Агапит Печерский преподобный, врач безмездный
(1 / 14 июня; 28 сентября / 11 октября)
Преподобный Агапит Печерский, врач («лечец») безмездный, родом из Киева, постриженик и ученик преподобного Антония Печерского, жил в XI веке. Если кто из монастырской братии заболевал, преподобный Агапит приходил к нему и самоотверженно ухаживал за больным, кормил вареной травой, которую готовил сам, и больной выздоравливал по молитве преподобного. К монастырскому врачу, обладавшему даром исцеления, обращались за помощью и многие миряне. В то же время в Киеве был опытный врач — армянин, который по одному виду больного мог определить степень болезни и даже точно определить день его кончины. Когда один из таких обреченных обратился к святому Агапиту, благодатный целитель с молитвой дал ему отведать пищи с монастырской трапезы, и больной выздоровел.
Разжигаемый завистью врач хотел отравить Агапита, но Господь сохранил преподобного, и яд не подействовал.
Святой Агапит исцелил Черниговского князя Владимира Мономаха, будущего великого князя Киевского (1114—1125), прислав ему вареное былие. Благодарный князь сам пришел в монастырь и хотел видеть своего целителя, но смиренный подвижник скрылся и не принял даров.
Когда сам святой целитель заболел, к нему пришел тот самый врач-армянин и, осмотрев, сказал, что кончина последует через три дня. При этом он дал обет стать православным монахом, если его предсказание не исполнится. Преподобный ответил, что Господь открыл ему, что призовет его только через три месяца. Святой Агапит почил через 3 месяца (1 июня, не позднее 1095), а армянин пришел к игумену Печерского монастыря, покаялся и принял постриг. «Верно, что Агапит — угодник Божий, — сказал он. — Я хорошо знал, что нельзя ему было при болезни его пережить трех дней, а Господь дал ему три месяца». Игумен, выслушав армянина, постриг его в иноческий образ и долго наставлял врача телес, чтобы он, последуя блаженному Агапиту, был искусен во врачевании своей души. Армянин богоугодно подвизался в Печерском монастыре и здесь же принял блаженную кончину.
Слышит наши прошения преподобный целитель и сегодня. Вот один из многочисленных случаев его помощи.
В одной семье не было детей. После долгого лечения врачи заявили, что не могут помочь молодой женщине. И тогда она обратилась к своей верующей знакомой. 14 июня, в день памяти преподобного Агапита, они вместе пришли в Крестовоздвиженский храм Киево-Печерской Лавры, где для поклонения были выставлены мощи святого. Молодая женщина припала к его руке и долго молилась о ниспослании младенца. Предстательством своего преподобного Господь услышал эти молитвы – в молодой семье родилась девочка. Но, когда ей исполнилось три месяца, она отравилась некачественным питанием. Врачи оказались бессильны. И тогда вновь вспомнили о святом Агапите. Уже бездыханного младенца положили на раку с мощами и молились. Через некоторое время родители услышали агукание совершенно выздоровевшего ребенка.
АКАФИСТ
Кондак 1
Избранный учениче великаго учителя преподобнаго и богоноснаго отца нашего Антония, и дивный подражателю жития его святаго, святче отче Агапите, песньми восхвалим тя с любовию, заступника нашего; ты же, яко имеяй дерзновение ко Господу, молися выну о спасении нас, грешных, от всяких бед избавляя зовущих ти: Радуйся, Агапите, душевных и телесных недугов скорый целителю.
Икос 1
Ангелов любезную чистоту от юности твоея возлюбив, блаженне Агапите, к добродетелей подвижнику, преподобному Антонию, притекл еси и, от него во иночество облеченный, подражатель ревностный подвигов его был еси; темже славим тя воззвании сими:
Радуйся, богоноснаго Антония добродетелей и даров наследниче.
Радуйся, на высоту совершенства духовнаго возшедый.
Радуйся, молитвенниче усердный.
Радуйся, дар врачевания и чудотворения от Господа получивый.
Радуйся, из глубины души часто ко Господу воздыхавый.
