Преподобный Герман Соловецкий – Чудотворец
(30 июля /12 августа)
Преподобный Герман был родом из города Тотьмы Пермской епархии. Благочестивые родители не могли научить его грамоте, но воспитали ум и сердце сына в строгих правилах христианского благочестия. С юных лет, стремясь к богоугождению и спасению, он по достижении зрелого возраста посвятил себя всецело на служение Богу в иноческой жизни. Молва о чрезвычайном удобстве Соловецкого острова для пустынного подвижничества привлекла его на Беломорский берег, и с рыболовами летом, вероятно, 1428 года он посетил место своих будущих подвигов. Хотя Соловецкий остров вполне соответствовал влечениям его души и представлялся ему совершенно удобным для глубокого безмолвия, однако же он не решился остаться там на жительство один. По окончании лета прп. Герман возвратился с рыболовами на Поморский берег и, поселившись на реке Выге при часовне, подвизался в молитве и посте.
Полюбив Соловецкий остров, преподобный Герман сделался со временем проводником и сожителем первым обитателям его — преподобным Савватию (+1435; память 27 сентября/10 октября) и Зосиме (+1478; память 17/30 апреля). Удалившись из Валаамского монастыря и отыскивая более уединенное место, инок Савватий, объятый огнем Божественной любви и смиренномудрия, устремился к Белому морю с непреодолимым желанием достигнуть Соловецкого острова. На реке Выге он встретился с преподобным Германом, от которого еще более услышал об удобстве Соловецкого острова для пустынножительства. Заготовив ладью, съестные припасы и орудия для возделывания земли, около 1429 года оба подвижника переселились на пустынный Соловецкий остров. Под Секирной горой, на расстоянии одной версты от берега, они устроили келью, где совершали спасительный подвиг пустынножительства. Здесь они были утешены особенным знамением, предвещавшим будущее предназначение острова, а именно: Господь благословил Соловецкий остров для уединенной монашеской жизни. Поэтому миряне не могли на нем долго оставаться. Но один рыбак дерзнул поселиться там с женой. Однажды в раннее воскресное утро преподобный Савватий услышал плач и стоны. И когда преподобный Герман пошел к месту, откуда они слышались, то увидел женщину в слезах, которая и рассказала ему, что два светлых юноши били ее, повелевая оставить остров, определенный по воле Божией для жительства иноков. После этого рыбак с женою отплыл с острова.
В суровом подвиге преподобные Герман и Савватий провели около шести лет. В 1435 году преподобный Герман уехал на Онегу за припасами, а преподобный Савватий отошел ко Господу. Но случилось это не на острове, а на реке Выге, куда преподобный Савватий приплыл в предчувствии кончины для причащения Св. Таин. Однако в скором времени Господь привел к преподобному Герману другого пустынника — юного отшельника Зосиму, который соорудил келлию на берегу пресноводного озера, в полуверсте от келлии преподобного Германа. С этого времени преподобный Герман сделался постоянным обитателем острова, участником молитвенных подвигов преподобного Зосимы и ревностным помощником его в основании монастыря. Будучи человеком некнижным, но убежденный в том, что жизнь великих подвижников весьма назидательна, прп. Герман впоследствии велел записать клирикам для памяти все, что он видел при жизни преподобного Савватия, о пришествии своем с ним на остров и о разных событиях из жизни блаженных отцов. Таких записок оставалось немало, ими воспользовался при составлении жития преподобных Зосимы и Савватия ученик преподобного Германа Досифей. Также преподобный завещал ученикам собирать в обитель книги.
