Пантелеимон святой великомученик
и целитель
Фото иконы с сайта: http://www.magazin-ikon.ru/ob-ikonah/59-ikonopisec-dionisij
(27 июль / 9 августа)
С древнейших времен св. Пантелеймон считается покровителем врачей. Молитвы болящих, с верой обращенные к нему, приносят облегчение, исцеляют от физических и духовных недугов. Св. Пантелеймон жил во времена правления императора Максимиана в III веке н.э. в городе Никомидии Вифанской провинции. Известно, что отец его по имени Евсторгий был знатным человеком языческой веры, а мать Еввула исповедовала христианство. При рождении мальчика нарекли именем "Пантолеон", что значит "по всему лев", и лишь позднее, когда проявил он в полноте своей целительские и духовные дары, люди стали называть его "Пантелеймон" — то есть всемилостивый.
Земная жизнь св. Пантелеймона была кратковременной, он принял мученическую смерть, будучи еще совсем юным. Поэтому на иконах он и изображается в лике юноши. Но сколь сильное воздействие оказал он на современников, что остался в вечной памяти, как целитель, истинный христианин, принявший великое мучение, но не отказавшийся от своей веры, и, наконец, святой, то есть снискавший особую божественную благодать Святого Духа.
Жития Святых повествуют, что св. Пантелеймон получил прекрасное по тем временам образование. Он обучался эллинской мудрости, проявлял великолепные способности, отличался приятным характером и манерами, был доброго нрава, за что его любили окружающие. Мать воспитывала мальчика в христианских традициях, но рано умерла, и воспитанием сына стал заниматься отец, пытаясь приобщить ребенка к язычеству. Вероятно, в полной мере это ему не удалось, ибо "душа человека по природе своей христианка" (Тертулиан), и материнские уроки глубоко запали в душу еще в раннем детстве. Лекарскому искусству св. Пантелеймон учился у знаменитого врача Евфросина, услугами которого пользовался сам царь Максимиан, известный гонитель христиан. Царь вскоре обратил внимание на юношу и захотел сделать его в будущем своим придворным врачом.
Поворотным моментом в жизни св. Пантелеймона стала встреча с престарелым пресвитером по имени Ермолай. Старец подолгу беседовал, наставляя юношу, полюбив его как родного. Вместе с душеспасительными беседами, Пантелеймон получил, видимо, и какие-то советы в отношении целительства, которое может совершаться по истинной вере во Христа. Юноша желал проверить на практике это, но какое-то время не предоставлялось случая. Но однажды, идя от старца, св. Пантелеймон наткнулся на мертвого ребенка, который был ужален большой змеей. Сама змея лежала около умершего. Увидев это, юноша сперва испугался и отступил в ужасе назад, но потом сказал сам себе: "Сейчас надо испытать и узнать, истинно ли говорит старец Ермолай". И, возведя глаза к небу, он произнес: "Господь Иисус Христос, я недостоин призывать Тебя, но, если Ты желаешь, чтобы я стал рабом Твоим, то яви Свою силу и сделай так, чтобы по имени Твоему мальчик ожил, а ехидна стала мертвой". И чудо свершилось, мальчик встал живым, ехидна сдохла. Юноша со слезами на глазах стал прославлять и благодарить Бога, после чего крестился у старца Ермолая, оставаясь после крещения у него еще семь дней. Особенностью данного случая чудесного исцеления является то, что оно совершилось еще не по полной вере самого целителя и наряду с воскрешением младенца окончательно воскресило душу юного лекаря. Это был своеобразный аванс, если можно так выразиться, и в то же время высший знак доверия и любви к пожелавшему найти истину.
Спустя какое-то время происходит второй случай чудесного исцеления, который, так же, как и первый, излагается по Житиям Святых. На этот раз к Пантелеймону обратился слепец, окончательно отчаявшийся во врачах, так как на лечение истратил почти все состояние свое, а пользы не получил никакой. Несчастный, прослышав об искусстве врачевания юноши, стал просить его: "Умоляю тебя, помилуй меня, ослепшего, не видящего сладкого света: все врачи, находящиеся в этом городе, меня лечили, но не принесли никакой пользы". Между тем оказалось, что среди безуспешно лечивших врачей был и Ефросин — учитель св. Пантелеймона. Видя горячую веру несчастного, Пантелеймон берется его лечить и не только исцеляет физический недуг (наступает полное прозрение), но и воскрешает духовно, приобщая к истинной Христовой вере. Эпизод исцеления в "Житиях Святых" описан так: "Коснувшись очей слепца, св. Пантелеймон произнес: "Во имя Господа моего Иисуса Христа, просвещающего ослепленных, прозри и начни вид еть". Можно представить, сколько радости было у этого человека, вновь увидевшего свет. После исцеления бывший слепец (вместе с отцом св. Пантелеймона) принимает крещение. То, что исцеление произошло полное, а не только физическое, говорит тот факт, что исцеленный не откажется и в будущем от истинной веры и, как и излечивший его, примет за нее мученическую смерть.
