Божий угодник Николай (Гурьянов)
Псковоезерский
(24 августа)
Протоиерей Николай Алексеевич Гурьянов родился 24 мая 1909 году в купеческой семье в селе Чудские Заходы Гдовского уезда Санкт-Петербургской губернии.
Любовь к храму и церковному пению была присуща всем членам семьи. Отец, Алексей Иванович Гурьянов, был регентом церковного хора, старший брат, Михаил Алексеевич Гурьянов, был профессором Санкт-Петербургской консерватории, младшие братья, Петр и Анатолий, также обладали музыкальными способностями, но о них осталось мало известий. Все трое братьев погибли на войне.
Николай принял Святое Крещение в Михаило-Архангельском храме в селе Кобылье Городище. С детства прислуживал в алтаре.
В 1926 г. закончил Гатчинский педтехникум. Учился в Ленинградском педагогическом институте, откуда был исключён за выступление против закрытия одного из храмов.
В 1929-1931 гг. преподавал математику, физику и биологию в школе и служил псаломщиком в Тосно.
Затем до 1934 года служил в должности псаломщика Свято-Никольского храма в селе Ремда Середкинского района Ленинградской (теперь Псковской) области.
В 1931 году арестован. Прошел петербургские "Кресты", лагеря под Киевом, ссылку в Коми. Освобожден в 1942 г.
8 февраля 1942 года он был рукоположен во диакона митрополитом Сергием (Воскресенским, † 1944), а 15 февраля 1942 года рукоположен в священника. В том же году отец Николай окончил богословские курсы и был направлен в Ригу, где служил священником в Свято-Троицком женском монастыре. Затем был переведен в Вильнюс, нес послушание уставщика в Свято-Духовском монастыре до 16 мая 1943 года.
С 1943 по 1954 год отец Николай Гурьянов был настоятелем храма Святителя и Чудотворца Николая в селе Гегобросты Паневежского благочиния Виленско-Литовской епархии.
В 1958 году отец Николай был переведен в Псковскую епархию. Указом епископа Иоанна (Разумова, † 1990) по личной просьбе он был назначен настоятелем храма Святителя и Чудотворца Николая на острове Залита на Чудском озере. В день Покрова Пресвятой Богородицы в 1958 году отец Николай совершил здесь первую Литургию. Здесь прошли следующие 44 года его пастырского служения. Здесь он стал тем, кем знают его православные верующие России и зарубежья - батюшкой Николаем, старцем с острова Залит.
Скончался в ночь с 23 на 24 августа 2002 г. 26 августа 2002 года на острове Талабск (Залита) Псковской епархии прошло отпевание и погребение протоиерея Николая Гурьянова.
На церемонии отпевания и захоронения, помимо архиепископа Псковского и Великолукского Евсевия и губернатора Псковской области Евгения Михайлова, присутствовали бывший руководитель Межпромбанка, ныне - представитель исполнительной власти Республики Тыва в Совете Федерации Сергей Пугачев наместник Сретенского монастыря в Москве архимандрит Тихон (Шевкунов), а также около 3 тысяч паломников.
Долгие годы верным спутником и помощником в пастырских трудах и повседневных заботах была для отца Николая его мать - Екатерина Стефановна Гурьянова. Почила она 23 мая 1969 года и похоронена на кладбище острова Залита, напротив дома отца Николая.
В 1952 году он был удостоен права ношения золотого наперсного креста, в 1956 году - сана протоиерея, в 1988 году был награжден митрой и правом служения с открытыми царскими вратами до "Херувимской". В 1992 году Святейший Патриарх Алексий II удостоил отца Николая права служения Литургии с открытыми царскими вратами до "Отче наш".
АКАФИСТ
ИЖЕ ВО СВЯТЫХ ОТЦУ НАШЕМУ ПРАВЕДНОМУ НИКОЛАЮ ПСКОВОЕЗЕРСКОМУ АРХИЕРЕЮ БОЖИЮ НЕКТАРИЮ
Первый Акафист Святому Праведному Николаю Псковоезерскому, Николе Островному, составлен глубокими почитателями молитвенных подвигов Святаго Старца во благо Святой Царской Николаевской Руси и во спасение душ человеческих. Акафист для келлейного моления всем любящим Святаго Духоноснаго Отца и уповающим на его Благодатную помощь Когда Господу будет угодно прославить Своего Дивнаго Праведника пред человеки, Акафист возможно ввести в общецерковное употребление
АКАФИСТ
Кондак 1
Избранный сосуде Благодати Божественныя, миро излиянное Руси Святой на Главу Спасову, мир весь молитвами твоими облагоухавый, Праведне Николае – Архиерею Божий Нектарие,
благослови с любовию воспети тя: Радуйся, Николае-Нектарие,
Радуйся, Острове Православия.
Икос 1
Небеснаго Ангела во плоти показа тебе Творец, в последняя времена явившего для покаяния и проповедания Евангелия; возсиял еси яко солнце чрез мрак греха, Светом Любви Христовой вся творения напоевая; темже и вся Земля Русская, земно кланяяся тебе, воспевает сицевая:
Радуйся, Благодати Божия дивное селение,
Радуйся, Ангелом и человеком преславное удивление,
Радуйся, Царей Самодержавных прославление,
Радуйся, Веры Православныя утверждение,
Радуйся, Николае-Нектарие,
Радуйся, Острове Православия.
Кондак 2
Видяще вдовицу, Святую Русь, горько плачущую, лишенную земнаго жениха, Царя-Помазанника, велегласно прославлял еси, Отче любимче, Великаго в Царях Мученика Николая, таинственно являвшегося ти с Пламенной Чашей Христовых Таин; всех притекающих к тебе побуждая пети Искупителю-Царю: Аллилуиа.
