АКАФИСТ
СВЯТОМУ БЛАГОВЕРНОМУ ЦАРЮ И ВЕЛИКОМУЧЕНИКУ
НИКОЛАЮ ВТОРОМУ
Кондак 1:
Избранный от рождения страстотерпче и Христовой любве воплощение, воспиваем ти похвальная, яко паче всего Отечество свое возлюбившему, ты же, яко имеяй дерзновение ко Господу, просвети омраченные умы и сердца наша, да зовем ти:
Радуйся, Николае, боговенчанный царю и великий страстотерпче!
Икос 1:
Ангелов Творец посла тя земли Российстей, яко ангела незлобия и вразумления к народу твоему, тя бо избра по образу Сына Своего Единороднаго в жертву искупления за грехи людския, мы же, дивящеся таковому о тебе промышлению Вседержителя, с умилением вопием:
Радуйся, Христу уподобление; радуйся, жертве всесожжения! Радуйся, российских царей украшение; радуйся, незлобия и всепрощения образ подавый! Радуйся, обидимых неложное упование; радуйся, веры нерушимое основание!
Радуйся, Николае, боговенчанный царю и великий страстотерпче!
Кондак 2
Видящи Всеблагая Богомати во уделе Своем страну нашу мерзостию растления оскверняему, избра тя от рождения, яко чистейшаго, Руси бо очищение, да вси надгробное рыдание тебе творим песнь: Аллилуиа!
Икос 2
Разум предвечный предуведе тя ко спасению и житию твоему прообразование Иова многострадального, рождение твое и память праведника сочетавая. Мы же, грехи и беззакония наша поминающие, с трепетом сердечным и сокрушением душевным вопием ти сице:
Радуйся, хулы и напасти от народа твоего претерпевый; радуйся, веру до конца сохранивый! Радуйся, образе кротости; радуйся, светильниче правды! Радуйся, блюстителю богопочтения; радуйся, правило смирения!
Радуйся, Николае, боговенчанный царю и великий страстотерпче!
Кондак 3
Сила Вышняго осени тя, боговенчанне Николае, лжемудрствующу западу вразумление противоратное соделавшаго, да мир Богу возопиет: Аллилуиа!
Икос 3
Имея тщание о вразумлении заблуждших поревновал еси, Благоверный царю, храмов созиданию, мощей святых угодников Божиих прославлению, просвещения христианскаго насаждению и обездоленных от насилия ограждению, да мир Христианский вопиет ти таковая:
Радуйся, святителя Николая на земли соимените; радуйся, преподобнаго Серафима на небеси сомолитвенниче! Радуйся, православия насадителю; радуйся, света Христова носителю! Радуйся, терпения христианскаго учителю; радуйся, православным христианом заступниче!
Радуйся, Николае, боговенчанный царю и великий страстотерпче!
Кондак 4
Бури безумия и злоречия не убоялся еси, страстотерпче Николае, егда согласие со враги на пагубу Отечества отвергл еси, злохуления, заточение и умерщвление претерпев, вопия Богу Вседержителю: Аллилуиа!
Икос 4
Слыша державы Российския нестроение и видя христиан разорение, молился еси, не престая, да спасет Всеблагая Русь православную, сего ради вопием ти:
Радуйся, молитвы кадило благовонное; радуйся, ломпадо веры неугасимая! Радуйся, буйствующих кротостию вразумление; радуйся, неутешных в скорбех утешение! Радуйся, небесных рачителю; радуйся, правды ревнителю!
Радуйся, Николае, боговенчанный царю и великий страстотерпче!
Кондак 5
Боготечная звезда россияном в разсеянии сущим явился еси, царю Николае, о имени твоем во едино их собирая и путь Христов к возрождению земли Российстей показуя, да поют ангели песнь о кающихся грешницех: Аллилуия!
Икос 5
Видя, яко кротость и смирение твое ничтоже успевают, все упование на Пречистую возложил еси и в руце Вседержителя всего себе предал еси, да и безумныя вразумит во еже пети тебе:
Радуйся, гордыни победителю; радуйся, венца небеснаго носителю! Радуйся, немощных стено необоримая; радуйся, гордых вразумителю! Радуйся, к людем своим любы преизобильная; радуйся, за Русскою землю жертва усердная!
Радуйся, Николае, боговенчанный царю и великий страстотерпче!
Кондак 6
Проповедуют концы вселенныя славу твою, во всю землю изыде слово твое, яко несть тоя жертвы, юже не принесл бых за благо Отечества своего, научая тем люди твоя благодарственно пети Богу: Аллилуиа!
Икос 6
Возсиял еси паче солнца земли Российстей, царю Николае, православному народу заступление даже до смерти явивый, да вси ко Христу обращаются и к тебе прибегают, сего ради воспеваем ти таковая:
Радуйся, свете от востока изшедый; радуйся, образе царем православным! Радуйся, правды сияние неистощимое; радуйся, кротости светило незаходимое! Радуйся, грешников отчее вразумление; радуйся, праведников усердное прославление!