Более пятидесяти лет провел преподобный Герман на суровом, холодном острове, проводя жизнь в непрестанной Иисусовой молитве и трудах, стараясь, как можно более, быть полезным для обители. Но по нуждам монастыря часто путешествовал на твердую землю. Святая любовь не взирала ни на опасности плавания по обманчивому морю, ни на другие неудобства пути, нелегкие особенно для старости. И самая смерть застигла его на службе обители. В 1479 году при игумене Арсении, преемнике св. Зосимы, преподобный Герман был послан в Новгород по делам монастыря, в обители св. Антония Римлянина почувствовал близость кончины и после исповеди и причащения Св. Таин мирно предал дух свой Богу. Соловецкие иноки хотели перевезти тело святого старца в родную обитель. Честные мощи святого были обретены нетленными и с честью положены с правой стороны алтаря в монастырском храме во имя святителя и чудотворца Николая, рядом с мощами преподобного Савватия. Впоследствии над местом погребения преподобного Германа была устроена часовня, а в 1860 году в обители был освящен каменный храм его имени.
Около 1602 года преподобный Герман явился пресвитеру Григорию, служившему в городе Тотьме, и повелел ему написать его образ вместе с преподобными Зосимой и Савватием и составить ему тропарь. Пресвитер Григорий исполнил повеление святого. Все с верою приходившие к иконе преподобного Германа получали исцеления от недугов.
Празднование преподобному по благословению патриарха Московского и всея Руси Иоакима (1674—1690) и архиепископа Холмогорского Афанасия совершается с 1692 года 30 июля/12 августа.
АКАФИСТ
Кондак 1
Избранный чудотворче и изрядный угодниче Христов, отче наш Германе преблаженне, пустыннаго жития на острове Соловецстем первоначальниче. Восхваляем тя любовию, ты же, яко имеяй дерзновение ко Господу, от всяких нас бед и скорбей свобождай, да зовем ти: Радуйся, отче наш Германе, преподобных Зосимы и Савватия сподвижниче.
Икос 1
Ангельски пожив, яко ангел безплотен на земли явился еси, преподобне отче наш Германе; ты бо евангельскаго гласа послушав, от юности иго Христово на рамо свое взем, в пустыню потекл еси, и, упование все на Бога возложив, Тому ревностно служити возжелал еси. Сего ради восхваляем тя сице:
Радуйся, родителей твоих плоде благословенный;
Радуйся, Господа твоего благий рабе и верный.
Радуйся, яко Христа единаго возлюбил еси;
Радуйся, яко многая лета на острове пустыннем Богу служил еси.
Радуйся, иго Христово на себе вземый;
Радуйся, от Подвигоположника Христа дар исцелений приемый.
Радуйся, яко красная мира сего ни во чтоже вменил еси;
Радуйся, в бреннем телеси, яко безплотен, пожил еси.
Радуйся, в страсе Божии издетска воспитанный;
Радуйся, на подвиги иночества от Господа призванный.
Радуйся, места рождения твоего града Тотьмы похвало и утверждение;
Радуйся, обители Соловецкия славо и ограждение.
Радуйся, отче наш Германе, преподобных Зосимы и Савватия сподвижниче.
Кондак 2
Видя, яко надлежит человеку прилежно злая от юности его терпети, усердно потщался еси совлещися ветхаго человека, тлеющаго в похотех его, и облещися в новаго, по Богу созданнаго в преподобии и правде; темже слезами покаяния день и нощь душевную ниву твою орошал еси, терния грехов и страстей искореняя, Христу же поя: Аллилуиа.
Икос 2
Разум просвещен свыше имея, провидел еси, отче Германе, будущая яко настоящая, и егда преподобный Зосима узре свет, осиявый место, на немже живяше, и церковь велию на воздусе, на востоце явльшуюся, тогда пророчески рекл еси ему, глаголя: «Не ужасайся и внимай себе; яко Господь чрез тя монахов множество соберет зде». Мы же проречения твоего исполнение видяще и сему дивящеся, тако глаголем ти:
Радуйся, душетленных сластей мира сего не познавый;
Радуйся, премудрости небесныя взыскавый.
Радуйся, яко добре на земли подвизался еси;
Радуйся, яко козней демонских не убоялся еси.
Радуйся, некнижным путь верный к небесем показавый;
Радуйся, в молитве и трудех непрестанно пребывавый.
Радуйся, яко нерадивых молитвою твоею к покаянию воздвизаеши;
Радуйся, яко изнемогающих и унывающих силою благодати укрепляеши.
