Свенская - Печерская икона Божией Матери
(3 / 16 мая; 17 / 30 августа)
История прославления этого образа связана с черниговским князем Романом Михайловичем, который, будучи в Брянске, лишился зрения. Услышав о чудесах и исцелениях, бывших от чудотворного Печерского образа Богородицы и от великих чудотворцев Антония и Феодосия Киево-Печерских, князь послал в Печерский монастырь милостыню вместе с прошением отпустить чудотворную икону к нему в Брянск.
По совету с братиею архимандрит Печерский отправил икону на лодке рекою Десною со священником. Во время плавания провожавшие святую икону должны были провести ночь на берегу реки Свены. Вставши поутру, они пошли в лодку помолиться перед иконой Богородицы, но не нашли её в лодке, а увидели образ на горе, стоящим на дубе между ветвями. Об этом чудесном явлении на берегу реки Свены (от которой икона получила название Свенской) возвестили князю Роману Михайловичу.
Князь поспешил отправиться пешком туда, где стояла икона, и, помолившись с верой перед образом, получил исцеление и вновь стал видеть. После благодарственного молебна, который отслужили перед иконой священнослужители, князь со всем народом стал рубить деревья, и вскоре общими трудами был сооружен храм в честь Успения Божией Матери. Князь устроил тут монастырь и щедро оделил его деньгами, а чудотворную икону обложил золотом и серебром. Дерево, на котором стояла икона, употреблено было для икон и других предметов храма.
В память о явлении иконы на реке Свене был установлен праздник 3 мая (16 мая по новому стилю). Второй день празднования – 17 (30) августа – был установлен в 1815 году в память об избавлении Брянска и самого Свенского монастыря от полчищ Наполеона. Узнав о приближающихся захватчиках, жители Брянска со Свенской иконой Пресвятой Богородицы совершили крестный ход вокруг города, слёзно умоляя Божию Матерь о заступничестве. Вскоре пришло известие, что неприятельские войска неожиданно повернули вспять.
В настоящее время Свенская Печерская икона Пресвятой Богородицы хранится в Государственной Третьяковской галерее. На иконе по сторонам возвышенного трона Богоматери представлены святые, основатели Печерского монастыря — преподобные Феодосий и Антоний с развёрнутыми свитками в руках.
АКАФИСТ
Кондак 1
Избранней от всех родов Пресвятей Деве Марии Богородице, яко воистину плотию рождшей Иисуса Христа, Спаса и Бога нашего, Владычице всея Вселенныя, избравшей вторым земным жребием страну нашу Российскую и обители иноческие чудотворными иконами прославившей, похвальное приносим пение; Ты же, о Всечестная наша Мати и Заступница, храни обитель Твою и спаси всех нас от враг видимых и невидимых да зовем Ти:
Радуйся, Пресвятая Богородице Дево, Свенская Похвало и наше присное утешение.
Икос 1
Ангел Хранитель внуши князю Роману, егда той бысть во граде Брянске, вспомянути о чудесех от иконы Твоея, Владычице, во обители Печерстей бывших, да испросит иноков Печерских отпустити икону чудотворную, писанную преподобным Алипием, исцеления ради слепоты своея и возопи Ти тако:
Радуйся, Всечестная наша Мати;
Радуйся, дивная наша Заступнице;
Радуйся, Надеждо нашего спасения;
Радуйся, града Брянска Хранительнице;
Радуйся, живущих в нем христиан Покровительнице;
Радуйся, надеющихся на Тя, Руководительнице;
Радуйся, Пресвятая Богородице Дево, Свенская Похвало и наше присное утешение.
Кондак 2
Видящи исцеления, получаемые с верою и любовию уповающими на Тя и услышав о явлении иконы Твоея на древе, на горе Свенстей стоящей, юже обретоша иноцы, князь Роман устремися к месту явления ея и возопи Богу: Аллилуйя.
Икос 2
Разум небесный приведе князя Романа к месту явления иконы Твоея, Владычице, и вознесе горячую молитву пред нею, князь Роман, получив исцеление очесем своим, созда ту обитель, собра иноки и вкупе с ними возопи Тебе:
Радуйся, икону Твою чудесами прославившая;
Радуйся, Свенскую обитель ею же прославила еси;
Радуйся, новый Свой удел на Свени возлюбила еси;
Радуйся, яко в ней икону Твою чудотворную явила еси;
Радуйся, дивны и велики чудеса от нея показала еси;
Радуйся, всем просящим у Тебя исцеления через икону Твою источаеши;
Радуйся, Пресвятая Богородице Дево, Свенская Похвало и наше присное утешение.
