Евфросиния Полоцкая
 
 
 







Евфросиния Полоцкая PDF Печать E-mail
Молитвы и о молитвах - Молитвы и акафисты святым
13.06.2013 22:20

Евфросиния Полоцкая преподобная

3e

(23 мая / 5 июня)

  Имя Евфросиния было наречено ей при постриге. Первое же было славянское – Предслава, или Предислава. Как будто предвидели, что носить его она будет недолго – перед славой неземной, неотмирной – духовной. Бог предызбрал ее как одну из первых русских игумений, как образец на века, как покровительницу женского русского монашества.

   Предание сохранило свидетельство о том, что правнучка святого равноапостольного князя Владимира, дочь полоцкого князя Георгия Всеславича княжна Предслава была необыкновенно красива. До сих пор образ, написанный с мощей, поражает правильностью черт: по-монашески сосредоточенный и вместе с тем чистый ангельский лик, в нем нет суровости, напротив – женственность и кротость.

   От рождения ей было дано все: приложением к красоте были знатность рода и высокое положение, благочестие. Она была рано обучена грамоте, чтению Священного Писания, Псалтири и других духовных книг. Многие князья просили ее руки. Но она была словно не принадлежащей к миру. Узнав о том, что родители задумали обручить ее с одним из знатных князей, Предслава тайно ушла из дома в обитель, где настоятельницей была ее тетя – игуменья Романия (вдова Романа Всеславича). Несмотря на молодость послушницы, игуменья, видя ее стремление к монашеству, ее слезы, благословила облечь княжну в иноческий образ.

   По благословению епископа Полоцкого Илии юная монахиня стала жить при Софийском соборе, подражая Пресвятой Богородице, в детские годы жившей при Иерусалимском храме. Здесь она изучала книги из библиотечного собрания, занималась их переписыванием, раздавая большую часть денег, полученных за работу, нищим.

  По преданию, однажды в сонном видении Евфросинии явился ангел, который возвестил ей волю Божию – основать обитель невдалеке от Полоцка, в местечке с названием Сельцо. Видение повторилось дважды. С этим же повелением ангел был послан и к епископу Полоцкому Илии. И вскоре Евфросинии был передан Преображенский храм в Сельце – для основания при нем женского монастыря. Сборы были недолгими: все имение монахини, кроме немногих личных вещей, составляли книги, которые она взяла с собой для духовных занятий и обучения будущих насельниц.

  Удалившись от мира, монахиня Евфросиния все же не смогла избежать известности. В первые годы жизнь ее была тихой, сокровенной. Молитва, обучение грамоте сестер, переписывание богослужебных и святоотеческих книг, пение и златошвейное искусство – все то, что заполняет жизнь женских монастырей, проходила и она. Радостью был приход в монастырь двух ее сестер. В монашестве им были даны имена Евдокия и Евпраксия. Обученные грамоте, искусствам, они стали ее помощницами в устроении дел монастыря. При обители было решено создать школу, и это привлекло под ее покров новых молодых насельниц. Простые и знатные, они встречали со стороны матушки любовь, видели в ней душу просвещенную, светлую, евангельскую. Долгожданным было монашество для игуменьи, и послушницам передавалось то же чувство – высшей радости, равной которой нет на земле. Работа ли пост – все шло с молитвой, все во славу Божию, во спасение.

  При игуменье Евфросинии в Спасо-Преображенском монастыре понемногу строились храмы. В 1161 году был воздвигнут новый каменный храм во имя Спасителя. Благословение Господне приходило и через святыни. Одной из главных стал крест с частицами мощей многих святых и частью Животворящего Креста Господня.

   Позднее предметом особого попечения игуменьи стал и основанный ею Богородицкий монастырь. Для него святая просила Патриарха Константинопольского Луку и византийского императора Мануила прислать ей список чудотворной Ефесской иконы Божией Матери, по преданию, написанной святым апостолом и евангелистом Лукой. Спустя годы Ефесская икона на Руси получила известность под названием «Корсунская». А в 1239 году она была перенесена в собор города Торопца по случаю венчания князя Александра Невского и дочери полоцкого князя Брячислава.

   Шли годы, и матушка Евфросиния становилась все более почитаемой. К ее кроткому увещанию прислушивались князья, не раз удавалось ей предотвратить кровавые столкновения между боярами и простым людом. Зная действенность и благодатную силу ее молитвы, к ней приходили за помощью, духовным советом и благословением.

  Необычной была ее кончина. На склоне лет преподобная Евфросиния пожелала поклониться Животворящему Кресту Спасителя. Поручив монастырь управлению своей сестры Евдокии, она в сопровождении другой сестры – Евпраксии отправилась в Святую Землю. После совершения паломничества к святыням Константинополя матушка прибыла в Иерусалим. И 23 мая 1173 года, после поклонения Честному Животворящему Кресту, она приняла мирную кончину в русском монастыре в честь Пресвятой Богородицы.