Радуйся, вольную Христа ради нищету возлюбивый;
Радуйся, в нестяжании безпечальное житие проводивый.
Радуйся, яко лучами добродетелей твоих иноков просвещаеши;
Радуйся, яко от всякия напасти их ограждаеши.
Радуйся, отче наш Германе, преподобных Зосимы и Савватия сподвижниче.
Кондак 3
Сила Вышняго укрепи тя, егда, приступая работати Господеви, по слову Писания, душу твою во искушение уготовал еси, постом, бдением и многими лишении в пустыни тело твое изнуряя, душу же молитвою непрестанною питая, во псалмех и пениих и песнех духовных воспевая сердцем и усты Богу: Аллилуиа.
Икос 3
Имея ревность о спасении души своея, дом отчий и вся красная мира сего оставил еси, угодниче Христов, и мужественно в пустыню вселился еси, сподвижник и сотаинник преподобным Савватию и Зосиме был еси; темже и на небеси купно с ними мзду трудов своих обрел еси, идеже слышиши от нас похвалы сия:
Радуйся, преподобных Савватия и Зосимы сожителю;
Радуйся, преподобных совершеннаго безмолвия любителю.
Радуйся, яко тесный путь паче широкаго избрал еси;
Радуйся, яко непрестанною молитвою дары духовныя стяжал еси.
Радуйся, святым древним отцем ревновавый;
Радуйся, всего себе на служение Богу предавый.
Радуйся, яко демонския полки всеконечно погубил еси;
Радуйся, яко ангельския лики возвеселил еси.
Радуйся, плоти угодия никогдаже творивый;
Радуйся, притекающим к тебе отец чадолюбивый.
Радуйся, яко во плоти сый риз греховных до конца совлеклся еси;
Радуйся, яко образ Божий в себе благодатию Христовою возставил еси.
Радуйся, отче наш Германе, преподобных Зосимы и Савватия сподвижниче.
Кондак 4
Бурю уныния и напастей, от врага спасения подвижником благочестия наводимую, молитвою отгоняя и в непрестанных трудех пребывая, помощию Божиею достигл еси тихаго пристанища, покоя душевнаго, благодарне Благодетелю Богу взывая: Аллилуиа.
Икос 4
Слышавше ревнителие равноангельнаго жития, яко на острове Соловецстем преподобнии oтцы Зосима и Герман обитель боголепнаго Спасова Преображения устрояют и ищущих спасения братолюбно приемлют, Божиим Духом движимии притекаху, просяще наставления и руководительства. Мы же, суетою омраченнии, тебе, яко общаго наставника, отче наш Германе, прославляем звании сими:
Радуйся, плоть твою духови покоривый;
Радуйся, трудом, бдением и постом ю изнуривый.
Радуйся, яко слез твоих струями ниву душевную напоил еси;
Радуйся, яко вся помыслы душепагубныя от себе удалил еси.
Радуйся, стрелою любве Божественныя сердце твое уязвивый;
Радуйся, немощи немощных, яко сильный, на себе носивый.
Радуйся, яко причастник всем боящимся Бога был еси;
Радуйся, яко до зела себе смирил еси.
Радуйся, очи наша верою просвещаяй;
Радуйся, сердца наша надеждою спасения озаряяй.
Радуйся, яко преподобному Зосиме в созидании обители послужил еси;
Радуйся, яко подвиги твоими братию всю удивил еси.
Радуйся, отче наш Германе, преподобных Зосимы и Савватия сподвижниче.
Кондак 5
Боготечная звезда явился еси, богоблаженне отче наш, преподобным Савватию и Зосиме, егда восхвалял еси пустынность острова Соловецкаго и провождал еси их, по морю плывя, на место святое сие, идеже в безмолвии труды ко трудом прилагая, плоды духовныя собирал еси, Богу же сердцем чистым взывал еси: Аллилуиа.