Икос 2
Разума Божественнаго мятежный мир ища, на Остров твоей жертвенной Любви притекающе, взываху: Господи, покажи нам святаго отца Николая; и абие скораго помощника и тепла заступника в скорбях тя имуще, всех недоумений разрешение получаху, дивящеся сице:
Радуйся, отче всех, неистощимое терпение,
Радуйся, скорбящим обильное утешение,
Радуйся, всем помоще и благословение,
Радуйся, болящим здравие и облегчение,
Радуйся, Николае-Нектарие,
Радуйся, Острове Православия.
Кондак 3
Силою свыше облекл тя Иисус, Небесный Жених души твоея, вся претерпети страшная века сего богоборнаго, за еже быти Столпом огненным, Исповедником Веры и Царства Русскаго Православнаго несокрушимым молитвенником, не могущим укрытися на вершине Горы-Христе посреде Острова стояй; за еже быти подобным Серафиму Саровскому, в Царство Небесное всех приводяй, поющим тебе: Аллилуиа.
Икос 3
Имуще богатство милосердия жителю Острова беззаконному,
трикраты посекшему лик Славнаго Святителя Николая, по кончине сего безумнаго, панихиду творя по нем, Отче Святый, трикраты руце его во гробе воздымающиеся, крестообразно укреплял еси:
да простит ти, чадо, Христос, глаголя; и нас огради знамением Креста, поющих ти сицевая:
Радуйся, Пресвятой Троицы верный служителю,
Радуйся, велений Ея исполнителю,
Радуйся, Любовию Креста разрешаяй ны,
Радуйся, во Христе Иисусе прощаяй ны,
Радуйся, Николае-Нектарие,
Радуйся, Острове Православия.
Кондак 4
Бурею духовною волнуемое об отдохновенном времени твоем, Отче безсонный, дивно узре тя чадо твое и в Небесных неусыпна,
одесную Обители Светозарнаго Отрока Царевича Алексия,
блистающим к тебе любовию Царей, собеседующа со Царственными Мученики и Блаженным Иоанном Чудотворцем о Руси Святой; и тамо поющим о ней: Аллилуиа.
Икос 4
Слышаша слепии, немые и глухие бесы, имже имя легеон,
молящася тебе безмолвно, Херувиме огненный, вопияху мучительно, огнем молений твоих пожигаемы, ты же во езеро Талабское отсылал их еси, и множицею у недужных винопитием зелье изымал еси, о камень Веры сокрушая; мы же, зряше силу, Христом тебе данную, взываем ти:
Радуйся, юродством Царство Небесное стяжавый,
Радуйся, Крестом силы бесовския поправый,
Радуйся, сокрушитель отчаяния,
Радуйся, юродством попалил диавола,
Радуйся, Николае-Нектарие,
Радуйся, Острове Православия.
Кондак 5
Боготечною Кровию искупивый нас Христос, Русь Святую кровию новомучеников в Царскую багряницу облекл Еси: вся безумная от слуг сатаны претерпел еси: хлада и мраза терпение, от безбожных иудей гонение, Православныя Веры Исповедниче Отче Праведне Николае, моляся, яко кровь проливая за весь наш грешный мир, да вси покаянно восплачут Богу, спасенные: Аллилуиа.
Икос 5
Видяще отроцы и младенцы люте разслабленные, приносимые к тебе, вся их Серафимовичи содевал еси, Сладчайшим Именем Иисусовым, яко небесным нектарием, напоевая; родителей со умилением взывая пети тебе:
Радуйся, ключу молитвы Иисусовой, всех целителю,
Радуйся, осенением иконы твоея от смерти избавителю,
Радуйся, покрывающий молитвами чада твоя,
Радуйся, приходяй со детьми ко Христу,
Радуйся, Николае-Нектарие,
Радуйся, Острове Православия.
Кондак 6
Света Евангельскаго светлое блистание был еси, простыми словесы Истину благовествуя: мужам, женам и чадом глаголя тяготы ближних носити, заповеди Христовы творити, любовию вражду побеждая: во смирении и милости суд и слово твое, Старче благодатный Николае, Ангелом поющим о тебе: Аллилуиа.
Икос 6
Возсия вселенней Божественный Свет Истины Христовой тобою,
преподобне молчальниче, архиереом, пастырям, правителем привременным, посещающим тебе: ты же иконами Святых Царей Земли Русской благословляше сих, в тишину келлии твоей входящих, яко во Гроб Христов, плачущих и чающих Христова утешения сице:
Радуйся, пастырей мудрый пастырю,
Радуйся, отче отцев, высший ангельский чин,
Радуйся, Державу и Церковь Русскую хранивый,
Радуйся, от ересей и расколов нас защитивый,
Радуйся, Николае-Нектарие,
Радуйся, Острове Православия.
Кондак 7
Хотя сокровенную тайну от века открыти Христе, жемчужину Православия таинствовал нам в последняя времена, Светильника сего Николая в виде голубине, на Острове посреди моря житейскаго сокрытаго, Архиерея Божия схиепископа Нектария,
ризою смирения Самим Господом облеченнаго, Сияющаго чудесами подобно Эгинской Звезде, присно поюща Тебе: Аллилуиа.