   Удивительна ее жизнь, удивительна и судьба ее мощей. 3 октября 1187 года захвативший Иерусалим султан Саладин потребовал от христиан покинуть город. И тогда возвращавшиеся на Русь монахи взяли с собой мощи великой русской подвижницы. Первым местом их упокоения была Киево-Печерская Лавра, и только в 1910 году мощи преподобной Евфросинии были с почестями перенесены в Полоцк, в основанный ею монастырь.

  13 мая 1922 года по постановлению “народного комиссариата юстиции РСФСР” рака с мощами была вскрыта, затем мощи были отправлены на атеистическую выставку в Москву, а оттуда - в Витебск, где демонстрировались на протяжении почти двух десятков лет в местном краеведческом музее.

   Во время немецкой оккупации верующие перенесли раку преподобной из музея в Свято-Покровскую церковь, а 23 октября 1943 года нетленные мощи вновь возвратились в Полоцкий Спасо-Евфросиньевский монастырь, где почивают и поныне.

   В земной жизни ей выпал особый удел – быть миротворцем в своем Отечестве, и сегодня святая соединяет духовно Россию, Белоруссию и Украину и одновременно как бы связывает русские земли с центром мира – Иерусалимом. Первая «матушка русской земли» и одна из первых наставниц русских женщин в таинствах духовной жизни, она напоминает о том, что дух монашества – это мир, любовь и радость.

 

 

АКАФИСТ

Кондак 1

 

Избранную Христову невесту песньми восхвалим днесь, вернии, Евфросинию; сия бо княжна, дом отчий оставльши и во иночестве поживши добре, многая управила есть ко спасению; во Иерусалиме плотию преставльшися, во Иерусалим горний духом преселися и тамо присно за ны молится. Ейже тако возопиим: Радуйся, Евфросиние, невесто Христова всечестная.

 

 

Икос 1

 

Ангельски поживши, преподобная, постническим житием угодила еси Христу и небесныя радости причаститися сподобилася еси по скончании. Темже с горних высот призри на ны, тако тя величающия:

Радуйся, Российския земли похвало;

Радуйся, отрасль славная от рода Владимира равноапостольнаго.

Радуйся, именитых родителей чадо богоизбранное;

Радуйся, голубице непорочная.

Радуйся, девственнице чистая;

Радуйся, инокиням утешение.

Радуйся, ко Иерусалиму небесному путеводительнице;

Радуйся, благочестия звездо.

Радуйся, заступнице к тебе притекающих;

Радуйся, целительнице недугов незримая.

Радуйся, ходатаице за ны теплая;

Радуйся, Евфросиние, невесто Христова всечестная.

 

 

Кондак 2

 

Видение бе радостное, егда по рождении твоем принесоста тя, преславная, родителя твоя во храм Господень: тамо бо в купели крещения от первороднаго греха омылася еси погружением, и мира священным помазанием тя, яко отрасль младую, иерей привил есть ко Христу, да поеши Ему выну со избранными Его: Аллилуиа.

 

 

Икос 2

 

Разумом, свыше просвещенным, и чистым сердцем Христови от юности вручила еси себе, Предиславо; почасту во храм притекающи, в горнице во трудех присно пребывала еси. Темже тя ублажаем:

Радуйся, Христови обрученная от купели крещения;

Радуйся, миром благодатным запечатленная.

Радуйся, Духа Свята вместилище чистое;

Радуйся, тем умудренная во спасение.

Радуйся, во благое свыше укрепленная;

Радуйся, разум просветившая молитвою.

Радуйся, совесть стяжавшая крепкую во благом;

Радуйся, от младости уведевшая пути благочестия.

Радуйся, уклонилася бо еси пути гибельнаго;

Радуйся, трудолюбивая отроковице.

Радуйся, юных дев российских красото;

Радуйся, Евфросиние, невесто Христова всечестная.

 

 

Кондак 3

 

Силою Вышняго укрепленная, возлюбила еси преподобная; научение книжное и тому прилежала еси; мудрость же книжную постигши, паче прочих божественныя книги избрала еси, и яже умудрити могут во спасение всякаго человека, усердно почитала еси, сладце поющи Господеви: Аллилуиа.

 

 

Икос 3

 

Имать днесь обитель твоя отроковицы многи и млады, научению книжному зде вданныя. Сего ради усердно молим тя, всехвальная, призри на тыя и умудри я во спасение, да тя величаем:

Радуйся, ключ мудрости взыскавшая;

Радуйся, яко художество книжное постигла еси от младости.

Радуйся, тем отверзшая двери богопознания;

Радуйся, Священное почитавшая Писание.

Радуйся, от сего узревшая мира сущаго сотворение;

Радуйся, умиленная неизреченным Христовым снизхождением к падшему роду нашему.

Радуйся, возлюбившая возлюбльшаго нас Господа;

Радуйся, Тому Единому поработати возжелевшая.

Радуйся, последи в чертог славы Его всельшаяся;

Радуйся, девственнице, юным девам незримая споспешнице в научении.

Радуйся, светильниче благочестия и знания;

Радуйся, Евфросиние, невесто Христова всечестная.

 

 

Кондак 4

 

Бури житейских бед и напастей бежавши, преподобная, паче брака честна житие девственное возлюбила еси и от именитых женихов уклонилася еси, отроковице, да единому Жениху Небесному Христу поработаеши, поющи Ему: Аллилуиа.