Икос 5
Видя враг рода человеча, яко необитаемая доселе пустыня процветает, яко крин, и яко в ней имя Господне от пустынножителей прославляется, восхоте погубити святое дело Божие; напусти бо человека некоего с женою его и чады преселитися на остров. Ангели же Господни, биения давше жене, повелеша оставити остров, да будет сей в жилище токмо иноков. Сего ради прославляюще Господа, тако благоизволившаго, глаголем ти:
Радуйся, измлада иноческое житие избравый;
Радуйся, пустыннаго и безмолвнаго пребывания взыскавый.
Радуйся, яко непрестанно себе внимал еси;
Радуйся, яко равноангельное жительство показал еси.
Радуйся, в терпении мнозе потрудивыйся;
Радуйся, молитв забралом присно ограждавыйся.
Радуйся, яко преподобным Зосиме и Савватию сподвижник и сотаинник был еси;
Радуйся, яко с ними в пристанище безстрастия достигл еси.
Радуйся, яко злато в горниле, искушенный;
Радуйся, светом Трисиянным озаренный.
Радуйся, яко с небесе на вся ны милостивно призираеши;
Радуйся, яко вся прошения наша во благо исполняеши.
Радуйся, отче наш Германе, преподобных Зосимы и Савватия сподвижниче.
Кондак 6
Проповедник всем глагол ангельских был еси, преблаженне отче, егда, по совершении с преподобным Савватием воскреснаго нощнаго молитвословия изшед из храмины, внезапу услышал еси глас жены плачущея и, узрев ю, вопросил еси о причине плача. Она же рече: «два юноши светли жестоко биша мя и рекоша ми: бежите отсюду, ибо не для вас место сие, яко зде иноков множество прославит Господа». Ты же, слышав сие, умиленне Богу возгласил еси: Аллилуиа.
Икос 6
Возсия свет велий от обители Соловецстей, осияваяй всю страну нашу, ибо лучами добродетелей твоих просвещаеши не токмо притекающих к цельбоносным мощем твоим, но и издалече верою призывающих тя. Озари убо светом Евангелия омраченная грехом сердца наша и укрепи нас во благочестии, да вси радостно взываем ти:
Радуйся, пустыни красное прозябение;
Радуйся, постников предивное украшение.
Радуйся, яко в бодреннем трезвении пребывал еси;
Радуйся, яко мзду трудов твоих на небеси восприял еси.
Радуйся, ангелов собеседниче;
Радуйся, Царствия Христова наследниче.
Радуйся, яко благодать от Бога обрел еси;
Радуйся, яко иерею благоговейному образ твой во сне списати повелел еси.
Радуйся, безмездный недугов целителю;
Радуйся, благодатный бесов прогонителю.
Радуйся, яко с преподобными Зосимою и Савватием ревностно трудился еси;
Радуйся, яко с ними наставник добр монахом явился еси.
Радуйся, отче наш Германе, преподобных Зосимы и Савватия сподвижниче.
Кондак 7
Хотя всем человеком спастися и в разум истины приити, Человеколюбец Господь указа ти место удобно спасения, идеже ты многими поты и скорбьми, злострадании и лишении неленостне Богу работал еси, выну вопия Ему: Аллилуиа.
Икос 7
Новаго Моисеа, древлему подобна, видим тя, богоизбранне отче наш, ибо в пустыни земнаго странствия нашего всех, к помощи твоей прибегающих, к Иерусалиму горнему наставляеши, фараона мысленнаго потопляя и всех молением твоим ограждая, вопиющих ти таковая:
Радуйся, молитвенниче наш неусыпный;
Радуйся, предстателю о нас непостыдный.
Радуйся, яко скорби пустыннаго жития доблественне претерпел еси;
Радуйся, яко постом и молитвою, аки крилами, на высоту добродетелей возшел еси.
Радуйся, чистотою душевною и телесною Бога прославивый;
Радуйся, нравы твоими вся ны наставивый.
Радуйся, яко в небеснех чертозех вселился еси;
Радуйся, яко оных обителей и нам пред Богом ходатай явился еси.
Радуйся, бед и напастей нас свобождаяй;
Радуйся, всем благая от Спаса Христа подаваяй.