После смерти отца св. Пантелеймон раздает все свое наследство бедным и нуждающимся, сам же продолжает помогать людям. "Ему послан был свыше дар исцеления, и он всегда бесплатно лечил больных не столько травами, сколько призыванием имени Иисуса Христа" ("Жития Святых"). "Он являлся врачом не только болезней, но и нищеты человеческой" (там же). Все больные из города и ближайших мест, видя такое удивительное искусство врачевания и бескорыстие, стекались за помощью к Пантелеймону.
Из-за зависти других врачей, по их наговорам и за приверженность к христианству, св. Пантелеймон был заключен императором в темницу. Его обвиняли в чародействе, волшебстве, отступлении от языческой веры предков. Мужественный юноша отстаивал христианскую веру и предложил императору устроить своеобразное состязание: принести любого безнадежного больного и предоставить его сначала придворным лекарям, исповедовавшим язычество. Император согласился. Тогда принесли расслабленного, то есть парализованного, больного, над которым тщетно лекари и жрецы призывали своих богов: кто Асклепия, кто Зевса, кто Диану. Помощи от них больной не получил никакой. Тогда Пантелеймон, помолившись, взял за руку страдающего и произнес: "Во имя Господа Иисуса Христа встань и будь здоров"... Больной тут же выздоровел и встал.
В бессильной злобе император приказал умертвить юношу, на что тот мужественно ответил: "Умереть за Христа для меня приобретение". Св. Пантелеймон принял мученическую смерть. Его тело строгали железными когтями, ребра опаляли горящими свечами, бросали в раскаленное олово, колесовали и, в конце концов, обезглавили. Свою смерть он встретил радостно, распевая псалмы.
АКАФИСТ
Кондак 1
Избранный страстотерпче Христов и врачу благодатный, туне подаяй недугующим исцеления, песньми восхваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих: Радуйся, великомучениче и целителю Пантелеимоне.
Икос 1
Ангела земнаго и небеснаго человека вемы тя, славный Пантелеимоне: ангельскою бо непорочностию и мученичеством украшен, преселися еси от земли на Небо, идеже со Ангелы и всеми святыми предстоя Престолу Господа славы, молися о нас, земных, почитающих тя звании сими:
Радуйся, светлосте благочестия;
Радуйся, преславный светильниче Церкви.
Радуйся, мучеников пречестных украшение;
Радуйся, верных в непоколебимом терпении утверждение.
Радуйся, юности преизрядная похвало;
Радуйся, поборниче Христов, в мужестве неодоленный.
Радуйся, произрастший в мире, премирен явивыйся;
Радуйся, ангеле во плоти, превосходяй смертных.
Радуйся, небожителю всеблаженный;
Радуйся, Божественного разума вместилище.
Радуйся, имже вера возвысися;
Радуйся, имже прелесть низложися.
Радуйся, великомучениче и целителю Пантелеимоне.
Кондак 2
Видя тя Владыка сосуд избран, возлюби души твоея доброту. Ты бо земную всякую сладость и славу презрев, венцем мученическим возжелел еси украситися, уязвлен Божественною любовию, и вдохновенно поя: Аллилуиа.
Икос 2
Разум богодухновен имея, о доблий воителю Пантелеимоне, изумил еси царя Максимиана мужеством души твоея и словесы, имиже дерзновенно проповедал еси Христа. Темже похваляюще дерзновение твое, глаголем ти сице:
Радуйся, угрозы Максимиана презревый;
Радуйся, советом нечестивых непокоривыйся.
Радуйся, насаждение истиннаго богопочитания;
Радуйся, искоренение демонскаго служения.
Радуйся, неистовства мучителей изобличителю;
Радуйся, идольския прелести низложителю.
Радуйся, разгнавый нечестивых соборища;
Радуйся, пременивый тленная на Небесная.
Радуйся, собеседниче невещественных Ангелов;
Радуйся, сликовствователю многострадальных святых.
Радуйся, имже сатана посрамися;
Радуйся, имже Христос прославися.
Радуйся, великомучениче и целителю Пантелеимоне.
Кондак 3
Силою Вышняго, дарованную тебе, и крепкие терпением твоим обезсилил еси мучителеву дерзость, мужественный победоносче: огня, зверей, колеса не убоявся и мечем усечен во главу, венец победы приял еси от Христа Бога, взывая Ему Аллилуиа.
Икос 3
Имущи обитель твоя вседрагую главу твою, богомудрый страстотерпче, яко превеликое сокровище, радости исполняется о сем и, любовию воспевающи данную тебе от Бога благодать исцелений, благодарно зовет ти:
Радуйся, Никомидии светильниче всесветлый;
Радуйся, чтущей тя обители страже неусыпный.
Радуйся, имже охладе безбожие;
Радуйся, имже возрасте богопознание.