 

 

Икос 4

 

Слышала еси, преподобная, яже апостол рече: глаголю безбрачным и вдовицам — добро им есть, аще пребудут, якоже и аз; аще ли жени, да посягают; не оженивый бо ся печеттся, како угодити Господеви; и сему поревновала еси. Темже тя величаем:

Радуйся, девственнице чистая;

Радуйся, путь иноческаго жития избравшая.

Радуйся, яко жребий девства прияти и вместити возмогла еси Божиею благодатию;

Радуйся, мирскаго треволнения избегшая.

Радуйся, тихаго пристанища взыскавшая;

Радуйся, Марии Лазареве подражавшая.

Радуйся, яко во храме, аки при ногу Христову, приметалася еси;

Радуйся, яко лику мучениц и преподобных жен приобщилася еси.

Радуйся, презревшая лепоту мира тленнаго;

Радуйся, неизреченныя радости в мире горнем днесь причастнице.

Радуйся, праведнаго жития образе;

Радуйся, Евфросиние, невесто Христова всечестная.

 

 

Кондак 5

 

Бога точию боящися, не устрашилася еси, Евфросиние, тяготы жития иноческаго, кров же оставльши отчий, во обитель притекла еси и облещи тя во ангельский образ умильне игумению молила еси, да не обязавшися куплями житейскими, выну пети сподобишися Христови: Аллилуиа.

 

 

Икос 5

 

Врача Небеснаго молила еси, всехвальная, да скорбь, родителема твоима отшествием учиненная, на радость преложится; оставила бо еси я, преподобная, да Христови послужиши за рождших тя молишися. Темже тя хвалим достойно:

Радуйся, избраннице Божия;

Радуйся, тайне, из отчаго дома отшедшая.

Радуйся, во обитель всельшаяся княгини Романовы;

Радуйся, возложшая руку на рало делания духовнаго.

Радуйся, брачный венец отложившая;

Радуйся, главу покрывшая кукулем незлобия.

Радуйся, одеждам брачным одежду нищеты предпочетшая;

Радуйся, со приятием вервицы, аки мечем, вооруженная словом Божиим.

Радуйся, крест Христов, аки знамя веры, приимшая;

Радуйся, яко не посрами тя Господь во уповании.

Радуйся, родителя бо, пришедшая тя видети, от писания тобою утешившася, в радости возвратистася;

Радуйся, Евфросиние, невесто Христова всечестная.

 

 

Кондак 6

 

Проповедника Павла, иже рече: всяк подвизаяся от всех да воздержится, послушающи, в посте и воздержании неослабно пожила еси, преподобная, во обители; суесловия бо бегала еси и песньми псаломскими назидающися молилася еси, и в добрем изволении утверждающися, выну пела еси: Аллилуиа.

 

 

Икос 6

 

Возсия благодать в подвизех жития твоего, Евфросиние всечестная; по некоем бо времени во град Полотск преселилася еси, и при храме святыя Софии в клетце мале подвизающися, книги божественныя преписовала еси и тако град ти присный полезным учением напаяла еси, слышащи от всех таковая:

Радуйся, Полотское радование;

Радуйся, девам сияние.

Радуйся, звездо благочестия;

Радуйся, смирения исполненная.

Радуйся, послушанием утвержденная;

Радуйся, с молчанием скорби терпевшая.

Радуйся, при храме бо, яко древле Богоотроковица, пожила еси;

Радуйся, мудрая княжно и инокине пречестная.

Радуйся, цвете постничества;

Радуйся, свете кротости.

Радуйся, упования неложнаго исповеднице;

Радуйся, Евфросиние, невесто Христова всечестная.

 

 

Кондак 7

 

Хотяй спасти тобою жены и девы многия во иночестве, Владыка Христос сицеваго видения удостой тя, преподобная; в соннем видении узрела еси себе, Евфросиние, принесену в сельце к церквице Спасове, и Ангела ти рекшаго: зде ти быти подобает. Ты же абие от сна воставши, радостне пела еси: Аллилуиа.

 

 

Икос 7

 

Новое чудо бысть: тойже бо Ангел явився святителю Илии, повеле ему дати сельце то на вселение ти и церквицу на молитву, еже и сотвори святитель абие. Сия поминающе, тако тя величаем:

Радуйся, ангельски пожившая;

Радуйся, Ангела Господня узревшая.

Радуйся, сладкия беседы его причастнице;

Радуйся, яко и пред святителем ходатай бе о тебе.

Радуйся, Ангелом и на всех путех твоих храненная;

Радуйся, кровом крил его огражденная.

Радуйся, не преткнувшая ноги твоея о камень гордыни;

Радуйся, сего ради видения зрака ангельского удостоенная.

Радуйся, яко явися ти, иже зрит лице Отца нашего Небеснаго;

Радуйся, не прогневльшая хранителя ничимже суетным и греховным.

Радуйся, сего ради радостныя вести удостоенная;

Радуйся, Евфросиние, невесто Христова всечестная.

