Боянская икона Божией Матери

12/25 сентября

В 1898 г. румынские католики греческого обряда возвели в селе Бояны храм Рождества Пресвятой Богородицы, впоследствии ставший православным¹. В 1991 г. для храма был написан образ Божией Матери с Младенцем Спасителем. Во время вечернего богослужения 18 декабря 1993 г. накануне дня памяти свт. Николая Мирликийского икона начала источать слезы. По словам протоиерея Николая Жара, наблюдавшего это чудо, вначале «глаза Божией Матери были наполнены слезами и очень блестели», а к концу богослужения полились до самого низа иконы. В 1993 г. перед образом исцелились больной раком отрок Георгий из Хмельницкой области и священник Игорь из Польши. 4 октября 1994 г. Священный Синод Украинской Православной Церкви благословил почитание чудотворной Боянской иконы Божией Матери во всей Украине и назначил днем торжественного празднования в честь этой святыни 25 сентября нового стиля. С тех пор к иконе совершаются многочисленные паломничества, и сам образ посетил многие регионы Украины². В 1995 г. при храме основан монастырь. Вначале он существовал как сестричество при Боянской иконе Божией Матери и скит под духовной опекой Бонченской обители. 28 декабря 1999 г. Священный Синод утвердил за сестричеством официальный статус монастыря. По состоянию на 2003 г. обитель, кроме храма Рождества Пресвятой Богородицы 1898 г. и бывшего приходского дома, построенного в начале ХХ в. и используемого в качестве жилого корпуса, имела 3-этажный жилой корпус с домовым храмом Боянской иконы Божией Матери (1998), колокольню, часовню (2000).

АКАФИСТ

Кондак 1

Взбранной Воеводе и усердной Заступнице рода христианскаго, похвальная пения приносим о явлении Ея иконы. Сия бо слезы источает и сими всяку слезу от очес страждущих и притекающих к Ней отирает, да во умилении присно зовем Ей:

Радуйся, Богородице Дево, слезящая о гресех наших. 

Икос 1

Архангел Гавриил вещаше Тебе, Дево, радуйся, и мы, грешнии, сице Тебе вопием, яко благоизволила еси явити чудотворный Твой образ, в земли Боянстей чудесне просиявший, злобу всякую и неверие человеков посрамивший и научивший всех звати Ти сицевая:
Радуйся, Преблагая Заступнице рода христианскаго;
Радуйся, преизящнейшая Наставнице наша;
Радуйся, Преблагословенная, Господь с Тобою;
Радуйся, Препрославленная Царице неба и земли;
Радуйся, яко Тобою Ангели удивляются;
Радуйся, яко Тобою вси человецы хвалятся;
Радуйся, Богородице Дево, слезящая о гресех наших. 

Кондак 2

Видя, яко мы грешнии в беззакония погружаемся, Ты, Пречистая, благоволила еси слезы источати из Богоматерних очес Твоих, показующи сим великую любовь Твою к нам и милосердие. Священницы же и людие, видяще в церкви плачущую Твою икону, со страхом и любовию воззваша Богу: Аллилуиа.

Икос 2

Разум неуразуменный о явлении слезящия Твоея иконы уразумети ищуще, архиереи притекоша в храм Твой, Владычице, и со страхом 
испытавше вся, яже от Тебе бывшая, со всеми верными воспеша благодарственную песнь Тебе, глаголюще:
Радуйся, похваление наше в земнем странствии;
Радуйся, Прелюбимая наша Заступнице;
Радуйся, породившая нам Царя Славы, Христа;
Радуйся, пречудно к небесному Свету нас приводящая;
Радуйся, Стамно, Небесную Манну вместившая;
Радуйся, Царице, ризами златыми одеянная;
Радуйся, Богородице Дево, слезящая о гресех наших.

Кондак 3

Силою свыше укрепляеши нас, Богомати, и слезми Твоими исцеляеши души наша и телеса, исхищающи от мрака неверия, ересей и расколов, да, избавльшеся от заблуждения, прославим чудеса Твоя и из глубины души воскликнем Богу: Аллилуиа.