Радуйся, светлая страстотерпцев славо;
Радуйся, радостное православных слышание.
Радуйся, исцелений благодатный источниче;
Радуйся, дарований великих вместилище.
Радуйся, благовонное миро, облагоухающее души;
Радуйся, яко помогаеши призывающим тя.
Радуйся, слепым зрение даровавый;
Радуйся, хромым благошествие устроивый.
Радуйся, великомучениче и целителю Пантелеимоне.
Кондак 4
Бурею помышлений многобожия одержим, нечестивый царь смутися, увидев от завиствовавших тебе врачев, яко всякия неисцельныя недуги целиши ты Именем Христа. Мы же, с веселием славяще дивнаго в тебе Бога, вопием Ему: Аллилуиа.
Икос 4
Слышавше никомидийстии людие о великом сострадании твоем к страждущим и о безмездном врачевании от всяких болезней, устремишася вси к тебе, с верою во врачующую благодать, в тебе сущую, и приемлюще скорая исцеления от всяких болезней, прославляху Бога и тебе величаху, всемилостиваго целителя своего, зовуще ти:
Радуйся, помазанный миром благодати;
Радуйся, храме Бога освященный.
Радуйся, великая благочестивых славо;
Радуйся, твердая озлобляемых стено.
Радуйся, мудрых превосходяяй разумом;
Радуйся, верных осияваяй мысли.
Радуйся, Божественных даров приятелище и многообразных нам милостей Господних источниче;
Радуйся, скорый помощниче страждущим.
Радуйся, обуреваемых пристанище;
Радуйся, заблуждших наставниче.
Радуйся, болящих туне врачуяй;
Радуйся, обильно исцеления источаяй.
Радуйся, великомучениче и целителю Пантелеимоне.
Кондак 5
Чудо преславное сотвори с тобою Господь, егда чрез служителя Своего Ермолая призва тя в чудный Свой свет. Ехидною бо велиею угрызенно умершее отроча по молитве твоей ко Христу абие оживе и воста здраво. Познав убо Жизнодавца всех Истиннаго Бога, с твердою верою воззвал еси Ему: Аллилуиа.
Икос 5
Узре свет слепый, емуже с призыванием Имене Христова прикоснулся еси ты, славне. Ермолаем бо пресвитером просвещен, отринув отеческое многобожие, восприял еси матернее благочестие, имже и отца просветил еси. Сего ради тебе, славному угоднику Божию и чудному врачу, взываем:
Радуйся, к Богу велие рачение имеяй;
Радуйся, присногорящий огню Божественныя любве.
Радуйся, деятельный послушателю священных поучений Ермолаа;
Радуйся, последовавый советам матере твоея Еввулы.
Радуйся, яко вся раздал еси, да Христа приобрящеши;
Радуйся, любовь к миру любовию Божиею победивый.
Радуйся, яко вместо сладких мира за Христа лютая страдания приял еси;
Радуйся, яко общник сотворился еси Страстем Христовым.
Радуйся, восторжествовавый над всеми страстьми;
Радуйся, украсивыйся благодатным безстрастием.
Радуйся, исполняяй радости притекающия к тебе;
Радуйся, туне исцеляяй всех благодатию Христовою.
Радуйся, великомучениче и целителю Пантелеимоне.
Кондак 6
Проповедник истины явися просвещенный тобою телесне и душевне слепец: подобно бо евангельскому слепцу, дерзновенно пред всеми исповеда Света Истиннаго Христа, просвещающа всякаго человека, нечестиваго же царя и боги языческия укорив, чрез мечное усечение взыде к немерцающему свету на Небеси пети Богу: Аллилуиа.
Икос 6
С светлым лицем представ судилищу цареву, дерзновенно взывал еси, преблаженне, во услышание всех: всецелебная сила моя и слава Христос есть Истинный Бог, Владыка всех, мертвыя воскрешаяй и всяк недуг отгоняяй. За таковое исповедание ублажающе тя, глаголем:
Радуйся, уста громогласная Божества Христова;
Радуйся языче медоточный, вещаяй Его домостроительство.
Радуйся, ветие превысшаго Богословия;
Радуйся, сеятелю мудрый благочестия.
Радуйся, сладкозвучная веры свирель;
Радуйся, славный проповедниче Православия.
Радуйся, прежде смерти явивый дивная;
Радуйся, по смерти совершаяй чудная.
Радуйся, зрителю славы Христовой;
Радуйся, послушателю молящихся тебе.
Радуйся, подателю милости тоя требующим;
Радуйся, ходатаю благ почитающим память твою.
Радуйся, великомучениче и целителю Пантелеимоне.
Кондак 7
Миро излияся на душу твою, богомудрый целебниче, от Утешителя Духа; темже по смерти честныя останки твоя, благоуханием своим страстей злосмрадие отгоняя, исцеление подают вопиющим верою Богу: Аллилуиа.
