Алексий, человек Божий

 

 

(17 / 30 марта)

 

   Жил в Риме Евфимиан - очень богатый и знатный человек, первое лицо в императорском дворце. Он был справедлив, милосерд и жаловал нищих щедрой милостыней. Каждый день в его доме накрывались три стола для сирот, вдов, странников и путешествующих. Жена его Аглая была благочестива и богобоязненна, но не было сына у них по ее неплодию. Они горевали и печалились, не имея наследника. Ежедневно они раздавали милостыню и прилежными молитвами и прошениями испрашивали у Господа даровать им сына-наследника.

   Бог по благости своей послал им сына, которого нарекли Алексием. В сугубой радости они возблагодарили Господа и положили с тех пор жить в чистоте и святости, чтобы приятны Богу были и они сами, и дарованный им сын. Когда мальчик подрос, его отдали служителям церковных таинств и свободных наук, по Божьей милости он преуспел во всех занятиях философских, а более всего духовных. Спустя некоторое время родители решили женить сына, в невесты была выбрана девица из императорского рода, и в храме Св. мученика Бонифация их обвенчали. Праздничный день провели в веселии и радости. Вечером же, придя в опочивальню супруги, Алексий начал поучать жену и много говорил ей о святыне, затем отдал ей свое золотое кольцо и ленту (головку пояса, которым перепоясывался), все это завернул в вышитый пурпурный платок и сказал: "Возьми и храни это, пока Господу угодно будет, и Господь да будет посреди нас".

   После он взял часть своего имущества и пошел к морю, взошел на корабль и с Божьей помощью достиг Лаодикии, а оттуда направился в Сирию, в город Эдессу, где был нерукотворный образ Господа нашего Иисуса Христа на полотне. Прибыв на место, он роздал нищим все, что у него было, и, одевшись в убогие одежды, сел с нищими в притворе храма Св. Богородицы. Каждый воскресный день он принимал Святые Тайны и из милостыни, которую ему подавали, брал себе необходимое, а остальную часть дарил нищим.

    В Риме же после его ухода был проведен тщательный обыск, и когда Алексия не нашли, то отец послал своих слуг во все концы земли искать сына. Некоторые из них были и в Эдессе, видели его сидящим вместе с другими нищими, но, дав ему милостыню, отходили, не узнавая его. Алексий прославлял за это Бога: "Господи, благодарю Тебя, который призвал меня и устроил так, что я от рабов своих принимаю милостыню во имя Твое; молю, сподоби свершиться во мне делу, которое Ты начал".

    Мать с того дня, как скрылся сын, сидела на полу своей спальни и горестно плакала, говоря: "Жив Господь, не сойду с места, доколе не узнаю, что стало с сыном моим". И невеста сказала свекру: "Не выйду из дома твоего, но уподоблюсь горлице, которая не сочетается ни с кем, когда супруг ее пленен. Так буду и я вести себя, пока не узнаю, что стало со сладчайшим супругом моим".

    А Алексий человек Божий пребывал в том притворе семнадцать лет, ведя жизнь воздержанную и святую. И Бог после этого пожелал открыть подвиг его. Однажды бывшая там икона Святой Богородицы заговорила при церковном пономаре: "Введи сюда человека Божия, он достоин Царства Небесного, и дух Божий почивает на нем, и молитва его, как огонь, поднимается к лицу Божию". Пономарь вышел, поискал его и не нашел, вернулся обратно и стал молить Бога: да покажет ему этого человека. И снова та же икона вымолвила: "Тот, кто сидит при входе, это он". Обрадованный пономарь вышел, увидел и припал к ногам его, моля войти внутрь церкви. После этого о нем все узнали и стали чтить его, но человек Божий убежал от людской славы: тайно покинув Эдессу, он пришел в Лаодикию и сел на корабль, чтобы отплыть в Таре Каликийский, где думал жить в безвестности при храме Св. Павла. Божиим промыслом, однако, ветер подхватил корабль и пригнал его к римской гавани. Когда Алексий человек Божий понял, куда он прибыл, он сказал в сердце своем: "Жив Господь! Я никому не буду в тягость и пойду прямо в дом отца моего, потому что там не узнают меня". Сойдя на берег, он пошел и увидел, что навстречу ему из дворца идет отец и множество людей вслед за ним. И возопил к отцу: "Раб Божий, взгляни на меня и яви милосердие, ибо я беден и странник, вели принять меня в доме твоем, чтобы мне питаться крохами от стола твоего, и Бог благословит лета твои и помилует того, кто у тебя на чужой стороне".

    Слушая это, отец вспомнил о сыне своем и, растрогавшись, позвал его к себе, а слугам сказал: "Кто из вас примет заботу об этом человеке? Жив Господь, я сделаю его свободным, и из дома моего он получит наследство". Когда служитель был назначен, отец велел привести Алексия и при входе в дом поставить ему постель, чтобы сам он, входя и выходя из дому, мог видеть его и чтобы давали ему пищу со стола и ни в чем бы не притесняли. Алексий же продолжал свою подвижническую жизнь, не ослабляя постоянных молитв, постов и бдений. Слуги стали насмехаться над ним, выливали ему на голову помои и всячески обижали. Но человек Божий все терпел с радостью, по любви к Господу. Так провел он неузнанный в доме отца своего еще семнадцать лет. Когда же почувствовал, что завершилось время жизни его, то потребовал у приставленного к нему слуги бумагу и трость и описал свою жизнь по порядку - как он отказался от брака, как пошел странствовать, как против воли возвратился в Рим и как выносил множество бесчестий в доме своего отца.

