Смоленская икона Божией Матери,
именуемая «Одигитрия»
(28 июля / 10 августа)
Смоленская икона Божией Матери, именуемая «Одигитрия» («Путеводительница»), по церковному преданию, написана св. ев. Лукой во время земной жизни Пресвятой Богородицы, по просьбе Антиохийского правителя Фео̀фила. Из Антиохии святыня была перенесена в Иерусалим, а затем в Константинополь. Греческий имп. Константин IX Мономах (1042 – 1054), выдавая в 1046 г. свою дочь Анну за кн. Всеволода Ярославовича, сына Ярослава Мудрого, благословил ее в путь этой иконой. После смерти князя Всеволода икона перешла к его сыну Владимиру Мономаху, который принес ее в начале XII в. в Смоленскую соборную церковь в честь Успения Пресвятой Богородицы. С того времени икона стала называться Смоленской. Празднование в честь этого чудотворного образа 28 июля установлено в 1525 г. в память возвращения Смоленска России. Св. икона Божией Матери «Одигитрия» - одна из главных святынь Русской Церкви. Верующие получали и получают от нее обильную благодатную помощь.
АКАФИСТ
Кондак 1
Избранней от всех родов, Небеси и земли Царице, Пресвятей Богородице Одигитрии, яко избавльтеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством, благодарственное пение приносим Ти, раби твои. Ты же, Всемилостивая наша Заступнице, от всяких нас бед и скорбных обстояний свобождай и к царствию горнему путеводствуй, да зовем Ти: Радуйся, Богородице Одигитрие, христиан упование!
Икос 1
Архангельский глас вопием Ти, Чистая: радуйся, Благодатная Одигитрие Марие, и радости духовныя исполни нас, да благоговейною душею и чистым сердцем принесем Ти, рождшей миру Спасителя Христа Бога нашего, глаголы сия:
Радуйся, Бога Отца благоволением осененная;
Радуйся, Бога Сына Мати неискусобрачная.
Радуйся, Бога Духа Святаго обитель священная;
Радуйся, Троическия тайны проявление.
Радуйся, Ангельских умов удивление;
Радуйся, человеческаго рода украшение.
Радуйся, горняя с дольними совокупившая;
Радуйся, врата райския земнородным отверзшая.
Радуйся, лествице небесная;
Радуйся, стамно Богоприимная.
Радуйся, Купино неопалимая;
Радуйся, трапезо Пресвятая.
Радуйся, Богородице Одигитрие, христиан упование!
Кондак 2
Видев икону Пресвятаго Твоего лика, Богородице Дево, юже всехвальный евангелист Лука написа, рекла еси о ней пречистыми усты Твоими: “С сею иконою благодать Моя и сила”. Таковое обетование Твое уведевше, благоговейно почитаем Пресвятый образ Твой, Владычице, и воспеваем Сыну Твоему и Богу: Аллилуиа.
Икос 2
Уразумев благоволение Твое, Богородице, к сей иконе Твоей, славный Апостол Лука дарова ю в благословение и освящение Христовой Церкви Антиохийстей, в ней же Путеводительницей она наименовася и чудесы божественными прославися. О сем благодаряще Тя, Госпоже Всеблагая, яко подобие Пречистого лика Твоего во утешение нам оставила еси, усердно Тебе вопием:
Радуйся, Царице горних и дольних;
Радуйся, Владычице ангелов и человеков.
Радуйся, мира умирение;
Радуйся, древния вражды разрушение.
Радуйся, девства столпе;
Радуйся, смирения глубино.
Радуйся, облаченная в солнце;
Радуйся, сияющая Божественною славою.
Радуйся, Мати Света Невечерняго;
Радуйся, раю сладости небесныя.
Радуйся, вертограде Христов благоуханный;
Радуйся, одре Царя Великаго.
Радуйся, Богородице Одигитрие, христиан упование!
Кондак 3
Силою Божиею чудеса предивныя совершахуся от иконы Твоея, Богомати Владычице, егда принесена она бысть в Царьград и в преславнем Влахернстем храме поставлена; слепыя просвещаше, всяк недуг в людех врачеваше благодатию Твоею, Богородице, да вси зовем прославльшему Тя Богу: Аллилуиа.