Икос 7
Егда узреша идольстии чтители многолетна расслабленна, молитвою твоею, святе, воздвигнута и ходяща, мнози увероваша во Христа; жрецы же бесовстии, завистию снедаеми, подвигоша царя на ярость. Тебе убо нещадно за Христа стружему и опаляему бывшу, со умилением зовем:
Радуйся, наслаждения земная презревый;
Радуйся, благ вещественных превысший.
Радуйся, яко вся красная мира сего ни во что же вменил еси;
Радуйся, яко славу скоротекущую с себе отрясл еси.
Радуйся, неуловим пребывый ловления Велиара;
Радуйся, победивый мучителя коварства.
Радуйся, не пощадивый за Христа жизни своея;
Радуйся, враг явивыйся враждебныя плоти.
Радуйся, многобожия широту утеснивый;
Радуйся, Божественною силою идолы поправый.
Радуйся, острейшая стрело, язвящая враги;
Радуйся, предстателю, заступаяй верующия.
Радуйся, великомучениче и целителю Пантелеимоне.
Кондак 8
Страннолепно являшеся тебе Господь, ободряя и соблюдая в мучениях за Имя Его: во образе бо пресвитера Ермолая, клокочущее олово, в неже ввержен был еси, охлади, и в мори отрешив велий камень от выи твоея, изведе неврежденна на землю. Ты же, паки представ пред царя, торжественно пел еси Христу Богу: Аллилуиа.
Икос 8
Весь умне на Небеси водворяяся, и низу на земли сущих не оставляеши, сопребывая с нами всечестною главою твоею, великий страстотерпче Христов, приемля от Господа и подая просвещение и освящение вопиющим тебе таковая:
Радуйся, премудросте Божественныя исполненный;
Радуйся, промышления Божия о нас таинниче.
Радуйся, богомудренных умов услаждение;
Радуйся, боголюбивых душ увеселение.
Радуйся, пресветлый Христов бисере;
Радуйся, освященный душею и телом.
Радуйся, во дворех перворожденных на Небеси вселивыйся;
Радуйся, в присноблаженных обитаяй чертозех.
Радуйся, света Троическаго зрителю;
Радуйся, в молитвах к Богу теплый о нас предстателю.
Радуйся, просвещение душам подаваяй;
Радуйся, скорбящим утешение ниспосылаяй.
Радуйся, великомучениче и целителю Пантелеимоне.
Кондак 9
Всякое естество удивися, Пантелеимоне, сиянию в тебе благодати и богатству добродетелей: ангелоподобней чистоте твоей, великому мужеству в лютых страданиях, крепкой любве ко Христу и многому состраданию к людем, в нихже твориши преславная, во еже пети: Аллилуиа.
Икос 9
Ветия многовещанныя не возмогут по достоянию восхвалити борения твоя, славный добропобеднице, како непобедимою силою Божиею юный леты победи древняго и исконнаго врага и посрами идольскую прелесть. Мы же, удивления исполненнии, зовем ти:
Радуйся, радостное зрелище Ангелов;
Радуйся, благоговейное удивление человеков.
Радуйся, кровь за Христа излиявый и в смерти млеко источивый;
Радуйся, тело за Него мученической смерти предавый.
Радуйся, исповедничества правило;
Радуйся, доблий воине Царя царей.
Радуйся, тьмы державна победивый;
Радуйся, победою твоею Небесных и земных обвеселивый.
Радуйся, Горняго мира обитателю блаженный;
Радуйся, дольняго мира мудрый странниче.
Радуйся, древо, украшенное плодами благодатных дарований;
Радуйся, носяй добропобедныя ветви.
Радуйся, великомучениче и целителю Пантелеимоне.
Кондак 10
Сострадания исполнен, яко истинный подражатель Подателя милости Господа, честный страдальче, Пантелеимоном сиесть, Всемилостивым, от Него проименован еси, на вся притекающия к тебе милость изливая, юже и нам неоскудно источай, о тебе вопиющим Богу: Аллилуиа.
Икос 10
Стену тя тверду обрет мучитель, никиими же муками победиму, покусися сокрушити крепость твою зубы зверей и остриями мучилищнаго колеса, обаче и в сем ничтоже успе: сила бо Христова лютость зверей укроти, а страшное коло, на немже обращаемо бе тело твое, абие сокрушися. Тебе убо непобедимому страстотерпцу зовем:
Радуйся, честное Христово избрание;
Радуйся, непорочное Богови благоухание.
Радуйся, твердый адаманте Церкве;
Радуйся, непоколебимый столпе, досязаяй до Небесе.
Радуйся, звери видимыя укрощаяй;
Радуйся, драконов невидимых сокрушаяй.
Радуйся, обагренный твоею за Христа кровию срастворенною млеком;
Радуйся, неувядаемыя приемый венцы.
Радуйся, радость причинивый Ангелом и человеком;
Радуйся, прославленный Богом на Небеси и на земли.
