вкупе хвалу принесем Единому Владыце.

 

Вси святии, в земли Российстей просиявшии, молите Бога о нас.

 

Антоние, Иоанне и Евстафие, твердии исповедницы Православныя веры, издревле в земли Российско-Литовстей насажденнии, молитвами вашими от зловредных иноверных мудрований соотчичей ваших и всех нас ограждайте.

 

Вси святии, в земли Российстей просиявшии, молите Бога о нас.

 

Ходатаи будите за отечество ваше земное, Афанасие преподобномучениче, и ты, отроче Гаврииле, научите убо и нас Православие дерзновенно исповедати и страха вражия не боятися.

 

Вси святии, в земли Российстей просиявшии, молите Бога о нас.

 

Да почтится Иов преподобный, Лавры Почаевския украшение, вкупе со всеми угодники и чудотворцы Волынскими, делы своими и чудесы облиставшии преславно земли нашея концы.

Слава: Песньми священными восхвалим Афанасия, Цареградскаго святителя, свое благословение земли Российстей принесшаго и честныя своя мощи, яко залог единения со Вселенскою Церковию, нам оставльшаго.

И ныне: Се время заступления Пресвятыя Богородицы прииде, умножившимся соблазном, се время наших к Ней воздыханий, о братие, рцем убо от всего сердца нашего: Владычице, Владычице, помози людем Твоим.

 

Господи, помилуй (трижды)

 

 

Седален, глас 7-й

 

Нощней тьме огустевающей, умножается звездный блеск, и к тому очи заблуждших радостно возводятся. Тако и умножившейся на земли греховней тьме, возведем горе очи наши, братие, и, сияние духовных звезд, землю нашу озаряющих, узревше, к Небесному Отечеству потщимся, егоже да не лишит Господь нас, грешных, молитвами святых Своих.

Слава, и ныне: Притецем, вернии, к Божественней и цельбоносней ризе Спасителя нашего Бога, благоизволившаго сию плотию носити и на Кресте Святую Свою Кровь излияти, еюже искупи нас от работы вражия. Темже благодарственно вопием Ему: спаси Первосвятителя нашего и архиереи, Отечество наше и вся люди честною Твоею ризою защити и спаси души наша, яко Человеколюбец.

 

 

Песнь 4

 

Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зовем Ти: силе Твоей слава, Человеколюбче.

 

Вси святии, в земли Российстей просиявшии, молите Бога о нас.

 

Первоначальника и устроителя града Москвы, блаженне княже Данииле, показа тя Господь, к Нему же непрестанно моляся, град твой охраняй, землю нашу от бед спасай, православныя же русския люди посещати милостивно не престай.

 

Вси святии, в земли Российстей просиявшии, молите Бога о нас.

 

Молим вас, святителие Христовы Петре, Алексие, Ионо, Филиппе и Иннокентие, Фотие, Киприане и Феогносте и вси прочии Московстии чудотворцы: душевное смущение и печали нашея бурю разорите и тишину нам подайте вашими к Богу молитвами.

 

Вси святии, в земли Российстей просиявшии, молите Бога о нас.

 

И первопрестольник Российския Церкве, и исповедник Православныя веры, и обличитель грехолюбивых и мятежных, и строитель Русския земли был еси, святителю Ермогене, и за сие темницею и гладом мучимь был еси и приемь от Бога неувядаемый венец, со святители и мученики веселишися.

 

Вси святии, в земли Российстей просиявшии, молите Бога о нас.

 

Радуется славный град Москва, и веселия исполняется вся Россия, на твоя молитвы надеющеся, Сергие Богоблаженне, обитель же твоя красуется, хранящи честныя твоя мощи, яко сокровище священное.

 

Вси святии, в земли Российстей просиявшии, молите Бога о нас.