Икос 3
Имеяше Тя Царьград Заступницу державную, Богородице Дево, и во дни нападения на него врагов сильных и бранеискусных, помощь Твою чудесную от святыя иконы Твоея Одигитрии получавше многочудесно. Темже молимся Тебе, Всеблагая, якоже древле град оный многажды от погибели спасла еси, тако и нас смиренных спаси от погибели вечныя Матерним предстательством Твоим ко Христу Богу, да благодарно зовем Ти:
Радуйся, Царьграда крепкое ограждение;
Радуйся, Влахернскаго храма благодатное сокровище.
Радуйся, нечистивых ратей одоление;
Радуйся, врагов Православия посрамления.
Радуйся, чад Христовых Предводительнице к победам;
Радуйся, Помощнице скорая в бедах к Тебе притекающих.
Радуйся, Заступнице усердная молитвенно Тя призывающих;
Радуйся, богомудрых святителей споспешнице во благовестии Христовом.
Радуйся, похвале жен и дев слава;
Радуйся, столпе огненный, зной страстей умеряющий.
Радуйся, столпе облачный, мрак грехов разгоняющий.
Радуйся, Богородице Одигитрие, христиан упование!
Кондак 4
Бурею морскою корабли прегордаго Кагана, град Твой пленити восхотевшаго, сокрушила еси, Владычице, и победу над ним людем христоименитым даровала еси от святыя иконы Твоея Одигитрии, лучи света небеснаго испуская и вои православныя ими просвещая, да вси увидят, яко Ты еси воистину Воеводо державная Царьграда и прославят милости Твоя и чудеса, воспевая Спасителю Богу: Аллилуиа.
Икос 4
Слышавше о чудесех Твоих преславных, Богородице Дево, яже от иконы Твоея явила еси в Царьграде, недоумеем, како икона та, носимая по стогнам града, силою Божественною носившими ю управляше и стопы их по воле Твоей направляше; направи убо Владычице, и наша стопы на путь исполнения заповедей Христовых, и научи нас верно исполняти святую волю Сына Твоего и Бога, да Тебе вопием сице:
Радуйся, свеще неугасимая;
Радуйся, звездо незаходимая.
Радуйся, сияющая светом Божественным;
Радуйся, просвещающая благодатию души верных.
Радуйся, мира Христова благоухание;
Радуйся, земли освящение.
Радуйся, чаше, черплющая радость всему миру;
Радуйся, источниче, изливающий вечную сладость.
Радуйся, чертоже благоукрашенный Царя Царей;
Радуйся, рая краснейшая.
Радуйся, утра светлей-шая.
Радуйся, Богородице Одигитрие, христиан упование!
Кондак 5
Яко Боготечная звезда, икона Твоя, Богомати Владычице, благоволением Твоим от Царьграда в страну Российскою принесеся, и граду Смоленску в наследие благодатное даровася, темже благодарим Тя, о Госпоже Всемилостивая, яко таковой дар святый Отечеству нашему даровала еси, и поем в Троице славимому Богу: Аллилуиа.
Икос 5
Видевше преславное заступление Твое града Смоленска, Пречистая Владычице, прославляем великую Твою милость, еюже град сей от разорения Батыева чудесно спасла еси, гласом Божественным от иконы Твоея исшедшим, угодника Христова Меркурия на единоборство с предводителем рати Батыевой послав; егоже он мечем своим порази и град Твой от запаления огненнаго избави. Самого же его венцем мученическим увенчала еси, того молитвами небесными сподоби нас на земли неосужденно взывати к Тебе:
Радуйся, мученика Христова Меркурия на подвиг ратный укрепившая;
Радуйся, гласом от иконы Твоея святыя его воодушевившая.
Радуйся, яко Давида на Голиафа победою его увенчавшая;
Радуйся, града Смоленска крепкое защищение.
Радуйся, град Твой от разорения избавившая;
Радуйся, Избавительнице от плена и поражения.
Радуйся, страны Российския благодатное утешение;
Радуйся, Церкви Христовой Боголепное украшение.
Радуйся, любящих Тя присное радование;
Радуйся, Утолительнице печалей.
Радуйся, болящих исцеление;
Радуйся, унывающих ободрение.
Радуйся, Богородице Одигитрие, христиан упование!