Радуйся, небожителю, ликовствуяй с мученики;
Радуйся, насыщаяйся лицезрением Христа пресладким.
Радуйся, великомучениче и целителю Пантелеимоне.
Кондак 11
Песнь исходную приносим твоему за Христа заколению священному, в немже вместе с кровию млеко истече от тебе, великомучениче, и масличина, под неюже усечен был еси, исполнися целительных плодов. Темже Христу, дивно прославляющему славящия Его, тепле вопием: Аллилуиа.
Икос 11
Светозарная луча был еси, богомудре, во тьме многобожия седящим, путеводящая к Солнцу Правды Христу Богу, Емуже молися, во свете заповедей Его присно пребывати и нам, сицевая радостная тебе приносящим:
Радуйся, пресветлая звездо, на мысленной тверди блистающая;
Радуйся, луча, христоименитым людем светящая.
Радуйся, таинственно облиставаемый от Солнца Христа;
Радуйся, умне землю обтекаяй.
Радуйся, селение красное Пресвятаго Духа;
Радуйся, сосуде пречестный, изливаяй исцеления.
Радуйся, чистоты сокровище;
Радуйся, милости тезоимените.
Радуйся, Царствия Небеснаго наследниче;
Радуйся, вечныя славы сопричастниче.
Радуйся, предстателю бедствующим в мори житейстем;
Радуйся, безсребренниче, помогаяй призывающим тя с верою.
Радуйся, великомучениче и целителю Пантелеимоне.
Кондак 12
Благодати обилие приял еси, треблаженне, по обилию любве твоея ко Христу Богу. Иже и яви тя многоцелебным источником, безмездно врачующим душевныя и телесныя болезни притекающих к тебе с верою и Богу вопиющих: Аллилуиа.
Икос 12
Поюще многострадальныя подвиги твоя за Христа, славный страстотерпче, хвалим долготерпение твое, ублажаем мученическую кончину, почитаем и священную память твою, заступниче наш и целителю, и в похвалу сицевая тебе зовем:
Радуйся, благочестия трубо благозвучная;
Радуйся, мечу, посекаяй нечестие.
Радуйся, строганный на древе за Распростершаго руце Свои на древе Крестнем;
Радуйся, яко опаляемь за Него, прелести пещь погасил еси.
Радуйся, язвами твоими враги уязвивый;
Радуйся, кровию твоею токи идольския крове изсушивый.
Радуйся, в кипящее олово вверженный за Христа;
Радуйся, погруженный за Имя Его в водах морских.
Радуйся, промышлением Божиим неврежден в сих пребывый;
Радуйся, яко чрез огнь и воду мучения вшел еси в покой Небесный.
Радуйся, изливаяй неизсякаемыя струи милости верным;
Радуйся, благосострадательный врачу, исцеления благодать подаваяй.
Радуйся, великомучениче и целителю Пантелеимоне.
Кондак 13
О многострадальный и предивный страстотерпче Христов и целителю наш Пантелеимоне! Милостиво прием сие малое от нас приношение, от многообразных недугов исцели ны и предстательством твоим сохрани от враг видимых и невидимых и вечнаго мучения избавитися нам Господа умоли, да во Царствии Его выну воспеваем: Аллилуиа.
(Этот кондак читается трижды, затем икос 1 и кондак 1)
МОЛИТВА ПЕРВАЯ
О преславный мучениче и доблий воине Небеснаго Царя, Пантелеимоне всеблаженне, милостиваго Бога преизрядный подражателю, иже Христа на земли дерзновенно исповедав, и многообразныя за Него муки претерпев, неувядаемый приял еси венец на небеси, идеже вечнаго наслаждаешися блаженства, и со дерзновением Престолу Трисолнечнаго Божества предстоиши! К твоему христоподражательному состраданию по Бозе прибегаем вси мы, грешнии, и всеусердно молим тя, теплаго заступника и предстателя нашего: не престай призирати на нас, сущих в нуждах и скорбных обстояниих, и твоею молитвенною помощию и цельбоподательною силою избавляй нас присно от лютых зол, всегубительства и всякия иныя беды и болезни. Ты бо приял еси, святе, неоскудную благодать исцелений от Спаса нашего Иисуса Христа за твердую твою к Нему веру, при чистом и непорочном житии запечатленную мученичеством и многопобедною твоею кончиною, в нейже по данной ти благодати и наименован от Христа Пантелеимоном, милости тезоименитым, милующим всех, притекающих к тебе в скорбех и болезнех. Сего ради, ведуще тя милостиваго ко всем помощника и целителя, с верою взываем к тебе: услыши нас и богоприятным ходатайством твоим подавай нам вся благопотребная в житии сем и нужная к вечному спасению. Мученическим же дерзновением твоим умоли милостиваго Бога, да помилует нас, грешных и недостойных, по велицей милости Своей, да избавит от труса, потопа, огня, меча и всякаго праведнаго гнева и прещения, благовремение подвизая нас к очистительному и умилостивительному во гресех наших покаянию, ради множества щедрот Своих, да подаст всем нам безбедное, тихое и богоугодное житие и всех нас от враг видимых и невидимых да сохранит благодатию Своею и непобедимым ополчением Ангел Своих, имиже ограждаеми и наставляеми да поживем в веце сем в покаянии, чистоте и в творении богоугодных дел: да сподобимся же твоим теплым предстательством христианскую кончину улучити безболезненну, мирну, непостыдну, и избавится от козней воздушных князей тьмы и вечныя муки, и тако быти наследниками безконечнаго, всеблаженнаго Царствия. Ей, угодниче Божий! Не престай молитися за ны грешныя, да твоим ходатайством временных и вечных бед избавлени, величаем тебе, заступника нашего и молитвенника, и вечно прославляем общаго Владыку, и Господа нашего Иисуса Христа, Емуже подобает всякая слава, честь и поклонение со Безначальным Его Отцем и Пресвятым Духом, ныне и присно и во веки веков. Аминь.