 

 

Кондак 8

 

Странник, кров узрев, радуется и, пришед, покой си приемлет. И ты, преподобная, радости исполнилася еси, при церквице на сельце водворившися со единою от инокинь, и ту основание обители твоея сотворила еси отнюдуже Богови днесь возносится песнь великая, в вышних сугубо песнословимая: Аллилуиа.

 

 

Икос 8

 

Вся весть Господь, и ничтоже тайно, еже не открыется; ведый же вся коемуждо от человек изволение дарует, да изберет кийждо путь жития, и якоже кто поживет, по житию коегождо скончавшася судит. Яже памятующе, тако тя хвалим:

Радуйся, благий ярем Христов подъемшая;

Радуйся, по гласу ангельскому на место пустынно отшедшая.

Радуйся, точию книги с собою принесшая;

Радуйся, со единем одеянием бывшая.

Радуйся, с треми малыми хлебы всельшаяся;

Радуйся, прочая вся оставльшая.

Радуйся, пустыни украшение;

Радуйся, яко сроднии за подвиг сей благословиша тя.

Радуйся, епископом Илиею утешенная;

Радуйся, яко вскоре к тебе многи инокини стекошася.

Радуйся, яко и обитель славная ту устроися;

Радуйся, Евфросиние, невесто Христова всечестная.

 

 

Кондак 9

 

Всемилостиваго Спаса храм во обители создала еси и честными иконами украсила еси, преподобная, споспешествующей ти благодати Божией; древоделя бо на строение церковное некий глас буждаше, на скончание же храма дивне плинфы многи обретошася. Яже зрящи, со умилением пела еси: Аллилуиа.

 

 

Икос 9

 

Вития мудрая была еси, преподобная, памятовала бо еси слово Христово, иже сотворит едину заповедей сих малых и научит тако человеки, сей велий наречется в Царствии Небеснем, и поучающи благочестию сестры своя, первее сия творила еси. Темже тя величаем:

Радуйся, инокиням правило иноческаго жития;

Радуйся, яко в чистоте и целомудрии блюла еси юныя.

Радуйся, неложно старыя почитавшая;

Радуйся, скорбным споспешнице в терпении.

Радуйся, была бо еси всем образ смирения и благолепнаго хождения;

Радуйся, обличительнице осуждения и многословия.

Радуйся, приятелище дара прозрения сердец;

Радуйся, вопрошающим мудрая советнице.

Радуйся, миротворице сварящихся;

Радуйся, добродетельми преукрашенная.

Радуйся, великая российская дево;

Радуйся, Евфросиние, невесто Христова всечестная.

 

 

Кондак 10

 

Спасения ради и утешения Ефесскую икону Владычицы нашея Богородицы испросила еси из Царяграда, преподобная, во град Полотск. Обитель ину устроивши, тою иконою сию украсила еси; сестру же и две дщери братния, Кирианну и Ольгу, иночества обеты Христови обручила еси и во обителех твоих во спасение управила еси многия, поющи: Аллилуиа.

 

 

Икос 10

 

Стеною крепкою от искушений явися смирение твое; вся бо ти Повеленная совершивши, яко рабу неключиму вменила еси себе, преподобная; кротостию и тихостию нрава паче злата и бисера украсила еси душу твою. Темже тя величаем:

Радуйся, слуго чистая Девы Пречистыя;

Радуйся, увеселила бо еси Полотск чудным Божия Матере образом.

Радуйся, великое сокровище Российстей земли тако стяжавшая;

Радуйся, многия девы во обитель Божия Матере приведшая.

Радуйся, присныя ти на путь спасения привлекшая;

Радуйся, мудрая управительнице во спасение.

Радуйся, две обители, яко свещи возжегшая;

Радуйся, теми просветившая страну Полотскую.

Радуйся, насадительнице древа иноческаго жития;

Радуйся, смирением утаевавшая высоту твоих подвигов.

Радуйся, строительнице Российския земли;

Радуйся, Евфросиние, невесто Христова всечестная.

 

 

Кондак 11

 

Песньми восхваляюще тя, терпению твоему дивимся, преподобная; всякия бо труды и скорби понесши, последи во Святую Землю странствие прияла еси, идеже, по желанию твоему, и скончатися приводе ти Господь; тамо бо к Нему в старости маститей преселилася еси, подвиг добрый совершивши, с песнию: Аллилуиа.

 

 

Икос 11

 

Светозарная луча земли Российския! Аще плотию преставилася еси от нас, преподобная, обаче духом с нами присно пребываеши. Во храме, тобою созданном, молящеся и кресту, от тебе устроену, покланяющеся, молим тя, приими от нас сицевыя хвалы:

Радуйся, древния России сияние;

Радуйся, оныя днесь великия похвало.

Радуйся, славная Земли Святыя от севера пришельнице;

Радуйся, гробу Христову поклонитися сподобльшаяся.

Радуйся, лампаду ту от земли Российския возжегшая;

Радуйся, у гроба Христова ко Христу отшедшая.

Радуйся, у онаго крест земнаго жития твоего оставльшая;

Радуйся, святыми тайнами при скончании напутствованная.

Радуйся, на небеси от святых угодник радостно сретенная;

Радуйся, венцем славы от Небеснаго Жениха увенчанная.