Кондак 6
Проповедует страна Российская милости и чудеса Твоя, Пречистая Дево, Богородице, и град Смоленск светло красуется, имея чудотворную икону Твою, всякия болезни исцеляющую и недужным здравие подающую. Сего ради со благоговением почитаем многоцелеб-ный образ Твой, Госпоже Всеблагая, и поклоняющеся ему, яко залогу Твоего к нам благоволения, вопием Богу: Аллилуиа.
Икос 6
Воссияла еси в стране Российстей лучами Божественных чудес от святыя иконы Твоея исходящими, Пречистая Владычице, к нейже от лет древних отцы наши прихождаше в скорбех и болезнех и нетщи отхождаше. Им же вслед и мы к Тебе приходяще и с любовию благоговейно лобызая образ Твой чудотворный, молимся Тебе: утоли печали наша, уврачуй недуги наша, да зовем Ти:
Радуйся, жезле старости;
Радуйся, вдовиц Заступление.
Радуйся, сирот призрение;
Радуйся, младенцев воспитание.
Радуйся, нищих снабдение;
Радуйся, пленных свобождение.
Радуйся, скорбящих утешение;
Радуйся, столпе и утверждение девства.
Радуйся, иноков Покровительнице;
Радуйся, инокинь Наставнице.
Радуйся, постников укрепление.
Радуйся, подвижников вразумление.
Радуйся, Богородице Одигитрие, христиан упование!
Кондак 7
Хотя даровати граду Москве причастие благодати от святыя иконы Твоея, Владычице Всемилостивая, благоволила еси принести икону Твою от Смоленска в Москву, да тамо пребывая, чудесы многими прославится. Егда же по умолению жителей Смоленска, возращашеся образ Твой святый в град их, на месте прохождения иконы Твоея Одигитрии, обитель дев во имя Твое сооружена бысть; в нейже, под осенением чудотворныя иконы Твоея с верою и любовию воспеваем немолчную песнь Богу: Аллилуиа.
Икос 7
Новосозданная обитель инокинь во граде Москве благоговейно чествует святое подобие чудотворныя иконы Твоея Одигитрии, милости неизреченныя источающее верным, ея же осенением люди православныя благодарно угешаеши и в подвигах поста и молитвы утверждаеши, подвизая их немолчно воспевати Матерния Твоя щедроты и благодарно взывати Тебе:
Радуйся, Богом возлюбленная Царице;
Радуйся, Бога возлюбившая Владычице.
Радуйся, едина благословенная в женах;
Радуйся, небесных радование.
Радуйся, земных Заступление;
Радуйся, демонов посрамление.
Радуйся, ада попрание;
Радуйся, укрепленная силою Господа Сил.
Радуйся, облеченная властию Царицы Неба и земли;
Радуйся, воинствующих на плоть целомудрием благая Помощнице.
Радуйся, подвизающихся в посте и безмолвии милостивая Утешительнице.
Радуйся, Богородице Одигитрие, христиан упование!
Кондак 8
Странствие земное многоскорбное и многомятежное услаждаеши нам Матерним Твоим о нас попечением, Богородице, и во дни скорбных обстояний помощь святую являеши нам во спасение. Памятуем и исповедуем, Владычице, Твое заступление, егда галлы страну Российскую разориша и град Москву плениша, Ты икону Свою святую Одигитрию от Смоленска в полцы воинства Российскаго благоволила еси принести и тем вои православныя воодушевила еси, славную победа им дарова, предстательством Твоим к Сыну Твоему и Богу. Ему же поем: Аллилуиа.
Икос 8
Вся милости и щедрот преисполненная, Всеблагая Мати Божия, воинству православнороссийскому помощь и одоление на враги преславно даровала еси. Галлы с бесчестием от Отечества нашего отгнала еси, и егда не бе нам уже спасения надежды, яко и наш град пленен и разорен бысть; победою дивною нас увенчала еси. Всегда памятуя таковое Твое заступление, хвалебно Тебе вопием:
Радуйся, страну нашу Российскую от нашествия иноплеменных предивно избавившая;
Радуйся, гордых силою Своею со стыдом вспять возвратившая.
Радуйся, иноверных ратей Всесильная Победительнице;
Радуйся, православного воинства Державная Пособнице.
Радуйся, иконою Твоею святою с воинами Российскими милостивно пребывавшая;
Радуйся, чудотворным образом Твоим полки их освящавшая.