Радуйся, воздыханьми чистоту душевную стяжавый.
Радуйся, Агапите, душевных и телесных недугов скорый целителю.
Кондак 2
Видев всевидец Господь благое души твоея изволение, блаженне Агапите, еже поработати Ему безленостно, внуши преподобному Антонию благословити тя на жестокое и острое в пещернем затворе житие. Ты же благословение святое с верою прием, в пещере покой вечный обрел еси, единому Богу работая, в пениих, бдениих и пощениих немолчно воспевая Ему: Аллилуия.
Икос 2
Разумев преподобный Антоний Божие о тебе смотрение и твое душеспасительное намерение, изобильно насыти тя духовною сладостию и в добродетелях укрепити, сего ради вопием тебе таковая:
Радуйся, преподобнаго Антония нравы подражавый.
Радуйся, того житию усердно поревновавый.
Радуйся, сыновью любовь к нему стяжавый.
Радуйся, и от него зело возлюбленный.
Радуйся, самовидче его подвигов.
Радуйся, во врачевании недугов ему споспешествовавый.
Радуйся, Агапите, душевных и телесных недугов скорый целителю.
Кондак 3
Силою Божиею укрепляем, святе Агапите, великия иноческия труды подъял еси во славу имене Его святаго, спасая и врачуя всех, с верою и надеждою к тебе притекающих и неленостно возносящих песнь Пресвятей Троице: Аллилуия.
Икос 3
Имея помысел чист и непорочну совесть и памятуя рекшаго: «Болен бех и посетисте Мене; понеже сотвористе единому от сих братий Моих меньших – Мне сотвористе», – недугующих иноков посещал еси и, якоже родители чада своя, утешал еси, отраду своим попечением подая, молитвою же со одра болезни воздвизая. Сего ради приими от нас богохваления таковая:
Радуйся, в добродетелех благоискусный подвижниче.
Радуйся, во Христе всю братию монашескую возлюбивый.
Радуйся, недужных иноков утешителю.
Радуйся, смиренный их служителю.
Радуйся, во временней жизни трудниче неусыпный.
Радуйся, покой вечный обретший.
Радуйся, Агапите, душевных и телесных недугов скорый целителю.
Кондак 4
Бурю многомятежнаго житейскаго моря безбедно прешел еси, блаженне, и в пристань безстрастия достигл еси, окормляем заповедями Христа Бога, яже быша светильник ногама твоима и свет стезям твоим. Темже ныне в горних обителех водворяешися, сладце поя Триединому Богу: Аллилуия.
Икос 4
Слышавше мысли о благоугоднем житии твоем, блаженне Aгапите, прихождаху к тебе: ови послушати поучений твоих, ови исцеление от различных недугов прияти, ихже ты, любовию приемля, руководствовал еси ко спасению, отгоняя всяк недуг и всяку немощь. Сего ради мы прибегаем к тебе, великому помощнику и целителю, славяще тя сице:
Радуйся, безмолвия любителю, обитель подвиги своими украсивый.
Радуйся, воине Христов, полки невидимых врагов победивый.
Радуйся, болезнующих грехами врачу благоискусный.
Радуйся, спасения многих душ человеческих виновниче.
Радуйся, ближняя твоя искренне возлюбивый.
Радуйся, спасению их душевному и исцелению телесному усердно послуживы.
Радуйся, Агапите, душевных и телесных недугов скорый целителю.
Кондак 5
Боготечное светило быв, угодник Божий, всех к Солнцу правды, Христу, путеводил еси образом жития твоего святаго, иже все бысть служение Богу и ближним твоим. Нищия и убогия милостиво питал еси, темже блаженство милостивых унаследовал еси и со святыми поеши вечно хвалебную песнь: Аллилуия.
Икос 5
Видим тя, блаженне отче Агапите, достигша в меру мужа совершенна о Христе и преисполненна дарований Божественных в Евангелии Христове обетованных верным учеником Бога Слова. Темже, чудящеся твоим подвигом, поем ти хвалебно:
Радуйся, во глубине сердца бисер драгий, Господа Иисуса Христа, обретый.