Икос 3

Имеющи попечение о людех земли Буковинския, благоволила еси явити чудотворную Твою икону, призывающую нас к слезному покаянию о гресех наших, да теплою верою и любовию к Тебе, Благословенней, воспеваем тако:
Радуйся, Жезле Ааронов прозябший;
Радуйся, неиссякаемый источник чудес;
Радуйся, неописуемое попечение о человецех;
Радуйся, слез Евиных избавление;
Радуйся, всемощный Покрове в бедах сущих;
Радуйся, скорая Заступнице уничиженных;
Радуйся, Богородице Дево, слезящая о гресех наших. 

Кондак 4

Буря ересей и расколов обуревает нашу землю, но Ты, Пречистая, ведущи немощи наша, и всегда готова сущи на помощь и заступление, явила еси нам икону Твою плачущую ичудотворящую, укрепляющи нас в православнем стоянии и воздвизающи пети Богу: Аллилуиа.

Икос 4

Услышавше о плачущей иконе Твоей, Богородице, православнии людие из многих градов и весей стекошася, да видят чудо сие явленное. Ты же, Пресвятая, простерла еси к людем Своя милости, подающи обильная исцеления различных недугов и научающи всех пети Тебе таковая:
Радуйся, всегдашняя Утешительнице наша;
Радуйся, утоление печали;
Радуйся, всех скорбящих Радосте;
Радуйся, обидимых Заступнице;
Радуйся, Херувимов честнейшая;
Радуйся, Серафимов славнейшая;
Радуйся, Богородице Дево, слезящая о гресех наших. 

Кондак 5

Боготечней звезде, целебныя лучи испущающей, уподобилася святая икона Твоя, Богомати, егда отрока, благоговейно облобызавшаго Твою икону, от неисцельныя язвы чудесно исцелила еси. Родители же сего и людие, уведевше бывшее, со слезами благодаряху Тя и воспеваху Богу: 
Аллилуиа.

Икос 5

Видяще слезы, от иконы Твоея, Пречистая, во время Божественныя Литургии истекшия, дети, притекшия из страны далече в храм Твой, удивишася. Ты же, Пресвятая, отгоняющи от душ их всякое сомнение, научила еси с верою и любовию пети Тебе сицевая:
Радуйся, Пророков Исполнение;
Радуйся, Святителей чудесная похвало;
Радуйся, Преподобных венче неизменный;
Радуйся, Мучеников всегдашнее укрепление;
Радуйся, святых жен Образе неизреченный;
Радуйся, Праведных всех непременное упование;
Радуйся, Богородице Дево, слезящая о гресех наших. 

Кондак 6

Проповедницы Твоея милости явишася людие, страждущии от различных болезней и обретшия исцеления душевных и телесных недугов у святыя Твоея иконы. Мы же, дивящеся таковому о нас попечению, со всеми верными вопием Богу: Аллилуиа.

Икос 6

Молитвы, приносимыя у святыя иконы Твоея, услышавши, Пресвятая Дево, жену некую исцелила еси от тяжкаго недуга, укрепляющи сим не токмо ея, но и нашу веру во всемощную Твою помощь всем призывающим имя Твое и вопиющим Тебе тако:
Радуйся, благая Питательнице младенцев;
Радуйся, предивная Покровительнице юных;
Радуйся, Жезле утешения старости;
Радуйся, непостыдная Надеждо в смерти нашей;
Радуйся, Заступнице наша на судищи Христове;
Радуйся, яко молитвами Твоими от ада грешных исхищаеши;
Радуйся, Богородице Дево, слезящая о гресех наших. 

Кондак 7

Хотя даровати милости Своя людем Всещедрый Господь, благоволи явити икону Твою, Пречистая, поражая сим, аки некиими стрелы духовными, всякое плотское мудрование в человецех и показуя, яко едина есть истинная вера, вера православная, научающая всех спасительно пети Богу: Аллилуиа.