   Господь пожелал после этого открыть его подвиг и величие, и вот в воскресный день после торжественной службы в храме раздался с неба голос: "Приидите ко Мне, все труждающиеся и обремененные, и Я успокою вас". Слыша этот голос, все были объяты страхом великим и, пав на лицо свое, восклицали: "Господи, помилуй!". И снова голос произнес: "Ищите человека Божия, чтобы молился о Риме. Ведь на рассвете в пятницу он испустит дух". И тогда все пошли и стали искать его, не найдя же, собрались в пятницу в храме и просили у Бога милости - показать им, где находится человек Божий. И услышали голос: "Ищите в доме Евфимиана". Евфимиану стали говорить: "Ты имел в своем доме такую благодать и не показал нам?". Но он отвечал на это: "Жив Господь! Не знаю". И тотчас призвав управителя домом своим, спросил его: "Знаешь ли ты в доме моем кого-нибудь, чтобы имел такую благодать?". Тот ответил, что не знает. Тогда императоры Аркадий и Гонорий отправились вместе с архиепископом Иннокентием в дом Евфимиана и тщательно расспрашивали про человека Божия.

   Хозяин же со слугами пришел раньше их, чтобы отдать распоряжения, и со светильниками и кадильницами вышел навстречу императорам и архиепископу. В это время слуга человека Божия подошел к Евфимию и сказал: "Посмотри, господин мой, не тот ли это, к кому ты приставил меня. Ведь я видел много дивных дел его: он причащался каждое воскресенье Святых Тайн, умерщвлял себя постами и от слуг твоих с радостью принимал и терпел множество бесчестий и досаждений". Услыхав это, Евфимиан побежал к нему, но застал его уже скончавшимся. Приблизившись, он открыл лицо его и увидел, что оно светится, как светильник, как лицо ангела Божия, а в руке у него небольшая записка, которую Евфимий захотел взять и не смог. Изумленный и испуганный, он вернулся к императорам и произнес: "Мы нашли того, кого искали".

    Императоры и архиепископ направились тогда вместе с Евфимием к месту, где лежал Алексий человек Божий, стали перед постелью и сказали: "Хотя мы и грешные, но держим кормило правления. Архиепископ же - общий отец. Дай нам хартию, чтобы мы узнали, что в ней написано". После архиепископ подошел, взял из его руки записку и дал прочесть ее Этию архивариусу Святой Римской Церкви. И вот при полной тишине она была прочитана пред всеми.

   Едва услыхав слова хартии, Евфимиан пал без чувств, затем, встав, разодрал одежды и стал рвать седины свои, дергать бороду, царапать себя и, падая, вопить: "Увы мне, Господи Боже мой! Зачем сотворил мне так, зачем так преогорчил душу мою, зачем столько лет доставлял мне воздыхания и стоны? Я ждал когда-нибудь услыхать голос Твой и получить от Тебя весточку, где бы ты ни был, и вот вижу тебя, хранителя старости моей, лежащего на одре и безмолствующего. Увы мне! Какое утешение положу в сердце моем?". Тут и мать его, услыхав, вышла... в растерзанной одежде, с распущенными волосами, с глазами, обращенными к небу. Столпившийся народ мешал ей приблизиться к телу, и она кричала: "Пустите меня к человеку Божию, дайте взглянуть на утешение души моей, дайте взглянуть на сына!...". Прибежала также и невеста его в худой одежде и со слезами заговорила: "Увы мне! Сегодня горестный день для меня, сегодня стала я вдовой. Уже не на кого мне взирать, не на кого поднять очей. Ныне разбилось зеркало мое, и погибла надежда моя. Отселе начинается горе, которому нет конца". Народ, видя это, лил слезы.

   Затем архиепископ вместе с императорами положили тело на украшенные носилки и понесли в центр города. Народу возвестили, что найден человек Божий. И все устремились навстречу святому телу. От прикосновения к нему расслабленные сразу исцелялись, слепые прозревали, бесы изгонялись...

   Императоры, видя эти чудеса, сами взялись нести одр вместе с архиепископом, чтобы и самим освятиться от сего тела. Они велели рассыпать по улицам много золота и серебра, чтобы толпа прельстилась деньгами и позволила пронести его в церковь, но народ пренебрег любовью к деньгам и все больше и больше теснился, чтобы прикоснуться к священному телу. Так с великим трудом они принесли его в храм Св. мученика Бонифация, и семь дней возносили хвалы Богу и делали ковчег из золота и драгоценных камней. В него и положили это священное тело в семнадцатый день месяца июля.

   Ковчег начал благоухать. Тогда люди с радостью вознесли великое благодарение Богу, изволившему дать народу Своему такую помощь, от которой всякий искренне просящий человек несомненно получает просимое.

 

   Святой Алексий человек Божий преставился 30 (17 по ст. ст.) марта в 411 году. Честные останки его были погребены в церкви св. Вонифатия на Авентинском холме в Риме, где когда-то венчался Алексий. Впоследствии над церковью св. Вонифатия была устроена другая (более обширная) церковь св. Алексия человека Божия, в которую и были перенесены в 1216 году мощи обоих угодников Божиих.