Икос 7
Дивнаго во святых Своих показа тя Бог, о Святителю кротчайший:
льна убо вземшагося не угаси, трости надломленной не преломи,
обаче глас хлада тонка был еси нам, прелагая мечи самости нашея на орала покаяния, темже псаломски гласуем тебе:
Радуйся, пламя молитвы Иисусовы,
Радуйся, носивый ризу смирения,
Радуйся, царю и священниче уединенный,
Радуйся, Мученику-Царю посвященный,
Радуйся, Николае-Нектарие,
Радуйся, Острове Православия.
Кондак 8
Странника Небеснаго дати восхотев людем твоим, во страданиях пребывающим, Отче Вениамине, Митрополите славный града Святаго Петра, остави посреде нас жезл твой, посошника твоего,
смиреннаго отрока Николая, имже досязаеши доныне каменных сердец наших, сею лозою Христовой точаще нам умиление,
исторгая источники покаяния, оная же вода живая поет: Аллилуиа.
Икос 8
Весь был еси в нижних, Мучениче Святый Вениамине, малое чадо во храме на руце подъемля, лобызая главу его и харизму пророчествуя целованием сим, и вышних никакоже отступи, на Свещнице Старчества Русскаго поставляя чадо сие Богом избранное, тем тьмы овец ко Христу приводя царским путем покаяния, они же поют святому отроку Николаю:
Радуйся, ангельской чистоты сияние,
Радуйся, молитвенниче о нашем покаянии,
Радуйся, из детства навыкший послушанию,
Радуйся, от юности изучивый Писание,
Радуйся, Николае-Нектарие,
Радуйся, Острове Православия.
Кондак 9
Всякое естество Ангельское удивися святому житию твоему, Новый Чудотворче отче наш Николае, крайнему твоему долготерпению: целодневно приемлюще народы ото всех предел Руси Святой, тяготы наша безропотно носивый, естеством более девятидесяти лет сый, любвеобильне Нектарие, услади любовию души наша, да поем с тобою Богу: Аллилуиа.
Икос 9
Светоприемную свещу целомудрия твоего, дикирий Благодати твоея, трикирий Веры твоея, проницающую мглу времен,
посылаеши нам, Божественный Вениамине, во образе дивнаго отрока Николая, емуже наперсный Крест Архиереев даруеши,
крестоношение сего за ны восписуя, Мы же, щитом Веры огражденные, воспеваем ему:
Радуйся, яко Крест твой – Крест смирения,
Радуйся, яко жезл твой – Крест долготерпения,
Радуйся, яко Крест – Руси хранение,
Радуйся, яко Крест – мира всего спасение,
Радуйся, Николае-Нектарие,
Радуйся, Острове Православия.
Кондак 10
Спасти хотя мир, над огненной бездной зияющий, не оставляеши нас, Господи: не десять уже праведных, но Веры взыскуя на земли;
ты же, Человече Божий, Христа ради юроде Николае,
удерживающий явился еси; последнего грешника милуя и исправляя, Любовию Креста вся соединяя и от гибели спасая:
отшедшу же в Небесная, не престай моля о нас ко Господу: Аллилуиа.
Икос 10
Царь Превечный земнаго Царя в Николае Втором яко Свой Образ явил Есть; ты же, Владыка Праведне, яко иный Нектарий Сэаттлийский Архиерей, в русском разсеянии на Чужбине, умолял еси: прославим, Мученика-Царя во главу угла Сонма Святых Новомучеников, укрепляя ны прияти дивный сей Образ Державной Руси, земная Небесным соединяяй, поющим ти, проповедниче покаяния:
Радуйся, Царя прославивый, иже прославит тя,
Радуйся, показавый Державных Супруг единосияние,
Радуйся, Царя Святителем величающий,
Радуйся, молитвою к Царю Русь спасающий,
Радуйся, Николае-Нектарие,
Радуйся, Острове Православия.
Кондак 11
Пение умиленное Царице Небесной приносил еси, угодниче Божий Николае, Материю Благодати Ея именуя; ныне же тя чада твоя воспеваем, яко Светолепнаго Ангела во плоти, таинника и избранника, велений Ея исполнителю, духа кротости от Чистой Голубицы приявшего, и зрящи омофор Пречистой над тобой, со Ангелы на Небесех поем Богу: Аллилуиа.
Икос 11
Светом небесным дивно просветися лице и тело твое в преставлении твоем, Отче Предивный, Архангелом Гавриилом ветвию райской предвозвещенном; мы же, осененные Небесною Славою во отшествии твоем, прославляем тя сице:
Радуйся, Христом Царем в Небесная вселенный,
Радуйся, Пречистою во успении твоем осененный,
Радуйся, Архангелом с Небес предвозвещенный,
Радуйся, Мучеником-Царем во отшествии благословенный,
Радуйся, Николае-Нектарие,
Радуйся, Острове Православия.
Кондак 12
Благодать подаждь гибнущему миру, Светильниче Церкви Святой,
Ангеле Небесный Николае; вемы, яко Христос чудно в тя вселися,
иже во дни последния храм бо Духа Святаго был еси. Сего ради и по успении твоем Крест и Евангелие в руце твои чудесно приемля, непричастен смерти явился еси; душею на Небесех со всеми Святыми пребываяй, не забуди тамо и нас, молящихся тебе: Аллилуиа.
Икос 12
Поюще присно Богоотроковице Архангельский глас, о милосердии Матерь мира всего умолял еси: безчадным чад благословляя,
недужных раковыми язвами исцеляя, томимых в узах чудесно молитвою свобождая, пропавших без вести открывая; всем творениям Божиим благодать даруя. Мы же, познаша тя великаго молитвенника и чудотворца, поем ти, Отче Драгий:
Радуйся, Чудотворца Николая славу стяжавый,
Радуйся, молитвою жизнь в умирающих вдыхавый,
Радуйся, на море люди от потопления избавивый,
Радуйся, блаженне, и безсловесные скоты милуяй,
Радуйся, Николае-Нектарие,
Радуйся, Острове Правосавия.