Радуйся, яко непрестанно духом горел еси;
Радуйся, яко со всеми человецы мир имел еси.
Радуйся, отче наш Германе, преподобных Зосимы и Савватия сподвижниче.
Кондак 8
Странно убо видети, како ты, богоблаженне отче, старостию притружденный, за послушание настоятелю и братии по морю многажды плавал еси, о нуждех новосозидаемыя обители и об утешении братии попечение имея, отнюд покоя себе не дая и среди опасностей потопления живот твой Богови вверяя и сердцем взывая Ему: Аллилуиа.
Икос 8
Весь ум твой в небесная вперив, горняя мудрствовал еси, а не земная, преподобне отче наш, вышних ища, идеже есть Христос одесную Бога седя, идеже празднующих глас непрестанный, идеже радость праведных несказанная. Тамо убо со всеми святими водворяяся, слышиши от нас ублажения сии:
Радуйся, очесы веры на Христа присно взиравый;
Радуйся, в злостраданиих николиже роптавый.
Радуйся, яко на ладии многажды по морю плыл еси;
Радуйся, яко сие за послушание настоятелю и братии творил еси.
Радуйся, морских волнений и напасти не страшивыйся;
Радуйся, благому Промыслу Божию всецело покоривыйся.
Радуйся, яко смирением и послушанием Богу угодил еси;
Радуйся, яко козни вражия до конца сокрушил еси.
Радуйся, в бурю пловцем подаваяй спасение;
Радуйся, дивное им в бедах поможение.
Радуйся, яко душу твою по братии полагал еси;
Радуйся, яко имя Господне непрестанно призывал еси.
Радуйся, отче наш Германе, преподобных Зосимы и Савватия сподвижниче.
Кондак 9
Всякое плотское мудрование мужественне отринув, вдал еси себе в совершенное послушание настоятелю и братии, памятуя слово наставления святоотеческаго, яко послушание паче поста и молитвы есть, и тако достигл еси в мужа совершенна, в меру возраста Христова, Богу поя: Аллилуиа.
Икос 9
Витии премудрии не возмогут достойно восхвалити труды и подвизи твоя, ибо всего себе от юности в жертву Господеви возложив, даже до старости многолетныя распинал еси плоть со страстьми и похотьми, да очистиши сердце твое и да будеши храм Животворящаго Духа Святаго. Сподоби и нас, святче Божий, тебе усердно подражати и сице тебе возглашати:
Радуйся, в пустынных дебрех и горах привитавый;
Радуйся, постом и молитвою в напастех себе ограждавый.
Радуйся, яко чести и славы мирския избегал еси;
Радуйся, яко во смирение аки в порфиру Царствия Небеснаго облеклся еси.
Радуйся, благодати сосуде избранный;
Радуйся, любве, соуза совершенства, кладенец преизливанный.
Радуйся, яко игу Христову выю твою подклонил еси;
Радуйся, яко по трудех дневных нощи в молитве проводил еси.
Радуйся, вся обеты иноческия свято соблюдавый;
Радуйся, прельщениям лукаваго никакоже внимавый.
Радуйся, яко от всякаго зла себе хранил еси;
Радуйся, яко полчища бесов посрамил еси.
Радуйся, отче наш Германе, преподобных Зосимы и Савватия сподвижниче.
Кондак 10
Спасти хотя душу твою, нозе твои на камени веры поставил еси и, светильник слова Божия вжег, в законе Господни ходил еси, помышляя, яко странник и пришлец еси на земли и яко жительство Твое на небеси есть. Сего ради ко всем заповедем Господним направлялся еси, всяк путь неправды возненавидев, во еже непрестанно воспеваяй Христу Богу ангельскую песнь: Аллилуиа.
Икос 10
Стена еси и крепкое заступление обители твоея и всем верою молящимся тебе, ибо небесе и земли Творец, видя богоугодное житие твое, облагодати тя, да будеши печальным утешение, скорбящим радование, недугующим врач и целитель, кающимся надежда прощения и всем во всяких нуждах помощник, да вси ублажают тя сице:
Радуйся, образе кротости и смирения;
Радуйся, теплый ходатаю нам спасения.