Икос 7

Новое чудо сотвори Господь явлением иконы Божия Матере в Боянах, сия бо во удивление и вразумление многих чудесно слезы источает из очес Богоматере и Богомладенца Христа, подающи с ними надежду на спасение всем вопиющим к Ней таковая:
Радуйся, небурное Пристанище в мори плавающим;
Радуйся, непостыдная Надеждо по воздуху путешествующим;
Радуйся, всемощное укрепление наше в земнем странствии;
Радуйся, наша присная и вожделенная Похвало;
Радуйся, крепчайшая Заступнице воюющих на плоть свою;
Радуйся, Щите, ограждающий нас от духов злобы;
Радуйся, Богородице Дево, слезящая о гресех наших. 

Кондак 8

Странное чудо явися, Пресвятая Владычице, егда, по молитвам родительницы пред иконою Твоею, младенец скончаваяся, возвратися к жизни. Видящии же сия утвердишася в вере и надежде на Твою помощь и воспеша Всесильному Богу: Аллилуиа.

Икос 8

Весь мир величает Тя, яко Всемощную Покровительницу нашу, ибо молитвами Твоими ныне, якоже древле в Кане Галилейстей, чудеса 
совершаются, скиптры царстии утверждаются и прогоняются полцы врагов видимых и невидимых от всех вопиющих Ти:
Радуйся, ограждение наше от соблазнов мира;
Радуйся, предивный человеков Покрове;
Радуйся, яко мы, грешнии, Тя верно ублажаем;
Радуйся, яко пред Тобою смиренно колена душ и телес приклоняем;
Радуйся, яко слезы Твоя укрепляют веру Православную;
Радуйся, яко сими умягчаеши наша злая сердца;
Радуйся, Богородице Дево, слезящая о гресех наших.

Кондак 9

Всякое естество Ангельское удивися, егда в Рождестве девство сохранила еси, Богородице. И ныне Твоими слезами люди во удивление привела еси, призывающи к целомудрию и благочестивому житию, да чистыми душами и телесы возсылаем песнь Богу: Аллилуиа.

Икос 9

Витии многовещаннии не возмогоша исчислити множество чудес Твоих, Богомати, имиже любовь Твою к людем являеши. Мы же ублажаем Тя, яко призрела еси нас, удалившихся от своего Творца и ныне прибегающих к Твоему Покрову и вопиющих:
Радуйся, плачем твоим нас утешающая;
Радуйся, всесильную десницу Твою к нам простирающая;
Радуйся, Кораблю хотящих спастися;
Радуйся, небурное наше Благоотишие;
Радуйся, верных Венче благознаменитый;
Радуйся, горних чинов Украшение;
Радуйся, Богородице Дево, слезящая о гресех наших.

Кондак 10

Спасти хотя мир, милосердый Господь, дарова людем согрешившим великую Заступницу и Ходатаицу, Пречистую Матерь Свою, да вси, хотящии наследовати спасение, прибегают к Ней во умилении сердца, вопиюще Богу: Аллилуиа.

Икос 10

Стена еси, Дево, всем от духов злобы страждущим, прогоняющи их далече от призывающих имя Твое. Сего ради мы, боримии от мира, плоти и диавола, смиренно молим Тя и пред Твоим пречистым образом взываем сице:
Радуйся, непременная Устроительнице нашего спасения;
Радуйся, Путеводительнице наша;
Радуйся, дивно приводящая грешников к покаянию;
Радуйся, Радосте наша;
Радуйся, с пречистою Плотию Твоею на небеса вознесенная;
Радуйся, славо наша и величание;
Радуйся, Богородице Дево, слезящая о гресех наших.

Кондак 11

Пение благодарственное приносим Ти, Пречистая, яко честнейшей Херувимов и славнейшей без сравнения Серафимов, и уповая на Тя не убоимся, егда подвижется земля и преложатся горы в сердца морская, чада Твоя бо есмы, у Креста Тебе врученнии Твоим Сыном и Богом нашим, Емуже вопием: Аллилуиа.