Кондак 3
Силою Божию и благодатию Своею землю Брянскую осенившая, Богородице Дево, чрез явление иконы Своея на Свени, похвальное возглашаем Ти пение и тако вопием ко Господу: Аллилуйя.
Икос 3
Имея веру велию, благоверный князь Роман, предъизбранный свыше послужити прославлению иконы Твоея на Свени явившейся, Владычице Преблагая, той бо путь творя от града Брянска к реце Свени и достигнув места Тобою избранного, видев икону Твою на древе стоящу, к ней же, молебно припадая (со слезами теплыми) сице Тебе возглашаем:
Радуйся, спасения нашего главизно;
Радуйся, князя Ромна к прославлению иконы Твоея избравшая;
Радуйся, ему же источник исцелений указавшая;
Радуйся, прошение его о принесении иконы Твоея исполнившая
Радуйся, путь иноков на Свени задержавшая;
Радуйся, князя Романа к сему месту призвавшая;
Радуйся, Пресвятая Богородице Дево, Свенская Похвало и наше присное утешение.
Кондак 4
Бурю сомнений разгна, сила Вышняго осени князя Романа устроити храм на месте славного явления иконы Твоея, и бысть воздвигнут храм Успения ради Твоего, Богомати, и в нем прославляя Тя, нашу Заступницу, Честнейшую Херувим и Славнейшую без сравнения Серафим и Сыну Твоему вопием: Аллилуйя.
Икос 4
Слыша об обилии чудес и исцелений от святыя иконы Твоея, Пренепорочная Дево, изливаемых, недоумеваем песнословити Тя по достоянию, кий бо язык человеческий возможет изрещи величия Твоя, о Дивная Владычице, обаче любовию Твоею побеждаеми сице вопием Ти:
Радуйся, в селения райския путеводительнице;
Радуйся, в подвизех наших укрепляющая;
Радуйся, благое начало и славный конец всех подвизающихся;
Радуйся, святыя радости Божественная Струе;
Радуйся, встречающих Тя с любовию, утешение;
Радуйся, посещением Своим храм душевный устрояющая;
Радуйся, Пресвятая Богородице Дево, Свенская Похвало и наше присное утешение.
Кондак 5
Благодатная сила, иконе Твоей дарованная, Пресвятая Госпоже Богородице, созывает верных соборы песньми духовными славити Тя, Честнейшую Херувимов и Серафимов, ибо рождши Единаго от Троицы, предстоиши ныне пред Престолом Триипостаснаго Божества, идеже воинства горния с трепетом вопиют: Аллилуйя.
Икос 5
Видеша токи чудес на месте явления чудныя иконы Твоея, Владычице Всемилостивая, на Свени бывшая, князь Роман вкупе с насельники града Брянска со усердием многим храм Божий воздвигоша и тако создаша святую обитель нову, в ней же немолчно воспевают Ти благохваления сицевыя:
Радуйся, землю Брянскую в достояние Севе избравшая;
Радуйся, яко на горе Свенстей духовный сад насадившая;
Радуйся, яко тамо живущим вся потребная подавшая;
Радуйся, иноков от мира греховнаго собравшая;
Радуйся, во обитель Свенскую их приведшая;
Радуйся, от врагов видимых и невидимых защищающая;
Радуйся, Пресвятая Богородице Дево, Свенская Похвало и наше присное утешение.
Кондак 6
Проповедует обитель Свенская Твое матернее пред Богом предстательство, Преблагословленная Дево, ибо Тебе дадеся велия благодать всемирнаго заступления, тем же умильно на святую Твою икону взирающе, в скорбех и недугах врачевство обильно от нея почерпаем и вопием глаголы хвалебными на ней изображенному вкупе с Тобою Сыну Твоему и Богу: Аллилуйя.