Кондак 13
О, правило веры во время апостасии, О, образе кротости миру, лежащему во зле, О, воздержание многовещанных учителей! Три узельцы Царствия Небеснаго, иже суть: Вера, Надежда, Любы:
подаждь страждущему Отечеству нашему, Руси Святой, спасая терпящий озлобления от буйнаго мира Корабль Церкви и Державы Родной; да воспоем ти, вернии, Чудотворче Новый Николае,
Архиерею Божий Блаженный Нектарие, во успении твоем нам давшему завет: «Аз есмь с вами, и никтоже на вы! Христос Воскресе! Не теряйте Пасхальную Радость!»: Аллилуиа.
(Этот кондак читается трижды, затем икос 1 и кондак 1)
МОЛИТВА ПЕРВАЯ
О, Праведне и пречудне отче наш Николае, Пастырю верный и Архиерею Божий смиренный Нектарие! Во времена отступления, нечестием мир пленившего, благочестием просиял еси,
сокровенных судеб Божиих яснозрителю, тайновидец душ человеческих. Веруем: возлюби тя Бог, молитвенника пламеннаго за весь мир, и ныне наслаждаешися вышняя Славы у Престола всех Царя, купно со Святыми Царственными Мучениками и Всеми Святыми, в Земле Русской Просиявшими. Но яко имея дерзновение велие у Христа Царя И Его Пречистой Матери, Царицы Неба и Земли, Моли с Ними, да простит Господь нас, грешных, и помилует: от клятвы разрешит, от пленения вражия и ига богоборцев свободит, и дарует нам зрети Преславное Воскресение Святой Руси. И по всей Вселенней страшно и славно будет Пресвятое Имя Твое, Отца и Сына и Святаго Духа,Ныне и присно и во веки веков: Аминь!
МОЛИТВА ВТОРАЯ
Великий угодниче Христов, старче блаженный, святый праведный отче наш Николае, во время отступления, нечестием мир пленившего, ты благочестием нелицемерным народу русскому, яко солнышко ясное просиял еси. Сокровенных судеб Божиих яснозрителю, тайновидец душ человеческих, ныне смиренно молим тя, не остави нас сирых и убогих, исцели души наша от лукавствия, да не погибнем во страстех наших. Вемы бо, яко не подобаше нам чесого просити, токмо о еже исполните нам волю Божию, еже есть освящение наше, и восприяти святыню веры нашея: дар Духа Святаго Божиего, и приобщитися Церкви первенцев, написанных на небеси, и избегнути духов злобы поднебесных, да не обладает нами тех сила, но да сподобимся наследовать Царствие Небесное со всеми святыми и одесную стати на Страшнем Судищи Христовом и услышати глас Сына Человеческого, пришедшего во славе Своей со всеми святыми Ангелы: «Приидите, благословеннии Отца Моего, наследуйте уготованное вам Царствие от сложения мира». Аминь.
Тропарь
Глас 4
Божественной Благодати преизрядный носителю, Православныя Веры Исповедниче, Любови Христовой сосуде неисчерпаемый,
Образ был еси воздержания, На Остров, аки в тихое пристанище, вселился еси, Кротостию и смирением Христа Единаго возлюбив, И ныне со Ангелы ликовствуя, Отче Праведне Николае, Моли Христа Бога спастися душам нашим.
Кондак
Глас 3
Яко финикс цветущий при истоках вод, Яко крин благоухающий посреде житейских невзгод, Наследниче Благодати древних Святых, Отче Николае, утешителю наш, Моли Христа Бога спастися нам.
Величание
Ублажаем тя, Святый Праведный отче наш Николае, и чтим святую память твою: ты бо молиши за нас Христа Бога нашего.
Для келейного чтения. Канон о.Николаю Гурьянову.
Канон гл.3
Песнь 1
Воды древле манием божественным во едино сонмище совокупивый и разделивый море израильтеским людем. Сей Бог наш препрославлен есть, Тому Единому поим, яко прославися.
Святый праведный отче наш Николае, моли Бога о нас.
Сердце чисто созижди во мне, Боже, и дух прав обнови во утробе моей, омраченный ум мой просвети, молюся, да возмогу узрети святость праведнаго отца и смиренно воспети Господу: Сей Бог наш, дивен во святых Своих, препрославлен есть, Тому Единому поим, яко прославися.
Святый праведный отче наш Николае, моли Бога о нас.
От юности Христа пламенне возлюбив, блаженне, Тому Единому работати искренне возжелал еси всем сердцем твоим. Сего ради избранником Божиим нарекаем тя, прославляя Творца: Сей Бог наш, дивен во святых Своих, препрославлен есть, Тому Единому поим, яко прославися.
Святый праведный отче наш Николае, моли Бога о нас.
Иерусалима Небеснаго взыскуя, на остров вселился еси, отче; онамо внидоша, яко в Землю Обетованную, идеже ни покой, ни веселие, но скорби многи приял еси, радуяся, яко нива церковная произращает Небу люди совершенны и радостно поющия: Сей Бог наш, дивен во святых Своих, препрославлен есть, Тому Единому поим, яко прославися.
Святый праведный отче наш Николае, моли Бога о нас.