 

Песньми священными восхвалим преподобнаго Никона, послушания рачителя, с нимже воспоим Михея, Савву и Дионисия, Стефана, Андроника и Савву и вся преподобныя ученики и собеседники великаго Сергия, ихже молитвами сынове российстии спасаются.

 

Вси святии, в земли Российстей просиявшии, молите Бога о нас.

 

О премудрии и, блаженнии Василие, Максиме и Иоанне Московстии и вси Христа ради юродивии Российстии, чуднии житием и разумом, молим вас прилежно: молите Христа Бога нашего за земное отечество ваше и всем верным спасение испросите.

Слава: Новый столпник в дебри Калужстей явился еси, преподобне Тихоне, и купно с преподобным Пафнутием, иночества строгим ревнителем, и блаженным Лаврентием ко Граду Горнему в стране твоей путь верный проложил еси, на немже упаси и нас молитвами твоими.

И ныне: Подобием иконы Иверския не точию Афон просвещается, но и град Москва украшается и инии гради и веси освящаются, от тоя чудесную помощь приемлюще и источник утешения в ней обретающе, и нам, Благая Вратарнице, двери райския отверзи.

 

 

Песнь 5

 

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

 

Вси святии, в земли Российстей просиявшии, молите Бога о нас.

 

Великаго Новаграда первопастырие, Никито, Нифонте, Иоанне, Феоктисте, Моисее, Евфимие, Ионо и Серапионе, и прочии чуднии святителие, в дому Премудрости Божия, яко финиксы, процвели есте, словесы благоплодными и непорочным житием.

 

Вси святии, в земли Российстей просиявшии, молите Бога о нас.

 

Светло да похвалятся князие Новгородстии, Владимир, Святыя Софии пречудныя устроитель, с материю своею Анною, и Мстислав, и Феодор, с ними же и вси от рода князей Российских житием богоугодным просиявшии, Божественными да воспоются песньми.

 

Вси святии, в земли Российстей просиявшии, молите Бога о нас.

 

Дивнаго Варлаама, велика Новаграда славу и украшение, всероссийскаго молитвенника, и Антония славнаго, от ветхаго Рима на камени по волнам морским преплывшаго, Савву же, и Ефрема, и Михаила кто достойно прославит от земных?

 

Вси святии, в земли Российстей просиявшии, молите Бога о нас.

 

Едемскаго рая, приидите, видим цветы присножизненныя и богопрозябенныя, подвиги отец, в пределех Новгородских просиявших, ихже есть един Делатель Господь.

 

Вси святии, в земли Российстей просиявшии, молите Бога о нас.

 

Всеволод кроткий и Довмонт, Пскову стена необоримая, и Никола блаженный и Корнилий преподобный, святым Крещением чудь Ливонскую просветивый, песньми да воспоются.

 

Вси святии, в земли Российстей просиявшии, молите Бога о нас.

 

Веру Православную пред латины проповедавшии, к вечным востекоша обителем Исидор пресвитер и с ним собор мученический во Юрьеве, граде Ливонстем, Царю царей ныне предстояще, молятся о нас, почитающих память их.

Слава: Авраамия Богоноснаго, Смоленска украшение, и Евфросинию, радование Полотское и девам сияние, Христе мой, Тебе приводим молитвенники, ихже ради спаси нас.

И ныне: Заступница теплая иногда великому Новуграду была еси и ненадеющихся надежда и людей бедствующих Помощница, и ныне оком милосердным призри на нас и, скорби наша видевши и воздыхание услышавши, знамение милости яви нам, Пречистая.

 

 

Песнь 6

 

Ирмос: Воднаго зверя во утробе длани Иона крестовидно распростер, спасительную страсть проображаше яве; тем, тридневен изшед, премирное Воскресение прописаше плотию пригвожденнаго Христа Бога и тридневным Воскресением мир просвещшаго.

 

Вси святии, в земли Российстей просиявшии, молите Бога о нас.