 

 

 

АКАФИСТ

 

Кондак 1

 

Избранный угодниче Христов, свыше нареченный человече Божий, святе Алексие, похвальное пение приносим ти, любовию чтущии твоя подвиги, терпение и многострадание, имиже Богу угодил еси и явился еси равноангелен на земли; ты же, яко имеяй дерзновение ко Господу, молитвами твоими от всяких нас бед свобождай, да зовем ти: Радуйся, человече Божий Алексие, молитвенниче о душах наших.

 

 

Икос 1

 

Ангел земный и человек небесный был еси, Алексие блаженне, от младых бо лет жития твоего чистоту души и тела соблюл еси и Христу любовию усердною последовал еси, Егоже взыскуя, вся красная мира сего оставил еси и достигл еси совершенства духовнаго. Сего ради слышиши от нас сия достодолжныя тебе похвалы:

Радуйся, ветхаго Рима рождение;
Радуйся, безчадных родителей неплодия разрешение.
Радуйся, молитв усердных плод богодарованный;
Радуйся, от младенчества на богоугождение свыше предызбранный.
Радуйся, в страсе Божием добре воспитанный;
Радуйся, Закону Господню верно наученный.
Радуйся, о небесных паче, неже о земных, помышлявый;
Радуйся, самоотвержение чудное показавый.
Радуйся, чистоту девственную Христа ради непорочно сохранивый;
Радуйся, обручницу, красотою цветущую, Иисуса ради оставивый.
Радуйся, мудрый странниче, отечества горняго взыскавый;
Радуйся, Божий избранниче, вся прилоги мира, плоти и диавола победивый.
Радуйся, человече Божий Алексие, молитвенниче о душах наших.

 

 

Кондак 2

 

Видев непостоянство красот мира сего, тлению причастных, Алексие богомудре, возлюбил еси блага нетленная вечная, Христом обетованная во Евангелии верным рабом Его; сего ради дом родителей твоих и все богатство их оставил еси, нищету же вольную избрал еси, да Христу угоден будеши и возможеши невозбранно пети Ему: Аллилуиа.

 

 

Икос 2

 

Разумел еси добре, Алексие блаженне, яко живя в мире, в супружестве и богатстве, неудобь обрящеши спасение; темже торжеству брачному приспевшу, ты брака внезапно уклонился еси, предпочитая в девственней чистоте Богу благоугождати. О сем дивимся и тебе зовем хвалебно:

Радуйся, Христов любителю, мрежею любве к миру сему неуловленный;
Радуйся, Иисусов последователю, плоти угождения избежавый.
Радуйся, высотою подвига твоего ангелы удививый;
Радуйся, крепостию произволения твоего демоны посрамивый.
Радуйся, град отечествия твоего оставивый, да Вышняго Града наследие обрящеши;
Радуйся, в путь далекий и многоскорбный потекий, да пути спасительнаго причастник будеши.
Радуйся, нищету самоизвольную себе усвоивый;
Радуйся, гладом и жаждею многажды томимый.
Радуйся, в молитвах деннонощных пребывавый;
Радуйся, слезами умиления лице твое орошавый.
Радуйся, терпения столпе непоколебимый;
Радуйся, веры адаманте крепкий.
Радуйся, человече Божий Алексие, молитвенниче о душах наших.

 

 

Кондак 3

 

Силою Божиею укрепленный, путь далекий совершил еси и града Едеса достигл еси, Алексие достохвальне, в немже, яко един от нищих, пребывал еси в злострадании и нищете, ко храму Божию выну приметаяся и молитвы усердныя со многими слезами принося Христу, Царю и Богу, зовый: Аллилуиа.

 

 

Икос 3

 

Имел еси, святче Божий, небо покровом и землю одром упокоения, рубища же убогая одеянием многоподвижному твоему телу, зноем опаляему и мразом померзаему, емуже ни малаго угождения не попускал еси, да не возобладает плоть над духом твоим, любовию ко Господу пламеневшим. В таковем подвизе твоем едино утешение Христа имел еси, Иже и нам внушает вопити тебе:

Радуйся, от запада на восток пришедый взыскати Солнца Правды, Свет Невечерний;
Радуйся, Того во глубине твоего боголюбиваго сердца обретый.
Радуйся, светильниче Божественнаго сияния, мира концы озаривый;
Радуйся, твоими христопоследовательными стопами Едес освятивый.
Радуйся, правило веры истинныя;
Радуйся, образе нищеты духовныя.
Радуйся, в души твоей добродетели высокия возрастивый;
Радуйся, целомудрия сокровище драгое сохранивый.
Радуйся, Евангелия Христова добрый хранителю;
Радуйся, заповедей Иисусовых усердный исполнителю.
Радуйся, на земли небесно поживый;
Радуйся, Богу совершенно угодивый.
Радуйся, человече Божий Алексие, молитвенниче о душах наших.

 

 

Кондак 4

 

Бурю страстей юношеских воздержанием укротил еси, святе Алексие, и постом сугубым увядил еси красоту лица твоего; темже возсия в души твоей нетленная красота благодатнаго безстрастия, благоугодная краснейшему паче сынов человеческих Христу, Емуже во умерщвленнем телеси сладце воспевал еси песнь хвалы и благодарения: Аллилуиа.