Видя бурю и ветр крепок, великий апостол утопаше, но возопи, глаголя: «Господи, спаси мя - погибаю». Бог же, простреше руку, рек: «Маловере, почто усумнился еси». Спаси же и мя, Спасе, волнами потопляема, и руку ми подаждь, яко Петрови, вопиющему: Сей Бог наш, дивен во святых Своих, препрославлен есть, Тому Единому поим, яко прославися.
Слава: Трисиянным светом озарен, воздержание, молитву и любовь стяжавши, преподобне, образ жития во Христе явил еси, святе, в нем же преуспети и нас сподоби ходатайствы твоими, да со благодарением воспоем Господу: Сей Бог наш, дивен во святых Своих, препрославлен есть, Тому Единому поим, яко прославися.
И ныне: О, Всепетая Мати, рождшая всех святых святейшее Слово, облагодати ны, даруя слово пламенное, да сынолепно воспоем милость Твою, еюже матерски болезнуеши о скорбящем мире и Христа умоляеши Господа, Ему же умиленно взываем: Сей Бог наш, дивен во святых Своих, препрославлен есть, Тому Единому поим, яко прославися.
Песнь 3
Неплодная душе и безчадная, стяжи плод благославный, веселящися возопий: утвердихся Тобою, Боже, несть свят и несть праведен, паче Тебе, Господи.
Святый праведный отче наш Николае, моли Бога о нас.
Во Православии утвердивыйся и многославные плоды веры принесый, николиже велемудрствовал еси о себе, блаженне, научая и нас выну воспевати Единому Богу: несть свят и несть пра¬веден, паче Тебе, Господи.
Святый праведный отче наш Николае, моли Бога о нас.
«Внидете узкими враты, - рече Господь, - яко пространная врата и широкий путь, вводяй в пагубу, и мнози суть входящии им». Ты же, отче Николае, узким путем шедый и Царских врат достигнувый, не забуди, о нас, грешных, взывающих: несть свят и несть праведен, паче Тебе, Господи.
Святый праведный отче наш Николае, моли Бога о нас.
Вемы: яко плод духовный есть любы, радость, мир, долготерпение, благость, милосердие, вера, кротость, воздержание, -на таковых несть закона. А иже Христовы суть, плоть распяша со страстьми и похотьми. Аще живем Духом, Духом и да ходим. Ты же, отче Николае, сторичный плод принесл еси, Дароподателю Богу, поя: несть свят и несть праведен, паче Тебе, Господи.
Святый праведный отче наш Николае, моли Бога о нас.
Странные глаголы прорече Господь: горе вам, насыщении -яко взалчете, смеющиися - яко возрыдаете, богати - яко отстоите утешения вашего; горе - егда добре рекут вам вси человецы, яко лукавство в душах ваших суть. Обаче горе мне грешному, яко получил бых убо добро за добро свое в веце сем, но смиренно вопию Богу: несть свят и несть праведен, паче Тебе, Господи.
Слава: Святая душа твоя, отче Николае, обитель Триединому Богу бысть, в ней же Отец и Сын и Дух Святый вселися. Сего ради молим тя, и нам сию благодать обрести и во Царствие Божие внити, радостно поюще: несть свят и несть праведен, паче Тебе, Господи.
И ныне: Заступнице усердная рода христианскаго, вся возможна Тебе суть испросити у Сына Твоего. Еда не претвори Господь воду в вино, внемля мольбе Матере Своея, якоже содела первое чудо в Кане Галилейстей. Мы же, умиленно на любы Христа взирая, с благодарением поем: несть свят и несть праведен, паче Тебе, Господи. Господи, помилуй. (Трижды)
Седален, глас 4
Якоже бо беху во дни, прежде потопа: ядуще и пиюще, женящеся и посягающе, до негоже дне вниде Ное в ковчег, и не уведеша, дондеже прииде вода, и взят вся. Тако будет и в пришествие Сына Человеческаго. Сего ради, предстательством праведнаго отца, молю, да пребуду в ковчезе Церкве Твоея, Спасе, дондеже сниде огнь с Небесе и пожрет вся.
Слава, и ныне: Зриши, Пречистая, яко во пламени грехов изчезоша дние наша. Яко да не погубит нас до конца пламень сей страстный, молим Тя, Пресвятая: подаждь и нам недостойным росу благодати Твоея и яви милосердие Твое.
Песнь 4
Положил ecu к нам твердую любовь, Господи, Единороднаго бо Твоего Сына за ны на смерть дал ecu. Тем же ти зовем благодаряще: слава силе Твоей, Господи.
Святый праведный отче наш Николае, моли Бога о нас.
Язвы греховныя на душах человеческих провидел еси, прозорливиче дивный, и тайная прегрешения наша с любовию и долготерпением обличал еси. Тем же и ныне не остави ны до конца, но к покаянию приведи и благодатию Бога спаси, да во Царствии Его, ликуя, воспоем, благодаряще: слава силе Твоей, Господи.
Святый праведный отче наш Николае, моли Бога о нас.
«Не десять ли очистишася - да девять где? - вопрошаше Господь. - Како не обретошася дати славу Богу, токмо иноплеменник сей?» Яко да не окаменеет сердце мое, научи и мя, отче, благодарити на всякий час Христа: слава силе Твоей, Господи.
Святый праведный отче наш Николае, моли Бога о нас.
Великий Павел рече, яко паче иных апостол потрудися, а наи¬паче же, благодать в нем обильный плод принесе. Тако и ты, отче, многия труды, бдения и пощения сотворив, на высоту безстрастия возшел еси, славу и поклонение Единому Богу воздая: слава силе Твоей, Господи.
Святый праведный отче наш Николае, моли Бога о нас.