 

Евангельски Христа возлюбивше, преподобнии Зосимо, Савватие, Германе, Иринарше, Елеазаре и прочии Соловецтии чудотворцы, мира отвратистеся, в непроходимыя и пустыя островы Соловецкия зашедше, всякия добродетели образу навыкосте, мудрей пчеле подобящеся, и селение, достойное прияти Духа Святаго, бысте, премудрии.

 

Вси святии, в земли Российстей просиявшии, молите Бога о нас.

 

Великаго в чудесех преподобнаго Трифона воспоим, Лопарскаго просветителя, в последних концех северныя страны от горькаго рабства бесовскаго люди избавльшаго и святым крещением возродившаго.

 

Вси святии, в земли Российстей просиявшии, молите Бога о нас.

 

Радуйся, пустыне, прежде безплодная и необитаемая, послежде же, яко крин, процветшая и инок множество возрастившая! Взыграйте, горы Валаама и вся древа дубравная, хваляще с ними Сергия и Германа, вкупе же и Арсения со Александром Свирским, отцы всехвальныя.

 

Вси святии, в земли Российстей просиявшии, молите Бога о нас.

 

Жития сего непостоянную пучину немятежно прешел еси, преподобне Кирилле, кормчую Матерь Божию имея, и ты, Иосифе, Волоцкая похвало, и Ниле нестяжителю, на воде покойне и на злаце воздержания ученик ваших стада мудре упасли есте, и ныне с ними молитеся о чтущих память вашу.

 

Вси святии, в земли Российстей просиявшии, молите Бога о нас.

 

Яко звезды великия, просияша в монашеских соборех Антоний Сийский и Трифон Вятский, Димитрий на Прилуце и Амфилохий и Дионисий, похвала Глушицкая, Григорий Пельшемский, Павел, и Сергий, и Корнилий Вологодстии, яко лучами, сияюще добродетельми жития своего, преподобнии.

 

Вси святии, в земли Российстей просиявшии, молите Бога о нас.

 

Боговидно поживше, пустыни, яко грады, сотворили есте, Макарие, Варнаво и Тихоне, Авраамие и Геннадие. Темже вкупе с прочими отцы, в пределех Костромских и Ярославских просиявшими, ублажаем вас и молим: молите Господа, да не лишит и нас егоже ныне наслаждаетеся боговидения в вечнем граде Небеснаго Царя.

Слава: Ликуй, Фиваидо Русская, красуйтеся, пустыни и дебри Олонецкия, Белоезерския и Вологодския, возрастившия святое и славное отец множество, чудным житием всех наставляющее миру не прилеплятися, крест свой на рамена взяти и во след Христу шествовати.

И ныне: Твоею всечестною иконою Тихвинскою, юже великая Россия яко некий дар Божественный свыше благоговейно прият, присно страну нашу, о Госпоже Царице Богородице, покрывай и заступай, спасающи сию от всех навет вражиих.

 

Господи, помилуй (трижды). Слава, и ныне.

 

 

Кондак, глас 3-й

 

Днесь лик святых, в земли нашей Богу угодивших, предстоит в Церкви и невидимо за ны молится Богу. Ангели с ним славословят, и вси святии Церкве Христовы ему спразднуют, о нас бо молят вси купно Превечнаго Бога.

 

 

Икос

 

Едемскаго рая древеса доброплодная и красная явишася святии, цветы благовонныя учений и плоды дел творящии, от нихже души наша питаются и глад наш духовный утоляется, приидите убо, притецем под сень их и ублажим их, яко страны нашея отраду и украшение и яко жития образ нам и начертание, тии бо венцы прияша нетленныя от Превечнаго Бога.

 

 

Песнь 7

 

Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.

 

Вси святии, в земли Российстей просиявшии, молите Бога о нас.

 

Леонтий, Исаия и Игнатий, Иаков и Феодор, честнии Духа сосуди и Ростову украшение, Авраамий, идолом покланявшияся ко Христу приведый, и Петр царевич, и Иринарх, самопроизвольный страдалец, Кассиан и Паисий, князь Роман и царевич Димитрий, и вси Ростовстии и Угличстии чудотворцы Божественными да воспоются песньми.