 

 

Икос 4

 

Слышав клирик церкве Едесския в видении глас от иконы Богоматере, человеком Божиим тя нарицающ, достойным Царствия Небеснаго, егоже молитва, яко кадило благовонное, восходит пред Лице Божие, и повелевающ ввести тя внутрь церкве от притвора, идеже нищетно пребывал еси, удивися зело таковей святости твоей, Алексие богоблаженне, и введ тя в церковь Господню, ублажаше тя звании сими:

Радуйся, Духа Святаго жилище, преукрашенное чистотою;
Радуйся, Божия благодати приятелище, сияющее добродетелей красотою.
Радуйся, Божия Матере словесы похваленный;
Радуйся, Царицею небесе и земли человеком Божиим наименованный.
Радуйся, имя новое и таинственное от Владычицы мира получивый;
Радуйся, смирением высокая стяжавый.
Радуйся, нищетою богатство нетленное снискавый;
Радуйся, почесть вышняго звания достойно восприявый.
Радуйся, молитв благоприятное кадило;
Радуйся, Царствия Горняго ревностный искателю.
Радуйся, в притворе церковнем дни и нощи молитвенно провождавый;
Радуйся, внутрь храма Божия повелением Богоматере честно введенный.
Радуйся, человече Божий Алексие, молитвенниче о душах наших.

 

 

Кондак 5

 

Боготечней звезде уподобился еси, Алексие святе, егда избегая славы человеческия, от Едеса удалился еси во иныя страны, обаче Божиим Промыслом корабль, на немже плыл еси, ко отечественному твоему граду Риму принесеся. Ты же, познав в сем волю Господню тамо тебе подвизатися, притекл еси к дому родителей твоих, и, яко един от нищих, у врат его водворился еси, слезами омывая лице твое и вопия ко Господу: Аллилуиа.

 

 

Икос 5

 

Видев тя боголюбивый родитель твой, святе Алексие, странна и нища образом, милосердова о тебе и хижину малу повеле соорудити тебе у врат своего дома, в нейже питаше тя Христа ради, отнюд не познавая в тебе своего сына; ты же, нищетно в доме родительстем пребывая, всякую нужду странническую и поношение нищенское претерпел еси, подвизая ны благохвалити тя сице:

Радуйся, мужество великое показавый;
Радуйся, в терпении мнозем преуспевый.
Радуйся, в доме родителей твоих незнаемь пребывавый;
Радуйся, скорбь их о лишении твоем всегда созерцавый.
Радуйся, сетования отца твоего слышавый;
Радуйся, слезы матере твоея видевый.
Радуйся, плач обручницы твоея познавый;
Радуйся, сердце твое сими болезненно уязвливый.
Радуйся, поношения и укоризны от слуг родителей твоих незлобно восприявый;
Радуйся, биения и заушения от них молчаливо переносивый.
Радуйся, за обидевшия тя непрестанно Бога умолявый;
Радуйся, самоизволен мученик воистину бывый.
Радуйся, человече Божий Алексие, молитвенниче о душах наших.

 

 

Кондак 6

 

Проповедник евангельския кротости был еси, святе Алексие, образом жития твоего многотерпеливаго всем показуяй, яко вся возможна человеку о укрепляющем Бозе, Егоже силою в немощней плоти великия подвиги совершил еси и многая страдания претерпел еси любве ради Христовы, достойно и праведно воспевая Пресвятей Троице серафимскую песнь: Аллилуиа.

 

 

Икос 6

 

Возсиял еси в древнем Риме необычайными подвиги твоими, Алексие блаженне, и сими озарил еси благодатно всю Церковь Христову: кто бо не умилится, слыша твое пачеестественное терпение и многая злострадания, в доме родителей твоих восприятая самоизвольно, и како, наследник сый того дома, от слуг его укоризны и раны преносил еси радостно. Сего ради приносим ти от усердия нашего сия песноглашения:

Радуйся, великий угодниче Христов, в мире премирно поживый;
Радуйся, равноангельный слуго Господень, многоболезненно жизнь твою препроводивый.
Радуйся, безчестие в славу себе вменивый;
Радуйся, раны на теле твоем терпеливо носивый.
Радуйся, ланиты твоя от заушений не уклонивый;
Радуйся, плещи твоя на ударения предавый.
Радуйся, оплевания христоподражательно принимавый;
Радуйся, молчанием на укоризны отвещавый.
Радуйся, во Христе утешение едино обретавый;
Радуйся, воспоминанием крестных страданий Иисусовых скорби твоя услаждавый.
Радуйся, великодушный многострадальче;
Радуйся, добропобедный подвижниче.
Радуйся, человече Божий Алексие, молитвенниче о душах наших.

 

 

Кондак 7

 

Хотение едино имел еси, человече Божий, еже благоугождати Богу; темже вся временная в уметы вменил еси и, наследник многаго богатства быв, сие оставил еси, нищ и странен пребывая, в родительстем доме непознаваем и зело уничижаем, присно воздыхая ко Господу и слезно моляся, да сподобит тя в стране блаженства вечнаго пети Ему со святыми: Аллилуиа.