Радуйся, имя Его Божественное во устех и в сердце своем выну имевый.
Радуйся, на земле алкавый и жаждавый.
Радуйся, нетленныя ныне пищи на небеси насыщаяйся.
Радуйся, нищету хранивый и нищия препитавый.
Радуйся, иго Христово благое и легкое с любовию носивый.
Радуйся, Агапите, душевных и телесных недугов скорый целителю.
Кондак 6
Проповедник Евангелия быв житием твоим, отче блаженне, плоть твою постом и молитвою поработил еси духу, и во славу Божию пожил еси; даром благодати, данным ти, армянина злочестиваго, завистию и гневом палимаго, не токмо посрамил еси, но и к свету истины Христовой привел еси, поучая за все благодарити и славословити Господа, поя Ему: Аллилуия.
Икос 6
Возсияв в пещере святыя обители Киево-Печерския, яко богоносное светило, блаженный Агапите, светом добродетелей твоих и врачеваний, умилил еси души и сердца человеков, зловернаго же врача и завистника безумие обличил еси. Тем убо, яко святому и блаженному угоднику Божию, умильно зовем ти:
Радуйся, искусство нечестиваго армянина посрамивый.
Радуйся, недугующаго, близ смерти бывшаго, от одра болезни воздвигнувый.
Радуйся, осужденнаго на смерть и напоеннаго смертным ядом, чудесно исцеливый.
Радуйся, от смерти того избавивый.
Радуйся, яко и сам ядом смертным, в питии твоем тайно растворенным, невридим по словеси Господню пребывый.
Радуйся, злобу и коварство врагов своих уничиживый.
Радуйся, Агапите, душевных и телесных недугов скорый целителю.
Кондак 7
Хотение единое имел еси, блаженне отче, еже Богу угождати и спасению душевному и здравию телесному ближних твоих благочестно служити, темже келлия твоя пещерная врачебница бысть всякому человеку, нищему и богатому, князю и убогому, ты бо, всем вся быти желавый, врачевал еси, не взирая на лица, всех наставляя вкупе сердцем и усты немолчно возглашати Богу: Аллилуия.
Икос 7
Новаго чудотворца великаго познав тя, славный князь Владимир Мономах, на одре болезни возлежа и при кончине сый, слезно молил еси, блаженне, приити и исцелити его, но ты, монашеский обет соблюдая, во еже николиже стен обители оставляти, посла еси ему зелие от трапезы своея, от негоже вкусив, князь воста здрав. Таковой силе твоего чудотворения и нелицеприятию твоему дивящеся, вопием ти хвалебно:
Радуйся, крине пещернаго прозябения.
Радуйся, мира Христова благоухание.
Радуйся, не скрывый талант врачевания, тебе Домовладыкою врученный.
Радуйся, ради сильных мира сего обета иноческаго не нарушивый.
Радуйся, славы ради высшего звания славу человеческую ни во чтоже вменивый.
Радуйся, великаго князя Владимира Мономаха с одра смертнаго былием, тобою благословенным, и молитвою подъял еси.
Радуйся, Агапите, душевных и телесных недугов скорый целителю.
Кондак 8
Странника и пришельца в мире сем помышлял еси себе быти, Агапите блаженне, темже о богатстве земнем отнюд нерадил еси. Всякое попечение о стяжании суетном имети возбраняя, приходящих к тебе разделяти достояние свое с нищей братией и в их лице Самому Христу служити поучал еси, немолчно воспевая хвалебную песнь: Аллилуия.
Икос 8
Весь в Бозе быв, отче блаженне, угождати Ему присно всех поучал еси, умоляя ничтоже предпочитати паче любве Христовы. Памятуя же реченное Христом: «Не собирайте себе сокровища, идеже моль и ржа истребляют, но собирайте себе сокровища на небеси», – не пожелал еси ради благ временных лишитися благ вечных, отвергая дары, тебе князем приносимыя и советуя раздати я нищей братии и убогим. Таковое твое нестяжание восхваляя, зовем ти сице:
Радуйся, нищету паче богатства возлюбивый.