 

Вси святии, в земли Российстей просиявшии, молите Бога о нас.

 

Да величается Невский победитель, благоверный князь Александр, да поется Георгий, воин храбрый и страдалец, да похвалится Андрей, первый Русския земли собиратель, вкупе со Глебом, юным сыном своим, да воспоется же и Авраамий мученик, града Владимира слава, Святыя Руси заступницы и Церкве Православныя украшение.

 

Вси святии, в земли Российстей просиявшии, молите Бога о нас.

 

Феодору и Иоанну слава, Суждальским светильником, Симону и Дионисию! С ними да поются и Евфимий, в подвизех превысокий, и Евфросиния преподобная, пресветлая Суждальская звезда, вкупе же и Косма, на Яхроме реце подвизавыйся.

 

Вси святии, в земли Российстей просиявшии, молите Бога о нас.

 

Песнь столпнику Никите, покаяния образ явившему, хвала и Даниилу, нищих и безродных согревателю, слава и Андрею, княжение оставившему и в нищетнем образе житие скончавшему, Переяславским чудотворцем.

 

Вси святии, в земли Российстей просиявшии, молите Бога о нас.

 

Константине княже, апостоле и просветителю Муромския земли, с Михаилом и Феодором, чады твоими, и Петре и Февроние, и праведная Иулиание милостивая, Мурома заступницы, вкупе же и Василие святителю и княже Романе, Рязани славо, о нас Христе молите.

 

Вси святии, в земли Российстей просиявшии, молите Бога о нас.

 

Тверская похвало, Арсение святителю, Михаиле, княже и мучениче, и Анно, града Кашина сокровище, Ниле и Макарие преподобнии, Ефреме, града Торжка просветителю, со Аркадием и Иулианиею, цветом целомудрия, о нас Христа молите.

Слава: Оружием ваших молитв, благовернии князие Феодоре и Давиде с Константином и Василие и Константине, Ярославля славо, охраняйте и ныне отечество ваше и людей православных от всяких бед и напастей.

И ныне: Яко благодатное сокровище даровала еси Святей Руси икону Твою Владимирскую, еюже отцем нашим многочастне и многообразне благодеяла еси. Не оскудей и ныне, о Мати Божия, утоляющи лютое на нас востание, и землю Русскую спаси.

 

 

Песнь 8

 

Ирмос: Победители мучителя и пламене благодатию Твоею бывше, заповедем Твоим зело прилежаще, отроцы вопияху: благословите, вся дела Господня, Господа.

 

Вси святии, в земли Российстей просиявшии, молите Бога о нас.

 

Красуйся, граде Казань, имея молитвенники своя, преподобных святителей Гурия, Варсонофия и Германа, отгнавших от тебе тьму неверия, и Иоанна мученика, и Стефана, и Петра, отеческое нечестие оставивших и мученически в Небесное Отечество прешедших.

 

Вси святии, в земли Российстей просиявшии, молите Бога о нас.

 

Священнаго Писания от юности научився, богоносе Стефане, ралом словес твоих оляденевшая зырянских людей сердца возделал еси и Божественное семя в них всеял еси. Ныне же вкупе со святыми продолжатели дела твоего Герасимом, Питиримом и Ионою паству вашу и всю Русскую землю молитвами вашими ограждайте.

 

Вси святии, в земли Российстей просиявшии, молите Бога о нас.

 

Веселися, Сибирская страно, в тебе бо Господь яви угодники Своя: праведнаго Симеона Верхотурскаго, и Иркутския святители Иннокентия и Софрония, и Иоанна Тобольскаго, новыя дивныя светильники и чудотворцы.

 

Вси святии, в земли Российстей просиявшии, молите Бога о нас.