Икос 11

Светоприемная свеща и Луна всесовершенная являешися человеком, Небесная Дево, в нощи бо греховней блуждающих нас просвещаеши, облистающи светом, от вечнаго Солнца Правды исходящим, и научаеши пети Тебе таковая:
Радуйся, в Рождестве девство сохранившая;
Радуйся, по Рождестве Дева пребывшая;
Радуйся, во Успении Твоем нас не оставляющая;
Радуйся, мира Благая Заступнице;
Радуйся, Земле обетования;
Радуйся, яко источаеши нам мед и млеко;
Радуйся, Богородице Дево, слезящая о гресех наших.

Кондак 12

Благодатный Покров и Защищение вемы Тя, Владычице мира, яко чрез икону Твою слезящую охраняеши от всяческих ересей и расколов, воздвизаемых духом злобы поднебесныя. Сподоби нас до скончания века пребыти во Святей Церкви Православней и воспевати Богу: Аллилуиа.

Икос 12

Воспевающи милости и чудеса Твоя, молимся Тебе, Царице Небесе и земли, даровавшей нам в Твоей святей иконе надежду спасения и 
твердое уверение в истинности веры православныя и, якоже древле Архангел, и мы Тебе вопием:
Радуйся, в мире премирная нам являющая;
Радуйся, девство и Рождество сочетавшая;
Радуйся, мудрецов мира сего посрамление;
Радуйся, чистоты и целомудрия возвышение;
Радуйся, немолчная Уста славы Божия;
Радуйся, всем сердцем и душею любити Бога нас научающая;
Радуйся, Богородице Дево, слезящая о гресех наших.

Кондак 13

О, всепетая Мати, Владычице наша Богородице, приими сия похвалы и молитвы от нечитых устен наших. Сохрани Церковь и люди наша от всяких нужд и напастей, и сподоби нас в единстве духа и союзе мира присно Тя славити и воспевати Богу: Аллилуиа.

Этот кондак читается трижды, затем икос 1 и кондак 1

МОЛИТВА

О, Преблагословенная Владычице Богородице, милости и благосѐрдия неисчерпа̀емая бездно и любве Божия присноживо̀тный Исто̀чниче! Предстоя̀ще пред святою Твоею иконою, ю̀же в землѝ нашей чудно явѝти благоволѝла еси, и созерца̀юще очами веры и смирения слѐзы милости Твоея̀, от чудотворнаго образа Твоего обильно источа̀мыя, яко рабѝ непотрѐбнии со умилением молим Тя: открытый покая̀нием ко Господу помрачѐнная сердца̀ наша и сокрушѐнный дух наш па̀ки созѝжди целому̀дрием; оживотворѝ любовию Божественнаго Сына Твоего вся наша по̀мыслы, чувствия и начина̀ния; страхом Господним укрепи рассла̀бленную страстьмѝ волю нашу; помозѝ в терпении принести благословѐнныя плоды̀ милосердия и братолюбия; да чистым сердцем и искреннею душею в любви Божией возраста̀юще, прочее время живота нашего в мире поживем, прославляющее в Троице Единаго Бога Отца и Сына и Святаго Духа, и Твое всемѝлостивное предста̀тельство, ныне и присно и во веки веков. Аминь.

ТРОПАРЬ

Тропарь, глас 4

Радуйся, земле Боянская, яко ничимже меньшая от всех градов христианских: ибо яви в тебе Господь чудотворную икону Своея Пречистыя Матере, слезящую о гресех наших и слезьми Своими благодатными, отирающую всяку слезу от очес наших.

Кондак, глас 1

В явлении Боянския иконы Божия Матере, ангелов чини удивишася, человечестии роди благодатию Святаго Духа укрепишася, целующе слезныя источники от лика Христа Богомладенца и Пречистыя Богоматере почерпающе от них дары исцелений во спасение душ наших.