Рече Господь: «Не льститеся: Бог поругаем не бывает. Еже бо аще сеет человек - тожде и пожнет. Яко сеет в плоть свою - от плоти пожнет истление, а сеет в дух - от духа пожнет живот вечный». Молитвами праведнаго Николая даждь ми, Спасе, да не плотию обольщуся, но спасуся, вопия: слава силе Твоей, Господи.
Слава: Чистоту, кротость и смирение глубоко, к нищете приложи, возлетел еси, святе, молитвою, аки крилома, на гору добродетелей; отонюдуже, усмотрев во мгновение ока образ мира сего преходящ, обаче возжелел есй небесныя славы блаженне. Тем Творцу нашему поем: слава силе Твоей, Господи.
И ныне: Уклонихся от стези правды и не хождах ногама моима на пути Христа, но на стремнинах страстей блуждающе, уязвих плесне мои тернием, обаче и храмляя, притекаю к Тебе и молюся: Пресвятая, спаси; о Тебе бо радуется, Благодатная, всякая тварь и Тобою благодаряще Богу зовет: слава силе Твоей, Господи.
Песнь 5
На земли Невидимый явился есй и человеком волею сожил ecu, Непостижи-мый, и к Тебе утреннююще, воспеваем Тя, Человеколюбче.
Святый праведный отче наш Николае, моли Бога о нас.
Аз есмь лоза истинная, - глаголет Господь, - и Отец мой - Делатель есть. Всяку розгу, о Мне не творящую плода, измет ю, и всяку, творящую плод, - отребит ю, да множайший плод принесет». И мы рождие есмы на лозе преподобия твоего и, якоже благодатию Святаго Духа напаяеми, Христу благоговейно речем: Непостижимый, к Тебе утреннююще, воспеваем Тя, Человеколюбче.
Святый праведный отче наш Николае, моли Бога о нас.
Сотник в Капернауме, понеже недостойным себе мняше, Господа под свой кров не призва, но смиренно моляше, да поне Слово Божие в дом его вниде. Сего ради похвалы от Бога той сподобися, яко веру и смирение явиша, и знамением тому: отрок здрав бываше. Сию веру обрести и нам Господа умоли, старче искусный Николае, смиренно глаголющим: Непостижимый, к Тебе утреннююще, воспеваем Тя, Человеколюбче.
Святый праведный отче наш Николае, моли Бога о нас.
Трепещу, да не обличуся Словом Всесильным в День Судный: «Идите от Мене, проклятии во огнь вечный, уготованный диаволу и ангелом его». Аще, убо, окаянный аз: алчущих не питах, жаждущих не поих, странных не введох, нагих не одеях, болящих и в темнице не посетих, - како убо возмогу на Царя Славы Христа воззрети и своими нечистыми уста произрещи: Непостижимый, к Тебе утреннююще, воспеваю Тя, Человеколюбче.
Святый праведный отче наш Николае, моли Бога о нас.
Рече Иисус со Креста: «Отче, отпусти им - не ведят бо, что творят». Един же от обешенною злодею хуляше: «Аще Ты еси Христос - спаси себе и наю». Другий же прещаше: «Ни ли ты боишися Бога? Достойно, по делам моим приемлю: помяни мя, Господи, во Царствии сии». Даруй же ми, Спасе, яко разбойнику, благоразумие обрести, поющему: Непостижимый, к Тебе утреннююще, воспеваю Тя, Человеколюбие.
Слава: Видев Господь смоковницу издалеча, имущую листвие, прииде, аще убо что обрящет на ней. И пришед, ничесоже обрете, токмо листвие едино. Аще убо пребуду и аз безплоден, изсышет абие древо живота моего, обаче камение окрест лежащее абие возопиет: Непостижимый, к Тебе утреннююще, воспеваю Тя, Человеколюбче.
И ныне: Невещественнаго Света селение чрево Твое бысть, Пречистая Богоневесто, светлостьми Божественнаго разума безбожие отгнавшаго. Сыну же Твоему со страхом и трепетом проречем: Непостижимый, к Тебе утреннююще, воспеваем Тя, Человеколюбче.
Песнь 6
Глубина страстей воста на мя и буря противных ветров, но, предварив, мя ты спаси, Спасе, и избави от тли, яко спасл ecu от зверя пророка.
Святый праведный отче наш Николае, моли Бога о нас.
Победивый враги смирением, на высоту безстрастия возшел еси, преподобне. Сподоби же и мя, отче, мытарства страшныя безпреткновенно преити, с верою вопиющему: мя Ты спаси, Спасе, и избави от тли, молитвами праведника Твоего, яко спасл еси от зверя пророка.
Святый праведный отче наш Николае, моли Бога о нас.
Приемый пять талантов, сотвори другая пять. Такожде имеяй два, приобрете и той другая два. Аз же, един талант приемый, шед, вкопа его в землю. «Лукавый рабе и ленивый», - совесть мя обличает. Но мя Ты спаси, Спасе, и избави от тли молитвами праведника Твоего, яко спасл еси от зверя пророка.
Святый праведный отче наш Николае, моли Бога о нас.
Человек некий сотворих вечерю и зва многия. Званнии же не быша достойни: село купих, волов купих, жену поях, - имей мя отречена, в безумии глаголаху. Яко дние лукави суть, даждь ми Боже уразумети и непрестанно взывати Тебе: мя Ты спаси, Спасе, и избави от тли молитвами праведника Твоего, яко спасл еси от зверя пророка.
Святый праведный отче наш Николае, моли Бога о нас.