Радуйся, мзду за свое врачевание отвергавый и раздати ю нищим и убогим повелевавый.
Радуйся, и последния укрухи хлеба твоего с неимущими деливый.
Радуйся, блаженство нищих унаследовавый.
Радуйся, любовь к Богу любовию к ближним своим свидетельствовавый.
Радуйся, похвалами молитвенными до днесь в обители Киево-Печерской зело почитаемый.
Радуйся, Агапите, душевных и телесных недугов скорый целителю.
Кондак 9
Всем приходившим в обитель молитв и врачевания ради, блаженне отче, дивно бысть видети тебе, нищетно в келлии твоей пребывающаго, ты же всех равною любовию принимал еси и коемуждо слово душеспасительное или исцеление подавал еси, научая всех пети виновнику всех благих Богу: Аллилуия.
Икос 9
Витии многовещаннии не возмогут достойно воспети подвиги твоя, блаженне Агапите, мы же дивящеся сим, дерзаем венчати тебе, аще и недостойнии, похвалами таковыми:
Радуйся, на скрижалех сердца твоею закон Христов написавый. Радуйся, от глубины сердечныя, добрая и душевноспасительная наставления человеком износивый.
Радуйся, пещерный гражданине.
Радуйся, грады и веси наполнивый славою твоих чудотворений.
Радуйся, Богом возлюбленный и ближними твоими благословляемый.
Радуйся, образ совершенства о Христе в себе явивый.
Радуйся, Aгапите, душевных и телесных недугов скорый целителю.
Кондак 10
Спасения надежу стяжал еси при исходе твоем, блаженне отче Агапите, и, яко пшеница зрелая во время жатвы, кончиною благою преселился еси в день, тебе Господом предуказанный, во обители горния, прияти мзду от руки праведнаго Мздовоздаятеля Христа, Иже вчини душу твою со духи святых, немолчно возглашающих пред престолом славы Его победную песнь: Аллилуия.
Икос 10
Царя небеснаго Христа благий раб и верный был еси, отче Агапите, темже по неложному Его глаголу: «Идеже есмь Аз, ту и слуга Мой будет», – мы чтуще тя, не сумнимся сердцем, яко ты со Христом во обителех блаженства вечнаго водворяешися и радости нетленныя наслаждаешися, яко истинный Того угодник; от нас же слышиши благохваления сия:
Радуйся, предсказания нечестиваго армянина о твоей смерти посрамивый.
Радуйся, о дне твоей блаженныя твоея кончины от Господа возвещенный.
Радуйся, душу твою в руце Господа радостно предавый.
Радуйся, откровенным лицем славу Трисиянного Божества узревый.
Радуйся, телом смертным в пещере погребенный.
Радуйся, душею безсмертною к Сиону горнему воспаривый.
Радуйся, Агапите, душевных и телесных недугов скорый целителю.
Кондак 11
Пение Богу и Пресвятей Богородице приносиши, блаженне отче наш Агапите, и об обители нашей святей и подвивающихся в ней, и о всех, с любовию к тебе притекающих, присно ходатайствуеши, прося мира свыше и благопоспешения всем, возносящим достодолжная похвалы Триединому Богу, воспевая Ему: Аллилуия.
Икос 11
Светильника тя добрых дел, блаженне отче, исповедуем быти и прославляем прославльшаго тя Господа, Иже чудесы многими мощи твоя знаменова: струй бо исцелений благодатных источаются от них недужным и подвизают верныя вопити тебе:
Радуйся, земный Ангеле и небесный человечe.
Радуйся, безмезднаго врачевания источниче.
Радуйся, мира многоцелебнаго преисполненный фиале.
Радуйся, от раки твоея святыя исцеления обильно пoдаваяй.
Радуйся, скорбящих утешителю.
Радуйся, унывающих ободрителю.
Радуйся, Агапите, душевных и телесных недугов скорый целителю.