Радуйся, изнемогающих силою свыше укрепляющая;
Радуйся, беспомощным помощь Твою святую подающая.
Радуйся, обидимых правосудная Заступнице;
Радуйся, ненадежных Надеждо.
Радуйся, печальных отрадо;
Радуйся, Богородице Одигитрие, христиан упование!
Кондак 9
Вси верныя с радостию и утешением видят образ Твой святый, на нем же умиленно взираеши на Богомладенца Христа, сего ради молим Тя, Всеблагая, яко Матерь вся содержащаго в деснице Своей Владыки: воззри и на нас скоромилостиво, и умоли Господа, да помилует нас недостойных. Научи нас, Владычице, молитися Ему благоприятно, и неосужденно пети Ему нескверными усты и чистым сердцем Ангельскую песнь: Аллилуиа.
Икос 9
Витийство наше песенное не довлеет к прославлению многих Твоих чудес, Богородице Одигитрие, ихже от святыя иконы Твоея явила еси и присно являеши верным: обаче Ты, яко воистину Благая Мати, веру и усердие наше приими; веси бо и любовь к Тебе нашу, еюже сердца наша пламенеют, и милостиво услыши сия в простоте составленныя похвалы:
Радуйся, обрадованная Приснодево;
Радуйся, Невесто Неневестная.
Радуйся, селение Бога Слова;
Радуйся, обитель Святейшаго Святых.
Радуйся, с Сыном Царем небес вечно царствующая;
Радуйся, Матернее дерзновение к Нему имеющая.
Радуйся, молитвам верных милостиво внемлющая;
Радуйся, любящим Тя, любовию Твоею Божественною воздающая.
Радуйся, Сиона горняго украшение;
Радуйся, мира дольняго защищение.
Радуйся, граде спасения нашего притекания;
Радуйся, горо святая, сошествием Божиим прославленная.
Радуйся, Богородице Одигитрие, христиан упование!
Кондак 10
Спаси нас, Владычице, от погибели вечныя Матерним предстательством Твоим ко Христу Богу, и сподоби нас узрети Тя в час кончины нашея, от руки лютаго миродержителя душу нашу соблюдающую: да помощию Твоею Святою избегнем его сетей и сподобимся Царствие Небесное получити и в радости вечней воспевати Человеколюбцу Богу: Аллилуиа.
Икос 10
Стена еси девам, Богородице Дево, и всем ревнителем девства и чистоты усердная Помощнице. Молим Тя, Пречистая, очисти наша сердца от всякия скверны греховныя, и украси души наша целомудрием и чистотою; да невредимы пребудем от всех искушений мира, плоти и диавола, и сподобимся достойно возглашати Тебе песни таковая:
Радуйся, добрая Младопитательнице девам;
Радуйся, благосердая Попечительнице сирот.
Радуйся, тихое прибежище обуреваемых страстями;
Радуйся, надежное пристанище смущаемых искушениями.
Радуйся, Мздовоздаятельнице подвижников целомудрия;
Радуйся, Споборнице борющихся со враги невидимыми.
Радуйся, милостивая Посетительнице неповинно осужденных;
Радуйся, благая Утешительнице напрасно оклеветанных.
Радуйся, Божественная Свободительнице сущих в плену и изгнании;
Радуйся, всемощная Покровительнице труждающихся и обремененных.
Радуйся, Судии Праведнаго умоление;
Радуйся, грешных с Богом примирение.
Радуйся, Богородице Одигитрие, христиан упование!
Кондак 11
Пение всеумиленное слышаще от верных рабов Твоих возносимое, Ты, Пречистая Мати Дево, яко имущая милосердие неизреченное, насыти нас пищею нетленною Слова Божия и научи нас всегда исполняти животворныя заповеди Господа нашего; Его же умоли, Предстательнице наша Всеблагая, да ниспослет милость Свою нам недостойным и сподобит нас унаследовати Его всесветлое и всеблаженное Царствие, идеже от всех святых поется Ему хвалебная песнь: Аллилуиа.
Икос 11
Светлыми лучами чудес Твоих, Богородице Дево, просвещаеши нас благодатно, и от святыя иконы Твоея Одигитрии утешение духовное ниспосылаеши угодникам Божиим. Нам же, грешным, дары целебныя подаеши от Нея неоскудно, да зовем Ти благодарственно и хвалебно:
Радуйся, Агнца и Пастыря Нетленнаго рождшая;
Радуйся, девство и славу Матери в Себе сочетавшая.