Иуда - раб и льстец, руце простре сребреники прияти, имиже Хлеб Нетления от Христа прия; и уста к целованию льстивно принесе, имиже Тело Христово и Кровь приимаше. Но горе тебе, якоже рече Бог. Мы же со упованием смиренно вопием: мя Ты спаси, Спасе, и избави от тли молитвами праведника Твоего, яко спасл еси от зверя пророка.
Слава: Без свидетелей обличаюся и без оглагольников осуждаюся, егда внезапу найде на мя День Судный. Воспряни убо, душе моя, и к Богу припади, вопиюще: мя Ты спаси, Спасе, и избави от тли молитвами праведника Твоего, яко спасл еси от зверя пророка.
И ныне: Споручнице грешных, погибших взыскание, Дево Пречистая, Мати Христа Бога, венец всего творения, о мне, грешнем, мольбу Богу принеси и молением Твоим от напастей и скорбей мя избави, якоже и аз Ему воспою: мя Ты спаси, Спасе, и избави от тли молитвами праведника Твоего, яко спасл еси от зверя пророка. Господи, помилуй. (Трижды)
Кондак, глас 3
Яко финикс, цветущий при истоках вод, яко крин, благоухаю¬щий посреде житейских невзгод, наследниче благодати древних святых, отче Николае, утешителю наш, моли Христа Бога спастися нам.
Икос
Якоже писано есть: «Коль красны ноги благовествующих мир, благовествующих благая. Но не вси послушаша благовествования». Исаия же глаголет: «Обретохся не ищущим Мене, явлен бых не вопрошающим о Мне»; и ко Израилю: «Весь день воздех руце мой к людем непокоривым и пререкающим». Тако и ныне: остаток - по избранию благодати бысть. Ты убо, отче Николае, Евангелие Святое житием твоим проповедал еси. Яко да не вотще благодать сия будет и да не наречемыся «жестоковыйныя и косныя сердцем», но яко мощно сторичный плод принесем и в покаянии воззовем: слава силе Твоей, Господи.
Песнь 7
Якоже древле благочестивыя три отроки оросил ecu в пламени халдейстем светлым Божества огнем, и нас озари, благословен ecu взывающия, Боже отец наших.
Святый праведный отче наш Николае, моли Бога о нас.
От преизобильных источников вод благодати духовныя всем, с теплою верою притекающим к тебе, подаеши благопотребная, яже ко спасению. Сего ради молим Спаса Христа: светлым Боже¬ства огнем и нас озари, благословен еси, взывающия, Боже отец наших.
Святый праведный отче наш Николае, моли Бога о нас.
Заповеда нам Дух Святой: «Всегда радуйтеся, непрестанно молитеся, о всем благодарите: сия бо есть воля Божия о Христе Иисусе в вас. Духа не угашайте. Пророчествия не уничижайте. Вся же искушающе, добрая держите. От всякия вещи злыя отгребайтеся. Сам же Бог мира да освятит вы всесовершенны о всем». Сего ради молим Спаса Христа: светлым Божества огнем и нас озари, благословен еси взывающия, Боже отец наших.
Святый праведный отче наш Николае, моли Бога о нас.
Сказа Господь юродивым девам: «Аминь, глаголю вам, не вем вас», яко не потрудишася во время свое елей милости в сосуды прияти. Да будет убо мой сосуд исполнен благодати, Ты, Спасе, мудрым девам сопричти и светлым Божества огнем и мя озари, благословен еси взывающаго, Боже отец наших.
Святый праведный отче наш Николае, моли Бога о нас.
Вемы: яко любы долготерпит, милосердствует, не завидит, не превозносится, не гордится, не безчинствует, не ищет своих си, не раздражается, не мыслит зла, не радуется о неправде, радуется же о истине, вся любит, всему веру емлет, вся уповает, вся терпит, любы николиже отпадает. Сия же любы преизбыточествова в душе твоей, отче Николае, яко да и мы Христу воспоем: свет¬лым Божества огнем и нас озари, благословен еси взывающия, Боже отец наших.
Слава: Рече Бог: «Не судите, да не судими будете. Имже бо судом судите - судят вам, и в нюже меру мерите - возмерится вам. Вся убо, елика аще хощете, да творят вам человецы, тако и вы творите им такожде: в сем бо - весь закон и пророцы». Обаче в покаянии прими и светлым Божества огнем и нас озари, благословен еси взывающия, Боже отец наших.
И ныне: Кто Тебе не ублажит, Пресвятая Дево, Ты бо еси роса духовная, греховный пламень угашающая. И якоже некогда явиша Господь чудо отроком в пещи Вавилонстей, молитвами Богородицы, светлым Божества огнем и нас озари, благословен еси взывающия, Боже отец наших.
Песнь 8
Нестерпимому огню соединившеся, богочестия предстояще, юноши пламенем же невреждени Божественную песнь пояху: благословите вся дела Господня, Господа и превозносите во вся веки.
Святый праведный отче наш Николае, моли Бога о нас.
Царя Предвечнаго доблий воине, стада Христова пастырю верный, сотвори молитву о нас, да тихое и безмолвное житие поживше в веце сем, Царствия Небеснаго достигнем, поюще: благосло¬вите вся дела Господня, Господа и превозносите во вся веки.
Святый праведный отче наш Николае, моли Бога о нас.
«Сие бо да мудрствуется в вас, еже и во Христе Иисусе, -наказует апостол. - Сый смирил Себе, послушлив быв даже до смерти, смерти же крестныя». Молитвами праведнаго отца укрепи, Христе, расслабленную волю нашу, да егда призовет Господь, готови пребудем и мы послушание Богу явити, воспевая: благословите вся дела Господня, Господа и превозносите во вся веки.