Кондак 12
Благодать Господню испроси нам, отче Агапите, почитающим с любовию святую память твою и усердно притекающим к честней раце мощей твоих, от неяже чудесныя исцеления подаеши недужным. Темже тебе, чудотворения даром от Бога прославленному, прилежно молимся: исцели наша недуги душевныя и телесныя и помози нам предстательством твоим спасение вечное получити, да вкупе тобою воспоем дивному во святых Своих Богу: Аллилуия.
Икос 12
Поюще подвиги твоя, блаженне отче, ублажаем равноангельское житие твое, дивимся чудотворением твоим, молитвенно почитаем святую память твою, и припадающе к раце мощей твоих, умильно взываем:
Радуйся, Пресвятыя Богородицы достойный служителю.
Радуйся, пещерожителей славо и похвало.
Радуйся, святыя обители твоея, вкупе с Антонием и Феодосием, присное охранение.
Радуйся, подвизающихся в ней благонадежное заступление. Радуйся, приходящих в ню на поклонение благий предстателю. Радуйся, почитающих память твою небесный покровителю.
Радуйся, Агапите, душевных и телесных недугов скорый целителю.
Кондак 13
О преблаженне отче Агапите! Ты горе на небеси, мы же долу на земли, удаленнии от тебе не толико местом, колико греховною нечистотою нашею, обаче дерзаем приносити тебе сие малое похвальное пение, еже милостивно прием, моли Господа и Владыку нашего избавити нас погибели вечныя и сподобити блаженства святых, вопиющих Ему хвалебную песнь: Аллилуия.
(Этот кондак читается трижды, затем икос 1 и кондак 1)
МОЛИТВА ПЕРВАЯ
О всеблаженне Агапите, земный Ангеле и небесный человече! Припадаем к тебе с верою и любовию и молим ти ся прилежно: яви нам смиренным и грешным святое свое заступление; се бо грех ради наших не имамы свободны чад Божиих просити о потребах наших Господа и Владыку нашего, но тебе, молитвенника благоприятнаго, к Нему предлагаем и просим тя со усердием многим: испроси нам от благости Его благопотребная дары душам и телесем нашим, веру праву, любовь ко всем нелицемерну, в злостраданиих терпение, тяжкими болезнями одержимым — от недугов исцеление, под бременем скорбей и напастей неудобоносимых падающих и жития своего отчаявшихся твоими молитвами получити скорое облегчение и избавление. Не забуди, блаженне отче, и обитель сию святую, присно тя чтущую, но соблюди ю и всех живущих и подвизающихся в ней и на поклонение в ню приходящих невредимыми от искушений диавольских и всякаго зла. Егда же приспеет наше от временнаго сего жития отшествие, и к вечности преселение, не лиши нас помощи твоея небесныя, но молитвами твоими всех нас приведи в пристанище спасения и наследники яви нас быти всесветлаго Царствия Христова, да поем и славим неизреченныя щедроты Человеколюбца Бога Отца и Сына и Святаго Духа и твое вкупе с преподобными Антонием и Феодосием отеческое зaступление во веки веков. Аминь.
МОЛИТВА ВТОРАЯ
Преподобне отче Агапите! Воззри на нас милостивно и к земли приверженных возведи к высоте небесней. Ты горе на небеси, мы на земли низу, удалены от тебе, не толико местом, елико грехми своими и беззаконии, но к тебе прибегаем и взываем: настави нас ходити путем твоим, вразуми и руководствуй. Вся твоя святая жизнь бысть зерцалом всякия добродетели. Не престани, угодниче Божий, о нас вопия ко Господу. Испроси предстательством своим у Всемилостиваго Бога нашего мир Церкви Его, под знамением креста воинствующей, согласие в вере и единомудрие, суемудрия же и расколов истребление, утверждение во благих делех, больным исцеление, печальным утешение, обиженным заступление, бедствующим помощь. Не посрами нас, к тебе с верою притекающих. Вси православнии христиане, твоими чудесы исполненнии и милостями облагодетельствованнии, исповедуют тя быти своего покровителя и заступника. Яви древния милости твоя, и ихже отцем всепомоществовал еси, не отрини и нас, чад их, стопами их к тебе шествующих. Предстояще всечестней иконе твоей, яко тебе живу сущу, припадаем и молимся: приими моления наша и вознеси их на жертвенник благоутробия Божия, да приимем тобою благодать и благовременную в нуждех наших помощь. Укрепи наше малодушие и утверди нас в вере, да несомненно уповаем получити вся благая от благосердия Владыки молитвами твоими. О, превеликий угодниче Божий! Всем нам, с верою притекающим к тебе, помози предстательством твоим ко Господу, и всех нас управи в мире и покаянии скончати живот наш и преселитися со упованием в блаженныя недра Авраамова, идеже ты радостно во трудех и подвизех ныне почиваеши, прославляя со всеми святыми Бога, в Троице славимаго, Отца и Сына и Святаго Духа, ныне и присно и во веки веков. Аминь.