Радуйся, крине девства, к чистому и девственному житию приводящая;
Радуйся, избранникам Божиим любовь Твою святую являющая.
Радуйся, угодникам Господним веления Небесныя открывающая;
Радуйся, преподобнаго Сергия Радонежскаго посещением Твоим сподобившая.
Радуйся, преподобнаго Кирилла Белоезерскаго гласом от иконы Твоея на Белоозеро наставившая;
Радуйся, преподобнаго Савватия Соловецкаго в подвигах пустынных укрепившая.
Радуйся, святителя Митрофана Воронежскаго иконою Твоею облагодатствовавшая.
Радуйся, обителей Христовых покров и снабдение;
Радуйся, рабов Божиих среди мира, тайное вразумление.
Радуйся, Богородице Одигитрие, христиан упование!
Кондак 12
Благодать Божия действует в чудесех, преславно являемых от святаго образа Твоего, Преблагословенная Богородице Дево, ею же и наши души просвети, мрак греховный разгоняя сиянием Солнца Правды Христа, да во свете повелений Его, богоугодно житие сие временное поживем во всяком благочестии и чистоте и сподобимся блаженство вечное получити и со избранными пети Богу: Аллилуиа.
Икос 12
Поюще Твоя чудеса, Богородице, проповедуем милости Твоя, прославляем щедроты Твоя неиссчетныя и, припадая к чудотворней иконе Твоей, молим Ти ся с верою и любовию: буди нам Путеводительница Благая к светлому граду Иерусалиму Небесному, да узрим Тя с высоты славы Твоея Божественныя на нас милостивно взирающую и вкупе со святыми воспоем Ти сице:
Радуйся, радосте наша Пресвятая;
Радуйся, Царице наша Преблагая.
Радуйся, усыновившая нас при кресте Сына Твоего и Бога;
Радуйся, Матернюю любовь к нам являющая.
Радуйся, во благих желания наши дивно исполняющая;
Радуйся, скоропослушливая к смиренным молитвам.
Радуйся, покровом Твоим святым нас покрывающая;
Радуйся, ризою Твоею честною благонадежно нас защищающая.
Радуйся, в час кончины нашея Всесильная нам Помощнице;
Радуйся, в мытарствах воздушных державная нам Заступнице.
Радуйся, телес наших безвозмездное врачевание;
Радуйся, душ наших спасение.
Радуйся, Богородице Одигитрие, христиан упование!
Кондак 13
О Всепетая Мати, Царице Всемилостивая Дево Богородице Одигитрие! Приими малое сие моление наше и принеси е Сыну Твоему, Матерне умоляя Его благость, да помилует нас грешных и недостойных; и Твоего ради всесильнаго ходатайства, избавит нас мучения вечнаго; сподобит Царствие Небесное получити и тамо со Ангелы воспевати Богу: Аллилуиа.
(Этот кондак читается трижды, затем икос 1 и кондак 1)
МОЛИТВА ПЕРВАЯ
О Пречудная н Превышшая всех тварей Царице Богородице, Небеснаго Царя Христа Бога нашего Мати, Пречистая Одигитрие Марие! Услыши нас грешных и недостойных в час сей молящихся и припадающих к Твоему Пречистому Образу со слезами и умиленно глаголющих: изведи нас от рова страстей, Владычице Преблагая, избави нас от всякия скорби и печали, огради от всякия напасти и злыя клеветы, и от неправеднаго и лютаго навета вражия. Можеши бо, о Благодатная Мати наша от всякаго зла сохранити люди Твоя и всяким благодеянием снабдити и спасти; разве Тебе иныя Предстательницы в бедах и обстояниях, и теплыя Ходатаицы о нас, грешных, не имамы. Умоли, Госпоже Пресвятая, Сына Твоего Христа Бога нашего, да удостоит нас Царствия Небеснаго; сего ради всегда славим Тя, яко Виновницу спасения нашего, и превозносим святое и великолепное имя Отца и Сына и Святаго Духа, в Троице славимого и поклоняемаго Бога, во веки веков. Аминь.