Святый праведный отче наш Николае, моли Бога о нас.
Рече Бог: «Безумне, в сию нощь душу твою истяжут от тебе, а яже уготовал еси, кому будут? Тако собираяй себе, а не в Бога богатея». Потщимся, абие богатство неветшающее обрести на Небесех, идеже татие не подкапывают, не крадут, но вси духов¬но с радостию поют: благословите вся дела Господня, Господа и превозносите во вся веки.
Святый праведный отче наш Николае, моли Бога о нас.
Аз, окаянный, егда тяжко греших - сыну блудному поревновах, егда же Богу трудихся - превозношением неблудному уподобихся. Молитвами праведнаго старца даруй ми, Спасе, ни ошую, ни одесную уклонятся, но шествовати царским путем, радостно песнопоя: благословите вся дела Господня, Господа и превозносите во вся веки.
Слава: Закхей, старей мытарем, грешник бяше, на ягодичину возлезе, якоже Иисуса видети искаше. Обаче Господь, лишше что сотвори, рече бо: «Днесь спасение дому сему бысть». Сотвори
убо, Господи, и мене достойна быти милости Твоея молитвами угодника Твоего, да благодаряще взываю: благословите вся дела Господня, Господа и превозносите во вся веки.
И ныне: Из девическия утробы воплотився еси, Христе, явися на спасение наше. Тем убо, Матерь Твою Богородицею православно величаем и Тебе благодаряще поем: благословите вся дела Господня, Господа и превозносите во вся веки.
Песнь 9
Благословен Господь, Бог Израилев, воздвигнувый рог спасения нам в дому Давида, отрока Своего, милосердия ради милости, в них же посети нас Восток с высоты и направил ны есть на путь мира.
Святый праведный отче наш Николае, моли Бога о нас.
Науча апостол Духом Святым: «Аще имам пророчество и вем тайны вся, и весь разум, и аще имам всю веру, яко и горы преставляти, любве же не имам, - ничтоже есмь. И аще раздам вся имения моя, и аще предам тело мое во еже сжещи е, любве же не имам, - никая польза ми есть». Сего ради, помози и нам, отче, нужнейшую, паче всех, любы душе приобрести, яко тако сотвори Господь с народом Своим, милосердия ради милости, в них же посети нас Восток с высоты и направил ны есть на путь мира.
Святый праведный отче наш Николае, моли Бога о нас.
Рече Господь: «Аминь, аминь, глаголю вам, аще не снесте Плоти Сына Человеческаго, ни пиете Крове Его, живота не имате в себе. Ядый Мою Плоть и пияй Мою Кровь имать живот вечный, и Аз воскрешу его в последний день». Тако сотвори Господь с народом Своим, милосердия ради милости, в них же посети нас Восток с высоты и направил ны есть на путь мира.
Святый праведный отче наш Николае, моли Бога о нас.
Человек бе богат, веселяся на всякий день светло. Обаче нищь некто, именем Лазарь, лежаше весь гноен. Восприяхом же: оный - благая, сей - злая своя в веце сем. Ныне же: оный страждет, сей же ублажается. Научи и мя, Спасе, творити волю твою, молитвами праведнаго отца, яко тако сотвори Господь с народом Своим, милосердия ради милости, в них же посети нас Восток с высоты и направил ны есть на путь мира.
Святый праведный отче наш Николае, моли Бога о нас.
«Исполните мою радость, - умоляше апостол, - да тожде мудрствуете, туже любовь имуще: единодушни, единомудренни. Ничтоже по рвению или тщеславию, но смиренномудрием друг друга честию больша себе творяще. Не своих си кийждо, но и дружних кийждо смотряйте». Мир Свой дарова нам Господь, да мир бых убо имели между собою во Христе Иисусе Господе нашем, милосердия ради милости, в них же посети нас Восток с высоты и направил ны есть на путь мира.
Слава: Вемы, якоже любящим Бога вся поспешествуют во благое, сущим по предуведению званным. Ты же, отче Николае, от юности избранным бяше. И якоже многия труды понесый, и многия ко Христу приведый, ныне со Ангелы и всеми святыми на Небеси ликовствуеши. Мы же, о тебе радуяся, благодарим: яко тако сотвори Господь с народом Своим, милосердия ради милости, в них же посети нас Восток с высоты и направил ны есть на путь мира.
И ныне: Благодатное чрево Твое, Пречистая, пространнее Небес Господь содела, Невместимаго бо вместила еси. Тем Тя, воистину, Богородицею исповедуем и Триединаго Бога славим, о Тебе поюще: яко тако сотвори Господь с народом Своим, милосердия ради милости, в них же посети нас Восток с высоты и направил ны есть на путь мира.
Достойно есть: Господи, помилуй. (Трижды)
Светилен, глас 8
От древних отец и Самого подвигоположника Христа наставлен бых во благих и с юных лет Господеви сочетахся произволением твоим. Плотския похоти умертвил еси пощением крепким, дух оживил есй надеждею благ вечных; ангельски на земли пожив, со Ангелы ныне ликовствуеши, тем тя чтим, Николае блаженне.
Слава, и ныне: Егда пришел час честнаго Успения Твоего, Пресвятая Дево, прежде исхода молила еси Сына Твоего: «Приими ныне в мире дух Мой и огради Мя от области темных духов, яко да не срящет Мя никаковое устремление сатаны». Аз же, гиблющий во гресех, вопию Ти, Богородице: «Не остави мя, Пречистая, егда приступят окрест и обличат тайная моя».