Икос 6
Возсия нам ближним и дальним источник чудес на Свени, Святая и Пречистая икона Твоя, Царице и Владычице всея твари, к ней же со усердием многим притекаем, приемля от нея дары неисчетных Твоих щедрот и недостойнии стезею отцев наших шествуя, с верою и любовию припадаем к Твоей чудотворней иконе и из глубины сердечныя вопием Ти тако:
Радуйся, яко икона Твоя чудно на Свени явившаяся, землю Брянскую просветила есть;
Радуйся, яко граду Брянску и пределам его свыше наследие спасительное даровала еси;
Радуйся, яко иконою Твоею обитель на Свени светло красуется;
Радуйся, яко иконе Твоей царие и святитилие благоговейно поклоняются;
Радуйся, яко икону Твою все монашество и вси православнии верно почитают;
Радуйся, Богом просвещенных россиян крепкое заступление;
Радуйся, Пресвятая Богородице Дево, Свенская Похвало и наше ное утешение.
Кондак 7
Хотя явити странное чудо, Дево Богородице, егда воздвизашася церковь каменна во обители Свенстей и своды церковныя падоша, Ты братию со игуменом Мартинианом неврежденно сохранила еси, о Пречудная Владычице, даруй же и нам, Госпоже, Всемилостивая, видети всегда чудный Покров Твой над нами недостойными и непрестанно взывати к Сыну Твоему: Аллилуйя.
Икос 7
Новое и преславное чудо яви всех чудес Творец и всея твари Владыко, егда во храме воздвизавшемся во обители Твоей Свенстей, Пресвятая Дево, попущением Божиим падение сводов бысть, сохраннии же иноцы Твоея обители, Пречистая, познаша силу заступничества Твоего и покровительства места сего из глубины сердечныя возопиша Ти сицевая:
Радуйся, облеченная в светлую одежду милости и щедрот;
Радуйся, сияющая благодатию и славою предивных чудес;
Радуйся, силою Твоею божественною, течение естественное изменяющая;
Радуйся, Своим заступничеством безвременно погибнути не попустившая;
Радуйся, невидимо Своими руками от погибели люди Твоя исхитившая;
Радуйся, руку помощи Твоея всем надеющимся на Тя простирающая;
Радуйся, Пресвятая Богородице Дево, Свенская Похвало и наше присное утешение.
Кондак 8
Странное заступление видя, народ наш православный милостями Твоими, Богогмати, облагодатствованный, немолчно славит имя Твое и благоговейно почитает Пречистаго лика Твоего изображение, им же дивная и преславная чудеса нам явила еси; тем же сынове российстии икону Твою в щит и ограждение от врагов видимых и невидимых имуще и помощию Твоею побеждающе супостаты, вопиют Царю Небесе и земли: Аллилуиа.
Икос 8
Во дни нашествия враг сильных и вооруженных, чудную и благодатную силу иконы Твоея явила еси; яко забралом град окружила и полки вражии в бегство обратила еси; посети и нас милостию и щедротами Твоими, и яко отцем нашим помощь Твою ниспослаше, тако и нас не лиши заступления Твоего, еже по Бозе надежду крепку на Тя возлагаем и зовем Ти:
Радуйся, жителей града Брянска в вере утвердившая;
Радуйся, свет тихий и радостный от многочуднаго Лика Твоего изливающая;
Радуйся, сиянием Лика Твоего святаго врагов ослепившая и в бегство обратившая;
Радуйся, скорбныя сердца иноков обители отгнанием врагов возвеселившая;
Радуйся, сетование их на ликование приложившая;
Радуйся, лишения их щедродательно восполнившая;
Радуйся, Пресвятая Богородице Дево, Свенская Похвало и наше присное утешение.
Кондак 9
Всякаго естества ангельскаго чистейши сущи, Владычице Богородице, обитель ради пришествия Твоея иконы созданную, от нечистот греховных, близ погибели бывшую, но покаянием очистившуюся, яко молитвенница о роде христианстем от враг избавила еси, тщащихся же разорити ю, посрамила еси; тем же вопием Богу: Аллилуиа.