МОЛИТВА ВТОРАЯ
К кому возопию, Владычице? К кому прибегну в горести моей, аще не к Тебе, Госпоже Владычице Богородице, Царице Небесная? Кто плач мой и воздыхание мое приимет, аще не Ты, о Пренепорочная, Надеждо христиан и Прибежище грешным? Приклони, о Пречистая Владычице, ушеса Твоя к молению моему, Мати Бога моего, не призри мя, требующа Твоея помощи, услыши стенание мое и вопль сердца моего внуши, о Госпоже Богородице Царице. И подаждь ми радость душевную, подкрепи мя нетерпеливаго, унылаго и нерадиваго к Твоему хвалению. Вразуми и научи мя, како Тебе молитися подобает, и не отступи от мене, Мати Бога моего, за роптание и нетерпение мое, но буди ми покров и заступление в жизни моей и приведи мя к тихому пристанищу блаженнаго онаго покоя, и сопричти мя к лику избраннаго Твоего стада и тамо удостой мя воспевати и славити Тя во веки. Аминь.
ТРОПАРЬ
Тропарь, глас 4
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы.
Слава, и ныне, Богородичен
Не умолчим никогда, Богородице, силы Твоя глаголати, недостойнии. Аще бо Ты не бы предстояла молящи, кто бы нас избавил от толиких вед? Кто же бы сохранил до ныне свободны? Не отступим, Владычице, от Тебе: Твоя бо рабы спасаеши присно от всяких лютых.
Кондак, глас 6
Предстательство христиан непостыдное, ходатайство ко Творцу непреложное, не презри грешных молений гласы, но предвари яко благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих тя.
Ин кондак, глас 6
Не имамы иныя помощи, не имамы иныя надежды, разве Тебе, Владычице: Ты нам помози, на Тебя надеемся и Тобою хвалимся: Твои бы есмы раби, да не постыдимся.
КАНОН
Пресвятой Богородице в честь иконы Ее Смоленской
Тропарь, глас 4-й
К Богородице прилежно ныне притецем, грешнии и смиреннии, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тщи, Тя бо и едину надежду имамы (дважды).
Слава, и ныне: Не умолчим никогда, Богородице, силы Твоя глаголати, недостойнии. Аще бо Ты не бы предстояла молящи, кто бы нас избавил от толиких бед? Кто же бы сохранил доныне свободны? Не отступим, Владычице, от Тебе, Твоя бо рабы спасаеши присно от всяких лютых.
Канон, глас 4-й
Песнь 1
Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.
Припев: Пресвятая Госпоже Богородице, услыши молитву раб Своих, молящихся Тебе.
Радостно, Чистая, ныне наставшее хваление приношаю, радуяся, и тихим гласом, Одигитрие, вопию Ти: радуйся и исполни мя разума, пети начинающа.
Пресвятая Госпоже Богородице, услыши молитву раб Своих, молящихся Тебе.
Христа родившая, радость нам вечную, о, радуйся, Всепетая, православным надежда, Одигитрие, всепетая Девице, радости исполни мя мирови желанныя.
Слава: Ликуют вси человецы и Ангели всегда, согласно вопиюще на небеси и на земли, Одигитрие: радуйся, Девице, радости бо Рождеством Твоим всяческая исполнила еси.
И ныне: Радуйся, Одигитрие, со страхом Ти вопиющих радости сподоби, Мати сущия радости, избавляющи скорбей всяческих, и всех помилуй, к Тебе прибегающих.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Песнь 3
Ирмос: Твоя песнословцы, Богородице, живый и независтный источниче, лик себе совокупльшия, духовно утверди, в Божественней Твоей славе, венцев славы сподоби.
Пресвятая Госпоже Богородице, услыши молитву раб Своих, молящихся Тебе.
Христа, Вышняго Царя, о, радуйся, непоколебимая Чистая и одушевленная палато! Радуйся, Одигитрие, радуйся: Тобою нерушим наш град сохраняется.
Пресвятая Госпоже Богородице, услыши молитву раб Своих, молящихся Тебе.
Вместити Егоже не возможе тварь, во утробу неискусобрачную, Одигитрие Девице, телесно вместила еси, темже Ти радуйся поем, по долгу величающе.