Радуйся, яко ревнующих о спасении под кровом своим соблюдаеши;
Радуйся, яко трудников и богомольцев обители твоея с небеси благословляеши.
Радуйся, обидимых благонадежное и скорое защищение;
Радуйся, в скорбех и печалех нам всем утешение.
Радуйся, яко всем, притекающим к тебе, в нуждех помогаеши;
Радуйся, яко за вся православныя христианы молитвы Богу возсылаеши.
Радуйся, на свещнице Христовой поставленный;
Радуйся, на земли дивно от Бога прославленный.
Радуйся, яко гнев Божий от нас грешных отвращаеши;
Радуйся, яко любовию чтущих святую память твою благодатно посещаеши.
Радуйся, отче наш Германе, преподобных Зосимы и Савватия сподвижниче.
Кондак 11
Пение надгробное со слезами смешанное принесл еси, всеблаженне отче, егда, возвратився в обитель, уведел еси о преставлении сподвижника твоего преподобнаго Савватия, егоже зело, яко брата, любил еси. Егда же Господь посла тебе новаго сподвижника твоего, преподобнаго Зосиму, тогда радости исполнився, благодарно Богу возгласил еси: Аллилуиа.
Икос 11
Светозарное светило показался еси, отче наш, Германе, в нощи греховней блуждающим, души наша светом богопознания просвещая и по пути заповедей Христовых ходити наставляя. Сего ради к тебе усердно притекаем и тако тя восхваляем:
Радуйся, целомудрия изрядный ревнителю;
Радуйся, чистоты усердный блюстителю.
Радуйся, яко надежду небеснаго наследия в себе имел еси;
Радуйся, яко жития преподобных Зосимы и Савватия списати повелел еси.
Радуйся, вся заветы преподобнаго Зосимы свято хранивый;
Радуйся, ни един же от них преступивый.
Радуйся, яко о смертнем часе непрестанне помышлял еси;
Радуйся, яко ко исходу от жития сего себе присно уготовлял еси.
Радуйся, по Бозе упование твое на Матерь Божию возлагавый;
Радуйся, Богородицу яко Матерь Света выну в песнех величавый.
Радуйся, яко преподобнаго Зосиму ко гробу проводил еси;
Радуйся, яко тело его многотрудное слезами теплыми оросил еси.
Радуйся, отче наш Германе, преподобных Зосимы и Савватия сподвижниче.
Кондак 12
Благодать, свыше ти дарованную, подаждь нам, досточудне отче наш, яко да и мы, подражающе вере и благочестию твоему, принесем Спасителю нашему дары духовныя; покаяние теплое, молитвы усердныя, братолюбие нелицемерное со всеми добродетельми, и сподобимся купно с тобою взывати Богу: Аллилуиа.
Икос 12
Поюще твоя чудесы, богоносне отче наш, восхваляем подвиги твоя, ублажаем и кончину твою, ибо, на смертнем одре возлежа и исход свой провидя, возжелал еси исповедатися и Святых Христовых Таин причаститися. Сподоби убо и нас христианския кончины живота нашего и добраго ответа на Страшнем судищи Христове, да зовем ти:
Радуйся, в монастыри преподобнаго Антония Римлянина богоугодное житие твое скончавый;
Радуйся, в Новограде на послушании умиленный дух твой Богу предавый.
Радуйся, яко и по смерти чудесы твоими сияеши;
Радуйся, яко духи нечистыя от человек прогоняеши.
Радуйся, от обители земныя во обители небесныя преселивыйся;
Радуйся, тамо со всеми святыми в вечней славе водворивыйся.
Радуйся, яко мощи твоя на месте трудов твоих почивают;
Радуйся, яко тыя мощи исцеления верующим источают.
Радуйся, духом воскресый прежде общаго воскресения;
Радуйся, и нашим душам указуяй путь обновления.