Икос 9
Витии многовещаннии недоумевают воспети по достоянию множество чудес Твоих, Владычице Богородице, во обители Свенстей Тобою сотворенных; Ты же и пристно не остави нас недостойных чад Твоих и сохрани обитель Твою, да вопием Ти тако:
Радуйся, землю Брянскую пришествием Своим освятившая;
Радуйся, по всей земле Брянской люди Твоя избравшая, их же возлюбила еси;
Радуйся, в обители Отца Невеснаго их вводящая;
Радуйся, молитвы наша в сердце Своем приемлющая;
Радуйся, в страданиях наших утешение;
Радуйся, иноков и инокинь благоподвизающихся Всемощная Покровительнице;
Радуйся, Пресвятая Богородице Дево, Свенская Похвало и наше присное утешение.
Кондак 10
Спасти хотя душу свою, святитель Иоанн прииде в Твою обитель, Богородице, и бысть зде искусен игумен; чрез него же прославися икона Твоя, Богоневесто, и просия, паче солнца; неции же иноцы клевету на него воздвигоша, но в туне бысть труд их, он же хранимь Девой Богородицей, непрестанно моляся Ей, прославляше Ю и Богу вопияше: Аллилуиа.
Икос 10
Стена тверда и заступление явилася еси, Владычице, новой обители Твоей Свенстей, егда же врази облегоша землю Брянскую и многажды разоряше дом Твой, Пречистая, Ты же, о Богомати, воздвизала еси из пепла и руин обитель Твою, иноци же вкупе собравшеся благородным сердцем и усты вопияли к Ти таковая:
Радуйся, икону Твою чудную нам даровавшая;
Радуйся, обитель Свенскую ею же утешившая;
Радуйся, прибегающих к Тебе покров и ограждение;
Радуйся, обитель Свою надежно охраняющая;
Радуйся, от супостатов иноплеменных ю избавляющая;
Радуйся, все благая прошения наша исполняющая;
Радуйся, Пресвятая Богородице Дево, Свенская Похвало и наше присное утешение.
Кондак 11
Пение умиленное приносят пред иконою Твоею Свенскою не токмо во граде Киеве, но и в Брянске, и в Москве, и в Ярославле и в друзих градех земли нашея православныя люди, призывая Тя в помощь и заступление, вкупе с преподобными Антонием и Феодосием Печерстими; получившия же от Тебе помощь и заступление, Богородице, вопиют Сыну Твоему и Богу: Аллилуиа.
Икос 11
Светоприемную свещу, просвещающую всех Тя призывающих, имуще мир христианстий Тебе, Дево Богородице, наипаче же обитель Свенская прославляет Тя, свою Покровительницу, юже храниши многая лета от нахождения агарян и всяких враг, от еритик же и междуусобныя брани, и от нападения иноплеменник; аще же иногда и попускала еси ей разоренной быти, грех ради наших, но паки еще благолепнее воздвизала еси ю, и дарами земными изобиловала насельников ея; темже и дарами благодатными обогащаеши вопиющих Ти сице:
Радуйся, иконою Твоею нас защищающая;
Радуйся, в скорбях и болезнях нам помогающая;
Радуйся, нерукотворенным образом Твоим нас покрывающая;
Радуйся, стольный град Москву Свенскою иконою посетившая;
Радуйся, и град Ярославль и другие грады земли Русския озарившая;
Радуйся, иконою Твоею исцеления и радость духовную нам подающая;
Радуйся, Пресвятая Богородице Дево, Свенская Похвало и наше присное утешение.
Кондак 12
Благодать Божественную, покров и заступление подаждь нам, Владычице наша и Мати, припадающим пред иконою Свенскою, воздвигни нас от сна греховнаго, сохрани обитель Твою и нас недостойных чад Твоих, сподоби нас жительствовати во ограде обители Свенския до конца дний наших и прославляти Тя и Сына Твоего, Христа Бога нашего, поя Ему: Аллилуиа.
Икос 12
Поюще Твоя милости и чудеса, явленная во обители Свенстей от лет древних и до ныне, поклоняемся пред образом Твоим имже спасаеши нас, и всех призывающих Тя в помощь и заступление и вопиющих Ти таковая:
Радуйся, торжество веры православныя во обители Свенстей иконою Твоею утвердившая;
Радуйся, сердца человеческия любовию о Бозе распаляющая;
Радуйся, обитель Свенскую иконою Твоею прославляющая;
Радуйся, иконы Твоя, яко проповедницы спасения показавшая;
Радуйся, с небесных высот на нас взирающая;
Радуйся, на благия деяния нас наставляющая;
Радуйся, Пресвятая Богородице Дево, Свенская Похвало и наше присное утешение.