Слава: Радость многопетая мирови, радостно Ти поюще присно, вечнующия, Чистая, радости сподобляемся Твоими матерними молитвами к Рождшемуся из Тебе, Одигитрие.
И ныне: Златую Тя стамну, и свещник, и жезл, и трапезу, Чистая, призываем, Одигитрие, и глас, еже радуйся, Тебе присно привношаем с сими же имены.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Господи, помилуй (трижды). Слава, и ныне.
Седален, глас 2-й
Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, Едина вскоре предстательствующая.
Песнь 4
Ирмос: Седяй в славе на Престоле Божества во облаце легце, прииде Иисус Пребожественный нетленною дланию и спасе зовущия: слава, Христе, силе Твоей.
Пресвятая Госпоже Богородице, услыши молитву раб Своих, молящихся Тебе.
Радуйся, чудо чудесем, Одигитрие Владычице. Радуйся, всем радосте градовом, и весем непобедимое христианское в бедах хранилище, и предградие, и на враги побеждение.
Пресвятая Госпоже Богородице, услыши молитву раб Своих, молящихся Тебе.
Радуйся, радуйся, людем православным похвало, и христолюбивым воинством покров пребываеши всем, Царице. Радуйся, Одигитрие, прибежище всем нам и утверждение.
Слава: Радуйся, всем скорое в бедах избавление. Радуйся, готовое всем скорбящим утешение. Радуйся, всепетая, радуйся, Одигитрие всеблагословенная, всем немощным целительнице.
И ныне: Радуйся, Еяже величия вся тварь славити убо спешит по достоянию, но не возмогает, Одигитрие, и сего ради зовет Ти: радуйся, Владычице, Боговместимое жилище.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Песнь 5
Ирмос: Ужасошася всяческая о Божественней славе Твоей: Ты бо, неискусобрачная Дево, имела еси во утробе над всеми Бога и родила еси безлетнаго Сына, всем воспевающим Тя мир подавающая.
Пресвятая Госпоже Богородице, услыши молитву раб Своих, молящихся Тебе.
Благостыни бездно и щедротам еси, радуйся, Одигитрие Девице, радуйся, всем радость творящи верным. О, радуйся, сущим в бедах и скорбящим пребыстрая Заступнице.
Пресвятая Госпоже Богородице, услыши молитву раб Своих, молящихся Тебе.
Радуйся, от исполнения величия чудес Твоих зряще, исполняемся, вси незрящии, слышаще же, вернии. Темже радуйся Тебе присно всюду и вси, Одигитрие, поем.
Слава: Христа Бога нашего, о, радуйся, Одигитрие, жилище и дом неизреченныя и пребожественныя, Дево, славы Его. О, радуйся, палато преукрашенная, радуйся, граде одушевленный, присно царствующий!
И ныне: Радость неоскудную Тя разсмотряюще, яко море, Отроковице, Одигитрие Девице, радующеся вси, радуйся вопием Ти, и поюще, Божественных даров невидимо присно от Тебе ожидающе.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Песнь 6
Ирмос: Божественное сие и всечестное совершающе празднество, богомудрии, Богоматере, приидите, руками восплещим, от Нея рождшагося Бога славим.
Пресвятая Госпоже Богородице, услыши молитву раб Своих, молящихся Тебе.
Христа, Чистая, приемлющи, глас еже радуйся, Одигитрие Девице, слышаше, Егоже неизреченно рождши, радуйся от всех слышиши всегда.
Пресвятая Госпоже Богородице, услыши молитву раб Своих, молящихся Тебе.
Радости вся исполнила еси, вышния и нижния Ты совокупила еси, Одигитрие, темже радостно и согласно ныне небо и вся земля зовет Ти.
Слава: Вдовам, о, радуйся, всепетая, и всем сирым, Одигитрие, утешение; радуйся, всем источающи нищим богатство неистощимое.
И ныне: Злата всякаго блистаема и утра солнечнаго светлейши, жилище Христово, радуйся, Одигитрие, радуйся, Девице, радуйся, Невесто Неневестная.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Господи, помилуй (трижды). Слава, и ныне.
Кондак, глас 6-й
Предстательство христиан непостыдное, ходатайство ко Творцу непреложное, не презри грешных молений гласы, но предвари, яко благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.