Радуйся, мудрая дево, вшедшая в чертог Жениха Небеснаго со славою;

Радуйся, Евфросиние, невесто Христова всечестная.

 

 

Кондак 12

 

Благодати причастнице, усердно молим тя, Евфросиние всехвальная, пролий теплую твою молитву ко Всевышнему за всю землю нашу православную, да мудростию и чистотою жития народнаго, яко дщерь избранная, будет во языцех земля наша, и чада ея да внидут в горняя селения, поюще Богови: Аллилуиа.

 

 

Икос 12

 

Поюще тя, яко заступницу нашу теплую, инокиням же и девам обители твоея покров и утверждение, радуемся о тебе, преподобная, и молитвами твоими просимая приемлюще, с любовию величаем тя сице достойно:

Радуйся, яко мощи твоя, во отечество принесенныя, процветоша нетлением;

Радуйся, всехвальная, равноапостольнаго Владимира правнуко.

Радуйся, собеседнице равноапостольныя Ольги и всего благосветлаго лика праведных жен;

Радуйся, всельшаяся в скинию святых.

Радуйся, незримая о нас ходатаице;

Радуйся, болящих врачевание дивное.

Радуйся, печальных утешение неложное;

Радуйся, отрадо скорбящих.

Радуйся, опоро тя призывающих;

Радуйся, заступнице наша теплая у Христа.

Радуйся, дивная, верою чтущих тя путеводительнице ко спасению;

Радуйся, Евфросиние, невесто Христова всечестная.

 

 

Кондак 13

 

О всехвальная мати наша Евфросиние всечестная! Моли за ны Господа и Матерь Его Пречистую, да укрепит наша немощныя силы и во спасение управит, юныя в чистоте соблюдет, девствующия укрепит в подвизе, во браце сущия в любви и мире усовершит, уврачует недужныя, просветит омраченныя, умершия простит и вся в чертоги Своя управит, идеже выну Ангели поют песнь хвалебную: Аллилуиа.

 

(Этот кондак читается трижды, затем икос 1 и кондак 1)

 

 

ТРОПАРЬ

 

Тропарь, глас 4

 

Подражающи дванадесятолетна дванадесятолетну Христу, учившему во святилищи Божию слову, последовала еси, Евфросиние, славу временную и земнаго обручника оставльши, и вся мирская презревши, краснейшему паче всех Христу себе уневестила еси, крест вземши, путем ангельскаго жития шествующи, и многия к нему наставляющи, во благоухании мира в Небесный Чертог востекла еси, идеже моли, Егоже возлюбила еси, о чтущих благочестно память твою.

 

 

Кондак, глас 8

 

Избранней Богом от самаго рождения и призванней на служение Ему, в чине ангельстем Господеви послужившей, свято и преподобно пожившей, и ныне с небесными силами Господа восхваляющей, о нас же, грешных, пред Господом ходатайствующей, с радостию и любовию воззовем: радуйся,Евфросиние, невесто Христова всечестная.

 

 

Величание

 

Ублажаем тя, преподобная мати наша Евфросиние, и чтим святую память твою, наставнице монахинь и собеседнице Ангелов.

 

 

МОЛИТВА

 

О, преподобная и приснопамятная, всехвальная мати Евфросиние, Ангеле во плоти, богоизбранный сосуде Святаго Духа, Церкве Христовы похвало и украшение, монашествующих славо и утверждение, отечеству, обители твоей и всей стране нашей помоще, покрове и защитнице! Ты еси, яко древо, насажденное при исходищих вод, плоды  добродетелей твоих и благодатными даровании Святаго Духа украшенная, наставнице делом и словом, избранная, непорочная и добрая, услыши ны, молящияся тебе и призывающия имя твое: имаши бо дерзновение у Господа. Испроси нам преспеяние в жизни добродетельней, огради сердца наша верою, надеждою, и любовию, и страхом Божиим. Подай нам помощь в трудех и скорбех наших, и якоже попечение имела еси в житии твоем о обители твоей и иночествующих, тако и ныне потщися о нас благопоспешити нам во всем; и обитель твою огради миром и защити от враг видимых и невидимых, да преуспевает и процветает в добродетелех. Изми ны от всякия нужды и тесноты, от лютых болезней и от нечаянныя смерти и приведи ны ко истинному покаянию при исходе из жизни сея. Испроси нам у Господа Бога кончину мирну, безболезненну, непостыдну, Святых Таин причастну и преведи ны чрез мытарства воздушная, да не похитят нас истязателие грознии по грехом нашим, но да твоим заступлением и помощию возможем безбедно проити истязание воздушное, и милость получити, и предстати неосужденно страшному Престолу, и на Страшнем Судищи сподобитися одесную стати Праведнаго Судии и наследовати праведных часть. Ей, госпоже, всечестная мати, преподобная Евфросиние, помози нам молитвами твоими, огради нас и заступи от всяких козней вражиих, да сподобимся прейти время жизни сея непреткновенно и спасение получити молитвами твоими у Христа Господа, Егоже и сподобимся пети и славословити со Безначальным Отцем и со Святым Духом во веки веков. Аминь.