МОЛИТВА ТРЕТЬЯ
О, священная главо, преподобне отче, преблаженне авво Агапите, не забуди убогих твоих до конца, но поминай нас всегда во святых твоих и благоприятных молитвах к Богу. Помяни стадо твое, еже сам упасл еси, и не забуди посещати чад твоих. Моли за ны, отче священный, за дети твоя духовныя, яко имеяй дерзновение к Небесному Царю, не премолчи за ны ко Господу, и не презри нас, верою и любовию чтущих тя. Поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва, аще бо телом и преставился еси от нас, но и по смерти жив сый пребываеши. Не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с небесными силами, у Престола Вседержителева предстоящи, достойно веселится. Ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли на небо, от мытарств же горьких, бесов воздушных князей и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу, Емуже подобает всякая слава, честь и поклонение, со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.
ТРОПАРЬ
Тропарь, глас 5
Богоноснаго Антония ревнуя смиренномудрию, аки некиим врачеством зелием снедным исцелял еси болящия, преподобне Агапите, тем и врача неверна уверив, наставил еси на путь спасения. Уврачуй и наша болезни и молися Господеви о воспевающих тя.
Кондак, глас 6
Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси от Бога продолжение живота и, сим чудом того уверив, ривел еси Христови, Емуже в веселии предстоя, молися о нас, преподобне.
Величание
Ублажаем тя, преподобне отче Агапите, и чтим святую память твою, наставниче монахов и собеседниче ангелов.
КАНОН
(Преподобному Агапиту Печерскому)
Канон, глас 6
Песнь 1
Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.
Яко немаго древле прикосновением устроил еси право глаголати, сице и мне, Христе, мой язык разреши, ум отверзи, да принесу в память угодника Твоего хваление, любовию поя.
Не могу воспети ясно благодати твоея, преподобне, аще не ты молитвами твоими подаси мне помощь, да прославлю Владыку, давшаго тебе благодать исцелений, во хвалении поя.
По предуведению воззван был еси, святе, вслед Владыки своего шествовати и, Тому последуя, вся красная мира оставль, любовию пришел еси к великому Антонию и с ним пожил еси, непрестанное хваление Богу поя.
Земному Ангелу и Небесному человеку последуя, и сам ангельское житие стяжал еси, отче преподобне. Тем твоя исправления почитаем и прославляем всех Владыку, о тебе песнь Ему поюще.
Богородичен: От земных и Небесных сил славимая, Приснодево, в днешний день хваление Тебе дерзающих приносити, от всех прилогов сохраняй, да выну Тя воспоем, Обрадованная.
Песнь 3
Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Во многих летех множайшия прошел еси труды, Агапите, подвизался во бдении и пощении, дондеже единонравен показался еси наставнику своему и от него утвердился еси на камени твердаго жития.
Ничтоже ино, токмо нищету имея, обнищавшему нас ради Христу последовал еси, отче, и, Того заповеди храня, служил еси больным, посещая, и упокоевая, и здравие тем молитвою своею подавая.
С преподобным жительствуя, стяжал еси преподобство, достохвальне Агапите, и исцеления даров сподобился еси, яко молитвою и зелием снедным здравие подавал еси болящим, темже и врач нареклся еси безмездный.