 

 

Икос 7

 

Ново и необычайно течение совершил еси жития твоего, святе Алексие, среди мира чуждо мирских пристрастий и всякия скверны греховныя; темже приял еси в души твоей боговедения дар совершен и был еси одушевленный храм Трисияннаго Божества, в немже Христос со Отцем и Духом обитель Себе сотвори, нас же научи звати тебе:

Радуйся, ангелов подобниче и человеков красото;
Радуйся, ризу душевную девства чистотою убеливый.
Радуйся, в радость Господа твоего вшедый;
Радуйся, добровольною нищетою превозвышенный.
Радуйся, терпением твоим с многострадальным Иовом сравнивыйся;
Радуйся, уничижением твоим евангельскому Лазарю подражавый.
Радуйся, болезньми многими здравие души стяжавый;
Радуйся, страданьми неисчетными Царствие Христово приобретый.
Радуйся, ветхаго Рима благодатное обновление;
Радуйся, Церкве Христовы Божественное удобрение.
Радуйся, обетований Иисусовых наследниче;
Радуйся, Пресвятыя Троицы таинниче.
Радуйся, человече Божий Алексие, молитвенниче о душах наших.

 

 

Кондак 8

 

Странник и пришлец был еси во граде отечествия твоего, святе, выну взыскуя Вышняго Града, Иерусалима Небеснаго; егдаже приспе время отшествия твоего к Богу, ты на хартии тайну жития твоего начертал еси, в познание твоим родителем, и неослабно пребывал еси в подвизех поста и молитвы, приуготовлялся ко исходу умиленным пением Богу: Аллилуиа.

 

 

Икос 8

 

Весь в Бозе быв, Алексие святе, молитве бывшей на устах твоих, предал еси праведную душу твою в руце Божии мирно и безмятежно, яко уснул еси; смерть бо тебе воистину упокоение бысть от страданий и подвигов непрестанных и прехождение от худшаго на лучшее. О таковем блаженнем успении твоем мы, радующеся, сия прикладныя тебе приносим глаголы:

Радуйся, святче Божий, свято и праведно жизнь земную совершивый;
Радуйся, во благоухании святыни сном смертным опочивый.
Радуйся, на лоно Авраама ангелы несенный;
Радуйся, пением неземным от святых Небожителей встреченный.
Радуйся, венцем безсмертныя жизни от Господа увенчанный;
Радуйся, во обители райския со славою восприятый.
Радуйся, Пресветлое Лице Владыки Христа выну созерцаяй;
Радуйся, Пресвятей Троице Трисвятую песнь немолчно возглашаяй.
Радуйся, Создателя горних и дольних молитвами твоими умилостивляяй;
Радуйся, весь мир христианский предстательством твоим объемляй.
Радуйся, ангелов и человеков радование;
Радуйся, почитающим святую память твою верный ходатаю.
Радуйся, человече Божий Алексие, молитвенниче о душах наших.

 

 

Кондак 9

 

Вси людие римстии в трепет приидоша, слышавше глас в соборней церкви града своего, во время Божественныя Литургии свыше от олтаря глаголющ и повелевающ поискати тя, человече Божий, да молитв твоих сподобятся. Темже во удивлении и ужасе бывше, молитвенно возопиша они ко Господу, да явит им тебе, Своего избранника, зовуще дивному во святых Своих Владыце: Аллилуиа.

 

 

Икос 9

 

Витийство человеческое не довлеет к похвалению тебе, святе Алексие, свыше похваленному Гласом Божественным, Егоже извещением людие римстии обретоша тя, мертва лежаща на одре, с хартиею на лице, еже сияше солнцеподобными лучами, и благоухание велие исхождаше от многоподвижнаго твоего телесе. Темже обретением твоим обрадовани, царь, святитель и весь народ возгласиша тебе:

Радуйся, светлая луче Трисолнечнаго Света, оживляющаго весь мир;
Радуйся, деннице, возшедшая просвещати Церковь Христову многими чудесы.
Радуйся, святости и чистоты крине благоуханный;
Радуйся, дарований Божественных сокровище.
Радуйся, родителем твоим хартиею себе явивый;
Радуйся, плач их горестный на сладостный преложивый.
Радуйся, седины отца твоего прославлением твоим прославивый;
Радуйся, слезы матере твоея благодатно вознаградивый.
Радуйся, честную обручницу твою, верность тебе сохраньшую, духовно утешивый;
Радуйся, весь народ римский обретением твоим зело возвеселивый.
Радуйся, исцеления чудесная от святых мощей твоих обильно источивый;
Радуйся, на небеси и на земли почесть посмертную достойно восприявый.
Радуйся, человече Божий Алексие, молитвенниче о душах наших.

 

 

Кондак 10

 

Спастися хотящим пример благий житие твое, святе Алексие, имже вся ны поучаеши отрешатися сует мира, искати же едино на потребу, еже есть богоугождение. Помози убо нам, человече Божий, в сем тебе подражати, укрепи немощное произволение наше, вдохни в нас мужество душевное, украси нас добродетельми и яви быти наследники Царствия Небеснаго, да с тобою на земли живых воспоем Создателю нашему: Аллилуиа.