 

КАНОН

 

Тропарь, глас 4-й

 

Подражающи дванадесятолетна дванадесятолетну Христу, учившему во святилищи Божию слову, последовала еси, Евфросиние. Славу временную и земнаго обручника оставльши и вся мирская презревши, краснейшему паче всех Христе себе уневестила еси, крест вземши, путем ангельскаго жития шествующи и многая к Нему наставляющи, во благоухании мира в Небесный Чертог востекла еси, идеже моли, Егоже возлюбила еси, о чтущих благочестно память твою.

 

 

Ин Тропарь, глас тойже

 

Богатство свое нищим расточивши и славу княжескую нивочтоже вменивши, обручника временнаго, красная дево, возгнушалася еси и, уневестившися Жениху Христу, Тому, яко же вено, чистоту душевную и телесную принесла еси, Евфросиние. Емуже ныне в веселии предстоя, поминай нас, чтущих память твою.

 

 

Канон, глас 6-й

 

 

Песнь 1

 

Ирмос: Яко по суху, пешешествовав Израиль по бездне стопами, гонителя фараона видя потопляема, Богу победную песнь поим, вопияше.

 

Припев: Преподобная Мати наша Евфросиние, моли Бога о нас.

 

От юности поучающися священным заповедем Господним и желающи Ему Единому послужити, презрела еси славу и богатство мира сего.

 

Преподобная Мати наша Евфросиние, моли Бога о нас.

 

Христа возлюбивши, родителей и сродников твоих и обручника земнаго оставила еси, преподобная, и монашеское житие восприяла еси.

 

Преподобная Мати наша Евфросиние, моли Бога о нас.

 

Скорби исполнися сердце отца и Матере твоей, егда во иночестем образе узреша тя, возлюбленную дщерь свою, ты же словесы благими, вразумляющу тя Святому Духу, утешила еси их.

 

Преподобная Мати наша Евфросиние, моли Бога о нас.

 

Яже в масле добродетелей свещу умасленну на сретение, мати, Жениха твоего возжже, просвети очи сердца моего, нощию житейскою омраченная, да достойно тя похвалю.

Слава: Ум старый в младе лет, мати, добывши, дерзаемо тело душе покорила еси, от юности впрягши под иго Христово и благодатное бремя легкое приемши.

И ныне: Скорбных наведения обуревают смиренную мою душу, и напастей облацы мое покрывают сердце, Богоневестная, но, Свет рождшая Божественный и Превечный, возсияй ми свет радостный.

 

 

Песнь 3

 

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

 

Преподобная Мати наша Евфросиние, моли Бога о нас.

 

В безмолвии со Единым Господем молитвою желающи соединитися, при святей церкви Святая Софии в тесней келлии водворилася еси, преподобная.

 

Преподобная Мати наша Евфросиние, моли Бога о нас.

 

От труда рук твоих, преподобная, послужила еси Христу, Спасителю нашему, богоугодно упражняющися в преписании книг святых, и ценою, вземлемою за них, утешала еси нищую братию Христову.

 

Преподобная Мати наша Евфросиние, моли Бога о нас.

 

В кротости и смирении, в постех и молитвах, в трудех, и нощных бдениих, и молитвенных коленопреклонениих, усердно послужила еси Господу твоему, всечестная.

 

Преподобная Мати наша Евфросиние, моли Бога о нас.

 

Сна не дала еси очима, ни веждома дремания, Евфросиние, дондеже обрела еси во твоем сердце место достойнаго обительства.

Слава: Пустынелюбица горлица бывши, Евфросиние, и уединяющася птица на здании, гнездо духовное птенцем твоим создала еси и пожила еси от юности житием Ангельским, в телесе будучи.

И ныне: Удивила еси воистинну ныне на мне, Владычице, благодеяния Твоя, Богоотроковице, и милости Твоя, темже славлю Тя, и воспеваю, и почитаю многое и безмерное еже о нас смотрение Твое.

 

Господи, помилуй (трижды)

 

 

Седален, глас 4-й

 

Ангельскаго видения сподобилася еси, преподобная Мати Евфросиние, трикратно бо посети тя Ангел, возвещая ти волю Господню, да идеши на место, нарицаемое Сельце, и устроиши тамо обитель дев, Богу освященных.

Слава, и ныне: Едина истинная христиан Покровительнице, всяких лютых обстояний, бед и скорбей нас избави и молитвами Твоими спаси души наша.

 

 

Песнь 4

 

Ирмос: Христос моя сила, Бог и Господь, честная Церковь боголепно поет, взывающи, от смысла чиста о Господе празднующи.

 

Преподобная Мати наша Евфросиние, моли Бога о нас.

 

Ангел возвести бывшему во дни твоя святителю Илии о тебе, преподобная, дати место, во еже обитель устроити.

 

Преподобная Мати наша Евфросиние, моли Бога о нас.

 

Якоже возлежит на главе царстей венец, тако почивает Дух Святый на тебе, преподобная, – сице возвести Ангел святителю.

 

Преподобная Мати наша Евфросиние, моли Бога о нас.