 

Радуйся, Иверие и вся земле Грузинская, торжествуй, Армение, воспевающи равноапостольную Нину и Тамару, Григория Просветителя и иных многих, в странах Кавказских веру Православную исповедавших и ныне о земнем отечестве Христу молящихся.

 

Вси святии, в земли Российстей просиявшии, молите Бога о нас.

 

Иерарше Богомудре Димитрие, жития святыx списателю и подражателю оным ревностный, славы оных молитвами твоими соделай нас общники.

 

Вси святии, в земли Российстей просиявшии, молите Бога о нас.

 

Святителю отче Митрофане, первый Воронежу пастырю, мужество велие явивый, прещения царева и смерти не убоявыйся и в простоте душу свою спасый, моли Бога о нас.

Слава: Яко пчела, мед сладкий от цветов скороувядающих собрал еси, отче Тихоне, от тленнаго мира духовное сокровище, имже всех нас услаждаеши.

И ныне: Заступницу усердную восхвалим и честному Ея поклонимся образу, имже в новопросвещенней стране правоверие утверди и в годину лютую матерь русских градов спасе. Сей и града святаго Петра великое сокровище, и всея земли нашея преславное богатство.

 

 

Песнь 9

 

Ирмос: О, девства край, Богородице! песньми же славными праздники возвышающая благодатей Твоих и ныне девственною Слова Твоего памятию наитием тайным украшающая в ней Тя величающия.

 

Вси святии, в земли Российстей просиявшии, молите Бога о нас.

 

О благий просветителю и тихий ангеле Церкве Тамбовския, святителю Питириме, веселися о пастве твоей и всея Руси, в ней бо новая и вечная радость процвете, преподобный Серафим, дивный трудник спасения нашего.

 

Вси святии, в земли Российстей просиявшии, молите Бога о нас.

 

О святителие Богомудрии Феодосие и Иоасафе, дивным нетлением от Господа прославленнии! Вами возвеличени есмы и мы, чада суще Церкве Православныя, в нейже и доныне Господь чудная являет и рабов Своих прославляет.

 

Вси святии, в земли Российстей просиявшии, молите Бога о нас.

 

О новый чудотворче, Иосифе, святителю и мучениче! Град Астрахань и вся Поволжская страна тобою хвалится и почитает тя, за правду от неверных мятежников люте пострадавша.

 

Вси святии, в земли Российстей просиявшии, молите Бога о нас.

 

О, паче слова и превыше похвал святых страстотерпцев подвига! Злобу убо лютых отступников и наглое иудейское неистовство претерпеша, веру Христову противу учений мира сего, яко щит, держаще и нам образ терпения и злостраданий достойно являюще.

 

Вси святии, в земли Российстей просиявшии, молите Бога о нас.

 

О, твердости и мужества полка мученик Христовых, от ханов лютых за Христа убиенных! Тии бо Церковь Православную украсиша и в стране своей крови своя, яко семя веры, даша, и купно со всеми святыми достойно да почтуся.

 

Вси святии, в земли Российстей просиявшии, молите Бога о нас.

 

О велицыи сродницы наши, именованнии и безыменнии, явленнии и неявленнии, Небеснаго Сиона достигшии и славу многу от Бога приимшии, утешение нам, в скорби сущим, испросите, веру нашу падшую возставите и люди расточенныя соберите, от нас, яко дар, песнь благодарения приемлюще.

Слава: О Троице Честная, приими, яже Россия приносит Ти, яко начатки и яко фимиам избранный, вся угодившия и прежде, и послежде в ней, знаемыя и незнаемыя, и молитвами их от всякаго вреда сию сохраняй.

И ныне: О Дево Благодатная, грады и веси наша честнаго лика Твоего изображении, яко благоволения знамении, обогатившая, благодарение наше приими и от бед лютых отечество наше избави, вси бо Тя, яко Покров всемощный страны нашея, величаем.