Радуйся, яко монахов множество наставника тя почитают;
Радуйся, яко православних собор присно тя ублажает.
Радуйся, отче наш Германе, преподобных Зосимы и Савватия сподвижниче.
Кондак 13
О преподобне и преблаженне отче наш Германе. Приими ныне малое сие моление наше, от души в похвалу тебе приносимое, и твоим многомощным предстательством умоли Господа нашего Иисуса Христа, да пробавит милость Свою нам грешным и подаст нам во временнем житии нашем вся благая и потребная яже к животу и благочестию, да и мы с тобою и всеми святыми выну Ему вопием: Аллилуиа.
(Этот кондак читается трижды, затем икос 1 и кондак 1)
МОЛИТВА
О великий угодниче Христов, земный ангеле и небесный человече, преблаженне отче наш Германе, преподобных Зосимы и Савватия сподвижниче, Соловецкий чудотворче и пустынножителю. Обстояще честную раку цельбоносных мощей твоих, мысленными очесы зрим тя с нами суща и мольбам нашим внемлюща. Сего ради с верою и любовию припадающе к тебе молим тя: призри с небесе святаго на нас грешных, слабых духом и немощных телом, и умилосердися, помози нам твоим многомощным ходатайством ко Творцу и Спасителю нашему. Ты веси, яко подобно реце многоводней, разливаются по земли нашей безбожие, неверие, зловерие, ереси, расколы, распри, раздоры, разделения, и увы нам. Среди именующихся именем Христовым хулится имя Божие, раздирается Церковь — Тело Христово, попираются Евангелие и закон Христов. Ты зриши оскудение велие любве многих и умножение беззаконий, ихже ради грядет гнев Божий на нас грешных. К кому прибегнем, отче наш? К кому возопим? Кто предстанет и защитит нас? На тя упование наше возлагаем, предивный угодниче Христов. Испроси нам у Господа грехов наших прощение и отврати от нас весь гнев Его, праведно движимый на ны. Утверди веру правую в сердцах наших, защити Церковь святую, духом грядущаго в мир противника Христова обуреваемую. Даруй нам любовь к Богу и друг ко другу, мир и единомыслие, утоли вся раздоры и нестроения наша, да не до конца погибнем. Буди стена крепка и заступление обители твоей, в еяже созидании много потрудился еси. Буди отец и наставник и покровитель иноком, ихже с преподобными Зосимою и Савватием мудре собрал еси на месте трудов ваших. Помози им подвигом добрым подвизатися, веру нераздельну соблюсти, главы невидимых змиев сокрушити, победителем греха явитися и житием своим прославити превелие имя Святыя Троицы. Не забуди и нас, любовию чтущих святую память твою и к тебе, яко отцу чадолюбивому, притекающих. Помогай и нам, отче наш милостивый, в душевных и телесных нуждах наших, подавай нам вся благая и потребная в жизни временней, да ревностно поработаем Господу Богу прочее время живота нашего, и понесем на себе иго Его благое и легкое Его бремя, и, тако достигше благодатию Христовою Небеснаго Царствия, сподобимся с тобою и со всеми святыми славити и воспевати пречестное и великолепое имя Отца и Сына и Святаго Духа ныне и присно и во веки веков. Аминь.
ТРОПАРЬ
Тропарь, глас 8
Желанием духовным от юности распаляемь, преподобне Германе, Христу тесным жития путем последовал еси, и в морский пустынный остров, аки в тихое пристанище, вселився, в нем многая лета постнически пожил еси, идеже блаженным отцем Зосиме и Савватию сожитель был еси: с ннмиже моли Христа Бога о нас, любовию чтущих память твою.
Кондак, глас 4
Вышних желая, вся долу влекущая возненавидел еси и, отечество свое оставль, в поморие пустынное отшел еси, таже в морский остров удалився, в нем многа лета Господеви поработал еси. Темже, память твою празднующе, любовию вопием ти: радуйся, Германе Богомудре, отче наш.
Фото иконы: http://www.cirota.ru/forum/view.php?subj=56299&order=&user_id=24592&show_all=1