 

И яко миро восходит к Богу, тяако восходит молитва преподобныя, и яко солнце сияет на тверди небесней, тако просия житие Евфросинии пред Ангелы Божиими, – глагола Ангел в видении святителю.

 

Преподобная Мати наша Евфросиние, моли Бога о нас.

 

Одежда нагим и богатство нищим, кормительница алчущим была еси и сирым мати, лютых избавляющи к тебе прибегающия, темже твоя во веки память пребывает, Евфросиние, Полотскому граду похвало.

Слава: Невеста Христова, мати, явися, масло многоблагоуханно совокупивши в девстве и обоюду возвеличивши его. И ныне радуешися вечно, в Обитель Небесную водворяющися и Божественную светлость приимающи.

И ныне: И где прочее иное обрящу заступление? камо прибегну? где же и спасуся? кую теплую возъимам Помощницу, скорбьми житейскими и бурями, увы мне! колеблему? На Тя Едину уповаю, и дерзаю, и хвалюся, и притекаю к Покрову Твоему: спаси мя.

 

 

Песнь 5

 

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

 

Преподобная Мати наша Евфросиние, моли Бога о нас.

 

Радости и удивления о видении Ангельском исполнися архиерей Господень и призваше тя, преподобная, возвестити ти чудное явление.

 

Преподобная Мати наша Евфросиние, моли Бога о нас.

 

Волю Господа твоего со усердием исполнила еси, преподобная, и пришла еси на место, показанное ти Ангелом, и тамо водворилася еси.

 

Преподобная Мати наша Евфросиние, моли Бога о нас.

 

На Единаго Господа возложивши твердое упование, ничтоже стяжала еси от имений, но в нищете евангельстей пребывала еси.

 

Преподобная Мати наша Евфросиние, моли Бога о нас.

 

На разумнем камени храмину неподвижиму создала еси, славная, и треволнения страстей отбегла еси, благоутешным Духом Параклитовым подъемлема в Вышнюю и Божественную обитель.

Слава: Небрегши отчия славы и гордения, но одинокое житие и неимение, Евфросиние, возлюбила еси и, крест Христов на рамо вземши, последовала еси Ему, зовущему тя.

И ныне: Кий Тебе дар принесу благодарения за, ихже насладихся, Твоих дарований и Твоея безмерныя благостыни? Темже славлю, песнословлю и величаю Твою неизреченную ко мне милость.

 

 

Песнь 6

 

Ирмос: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

 

Преподобная Мати наша Евфросиние, моли Бога о нас.

 

Видевше ангелоподобное твое житие, многия девы восхотеша обручитися Христу и в чистом девстве Ему Единому послужити.

 

Преподобная Мати наша Евфросиние, моли Бога о нас.

 

Сестра твоя, княжна Звенислава, подражающи тебе, отвержеся славы и наслаждений мира сего и к тебе притече, иго Христово благое на себе восприяти.

 

Преподобная Мати наша Евфросиние, моли Бога о нас.

 

Видя умножающияся сестры твоя духовныя, Евфросиние всечестная, возжелала еси соорудити храм Господу Вседержителю, честного и славнаго Его Преображения.

 

Преподобная Мати наша Евфросиние, моли Бога о нас.

 

В чаши своей вино всею душею черпавши и столп доволен поставивши, воспела еси: хлеб мой яждьте и вино вси пийте, жаждающии.

Слава: Утреневавши к Богу, голубице, была еси посребрена светло крилома, славная, златом же блещащи междурамия различным деянием.

И ныне: Утешение в скорбех вем, и недугов исцеление Тя знаю, Богомати, и всесовершенное сокрушение смерти, и реку живота неисчерпаемую, и всех, сущих в напастех, скорое и быстрое заступление.

 

Господи, помилуй (трижды). Слава, и ныне:

 

 

Кондак глас 8-й

 

Избранней Богом от самаго рождения и призванней на служение Ему, в чине ангельстем Господеви послужившей свято, и преподобно пожившей, и ныне с Небесными Силами Господа восхваляющей, о нас же, грешных, пред Господем ходатайствующей, с радостию и любовию воззовем: радуйся, Евфросиние, невесто Христова всечестная.

 

 

Икос

 

Ангельски на земли житие совершила еси, чистотою и смирением, кротостию и терпением, милосердием и воздержанием Господеви угодила еси, и ныне во светлостех святых почивающи последи трудов своих, приими от нас пение сие: радуйся, девственнице душею и телом; радуйся, наставнице предивная инокинем; радуйся, еще на земли сподобльшаяся ангельскаго видения; радуйся, от Господа чрез Ангела устроити обитель повеление приемшая; радуйся, со усердием волю Господню исполньшая; радуйся, вся земная наслаждения мира сего Христа ради отвергшая; радуйся, Небесному Жениху, Иисусу Сладчайшему, себе обручившая; радуйся, в чистоте, постех и молитвах Тому послужившая; радуйся, безценное сокровище – пречестный Крест обители своей во освящение и утверждение стяжавшая; радуйся, в трудех дневных и нощных житие свое совершившая; радуйся, в невечернем дни Царствия Божия ныне пребывающая; радуйся, Евфросиние, невесто Христова всечестная.