Прославил еси Бога во удесех твоих, преподобне, темже и Бог тя прослави благодатию исцеления, имже и наша недуги уврачуй душевныя и телесныя, да утвердимся на камени исповедания Божия.
Богородичен: Израстившая животное древо, Того плодом нас, умерщвленных грехами, оживи и даруй нам, Мати Чистая, крепкое благости Твоея исповедание.
Седален, глас 4
Яко туне приемый от Бога дар исцеления, страждущим исцеление туне подаеши, с верою к тебе притекающим. Темже и мы, кланяющеся раце мощей твоих, отче преподобне, просим прияти от тебе недугом нашим исцеление.
Песнь 4
Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.
Буия мира сего Христос избра, да премудрыя посрамит, еже и на тебе сбыстся, отче всеблаженне: благодатию бо, а не хитростию премудраго посрамил еси врача. Тем тя славим, о Господе празднующе.
Прельстися, иже первее больных прельщаше, извещая им день и час смерти, емуже ты поносив, преподобне, болящаго исцелил еси молитвою и зелием снедным, рек: даждь славу Богу, имущему ключ живота и смерти.
Зависти стрелою злочестивый арменин уязвен, поношаше ти, святе, и, послав на смерть осужденнаго, повеле пред тобою умертвити былием смертоносным. Но ты сего молитвою и зелием исцелив, посрамил еси еретика, хотящаго тя посрамити.
Претыкающемуся данная ти благодать бысть падение, преблаженне, наипаче бо на тя вооружився, злочестивый арменин наусти дати тебе отраву, но ты, и смертно испив, невредимь был еси, яко Божия благодать сохрани тя к большему чудодействию.
Богородичен: Радуйся, сосуде, носивший миро, исцелившее род человеческий, ядом мя греховным умерщвленна оживи, да прочее время цел поживу, Тя, Дево, восхваляя.
Песнь 5
Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.
От Бога благодать исцеления приемь, исцелил еси князя, иже аще и врачуемь бе от арменина, но не получаше отрады, твоего же зелия вкусив, от недуга избавися.
Зрите, иночествующии, и добродетельному терпению Богоноснаго отца почудитеся, како со отречением мира воли своея отречеся и не изыде никогдаже вне врат монастырских, еже видяще, сему поревнуйте.
Едину любовь ко всем имея, а не на лице зря, аще князь, аще прост к тебе прихождаше, преподобне, всем приходящим подавал еси исцеление туне, единаго ища возмездия от Бога.
Приемь князь тобою исцеление, всеблаженне, уразуме, яко истинен раб Божий еси, и видети тя желаше, темже прииде к тебе с дары. Ты же, Единаго имея Бога, ничтоже от тех даров восхотел еси прияти.
Богородичен: Хвалим Тя, Пречистая Дево, яко отверзаеши нам двери милости Твоея и подаеши всем независтный источник исцеления, от яда греховнаго избавляющий.
Песнь 6
Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.
Вся тленная мира сего оставив, принесенное злато извергл еси, блаженне, пред враты келлии своея, извергая вкупе любоименнаго врага и стирая душегубную того главу.
Един бисер стяжав многоценный — Иисуса, вся во уметы вменил еси, святе, и тем купил еси себе селение в Небесных, еже и мы получити молимся твоими, отче, молитвами.
Многими леты постяся, изнемогл еси телом, преподобне, но духом пребыл еси крепок, аки столп, вся наносимая терпя и благодаря Бога, к Нему взывал еси: возведи от тли живот мой, Многомилостиве.
Телом болезнуя, духом брался еси с злочестивым арменином, иже по триех днех смерть тебе провозвещаше, сего ты, блаженне, одолел еси, по триех месяцех отшествие свое к Богу возвещая.
Богородичен: К Твоему пристанищу прибегаем, Богоневестная Дево, носими житейских страстей волнами, яже Ты укроти, да воспоем Тебе: радуйся, пристанище житейских плаваний.