МОЛИТВА ВТОРАЯ
О великий Христов угодниче и преславный целебниче, великомучениче Пантелеимоне! Душею на Небеси Престолу Божию предстояй и триипостасныя Его славы наслаждаяйся, телом же и ликом святым на земли в Божественных храмех почивали и данною ти свыше благодатию различная чудеса источаяй, призри милостивным твоим оком на предстоящия люди, честней твоей иконе умильно молящияся и просящия от тебе целебныя помощи и заступления: простри ко Господу Богу нашему теплыя твоя молитвы и испроси душам нашим оставление согрешений. Се бо мы, за беззакония наша не смеюще возвести очеса наша к высоте небесней, ниже вознести глас молебный к Его в Божестве неприступней славе, сердцем сокрушенным и духом смиренным тебе, ходатая милостива ко Владыце и молитвенника за ны, грешныя, призываем, яко ты приял еси благодать от Него недуги отгоняти и страсти исцеляти. Тебе убо просим: не презри нас, недостойных, молящихся тебе и твоея помощи требующих. Буди нам в печалех утешитель, в недузех лютых страждующим врач, напаствуемым скорый покровитель, очесем недугующим прозрения датель, ссущим и младенцем в скорбех готовейший предстатель и исцелитель: исходатайствуй всем вся, яже ко спасению полезная, яко да твоими ко Господу Богу молитвами получивше благодать и милость, прославим всех благих Источника и Дароподателя Бога, Единаго в Троице Святей славимаго Отца и Сына и Святаго Духа ныне и присно и во веки веков. Аминь.
МОЛИТВА ТРЕТЬЯ
О, великий угодниче Христов, страстотерпче и врачу многомилостивый Пантелеимоне! Умилосердися надо мною, грешным рабом, услыши стенание и вопль мой, умилостиви Небеснаго, Верховнаго Врача душ и телес наших, Христа Бога нашего, да дарует ми исцеление от недуга, мя гнетущаго. Приими недостойное моление грешнейшаго паче всех человек. Посети мя благодатным посещением. Не возгнушайся греховных язв моих, помажи их елеем милости твоея и исцели мя; да здрав сый душею и телом, остаток дней моих, благодатию Божиею, возмогу провести в покаянии и угождении Богу и сподоблюся восприяти благий конец жития моего. Ей, угодниче Божий! Умоли Христа Бога, да предстательством твоим дарует здравие телу моему и спасение души моей. Аминь.
МОЛИТВА ЧЕТВЕРТАЯ
Святый великомучениче и целителю Пантелеимоне, Бога милостиваго подражателю! Призри благосердием и услыши нас, грешных, пред святою твоею иконою молящихся.
Испроси нам у Господа Бога, Емуже со ангелы предстоиши на небеси, оставление грехов и прегрешений наших. Исцели болезни душевныя же и телесныя рабов Божиих, ныне поминаемых, зде предстоящих и всех христиан православных к твоему заступлению притекающих.
Се бо мы, по грехом нашим люте одержимы есмы многими недуги и не имамы помощи и утешения, к тебе же прибегаем, яко дадеся ти благодать молитися за ны и целити всяк недуг и всяку болезнь.
Даруй убо всем нам святыми молитвами твоими здравие и благомощие души и тела, преспеяние веры и благочестия и вся к житию временному и ко спасению потребная. Яко да, сподобившеся тобою великих и богатых милостей, прославим тя и Подателя всех благ, дивнаго во святых, Бога нашего, Отца и Сына и Святаго Духа. Аминь.