 

 

Песнь 7

 

Ирмос: Росодательну у бо пещь содела Ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

 

Преподобная Мати наша Евфросиние, моли Бога о нас.

 

Не о своем точию спасении прилежаше ти попечение, преподобная мати, но о всех, ихже ти вверил есть Господь, ихже поучала еси в законе Господни, творити волю Его.

 

Преподобная Мати наша Евфросиние, моли Бога о нас.

 

Образ была еси словесному твоему стаду, всечестная Евфросиние, делы благими, смирением возвышаяся, и кротостию привлекая, и терпением утверждая пребывати непреклонными в любви ко Господу.

 

Преподобная Мати наша Евфросиние, моли Бога о нас.

 

Егда совершашеся созидание храма Господня, Ангел возбуждаше строителя, глаголя: Иоанне, иди на строение храма Вседержителева.

 

Преподобная Мати наша Евфросиние, моли Бога о нас.

 

Яко права ученица смиреннаго и мирнаго Христа, князем сродником, друг на други дерзающим подъяти меч, возбранила еси, яко оружием обоюдоострым, пресекающим, словом Божиим устрашающим.

Слава: Издалеча собирающи Божественное богатство, яко далече ходяй корабль, борзописчими персты добре писала еси, Богодухновенная, поемлющи отай и дающи нищим.

И ныне: Всею душею, и мыслию, и сердцем, и устнами Тя славлю, насладився Твоих великих дарований, и Твоея благостыни, и безмерных Твоих чудес.

 

 

Песнь 8

 

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

 

Преподобная Мати наша Евфросиние, моли Бога о нас.

 

С верою и твердым упованием помолилася еси, преподобная, ко Господу, и услыша Господь моление верныя рабы Своея, и чудне совершися создание храма Его.

 

Преподобная Мати наша Евфросиние, моли Бога о нас.

 

Радости и веселия исполнилася еси, преподобная Евфросиние, егда совершися освящение храма, в немже о еже прошением нашим услышанным быти от Господа со слезами молилася еси.

 

Преподобная Мати наша Евфросиние, моли Бога о нас.

 

Мощна бе пред Господем молитва твоя, зане храм, воздвигнутый тобою, чрез многая лета цел и невредим сохранися.

 

Преподобная Мати наша Евфросиние, моли Бога о нас.

 

Избавление обретши, Господи, горькаго осуждения, еже вкушения ради древа разумнаго Твоим распятием, Евфросиния постящися бысть во вся среды и пятки, тело умерщвляющи, а душу оживляющи потщанием, божествующим в безвещественнем теле.

Слава: Плодолетными вербами телесное деяние, яко на Вавилонстей реце, повесивши, в бури житейстей возопила еси: аще забуду тя, Иерусалиме, не предложивши в начале веселия, забвена буди десница моя и язык мой прильпни гортани моему по правде.

И ныне: Обстояния, и скорби, и нужды обретоша мя, Чистая, и напасти житейския, и искушения отвсюду мя обыдоша, но предстани ми и покрый мя святым Твоим Покровом.

 

 

Песнь 9

 

Ирмос: Бога человеком невозможно видети, на Негоже не смеют Чини Ангельстии взирати; Тобою бо, Всечистая, явися человеком Слово воплощенно, Егоже величающе, с Небесными вои Тя ублажаем.

 

Преподобная Мати наша Евфросиние, моли Бога о нас.

 

Возжелала еси имети во обители твоей икону Пречистыя Богоматере, юже и получила еси, и, радостно тую приемши, многая благодарения Господу и Пречистей Матери Его воздала еси.

 

Преподобная Мати наша Евфросиние, моли Бога о нас.

 

Крест честный устроила еси усердием твоим, преподобная, и каплю Божественныя Крове Христа Спасителя и часть Животворящаго Древа в нем положила еси на освящение и спасение всем, покланяющимся ему и целующим его с любовию и страхом.

 

Преподобная Мати наша Евфросиние, моли Бога о нас.

 

Многая лета в тесной келлии, при храме Господнем, в молитвах и коленопреклонениих препроводила еси, преподобная Евфросиние, яко безплотна, на земли пребывающи.

 

Преподобная Мати наша Евфросиние, моли Бога о нас.

 

Текла еси, яко же царица не Южская, но с трепетом видевше рукотворную Церковь и гроб, в нейже тридневный Всетворец, Божия Мудрость вселися, и тамо благослови Бог прияти тя, добрая дево.

Слава: Ливан, и смирну, и злато волсви Творцу Тебе принесоша, Евфросиния же – душу, и тело, и житие непорочно, сраспеншися Тебе, Христе, и совоскресши Тебе и в безконечнем Царствии с Тобою царствующи.

И ныне: Радость от Ангела Приемшей и мы, по проречению Твоему, Пресвятая Дево, ублажающе Тя со всеми роды, евангельски вопием: радуйся, Благодатная, Господь с Тобою.

 

Обновлено 16.06.2013 22:56
 






Рейтинг@Mail.ru Рейтинг@Mail.ru Rambler's Top100 Яндекс.Метрика