Кондак, глас 6
Врач сый изряден, чудне, являя несумненную твою веру, обличая же армениново неверие и приводя его к благочестию, себе, близ смерти бывшу, испросил еси от Бога продолжение живота и, сим чудом того уверив, привел еси Христови, Емуже в веселии предстоя, молися о нас, преподобне.
Песнь 7
Ирмос: Росодательну убо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.
Дарование имый свыше недуги исцеляти, преподобне, боляща мя небрежением благих деяний уврачуй, якоже иногда принесеннаго в недузе уврачевал еси, молитвою подав тому здравие и воспев: благословен Бог отец наших.
Чудодействуя святыми, твари Создатель внезапу постави тя здрава пред злочестивым, иже видев, удивися скорому твоему от болезни в здравие пременению. Мучима мя язвами студных дел, во изменение исправления приведи твоим, отче, свыше посещением, да пою: благословен Бог отец наших.
Болезнь твоя и зелие снедно принуди исповести врача свое злочестие, егоже укорил еси, яко дерзну осязати святую твою руку; се дерзаю и аз к тебе, отче, приступити, но молю тя: не отрини мя в нуждах моих, да пою: благословен Бог отец наших.
Трудов своих собрав плоды с веселием, аки добр земледелец, блаженною кончиною отшел еси к Горним прияти от Христа Бога даяние и приял еси от Него некончаемую радость, многочудне Агапите.
Богородичен: Во Твое чрево, Пренепорочная Дево, всельшееся Слово род человеческий в Небесных дворех всели. Умоли Того от тления мя сея жизни преселити, идеже потоком сладости питаются святии.
Песнь 8
Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети. Тя превозносим во вся веки.
Врач был еси, отче предивен, телесныя болезни врачуя, в жизни сей живый телом, по кончине же твоей душевное врачевство подавая, якоже сие на арменине явил еси, души того дав цельбу и ко благочестию наказание.
Видев тя, святе, арменин в видении чудном, исповеда ясно, яко свят еси и преподобен, и в веру из неверия преложся, бысть инок твоим направлением, егоже и нас не лиши, поющих Господа во веки.
Многое имый дарование, чудодействовал еси, исцеляя болящих, ныне же, сподобивыйся больших дарований, приложи пластырь на раны души моея, да, получив ослабу, превозношу Господа во веки.
Из пламеновиднаго света святым струи благодати подаяй, Христе Боже, палящия мя страсти угаси щедрот Твоих росою, разгоняя тьму страстей. Се бо преподобный молит с нами Тебе, Господа, превозносимаго от всех во веки.
Богородичен: Просветившая мир пречистым рождеством Твоим, мрак злодеяния моего разжени, изливая мне на благотворение щедрот Твоих богатую милость, да превозношу Тя, Матерь Божию, во веки.
Песнь 9
Ирмос: Бога человеком невозможно видети, на Негоже не смеют чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.
Богодаронаннаго целебника людие имуще, никтоже да грядет к суетным врачем, иже имение и здравие вреждают, но требуяй с верою да грядет к раце Богоноснаго отца и туне приимет исцеление.
Мысленныя ураниша ны разбойницы ныне, неисцельныя убо имуще язвы, несумненно к многочудесней припадаем раце твоей, преподобне, и просим: подаждь цельбу требующим, да вси тя хвалим и величаем.
В Горняя душею возшед, во всесветящияся чертоги, оставил еси, преблаженне, раку мощей своих в пещере; имже покланяющеся, просим: подаждь недугом нашим исцеление, да тя песньми величаем.
Помощи от тебе в немощех просящих не презри, но посещением твоим даждь душевное вкупе и телесное исцеление, преблаженне Агапите, яко сый врач преизящный, да выну тя величаем.
Богородичен: Помощи от Тебе требующих не презри, Дево, но подавай с верою к Тебе притекающим: Ты бо еси источник цельбам неоскуден, да Тя с Небесными силами присно величаем.
Светилен
Тленная мира оставив и нетленная сподобився прияти, потщался еси хуждшая на лучшая пременити, обнищав любоимением страстным, но обогатився дарованием исцелений, и нам сия подай, днесь память твою почитающим, всеблаженне Агапите.