Кондак 13
О, Всепетая наша Мати, Преславная Владычице! Приими сия похвалы и моления от скверных устен и нечистаго сердца нами возносимыя, сохрани обитель Твою, грехи нашими оскверненную, собери нас расточенных и сподоби в чине Ангельстем достигнути Небеснаго Царствия, и вкупе с преподобными Антонием и Феодосием, и всеми угодники Божиими прославляти Тя вечно, нашу Матерь и Сына Твоего и Бога и воспевати Ему песнь: Аллилуиа.
(Этот кондак читается трижды, затем икос 1 и кондак 1)
МОЛИТВА
О, Пресвятая и Пренепорочная Дево Богородице, наша Свенская Похвало и украшение, державный покрове Святаго места сего, Истинная Владычице избраннаго удела Своего. Приими нас недостойных раб Твоих, убогое моление, с верою и любовию приносящих, пред чудным образом Твоим, да посетиши милостивно греховное житие наше, просвещающе его светом покаяния, осени нас, обремененных скорбми многими, Твоею небесною радостию, сподоби нас присно славити Тя в мире и благочестии на месте святем сем, да без порока прешедше путь жития нашего, помощию Твоею достигнем вечнаго вселения во светлости святых и преподобных отец наших Кукши, Олега и Поликарпа Брянских и всех угодников Божиих, и едиными усты и сердцем воспоем Тя с Предвечным Сыном Твоим и Безначальным Его Отцем и Пресвятым, Животворящим, Всеблагим и Единосущным Его Духом во веки веков. Аминь.
ТРОПАРЬ
Тропарь, глас 4-й
Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием:
Радуйся, Благодатная, Печерская похвало.
Кондак, глас 3
Дева днесь невидимо предстоит в церкви и с лики Печерских отцев молится о нас, благоговейно величающих Ея безмерную милость, к роду нашему явльшуюся в чудном образе Ея, обитель Печерскую укрошающем.
Величание
Величаем Тя Пресвятая Дево, и почитаем святую икону Твою, юже от лет древних во обителей Свенстей прославила еси.
КАНОН
Пресвятей Богородице в честь иконы Ея Свенской - Почаевской
Тропарь, глас 4-й
Днесь светло торжествует Печерская обитель и радуется явлением образа Богоматере безмерный лик Печерских отцев, с нимиже и мы непрестанно вопием: радуйся, Благодатная, Печерская похвало.
Канон, глас 8-й
Песнь 1
Ирмос: Колесницегонителя фараоня погрузи чудотворяй иногда Моисейский жезл, крестообразно поразив и разделив море, Израиля же беглеца, пешеходца спасе, песнь Богови воспевающа.
Припев: Пресвятая Богородице, спаси нас.
Помощница и Покровительница еси обители Печерския, Дево Чистая, помози нам выну прославити Тя и разрешение прегрешений подаждь, молимся, Всенепорочная.
Пресвятая Богородице, спаси нас.
Владетель земли Черниговския Роман зрения лишися и, уведев о чудесех, от иконы Твоей Печерския бывших, прилежно моляшеся Тебе.
Слава: Архимандрит Печерский, внемля прошению Боголюбиваго Романа, совещашеся с братиею и отпусти святую Твою икону со иереем в ладии по Десне реце.
И ныне: Ангельское пение подобаше приносити Тебе, Матери Божией, Творца бо всех родила еси странно, но и от нас приими, Владычице, смиренныя сия похвалы.
Песнь 3
Ирмос: Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.
Пресвятая Богородице, спаси нас.
Утверди сердца наша во уповании на Тя, Пречистая Госпоже, яко утвердиша веру Романа, раба Твоего, да вопием: несть свят, яко Господь, и несть праведен, яко Бог наш.
Пресвятая Богородице, спаси нас.
Утру бывшу, иконы Твоея не обретеся в ладии, и, обретше ю на древе, вверху брега, радовашеся.
Слава: О сем дивном Твоем смотрении возвестиша Боголюбивому Роману, и сей, радости и умиления исполненный, от глубины сердечныя со слезами моляшеся Тебе, темже и наша во умилении приносимыя похвалы и прошения не презри.