 

 

Икос 10

 

Царя Небеснаго Христа верный последователь был еси, Алексие блаженне, егоже Страшному Престолу ныне предстоиши во славе небесней, о нейже мы, земнии и перстнии, ниже помыслити можем; обаче любовию усердною к тебе понуждаеми, мысленно созерцаем тя, горе за ны молящагося пред лицем Божиим, и бренными усты возсылаем ти пение таковое:

Радуйся, верно чтущим тя скорый помощниче;
Радуйся, молитвенно призывающих тя усердный заступниче.
Радуйся, праведниче Господень, Егоже Правда возсия немерцаемо;
Радуйся, соль земли, яже никогдаже обуяет.
Радуйся, добрыми делы твоими Бога прославивый и человеки удививый;
Радуйся, житием твоим ангелы возвеселивый и духи тьмы посрамивый.
Радуйся, Горняго Мира украшение;
Радуйся, дольняго мира защищение.
Радуйся, Рима славо и похвало;
Радуйся, христианскаго рода возвышение.
Радуйся, в чудесех просиявый;
Радуйся, в милостех неистощимый.
Радуйся, человече Божий Алексие, молитвенниче о душах наших.

 

 

Кондак 11

 

Пение надгробное со славою тебе сотвориша, святе Алексие, царь, святитель и весь народ римский, родителем твоим и обручнице твоей, возследующим честному твоему гробу, несенному благолепно в соборную церковь, от негоже чудес множество источил еси: слепии прозираху, разслабленнии укрепляхуся, недужнии здрави бываху прикосновением к мощем твоим святым, воеже всем видящим таковая возглашати Богу: Аллилуиа.

 

 

Икос 11

 

Светло и радостно бысть погребение твое, человече Божий, светел бо лицем возлежал еси во гробе и благоухание сладостное испущал еси от нетленнаго твоего телесе, сими знаменуя светлость немерцающую святыя твоея души, в воню благоухания Христова притекшия и мира Божественнаго преисполненныя, от еяже полноты и в наша души подаждь даяние благодатное, да со утешением духовным тебе возопием:

Радуйся, свеще неугасимая, в молитвах к Богу горе возжженная;
Радуйся, лампадо златая, елеем милости долу живущих умащающая.
Радуйся, алавастре драгий, миро целебное болящим источаяй;
Радуйся, реко многоводная чудес.
Радуйся, иночествующим наставниче добраго подвига;
Радуйся, в мире живущим образе богоугождения.
Радуйся, зерцало чистое праведнаго жития;
Радуйся, пристанище благоотишное по Бозе упование на тя возложивших.
Радуйся, врагов невидимых крепкий противоборче;
Радуйся, ищущим спасения душевнаго благий споспешниче.
Радуйся, от небесных высот к земнородным милостивно приникаяй;
Радуйся, чтущих тя прошения скоро исполняяй.
Радуйся, человече Божий Алексие, молитвенниче о душах наших.

 

 

Кондак 12

 

Благодать и милость испроси нам у Христа, Царя и Бога нашего, Алексие достохвальне; вемы бо, яко много может молитва твоя пред Лицем Его, и благоуветливо преклоняется Он к молению твоему. Темже усердно к тебе прибегаем и смиренно просим: окорми нас предстательством твоим в тихое пристанище Христово и сподоби наслаждатися нетленныя радости святых, немолчно вопиющих славословия песнь Триединому Богу: Аллилуиа.

 

 

Икос 12

 

Поюще подвиги многострадальнаго и предивнаго жития твоего, человече Божий, хвалим, славим и ублажаем тя усердною любовию, яко небеснаго многомощнаго предстателя нашего; ты же, святе, данною ти свыше благодатию нас, грешных и мрачных, освяти, просвети и настави вопити тебе неосужденно:

Радуйся, Востока незаходимаго присносияющая заре;
Радуйся, вселенную твоими чудесы исполнивый.
Радуйся, мощами твоими преславно чудотворяй;
Радуйся, образми подобия твоего предивная совершаяй.
Радуйся, болящих безмездный врачу;
Радуйся, скорбящих благий утешителю.
Радуйся, унывающих благодатное ободрение;
Радуйся, изнемогающих внезапное укрепление.
Радуйся, бедствующим на помощь ускоряяй;
Радуйся, от жития отходящим заступление твое многомощное являяй.
Радуйся, радости духовныя боголюбивым душам подателю;
Радуйся, благ временных и вечных усердный нам у Господа просителю.
Радуйся, человече Божий Алексие, молитвенниче о душах наших.

 

 

Кондак 13

 

О святый и богопрославленный человече Божий Алексие! Тебе, горе за ны молящемуся пред Престолом Господа Славы, мы грешнии, долу живущии, сие малое приносим пение, молимся от всея души и от всего помышления: молитвами твоими испроси нам у Христа Бога прощение согрешений и по кончине нашея жизни приятие в блаженныя обители Небеснаго Царствия, да с тобою во веки поем Ему: Аллилуиа.