МОЛИТВА ПЯТАЯ
(благодарственная, по исцелении от болезни)
Святый великомучениче, целителю и чудотворче Пантелеимоне, всеизрядный угодниче Божий и молитвенниче присный христиан православных! Достойно наречен еси Пантелеимоном, еже есть всемилостивый, яко приняв от Бога благодать молитися за ны и болезни целити, ты богатно подаеши всем, к тебе притекающим, различная исцеления и вся к жизни временней и ко спасению потребная. Сего ради и мы, недостойнии, сподобившеся твоея милости, паки пред святою твоею иконою прибегаем к тебе, и прославляюще тя, яко искренняго угодника Божия, нашего же вернаго молитвенника и исцелителя, усердне благодарим тя и Подателя всех благ Господа Бога нашего о великих благодеяниих, от Него тобою нам бывших.
Приими убо милостивно малое сие молитвенное благодарение наше, зане не имамы ино что по достоянию воздати тебе, и прочее время живота нашего не лиши нас, немощных и грешных, твоея помощи и молитвеннаго ходатайства у Господа Бога нашего, Емуже подобает всякая слава, благодарение и поклонение, Отцу и Сыну и Святому Духу, ныне и присно и во веки веков. Аминь.
ТРОПАРЬ
Тропарь, глас 3
Страстотерпче святый и целебниче Пантелеимоне, моли Милостиваго Бога, да прегрешений оставление подаст душам нашим.
Кондак, глас 5
Подражатель сый Милостиваго и исцелений благодать от Него прием, страстотерпче и мучениче Христа Бога, молитвами твоими душевныя наша недуги исцели, отгоня присно борца соблазны от вопиющих верно: спаси ны, Господи.
Величание:
Величаем тя, страстотерпче святый и целебниче Пантелеимоне, и чтим честная страдания твоя, яже за Христа претерпел еси.
КАНОН
(Святому великомученику Пантелеимону)
Тропарь, гл. 3
Страстотерпче святый и целебниче Пантелеимоне, моли милостиваго Бога, да прегрешений оставление подаст душам нашим.
КАНОН, глас 2-й
Песнь 1
Ирмос: Во глубине постла иногда фараонитское всевоинство преоруженная сила; воплощшееся же Слово всезлобный грех потребило есть: препрославленный Господь, славно бо прославися.
Припев: Святый великомучениче и целебниче Пантелеимоне, моли Бога о нас.
Подвигом, мучениче, добрым подвизався, и врач изряден быв, исцели болезни моя, и обдержащий огнь орошением твоим отжени, здравие ми совершенное подавая.
Святый великомучениче и целебниче Пантелеимоне, моли Бога о нас.
Болезней избави мя лютых, о Пантелеимоне, и належащую ми немощь вскоре от мене отжени, и конечное исцеление ми даруй, яко да заступника великаго верою ублажаю тя.
Слава: Целителю душам и телесем, исцели страсти моя лютыя, телесныя же и душевныя, притекшаго, о Пантелеимоне, под кров твой спасительный, мучениче Спасов, яко да хвалами ублажаю тя.
И ныне, Богородичен: Милосерда сущи, Чистая, яко благоутробное Слово Божие родившая, исцели недуг раба Своего, и скорую даруй цельбу и здравие, верою просящему Твоея милости.
Песнь 3
Ирмос: Процвела есть пустыня, яко крин, Господи, языческая неплодящая церковь, пришествием Твоим, в нейже утвердися мое сердце.
Святый великомучениче и целебниче Пантелеимоне, моли Бога о нас.
Разрушив многокозненное мучительство, страстотерпче, живот дающими о Христе подвигами, умерщвляющия страсти отжени от недугующаго зело, молитвою твоею.
Святый великомучениче и целебниче Пантелеимоне, моли Бога о нас.
Согнившей злыми помыслами и дел язвами душе моей, славне, посещением твоим даждь исцеление, и не остави мене погибнути окаяннаго, молю тя.
Слава: Безбожия пещь угасил еси течением кровей твоих, страстотерпче: темже ти молюся, огня болезни мя свободи.
И ныне: Низрину мя множество прегрешений, Чистая, в пучину недугов, но Сама, Чистая, окорми мя к тишине здравия, Богородице.
Песнь 4
Ирмос: Пришел еси от Девы, не ходатай, ни Ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.
Святый великомучениче и целебниче Пантелеимоне, моли Бога о нас.
Уврачуй неисцельно болящаго мя, безмездный врачу, от Бога дарование исцелений приемый, и не посрами мене, от моего упования с верою молящагося ти.
Святый великомучениче и целебниче Пантелеимоне, моли Бога о нас.
Умерщвляющия мя болезни, Пантелеимоне, лечбами твоими исцели, и ко здравию привлецы, яко да с радостию и веселием славлю тя, достоблаженне.
Слава: Глаголы моя болезненныя услыши, святе: вопию ти раб твой, якоже древле слепаго, исцели, молюся, отчаяннаго и ко аду приближшагося.
И ныне: Яко всех Владычице с верою Ти молимся, принеси моление Сыну Твоему и Богу нашему, да от обдержащей беды избавит раба Твоего, Чистая.