Икос
Простри длани Твоя, имиже всех Владыку яко Младенца прияла еси, за множество благости; не остави нас, всегда надеющихся на Тя, бодренною Твоею молитвою и неисчетною простынею ущедри нас и подаждь душам нашим милосердие Твое, во веки источающи: Тебе бо имамы, грешнии, заступницу от находящих на ны бед и зол. Но, яко имущи милосердия щедроты, ускори на молитву и потщися на умоление, предстательствующи присно, Богородице, чтущих Тя.
Песнь 7
Ирмос: Не послужиша твари Богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог, благословен еси.
Пресвятая Госпоже Богородице, услыши молитву раб Своих, молящихся Тебе.
Радуйся, радуйся, Богородице Одигитрие, всех и всегда наставляющи верных шествовати ко всякому пути спасительному; радуйся, Владычице, Тобою бо присно избавляемся настоящия варварския беды.
Пресвятая Госпоже Богородице, услыши молитву раб Своих, молящихся Тебе.
Радуйся, радуйся, Одигитрие, бдящи и молящися о нас к Богу, и всякия злобы ходатайством Твоим, всяческих скорбей, Богородительнице, всех людей избавляющи.
Слава: Радуйся, радуйся, Пресвятая Одигитрие, Яже прошения наша к пользе нам исполняющи и хотящи всем присно всегда любодружное благое единство, спешное же во изящных.
И ныне: Радуйся, радуйся, кораблем Одигитрие нуждно плавающим, избавляющи верных, и всем избавление от всякия скорби, и недуги пестротныя и медленныя разрешающи вскоре.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Песнь 8
Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Пресвятая Госпоже Богородице, услыши молитву раб Своих, молящихся Тебе.
Радуйся, всеблагословенная Марие, из Тебе бо всеблагословенный Бог одеявся во всего мя, человека, и, одеявся, соедини Своему Божеству неизреченным соединением, Дево Одигитрие, радуйся, Обрадованная, радосте всего мира.
Пресвятая Госпоже Богородице, услыши молитву раб Своих, молящихся Тебе.
Радуйся, лукавых духов прогонительнице; радуйся, Богородице Одигитрие. Радуйся, яко Тебе небесная невидимая воинства славословят всегда и величают яко Матерь Божию бывшую; радуйся, Яже нижняя сочтавши с вышними.
Слава: Радуйся, всех небесных сил без разсуждения превосходящая; радуйся, Одигитрие. Радуйся, всякия твари Бога рождшая, господствующи ей, Владычице всепетая; радуйся, яко пребываеши Девою, Чистая, и по рождестве.
И ныне: Радуйся, женам всем славо, храме преосвященный Бога нашего; радуйся, Одигитрие, радуйся, душеспасительная всей вселенней; радуйся, покрывающий облаче, небес ширшая; радуйся, мироположнице, Божественнаго мира полна.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Песнь 9
Ирмос: Всяк земнородный да взыграется, Духом просвещаемь, да торжествует же безплотных умов естество, почитающее священное торжество Богоматере, и да вопиет: радуйся, всеблаженная Богородице, Чистая Приснодево.
Пресвятая Госпоже Богородице, услыши молитву раб Своих, молящихся Тебе.
Радуйся, свеще, Свет невечерний понесшая, и в рождестве Твоем многобожия тьму разрушившая, и адовы пропасти избавльшая люди. Радуйся, Одигитрие Богородице, доброт всех предходатаице.
Пресвятая Госпоже Богородице, услыши молитву раб Своих, молящихся Тебе.
Радуйся, земле, из неяже клас прозябший небесный верным, и мира всего душегубнаго глада избави, разумная и одушевленная. О, радуйся, винограде, иже грозд животный рождшая, Богородице Чистая Одигитрие!
Слава: Радуйся, тайных цветов прекрасный сущий раю; радуйся, Мати Дево, невидимых разум чистотою страннолепно побеждши, Богородительнице. Радуйся, Отроковице, радуйся, Одигитрие, всемирное чудо и слышание.
И ныне: Лето живота нашего прочее сохрани невреждено поможением Твоим, Дево Отроковице, и сподоби конец благий получити нам, воспевающим Тя и взывающим: радуйся, всеблаженная Богородице, Чистая Одигитрие.
Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству (поклон).
Фотография иконы: http://www.liveinternet.ru/users/06leka/post132309961/