 

(Этот кондак читается трижды, затем икос 1-й и кондак 1-й)

 

МОЛИТВА

 

О, великий Христов угодниче, святый человече Божий Алексие, душею на Небеси Престолу Господню предстояй, на земли же данною ти свыше благодатию различная совершаяй чудеса! Призри милостиво на предстоящия святей иконе твоей люди, умиленно молящияся и просящия от тебе помощи и заступления. Простри молитвенно ко Господу Богу честнии руце твои и испроси нам от Него оставление согрешений наших вольных и невольных, в недузех страждущим исцеление, напаствуемым заступление, скорбящим утешение, бедствующим скорую помощь, всем же, чтущим тя, мирную и христианскую живота кончину и добрый ответ на страшнем Суде Христове. Ей, угодниче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да, твоими молитвами получивше благодать и милость от Господа, прославим человеколюбие Отца и Сына и Святаго Духа, в Троице славимаго и покланяемаго Бога, и твое святое заступление, ныне, и присно, и во веки веков. Аминь.

 

 

ТРОПАРЬ

 

Тропарь, глас 4

 

Возвысився на добродетель и ум очистив, к Желанному и Крайнему достигл еси, безстрастием же украсив житие твое, и пощение изрядное восприим совестию чистою, в молитвах яко безплотен пребывая, возсиял еси яко солнце в мире, преблаженне Алексие.

 

 

Кондак, глас 2

 

Дом родителей твоих, яко чужд, имев, водворился еси в нем нищеобразно и, по преставлении венец прием славы, дивен на земли явился еси, Алексие, человече Божий, Ангелом и человеком радование.

 

Ин тропарь, глас 4

 

Яко чистоты светильник пресветел показася, дивный Алексие, ибо тленный чертог на нетленное Божие Царствие пременив, яко целомудрил делатель преизряден. Сего ради предстоиши Господеви, всех Царю. Егоже моли, даровати нам мир и велию милость.

 

 

КАНОН

 

(Преподобному Алексию, человеку Божию)

 

Канон, глас 2

 

Песнь 1

 

Ирмос: Во глубине постла иногда фараонитское всвоинство преоруженная сила, воплощшееся же Слово всезлобный грех потребило есть, препрославленный Господь славно бо прославися.

 

Теснейший шествовал еси путь, непорочное и преподобное житие, мудре, проходя от юности, темже мою тесноту разшири ума восхвалити тя, в райстей широте водворяяся, Алексие.

 

Тебе самаго весьма Богу возложив, блаженне, вне плоти и мира был еси, богатству текущу Небесное предпочел еси и пребывающее и обещанный град Сион вечнующий.

 

Ложесн ты матерних неплодие разрешил еси, рождся, якоже Самуил, пребогате, во чреве же сердца чистый зачен страх, родил еси дух спасения Божественных добродетелей верою.

 

Богородичен: Божий Собезначальный Сын име яко виновну Тя к нам, Дево, подобия, едину, паче всея твари, Чистая, чисту Тя обрет. Тем Тя поем, вси роди, и ублажаем.

 

 

Песнь 3

 

Ирмос: Процвела есть пустыня, яко крин, Господи, языческая неплодящая, Церковь пришествием Твоим, в нейже утвердися мое сердце.

 

Пронзаемь желанием чистоты, чертогом, иже на земли, Небесный пременил еси и жены любовию сладчайшее Ангельское подобие.

 

Молвы житейския и тяжесть богатства оставил еси и пресельник был отечества, блаженне Алексие, Христове нищете подобяся.

 

Слезами, и болезньми, и воздержанием, всемудре, благое взыскал еси, когда приидет свет разума, безстрастие дая сердцу твоему.

 

Богородичен: Горе невидимый Ангелом, Чистая, доле из Тебе раждаемь, зрится совершен Человек, погибающий мир обновляя.

 

 

Седален, глас 3

 

Мира красоту, преподобне, оставил еси, пременив богатством текущим непроходимое яве и пребывающее, Алексие. Темже со всеми тя святыми славим и торжествуем светло в памяти твоей, просяще обрести молитвами твоими, блаженне, велию милость.

 

Слава, и ныне, Богородичен:

 

Недомысленно и непостижно есть, Владычице Богорадованная, еже соделанное о Тебе страшное Божие таинство, ибо Необыменнаго, заченши, родила еси, плотию обложена от пречистых кровей Твоих. Егоже всегда, Чистая, яко Сына Твоего моли спастися душам нашим.

 

Песнь 4

 

Ирмос: Пришел еси от Девы, не ходатай, ни Ангел, но Сам, Господи, воплощся, и спасл еси всего мя, человека. Тем зову Ти: слава силе Твоей, Господи.

 

Претерпел еси нищету, проситель быв, нищ, якоже Лазарь, желание бо Божественное утешаше, блаженне, сердце твое, пожелавшее богатства Небеснаго.

 

Безпечальнаго и тихаго жития возжелал еси, единощи ядый в седмице, Алексие, желанием ожидающаго тя не мимотекущаго, всеблаженне, наслаждения.

 

Храм Богу сердце ищай соделати, в дому возлюбил еси Богоматере, славне, всегда седети и Небесныя доброты созирати.

 

Богородичен: Воздоивши Дателя, Дево, млека, алчущее и утесняемое ныне сердце мое насыти всякаго разума и умиления Божественнаго, молю Тя.

 

 

Песнь 5

 

Ирмос: Ходатай Богу и человеком был еси, Христе Боже: Тобою бо, Владыко, к Светоначальнику Отцу Твоему, от нощи неведения приведение имамы.