Песнь 5
Ирмос: Ходатай Богу и человеком был еси, Христе Боже: Тобою бо, Владыко, к светоначальнику Отцу Твоему, от нощи неведения приведение имамы.
Святый великомучениче и целебниче Пантелеимоне, моли Бога о нас.
Ты мертва древле воскресил еси, Пантелеимоне: такожде помози и сему рабу твоему, молимся ти, и совершенное исцеление тому вскоре даруй.
Святый великомучениче и целебниче Пантелеимоне, моли Бога о нас.
Целиши многих недуги, с верою к тебе притекающих: такожде и мене исцели, и не посрами моего упования, не постыди мя, мучениче Пантелеимоне.
Слава: Источник сый многих даров Духа, Пантелеимоне, утоли горесть болезни моея, и исцели, блаженне, люте разслабленнаго.
И ныне: Яко огнь снедает мя, Пречистая Владычице, недуг, от негоже избави мя, и спаси мольбами Твоими, яко Жизнь всех неизреченно рождшая.
Песнь 6
Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
Святый великомучениче и целебниче Пантелеимоне, моли Бога о нас.
Блаженных надежд получив дарование, и мою надежду исполни, внезапу спаси мя от обдержащия мя смертныя болезни, Пантелеимоне.
Святый великомучениче и целебниче Пантелеимоне, моли Бога о нас.
Море обуревает мя недугов, пристанище тя тихое яви ми, святе, твою спасительную помощь низпослав, вопиет ти раб твой.
Слава: Уныния, блаженне, разжжения и пренемогания тяготу облегчи к твоему заступлению притекающаго, Пантелеимоне.
И ныне: Теплую Твою, Пречистая, помощь одожди рабу Твоему, люте горящему грехи, и телесными недуги одержимому, Препетая.
Песнь 7
Ирмос: Богопротивное веление беззаконующаго мучителя высок пламень вознесло есть; Христос же простре благочестивым отроком росу духовную, Сый благословен и препрославлен.
Святый великомучениче и целебниче Пантелеимоне, моли Бога о нас.
Пребыл еси неподвижим во время мучения, Пантелеимоне: темже люте одержимаго лютыми болезньми и бедствующа исцели раба твоего, да верою славит заступление твое.
Святый великомучениче и целебниче Пантелеимоне, моли Бога о нас.
Милостию видев тя богатящася Бог Многомилостивый, мудре Пантелеимоне, благодать ти дарова подавати исцеления. Темже ти молюся прилежно: ума моего недуги исцели.
Слава: Узы врага злодея духовным оружием, мудре, расторгл еси. Темже молимся ти: недугом связана и бедствующаго исцели болящаго, да присно почитаем заступление твое.
И ныне: Исцели сокрушение человеческое, Пречистая, рождшая Бога неизреченно: Того убо моли яко Преблагаго, исцеление ми подати, Дево, рабу Твоему, люте страждущему.
Песнь 8
Ирмос: Пещь иногда огненная в Вавилоне действа разделяше Божиим велением, халдеи опаляющая, верныя же орошающая, поющия: благословите, вся дела Господня, Господа.
Святый великомучениче и целебниче Пантелеимоне, моли Бога о нас.
Дан был еси верным ограждение, стена и врачевство, святе, изрядное, темже моя язвы душевныя, мудре, исцели и облегчи болезни телесныя, Пантелеимоне, люте обдержащия мя.
Слава: К твоему милостивому покрову притекающим отъемлеши всяку болезнь: и ныне посети прибегающа с верою к тебе, святе, раба твоего, и избави многообразных недуг.
И ныне: Направи, Чистая, к пристанищу здравия недугом бедствующа, и во глубину погружаема, и не даждь погибнути ми, Божественной помощи Твоей любовию ищуща, Еюже вернии спасаются.
Песнь 9
Ирмос: Безначальна родителя Сын, Бог и Господь, воплощся от Девы, нам явися, омраченная просветити, собрати расточенная. Тем Всепетую Богородицу величаем.
Святый великомучениче и целебниче Пантелеимоне, моли Бога о нас.
Яко свет, яко солнце возсиял еси, блаженне, лучами исцелений всех просвещая, темже с верою молимся ти: от недуг и тяжкия тьмы вскоре избави люте обуреваемаго.
Святый великомучениче и целебниче Пантелеимоне, моли Бога о нас.
Тебе ныне молим, святый Пантелеимоне, тебе припадаем и тепле молимся: смертною болезнию одержимаго от навета лютых недуг, посетив, исцели, да любовию ублажает тя.
Слава: День возсияй здравия рабу твоему, слежащему в нощи лютаго недуга, да благодарственным сердцем приидет в честный ти храм, твою исповедуя благодать, Пантелеимоне.
И ныне: Благая Владычице! Манием Твоим милосердым приосени огорченнаго мя грехи многими, и обдержащей мя болезни и немощей избави, да благодарственно ублажаю Тя, Владычице, Юже по достоянию блажат вси роди.