И ныне: О Пречудная Владычице Богородице, Мати Христа Бога нашего, – рече слепый владетель, – даруй ми прозрети, да вижу свет и лицезрею чудный образ Твой.
Господи, помилуй (трижды).
Седален, глас 4-й
Егда явися образ Твой, Пречистая, в церкви Печерстей, тогда воспеша Ти вси, видевшии чудо сие, с ними же и мы, ведуще в явлении сем сугубую благодать в обители нашей, радостно взываем Ти и любовию чтим лик Пречистый Твой, Богообрадованная, присно нас снабдевающая любовию Своею.
Слава, и ныне: Светлое днесь Госпожи нашея Пресвятыя наста торжество, веселися, пречудный Алипие со иноки Печерстими, да ликовствуют вси боголюбивии собори: созывает бо нас Пресвятая Богородица прославити чудную Свою икону, лучами милости не токмо обитель Печерскую, но и землю Брянскую просвещающую, темже, радующеся, вси вопием: спаси ны, Дево Чистая.
Песнь 4
Ирмос: Ты моя крепость, Господи, Ты моя и сила, Ты мой Бог, Ты мое радование, не оставль недра Отча и нашу нищету посетив. Тем с пророком Аввакумом зову Ти: силе Твоей слава, Человеколюбче.
Пресвятая Богородице, спаси нас.
Боголюбивый Роман, якоже иногда Закхей, радости исполнь, вопияше Тебе, Пречистая; елика и доле узрю с места сего на все четыре страны, толико придам к дому Твоему и созижду храм и обитель, идеже Ты возлюбила место сие.
Пресвятая Богородице, спаси нас.
Егда приближися к древу, идеже бе икона Твоя, паки сей раб Твой вопияше Тебе: Пресвятая Владычице, услыши глас молитвы моея и даруй свет очам моим.
Слава: Услышавши сие прилежное моление раба Твоего, Пречистая Владычице, абие исполнила еси прошение Его; тако внемли мольбам и нас, смиренных и недостойных.
И ныне: Зряше сие дивное знамение милости Твоея, архиерей земли тоя, иноцы и вси людие радости исполнишася и восхвалиша Тя.
Песнь 5
Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.
Пресвятая Богородице, спаси нас.
Виждь, Преблагословенная, от нощи утренюющих чад паствы Твоея, ныне окружающих честную и достохвальную икону Твою, величающих безмерную Твою милость и просящих разрешение грехов и жития исправление, не отрини нас от светоноснаго лика Твоего.
Пресвятая Богородице, спаси нас.
Архиерей земли Брянския, прием в руце свои от древа чудную икону Твою, благоговейно облобыза ю и молебныя пения воспе Тебе.
Слава: Сия честная икона Твоя, от Печерския обители принесенная и от руки преподобнаго Алипия начертанная, благословение святыя Лавры – дома Твоего, на землю Брянскую излияша, и мы, сему радующеся, благодарственными словесы воспеваем Тя.
И ныне: Боголюбивый князь Роман, благодарения Тебе, Всечистая, исполнь, храм во имя Успения Твоего сооруди и обитель иноческую учреди, да непрестанно славословится величие Твое.
Песнь 6
Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.
Пресвятая Богородице, спаси нас.
Слава иконы Твоея, от обители Печерския принесенная, озаряше не токмо землю Брянскую, но и до града Москвы достигоше, сего ради вопием Ти: радуйся, всея земли нашея похвало.
Пресвятая Богородице, спаси нас.
Три лета икона Твоя, Владычице, пребываше во граде Москве и абие со славою принесена бысть во обитель Свенскую, мы же ныне прославляем Тя, сего ради невредимы нас сотвори.
Слава: Честная Твоя икона явися воистинну покров державный людем Твоим, яко не токмо иноцы Печерстии, но и людие дальнии обретоша Твою помощь и заступление.
И ныне: В лютое лето нашествия дванадесяте язык людие града Брянска изнесоша честную икону Твою Печерскую и со слезами многими моляхуся, Твоего заступления ищуще.
Господи, помилуй (трижды). Слава, и ныне:
Кондак, глас 3-й
Дева днесь невидимо предстоит в церкви и с лики Печерских отцев молится о нас, благоговейно величающих Ея безмерную милость к роду нашему, явльшуюся в чудном образе Ея, обитель Печерскую украшающем.