 

Токи священными напаяя всегда слез твою душу, соделал еси клас, воистину сторичествующ, Делателю Безсмертному добре соблюдаемь.

 

Виден был еси на земли, житие Безплотных подражая, премногим твоим, отче, воздержанием, досточудне, и в молитвах прилежанием, имже, яко светом, просветился еси.

 

Огнем молитв греха попалил еси вещь, мудре, бденными же стояньми всякое сладострастие успил еси, уснув же, к сиянию преставился еси невечернему.

 

Богородичен: Иже, во Свете живый, во святое чрево Твое вселися, Чистая, мир, погибший тьмою неразумия, паки назидая, Егоже моли вся просветити, поющия Тя.

 

 

Песнь 6

 

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

 

Яко храм жив Божий, тя, бывша Христово селение, Неискусобрачная проявляет крыющася и прославляет утаитися тщащагося.

 

Молитвы твоя Богу, яко кадило, блаженне, приятны быша, отсюду житием твоим верных разумы облаговонил еси Духа благодатию.

 

Священным житием украшаема, паки Христос не хотяща, славне, тя отечеству дает, отбегающа славы привременныя.

 

Богородичен: Законы естества, Чистая Владычице, Зиждитель, новосоделавый создания, из Тебе неизреченно раждается и обожает мя безмерною милостию.

 

 

Кондак, глас 2

 

Дом родителей твоих, яко чужд, имев, водворился еси в нем нищеобразно и, по преставлении венец прием славы, дивен на земли явился еси, Алексие, человече Божий, Ангелом и человеком радование.

 

Икос

 

Житием и словесы украсился еси и Христову Церковь возвеличил еси твоим житием, отца и матерь, царя и люди торжествовати устроив, делы же соблюд, еже по образу Божию, Алексие преподобне, возсиял еси в мире твоим целомудрием. Темже благодать добродетелей твоих облиставает вся, верою празднующия, отче, память твою, явил бо ся еси Ангелом и человеком радование.

 

 

Песнь 7

 

Ирмос: Богопротивное веление беззаконнующаго мучителя высок пламень вознесло есть. Христос же простре Богочестивым отроком росу духовную, Сый благословен и препрославлен.

 

Претерпел еси, преподобне, пред родительными враты седя, и весьма непознаваемь, и от отрок ругания подъемля, и наругаемь люте, и нищетою многою оскорбляемь.

 

Плоти твоея мудрование умертвив, зря родители, и сими непознаваемь, естества покрывал еси нужду, преподобне, и презрение твоих неискусных отрок, оскорбляющих тя.

 

О, чудесе! Како пребыл еси, присно нищетствуя, в богатстве, Алексие, безмернаго смирения? Како претерпел еси ругания и укоризны от отрок, премудре, твоих, не ведевших жития твоего?

 

Богородичен: Великаго служительница Ты таинства была еси, Всенепорочная: Бога бо воплотила еси, великих зол нас избавльшаго, Тя величающия, Чистая Благословенная, Богорадованная.

 

 

Песнь 8

 

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: благословите, вся дела Господня, Господа.

 

Неведом прежде родителем сый, во время отшествия твоего сим тайну открываеши, являемь в славу Бога нашего, славне, вельми тя и достойне прославльшаго.

 

Господь гласом велиим являет тя всему Риму, сокровенное сокровище, пребогате, в нищетне образе лежаща и дары врачеваний вся, верою к тебе приходящия, обогащающа.

 

Князи людстии, и царие снидошася, и священницы, блаженне, погребсти тя Божиим мановением и, видяще велие видение, дивишася чудесем, преподобне, яже творил еси Божественною силою Духа.

 

Богородичен: Истлевшия ны древле преступлением обновляя, Человеколюбец нетленно воплотися от нетленныя Твоея, Всенепорочная, утробы и избави всех греховныя тли, Богоневестная.

 

 

Песнь 9

 

Ирмос: Безначальна Родителя Сын, Бог и Господь, воплощся от Девы, нам явися, омраченная просветити, собрати расточенная, тем Всепетую Богородицу величаем.

 

Исцеления источил еси, ко гробу несом, Богу тя, блаженне, вельми славящу: свет бо невидящии видеша и глаголание прияша прежде суще немии, всеславне Алексие.

 

Виден был еси, предлежащ и к погребению несом, яко солнце, отче, испущая исцелений зари преславно, и темныя страсти отгоняя, и опаляя демоны, и просвещая Богомудрыя.

 

Прииде погребсти тя Патриархов первейший, царь же, вельми христолюбивейший, князи, старцы и юнии и монашествующих лицы, Божественным мановением освящающеся прикосновением твоим, блаженне.

 

Восхищен был еси, на колеснице добродетелей несом, и почиваеши, идеже преподобных чини, собор апостол и мучеников, патриархов и всех праведник, с нимиже нас помяни, почитающия тя, Алексие.

 

Богородичен: Глас Тебе приносим Гавриилов, Всенепорочная, радуйся, глаголюще, ниво неделанная; радуйся, клятвы разрешение; радуйся, источниче воды животныя, преподобных похвало, Богородице Приснодево.

 

 

Светилен

 

О, чудо: како во вратех родителей твоих, многолетне, якоже некий адамант, терпел еси, естества нуждею не преклонился, ни родителей же и супружницы, Алексие, горькими рыданьми.