Радуйся, Николае, боговенчанный царю и великий страстотерпче!
Кондак 7
Хотяй веру православную на земли утвердити подвигнул еси все царство твое на заступление обидимыя страны Сербския, да вси вопиют Богу: Аллилуиа!
Икос 7
Новаго тя Ноя, строителя спасения народу Российскому яви Господь, да вся труды твоя поминающе, непрестанно воспиваем ти сицевая:
Радуйся, Российскаго корабля водителю; радуйся, славян в бедах утешителю! Радуйся, Сербстей стране заступление; радуйся, россиан окормление! Радуйся, христианских добродетелей насадителю; радуйся, миролюбия возвестителю!
Радуйся, Николае, боговенчанный царю и великий страстотепче!
Кондак 8
Странное чудо видим на тебе, Николае, десницею Всевышняго многажды спасаемем, со чады же и сродники мученическим венцем венчаем, да Богу Промыслителю всяческих вопим: Аллилуиа!
Икос 8
Весь еси всем христианом заступник явился еси, богоизбранне Николае, сугубое заступление народом славянским показуеши, на похвалу подвизая пети тебе:
Радуйся, защите обидимых; радуйся, вразумление обидящих! Радуйся, скорбных прибежище; радуйся, гонимых заступниче! Радуйся, в житии твоем миротворче; радуйся, по убиении твоем христианом поборниче!
Радуйся, Николае, боговенчанный царю и великий страстотерпче!
Кондак 9
Всякими чудесы яви Господь благоволение Свое Российским людем, дондеже преогорчиша Господа зело, но тобою к покаянию призываемы, купно воспоем Богу: Аллилуиа!
Икос 9
Ветии многовещаннии, яко рыбы безгласныя, не возмогут возреши высоту твоего терпения, мы же глубину падения нашего созерцающее, в сокрушении духа взываем:
Радуйся, терпение необоримое; радуйся, верносте христиан непоколебимая! Радуйся, гордыни сокрушение; радуйся, безумных умудрение! Радуйся, образ верным в житии и мученичестей кончине давый; радуйся, за грехи земли своей пострадавый!
Радуйся, Николае, боговенчанный царю и великий страстотерпче!
Кондак 10
Спастися хотя всем человеком, иже на крови мучеников Своих Церковь основавый сердцеведец Христос, положи тя, страстотерпче Николае, во основание новыя храмины Державы Российския, да вси в ней сущия вопиют Богу: Аллилуиа!
Икос 10
Стена еси всем к тебе с верою прибегающим и необоримое ограждение миру православному еси, научая вся верныя славити тя сице:
Радуйся, на земли небесных явление; радуйся, оскудевающих добродетельми восполнение! Радуйся, заре в земли Российстей возсиявшая; радуйся, реко, вся пределы ея напитавшая! Радуйся, смиренномудрия учителю; радуйся, веры и любве насадителю!
Радуйся, Николае, боговенчанный царю и великий страстотерпче!
Кондак 11
Пение Пресвятей Троице даже до смерти приносящее, течение скончал еси и веру соблюл еси, юже вся православныя христианы подвизаеши пети: Аллилуиа!
икос 11
Светодателем послан быв земли нашей, яко агнец непорочный, полагаешися во искупление грех наших, да вси непристанно тя славим:
Радуйся, боголюбезная жертве; радуйся, любвеобилие неистощимое! Радуйся, верности Христовы похвале; радуйся, веяние духа незримое! Радуйся, зерцало премудрости; радуйся, ненадеющихся надежде!
Радуйся, Николае, боговенчанный царю и великий страстотерпче!
Кондак 12
Божественная благодать немощная врачующи предуведе тя, яко врачевство неистощимое владомым твоим, вопиющим Богу: Аллилуиа!
Икос 12
Поюще страдания твоя, страстотерпче Николае, покланяемся терпению твоему, яко силе всемощныя Троицы явльшейся на тебе, да вси согласно вопием:
Радуйся, возлюбленное чадо Христово; радуйся, непорочная чада твоя и верныя слуги ко Христу приведый! Радуйся, царице праведною и мученицею быти поспособствовавый; радуйся, народ твой истине наставивый! Радуйся, Отечества чести не посрамивый; радуйся, Царство Небесное стяжавый!
Радуйся, Николае, боговенчанный царю и великий страстотерпче!
кондак 13
О пречудный и преславный страстотерпче Николае, призри на царство твое земное и люди твоя, всякаго бо ответа о гресех наших недоумеем, и умоли Вседержителя, да не внидет в суд с нами, но сподобит ны непрестанно воспевати: Аллилуиа!
(Сей кондак глаголи трижды)
Тропарь, глас 5-й
Царства земнаго лишение, узы и страдания многообразныя от богоборцев кротко претерпел еси, свидетелствовав о Христе даже до смерти, страстотерпче великий, боговенчанный царю Николае, сего ради мученическим венцем на небесах венча тя с царицей и чады Христос Бог, Егоже моли помиловати страну Российскую и спасти души наша.
|