Икос
Огради моя помышления, Пречистая, и Небесным Твоим благословением подвигни мя достойно воспети славу Твою на месте святем сем, да, надеяся на милость Твою, дерзну убогим языком воззвати к Тебе:
Радуйся, Печерская славо, от лет древних нас освящающая;
Радуйся Небесная Игумения обители нашей, присно зде пребывающая любовию и милосердием;
Радуйся, упование и крепость рабов Твоих, на месте сем служащих Ти;
Радуйся, незримо нас благодатию осеняющая в образе Твоем, обитель Печерскую украшающем.
Песнь 7
Ирмос: Божия снизхождения огнь устыдеся в Вавилоне иногда. Сего ради отроцы в пещи, радованною ногою, яко во цветнице, ликующе, пояху: благословен еси, Боже отец наших.
Пресвятая Богородице, спаси нас.
Людие, обретше дивное заступление от Твоея пречистыя иконы, Печерскою именуемыя, хвалебными гласы воспеваху: отец наших Боже, благословен еси.
Пресвятая Богородице, спаси нас.
В пещи искушений и бед опаляемых ороси, Богомати, струями Твоих щедрот, якоже древле явила еси помощь рабом Твоим, внегда врази ослеплени быша и вся сокровища во обитель возвратиша, да зовем велегласно: отец наших Боже, благословен еси.
Слава: Якоже избавила еси некогда игумена Мартиниана с братиею от смерти внезапныя, тако и нас, грешных, в покаянии зовущих, услыши и умилостиви Сына Твоего, да зовем Ему: отец наших Боже, благословен еси.
И ныне: Ты – веселие в обителех Твоих живущих и градов древних утешение и похвала, Дево Марие, Препетая и Превозносимая во веки.
Песнь 8
Ирмос: Седмерицею пещь халдейский мучитель Богочестивым неистовно разжже, силою же лучшею спасены, сия видев, Творцу и Избавителю вопияше: отроцы, благословите, священницы, воспойте, людие, превозносите во вся веки.
Пресвятая Богородице, спаси нас.
Пойте, иноцы Печерстии вкупе с братиею Свенскою, прославляй, земле Киевская и Брянская, Благую Владычицу, иконою Своею источающую струи чудес и благодеяний, мы же хвалим, благословим, покланяемся Ти, Богородице, поюще и превозносяще во вся веки.
Слава: Дивныя знамения милости от иконы Твоея Печерския источила еси, Владычице: духов злых отгнала еси отроковице Екатерине, якоже Роману, зрение даровала еси, сего ради превозносим Тя во вся веки.
И ныне: Явление иконы Твоея сердца иноков, в посте и молитве подвизающихся, возвеселило есть, и тем горшее устремление к Небесному Царствию им внушило есть, тако и нас, немощных, ускори на подвиги, да превозносим Тя во вся веки.
Песнь 9
Ирмос: Ужасеся о сем Небо, и земли удивишася концы, яко Бог явися человеком плотски и чрево Твое бысть пространнейшее Небес, Тем Тя, Богородицу, Ангелов и человек чиноначалия величают.
Пресвятая Богородице, спаси нас.
Приидите вси, благодарственными песньми возвеличим Матерь Божию и к дивному Ея образу благоговейно припадем, положившую с нами завет милости, прославим Обрадованную воскресением Сына Своего.
Пресвятая Богородице, спаси нас.
Богородице Дево, упование христианом, пробави и нашему роду милости Твоя, бывшия отцем нашим во обители сей, разори совет нечестивых, возстающих на ны, и сей дом Твой преславно соблюди.
Слава: Пресвятая Госпоже наша, поминая неисчетная Твоя благодеяния, имиже удивила еси обитель сию от лет древних, Тя, Матерь Божию, величаем.
И ныне: Святая обитель Печерская купно с дщерию своею по духу обителию Свенскою, днесь союзом любве совокуплени, яко всея твари честнейшую и земных всех славнейшую Тя, Богоотроковице, зряще на иконе Твоей Печерстей, ублажаем.
Фото иконы: http://phc.flybb.ru/viewtopic.php?p=2455
